Holmey pargh ghojmoHwI' jIH!

nom qaSba'taH poH! tlhoS cha' Hogh ret «'ewrop Holmey jaj» loplu'meH, DuSaQwIjDaq cha' Holmey pargh vIghojmoH: 'eSperanto Hol, tlhIngan Hol je!

tlhIngan Hol 'oghmeH qun vIDel 'ej vabDot Hov leng HaSta much wa'DIch 'ay'Hom vI'ang, vaj tlhIngan Hol mu'mey wa'DIch QoylaH wa'maH SuchwI'pu'. HochvaD Dajlaw'. qaStaHvIS 'op DISmey, chaq cha'maHlogh SoQvam vImuchpu', vaj jIpo'. loQ SuchwI'pu'vetlhvaD SoQwIj vIngajmoH. SaH je vengwIj De' chu' ghItlh qonwI'. jIjatlhtaHvIS mu'mey law' qonlaw'. rInpu'DI' mIlloghmeywIj qon je vumwI'Daj ghuD.

DaH muSov vengwIj Hoch!

 

'eSperanto Hol vImuchmeH SoQ chu' vIchenmoHta'. qaStaHvIS wejmaH tup, Holvetlh qun, jatlhwI'pu' nugh je vIrIch. ghIq 'eSperanto Hol neH vIjatlhchoH; DoyIchlan Hol qa'. QIt jIjatlh 'ej mu'mey Qatlh vInop. paq vI'uchbogh vISIqtaHvIS «Tio estas libro.» jIjatlh. latlh Dochmey vISIq: lampo, fenestro, tablo, suno. muyajba' ghotpu'. pab ngoD wa'DIch yajchoH: -o 'oHba' Hoch DIp ngutlh Qav'e'. ghIq cha' Dochmey vIDay: granda tablo, malgranda tablo; nova libro, malnova libro, bona vetero, malbona vetero. DaH wotqoq tam yajchoH. tlhIngan Hol -Ha' mojaq rur 'eSperanto Hol mal- moHaq'e'. qaStaHvIS loSmaH vagh tup, 'eSperanto Hol pab ghanroq vIghojmoH. Quchqu'choH SuchwI' mInDu' 'e' vIleghlaH. vabDot mu'mey luloylaH. Do' 'ewropnganpu' Qatlhbe' Holvetlh. pa'vetlhDaq ba' je tenaj. DuSaQwIjDaq vum 'ej Holmey paQDI'norgh rang. mughel, jatlh: «DIS veb 'eSperanto Hol HaSghon DaghojrupmoH'a'?» jIlaj net Sov! yapchugh ghojqangwI'pu', ghaytan 'eSperanto Hol vIghojmoHmeH 'eSperanto Hol vIlo'laH! vaQchu' mIwvam. Do'Ha' Qapqu'be, tlhIngan Hol vIghojmoHmeH mIw rap vIlo' net jalchugh. nov tlhIngan Hol mu'mey Hoch. rInpu'DI' HaSghon poHwIj, muyu' Mephisto wab HevwI' yu'wI'. Do'Ha' 'InternetDaq muchDaj vISambe'.

mIlloghvam qon parmaqqaywI'! qatlho'!

De'chel: nIwnejwIj wa'vatlhDIch 'oH Dochvam'e'! 🎉

Heghtay

wa' Hogh ret baDghun wISuch jIH parmaqqaywI' je. vengHomvetlhDaq boghpu' ghaH. 'ach QaQqu'be' qorDu'Daj wISuchmeH meq. Heghpu' SoSnI'Daj 'ej SochHu' pa' qaS nol. loQ SoSnI'Daj vISov je jIH. wejlogh maghompu' 'ej chabHommeyDaj vIparHa'qu'.

