qaSpu' DIS 2020 QISmaS!

DoyIchlanDaq QISmaS jIloppu' 'ej mutlhej qorDu'wIj bangwI' je. nuvpu' law' Suchlu' net chaw'be'mo', juHDaq malop neH. 'ach 'IH.

tera' poH jar wa'maH cha', jaj cha'maH loSDIch

DoyIchlanDaq QISmaS'e' jajvam potlh law' latlh jajmey potlh puS. wa'maH vaghlogh Qoylu'pu'DI' vavwI' SoSwI' je wISuch jIH, bangwI', be'nI'wI' je. chab law' wISoppu'DI' nobmey DInob. DISvam nobmey nob neHQo' qorDu'wI', Hoch wIghajmo', vItlhchoHpu'mo' SoSwI' yab HarqIn, 'ej yaHmeychaj SoQmoHnISmo' ngevwI'pu'. 'ach vavwI'vaD peQ De' meyrI' tIQ vISam. De'wI' Dochmey boS vavwI', 'a pagh vI' cha' wej 'uj 'aDbogh peQ De' meyrI'vetlh Hutlh. SoSwI'vaD yuch vInob, 'ej be'nI'wI'vaD nuj velwI' 'IH vInobta'. bangwI'vaD DISvam 'oSbogh QISmaS moQ'e' vInob, boSmo', 'ej Quj «qID Qob» vInobta'. choS nItebHa' 'uQ wISop 'ej HaSta jIH wIbej. vIraS Hol mu'ghom tIQ, wej 'uS ghajbogh ghogh HablI' 'uchwI' munobta' bangwI'.

tera' poH jar wa'maH cha', jaj cha'maH vaghDIch

jajvetlh nurIt be'nI'wI', 'anya, parmaqqayDaj, ro'nIy, puqbe'Daj, lInDa, je. SoQmo' Qe'mey 'ej wIvut wIneHbe'mo', 'uQ'a' wIvun: Da'vI' ghab, patat chab moQmey, naH Doq je. 'eyqu'! Ha'DIbaH Sopbe' bangwI', vaj naH yughbogh ghab ngeb Sop; Da'vI' ghab qa'. 'eylaw'. 'uQ'a' wISopta'DI', HaSta much wIbej: «ngem'a'». Dunbe', 'ach much QaQ 'oH.

tera' poH jar wa'maH cha', jaj cha'maH javDIch

juHDaj chegh bangwI', 'ej jaj cha'maH SochDIch juHDaj vISuch je. ghaH SuchtaH SoSDaj 'ej vaj loQ malop. Hov leng HIp munobta' SoSDaj! qIrq HoD HIp rurbogh HIp 'oH, 'ej vIparHa'qu'! ghItlhvam vIqontaHvIS, HIpvam vItoQ. 'ej HoD QonoS rurbogh paqHom munobta'. chIm paqHomvam, vaj buSHachwIj vIqonlaH. juHDajDaq pIj HaSta muchmey wIbej pagh Soj wIvut.

tera' poH jar wa'maH cha', jaj cha'maH HutDIch

lInDa qoS 'oH. be'nI'wI' puqbe' ghaH, vaj lorwI' ghaH. wa'maH wa' ben boghpu', vaj nobmey Hevqa'. Quj wInobta' jIH bangwI' je. jajvetlh 'elaDya' Soj wIvun.

jajmeyvam bangwI'vaD Hov leng vI'ang, 'ej «He'rI po'ter» mu'ang. 'ej Do'Ha' jIvumnIS...

(qengHoD vIHevpu'bogh)

DoyIchlanDaq jIHtaH

qaStaHvIS poH nI' naDev jIghItlhbe', Qu'mey law' vIturnISmo' 'ej latlh Dochmey vIbuSnISmo'. 'ach DaH 'op tup vIjon, jIH mubopbogh De' chu' vIja'meH...

DaH lupwI' mIrDaq jIba'taH 'ej mung juHwIj vIchollI'. DoyIchlanDaq jIboghpu' net Sov, 'ej layIpSIq luDab vavwI', SoSwI', be'nI'wI', puqbe'Daj, vIghro'chaj je. Ha'le Dab bangwI'. wa' veng Sumqu' latlh veng, DoyIchlan chanDaq tu'lu'. nItebHa' QISmaS DIS chu' je wIlop wIneH, vaj pa' jIratlh 'ej DIS veb jar wa' SuwISya' vIcheghrup.

DaH SuwISya'Daq qabDu' law' ngejpu' qoro'na javtIm (mu' chu' vIlo'!), 'ach rap DoyIchlan SaqSen yoS. 'ej vavwI' SoSwI' je vISuchmo', pa' juHwIjDaq jIwIgh'eghnISbe'law'. loQ jum chetmaj, 'a jIbepbe'. qorDu'wIj bangwI' je neH vISuch. juppu' vISuchbe'. berlInDaq latlh juppu' wISuch 'e' wInabpu', 'ach DaH qItbe'choH, vaj layIpSIqDaq wIratlhnIS.

toH... qabbogh De' chu' vIghaj je: DaHjaj muyu'ta' wej 'a'ghenwI', qawHaq vu'wI' vIgheS vIneHmo'. pe'vIl jIqeq, De' law' vIboS, latlh tejpu' vIrI', 'ej much vIchenmoHta'. jImuchDI' qay'be'law', 'ach ghIq mughelqu'. Qutlhqu' jangmeH Qu'! jIghunlaH 