chIrghDaq qaStaHvIS Heghtay, jatlh maqlegh. 'aynor SoSnI' yIn rIch. bom bom bomwI' ghom. 'IQ QoywI'pu' 'ej tlhoS jISaQchoH jIH. ghIq mol yotlh lujaH Hoch. pa' yav QemjIqDaq tIpqan 'aplo' vevlu'pu'DI' qoDDaq ro'Sa' 'uma'mey chellaH Hoch meb. ghIq nItebHa' SopmeH Qe'Daq ghom Hoch. 'ey chabmey 'ej 'ISQIm vItIv. jatlh 'aynor yIntaH net jalchugh SoSnI'Daj belmoHbej Heghtayvam. parmaqqaywI' qorDu' vIparHa'. DobHa'qu' Hoch 'ej vabDot qatru'na' ghaH vavDaj'e'. naH wa' neH: votlhqu' tennuSnal, 'olyIt. 'ach pIjHa' Suchlaw'.

qaStaHvIS Heghtay nol joq, mIllogh vIqonbe'.

pItlh.

paqmey, Har'eyngan boghoy je

Hogh ret cha' veng vISuch. DaH wanI'meyvetlh vIrIch.

berlIn 

berlIn vIlengtaHvIS qay'qa' DoyIchlan lupwI' tum. mImmo' lupwI'wIj wa'DIch, lupwI' cha'DIch vItenlaHbe' 'ej loQHa' jIpaS. monmajDaq Henwaq paq ngo' ngevwI' vISuch. qoD tIn law' Hur tIn puS! law'qu' paqmeychaj. qaStaHvIS 'op rep pa' jIratlh 'ej paqmey vIwIv. parmaqqaywI'vaD wa' paq vIje'rup: latIyna Hol Sunu'pIy paq! vIDIlDI' mujatlh ngevwI': 'InternetDaq paqvam je'meH 480 'ewro DIlqang vay', qubqu'law'mo'. Do'Ha' vIje'laHbe'. 'ach latIyna Hol paqmey, wa' 'elaDya' Hol tIQ paq, cha' DoyIchlan Hol paqmey, maya Hol bopbogh 'eSpanya' Hol, we'lIS Hol bopbogh DIvI' Hol paq je vIje'pu'. wa'maH vagh paqmey vIDIlmeH vaghmaH 'ewro neH vInob. Do' waghqu'be' paqmey. latIyna Hol vImuSHa'qu'mo' bIH vIlaD 'e' vItul.

ghIq wa' jup vISuch. yInyIv 'oH pongqoqDaj'e' 'ej 'op ret vengwIj Dab. qaStaHvIS wa' DIS maghombe'. qav'ap juHDajDaq chab wISop 'ej Dargh wItlhutlh. SaH je lIpqa', bangwI'Daj Deq (ghu'jaratngan). Soj DISangtaHvIS majaw 'ej maHagh. ghIq juH vIchegh. QaQ jajvetlh!

qatru' qengHoD

Ha'le

qaStaHvIS Ha'le veng Har'eyngan boghoy majeS jIH parmaqqaywI' je. law' nuvpu' 'ej pa' 'aHbaD vItIvqu'. QIt Ha'leDaq mayIt. qabbe' QoQ 'ej 'IHqu' Hoch ghot. pIj mubelqu'moH Har'eyngan boghoy. 'ej 'op Ha'lenganpu' vIghom: SennaH, 'a'el, Suqram, 'ayIDnI' je. DubDajDaq SIpoq cha'bogh buq qeng wa' loD. Hov leng yIvbeH tuQ latlh. cha'vetlhvaD vengmeymaj Hov leng yej'an lumuv 'e' vIchup. 'ej wa' SaQatvelo'ngan qIH 'aynor! SaQatvelo' Hol ghojtaH, vaj Do'qu'. chaq tugh QaHchuq.

Har'eyngan boghoy

chay' vanglaw' SIpoq?

vulqan Hol, romuluS Hol je

vulqan Hol, romuluS Hol je vImuchmeH, loSHu' ye'na veng vISuchta'. nuqjatlh jay'?! toH... 'op ret Ha'le, gherlItlh, ye'na je vengmey logh chal je 'angweDmeyDaq tlhIngan Hol vImuchpu'. qaStaHvIS HutmaH tup tlhIngan Hol qun, jatlhwI' nugh, ghojlu'meH mIw, QIch wab Ho'DoS, pab je vIrIch 'ej QoywI'pu' vIvuQ. meQHam loSHu' latlh cha' Hov leng Holmeyvetlh vIrIch. wejHa' De'vam vIghItlh.

mutlhej 'aynor parmaqqaywI'. ye'na vengDaq vay' juH qachDaq pa'Hom wIvunta'. 'IH qach Du'Hom je 'ej waghbe'qu' (wa' ram wIDIlmeH 43 'euro vInobnIS). pov qachvetlhvo' ye'na logh chal je 'angweD wIghoS. Hoch 'elmeH chaw' ngevlu' rIntaH, 'a nutlhej tlhebor net chaw'. 'angweD moQbIDDaq ba'taH 250 QoywI'. jIH'e', much yaHDaq jIQamtaHvIS vulqan Holmey, romuluS Holmey je vIrIch.

much yaHDaq jImuch 'e' vItIvqu'!

qatlh «Holmey» vIghItlh? cha' Hol neH bIHbe''a'? ghobe'. ghaytan wa'maH Holmey bIHlaw'! Dajqu' Holmeyvetlh pargh 'oghlu'meH qun 'ej Qatlh. pImchu' vulqan Holmey Qur. pImqu' je romuluS Holmey Qur. maHvaD wa' romuluS Hol QoymoH «Hov leng: pIqarD» HaSta lut mIr net Sov. Holvam rIchbogh pagh paq tu'lu', vaj pabHeyDaj vIpojnISba' jIH. pa' loQ gher'IDwIj vI'agh.

mayevtaHvIS mughel 'op ghot. ghIq moQbIDDaq «Hov leng: jaghna'» muchlu'. chaq wejlogh neH HaSta muchvam vIbejpu'. Dunbe', qabbe'. juHqoqmaj vIcheghpa' majaw jIH, 'aynor, 'ana' vumwI' je. qIjbogh qor'In DIr paH Qey tuQtaH 'ej DIrDaj SuDmoHta' — tenDIy 'orayngan be' rurchu'! tugh tlhIngan Hol vIrIchqa'meH pa' vIchegh. 'ej DIS veb wejlogh jIchegh 'e' lutlheb. tlhIngan Hol vIrIchqa', vulqang Holmey, romuluS Holmey je vIrIchqa', 'ej chaq QeD torSIv Holmey pargh vIrIch. chu' qechvam. SIbI'Ha' QonoSwIjDaq romuluS Hol chap vIQIj.

logh chal je 'angweDDaq vum qatru'Heypu' neH. 😉

jaj veb nItebHa' vIyetnam Qe'Daq maSop jIH, parmaqqaywI', tlhebor je. QaQqu' cha' jajmeyvetlh! Qapla'na' 'oHchu' muchwIj'e'!

ropqu' vavwI'

ropyaH qachDaq ghaHtaH vavwI''e'. ropqu' 'ej chaq pIvchoHbe'.

wej Hogh ret ropchoH vavwI'. puj 'e' jemlaw' 'ej Qatlh jaHmeH Qu'. 'oy' qIvDaj. 'op jav qIvDu'Daj luHaqlu'pu'. rachbej Haqvetlh, 'ach 'op ret 'oy'qu'choH qIvDaj. vabDot Hu'meH vIpoQnIS. jaj veb ropyaH qach 'elnIS. chaq chach Duj rI' ghaH, chaq chach Duj rI' loDnI'Daj. 'argh ghu'. lungej lerup net tu'. motlh Human DIrDaq Qobqu'be'bogh lerup tu'lu'. 'ach vavwI' qIvDu' luHaqDI' porghDaj lu'el lerup 'ej qIvDu' parghDaq pIr. ghIq porghDaj naQ lungej 'ej lupujqu'moH.

DaH ropyaH qachDaq QottaH. ghaH janmey je rar jaSrob law', tlhuHlaHbe'mo'. wa' rajma' neH ghaj 'ej nom QaplaHbe'. vaj 'IwDaj Say'moHmeH jan lulo' Qelpu'. nuyajlaH vavwI', 'ach jangqu'laHbe'. loQ qellaH nachDaj, loQ mInDu'Daj vIHmoHlaH, 'ach DaH jatlhlaHbe'. pIj wISuch jIH, be'nI'wI', bangDaj, loDnI'Daj ghap. DaH ngaDtaH ghu'Daj. 'a 'argh 'e' wIQoyvIp. SochmaH Soch ben boghpu' vavwI', HIq beng 'ej ropchu'be' porghDaj... cha' ben Heghpu' SoSwI', meq rop SIQmo'.

pIvchoH 'e' vItulqu'! 😟

ropyaH qachvamDaq QottaH vavwI'.

 

jul naptop

qaStaHvIS loS jaj 'aynor (parmaqqaywI') qaytu'pu' juHDaq maHtaH. baDghun 'oH vengHomchaj pong'e'. parmaqqay Deq SoS juHDaq Hopqu'be'. qaSpa' Hoghvam, chaq loSlogh pa' maHpu'. DobHa'qu' qaytu'pu'Daj. venqu' vavDaj. juHchajDaq De'wI' pat jomta' 'ej juH qach bopbogh Hoch De''e' cha' HaSta jIHDaj. vabDot nav QIn 'aplo'Daq HaSta ta qonwI' jom. nav QIn vevDI' le''aq, ghum HaSta jIH. tlhaQqu' vavDaj. ngavyaw' lughaj.

nItebHa' ngemDaq mayIt jIH, 'aynor, vavDaj, SoSDaj, ngavyaw'chaj je. «Hov leng: Hujbogh qo'mey chu'» wa' tlharwIl wIbej 'ej «loD ngar» wIbej. loD ngar HaSta muchmey ngo' vIbejqa' vIneHmo' bIH vIje'ta'. 

ghItlhjaj vorgh 'ewropDaq qaSpu' jul naptop! DoyIchlanDaq pupbe', jul chorghmaH vagh vatlhvI' So' maS. HuDHom wIjaH 'ej pa'vo' naptop wIbejtaH. Do' DIS 1999 jul naptop neqratlh vIghajtaH, vaj 'oH wIlo'. 'IH wanI'vam qub. QIt HurghchoH tamghay 'ej loQ jumlaw'. tlhom mIlloghvam Dun vIqonpu':

HuD 'emDaq ngabpa' jul'e' jonHa'qa' maS.

tugh Hov leng Holmey vIrIchqa'!

tugh ye'na vIjaH. DoyIchlan botlh veng 'oH. pa' logh chal je 'angweD tIn tu'lu'. wa' ben 'angweDvamDaq 250 nuvpu'vaD tlhIngan Hol vIrIch. ngugh Qapla'na' 'oHmo' mughelpu' jatlh «DIS veb rey'vam Damuchqa'meH tucheghlaH'a'? latlh Hov leng Hol DarIchlaH'a' je?». vaj jIlaj. DISvam cha'logh vengvetlhDaq rey' vImuch: jar 11, jaj 21-DIch tlhIngan Hol vIrIchqa'. jar 8, jaj 29-DIch vulqangan Hol, romuluSngan Holmey je vIrIch. vaj tugh qaS rey' cha'DIch! wejHa' Hoch 'elmeH chaw'mey luje'lu'pu'. jIQuchqu'! wa' ben Qapchu' rey'vam. vulqangan Hol, romuluSngan Holmey je vIrIchpu'DI', logh chal je 'angweD qach moQbIDDaq «Hov leng: jagh'a'» muchlu', romuluSnganpu' bopmo' HaSta muchvam.

wa' ben mutlhej parmaqqaywI' Deq. wej Hogh pIq mutlhej 'aynor. chaq bejwI'pu' mer ghu'vam... loQ ghu'vam vIHaj.

vep mIlloghvam lo' ye'na logh chal je 'angweD.

chenmeH mIlloghvam, Do'Ha' yab pargh lulo'. 'IH qalmuSDaj, 'ach QIch wab ngutlh qolna' rurbe'bej cha' ngutlh tlhoQmeyvetlh. qar'a' «yab pargh» mu'vam? yajlu''a'?

choH vItlh

«vIHbogh tera' 2» vIbejtaHvIS loQ yInwIj vIrIchqa' vIneH. qaStaHvIS cha' DIS QonoSvamDaq pagh vIqon 'ej qaSpu'bogh Hoch vIQIjqangbe'. qaSpu'mo' wanI'mey law'qu'. 'ach wa' wanI''a' vIrIchnIS: DaH matay'be' jIH telraQ je. qaStaHvIS jav DIS bID parmaqqaypu' maH, 'ach wej Hogh ret parmaqmaj wIghangmoH. qatlh qaSpu' lotvam? pImqu' tuch DIjalbogh. pIm je qawchanmeymaj. parmaqqay law' qangtlhIn wIHarbej cha'. reH parmaqqay'a' wa'DIch ghaHtaH neH telraQ, 'ach parmaqqaypu' vIpatlhmoHQo' jIH. qaStaHvIS wa'maH jav jar latlh parmaqqay vIghajtaH. 'aynor 'oH pongqoqDaj'e'. ngugh law'qu' yolmey...

DaH matay' jIH 'aynor je. ghu'vam vIbItlhlI'. ngeDbe'qu' Qu'vam 'ej pIj jI'IQ. juppu' DImojqa'laH 'e' wIHar.

chIch naDev mIllogh tu'lu'be'.

Du'Hom lop

Du'Hom ghaj qorDu'wIj net Sov. 240 morgh men Du'Hommaj. pa' juH qachmaj, raywal mach, HuDyar, puH Duj vergh, magh yotlh, Sormey law', QalmeH DoQmIv'a' tIn je lutu'lu'. 'e' Sov je juppu'wI', 'ach pIjHa' juHwIjDaq maghom. vaj mughelpu' lu'ap, bangwI' jup: «toH, ghorgh Du'Hom lop DaqaSmoH?»

vaj cha'Hu' qaSpu' Du'Hom lopvetlh. wa'maH loS ghotpu' vIrIt, muv wa'maH jav (qay'be'). vabDot jeS be'nI'wI'! maloplaHpa', qaStaHvIS 'op pem, QalmeH DoQmIv'a'maj vISay'nISmoH. jIQap, DaH Say'chu' 'ej ghun bIQ. maQal, bIQDaj mareH, Soj wIrong, naH HIq je maHpIn wIchImmoH 'ej «Privacy» ghoqwI' je DIQuj. leSpal Supghew je yach vay'. Qapbej lopvam! 'ej muQaHqu' bangwI'!

bI'reS

QaQ je QoQmaj, «Spotify» bom tetlhvaD ghaq qabDu' law'.

chaq DISvam Du'Hom lop wIqaSqa'moH. 😃

bertlham

yInwIj De' chu'

tlhIngan Hol vIlo'qu'be'taHmo' loQ jI'IQ. 'ej qaSmo' wanI' chu' ghu' chu' je QonoSwIj vIqonqa' vIneH. 'ach jISov'egh... chaq tagh qonmeH poH vIHutlh. vabDot QonoSvam laDtaH'a' vay'?!

toH... Hoch vIgherlaHbe'ba'. vaj meqmey potlh vIqon:

qorDu'wIj

DISvam jar vagh jaj cha'maH wejDIch pov Heghpu' SoSwI'. yab HarqIn SIQtaH qaSlaw'taHvIS Soch DIS. jIpupHa', HarqInDaj bI'reS jISovbe'mo'. jarvetlh nughovchu'be', not jatlh, reH QongDaqDajDaq Qot. yInna' 'oHbe'bej. vaj numerbe' HeghDaj wanI'. ma'IQ net Sov, 'ach qaq ghu'vam chu' net jallaH, qar'a'? qaSpu' nol 'IH 'ej SaH qorDu'maj naQ. Huj wa' ngoD 'ej Do'Ha': vavwI' qoS 'oH SoSwI' Hegh jaj'e'.

Qu'wIj

ghe'be' Qu'wIj ghu'. vengwIj rewbe' DuSaQDaq DoyIchlan Hol vIghojmoHtaH. cha' ghojmoHwI' ghuD vIghaj. Qup wa' (24) 'ej qan latlh (77) 'ej jIH mumaSlaw' ghojwI'pu'ma'. Qu'vam vIparHa'qu'taH, 'ach rut jIHon'egh, QIt ghojlaw'mo' 'op. tagha' Qu' chu' Samta' bangwI' je! jar chorgh vengwIjDaq wa' malja'Daq vumchoH.

Holmey

pIjHa' tlhIngan Hol vIlo'. poH vIHutlh. vaj QIt jIjatlh 'ej rut ghot vIyajbe'. rut mu'mey vIqawbe'. qab ghu'vam. rut DeSDu' «cha' monmey» vIlaD, 'a QIt jIlaD. DISvam SarbruqenDaq qaS qepHom 'ej Denmargh monDaq qaS 'ewrop qep. maSIr no' Hol vIghojtaH 'ej DaH 2607 mu'mey vISov. Hoch ghItlhjaj 'InternetDaq Sum wIlo' 'ej ghItlh tIQ DIlaD. DaH «'ovjeq'ISpu' 'IQDoy'» wIlaDlI'. Denmargh Hol vIghojchoHpu', DenmarghDaq qaSmo' wa' tlhIngan Hol qep. 'ej 'I'ran Hol vIghojtaH. tlhoS Hoch Hogh vengwIjDaq Holmey qeqmeH qep vIjaH, 'ach 'eSpanya' Hol, raSya' Hol, DoyIchlan Hol, 'eSperanto Hol je neH vIlo'. pa' qubqu' 'I'ran Hol jatlhwI'pu'.

parmaq

wa' parmaqqay vIghajtaH: telratlh, SanDIyHom, bangwI' joq vIpong. qaStaHvIS loS DIS matay'taH. ghaH'e', latlh parmaq ghaj je, 'eSSal 'oH pongqoqDaj'e'. loD tam ghaH, 'a naSHa'. rut Suqram ghom bangwI'. naSHa' je ghaH. ghaHvaD lIwnal vIper vIneH, 'a mItHa'law' mu'vam. batlh Hutlhbe'bej. chu' wa': pIra'HaDaq qaStaHvIS Holmey law' jatlhwI'pu' qep, wa' be' Dun vIghom... vIqIHqa' jIjatlh vIneH. naDev yInyIv vIpong. DoyIchlangan ghaH, berlInDaq boghpu' 'ej DaH layIpSISDaq 'ewrop QeD HaDlI'. Dunbej ghaH! val, tlhaQ, 'IHqu'. Holmey ghoj 'e' muSHa'. jatlhtaHvIS vIHqu'law' qabDaj SomrawDu'. tlhoS rap parmaq qangtlhInmaj, 'a wej parmaqqaypu' ghaj... muparHa'law' je ghaH, 'ach reH vIHon. jar jav, qaStaHvIS wejmaH jaj 'amerI'qa' SepjIjQa' Such. pa' Dab wa' parmaqqayDaj. ngugh pIjHa' maQum 'ej mulImmoHpu' ghu'vam. loQ mumaw'moH ghaH. 'ej jar chorgh jar Hut je vIraS 'Italya' je Suchqa' 'e' nab yInyIv. taHlaH'a' tIqwIj? DIch vIHutlhchu'.

bel Qu'

jIHvaD Supghew ngIp 'eSSal (bangwI' latlh parmaqqay)! 'oH vIchu' 'e' vIghojchoH. wIlmo' nItlhDu'wIj, leSpal vIchu'vIp. Qatlhqu'be' Supghew chu'meH mIw. mach 'ej loS SIrgh neH ghaj. DaH QeD torSIv maghpub vIlaDlI': «poH puqpu'». muchuppu' yInnej. Daj. voDchuch val ngaS. meqvetlhmo' not lulaDbej bangwI' yInyIv je. voDchuch Hajqu'.

Hoch bolaDta'chugh QInHom HIghItlh!

pItlh!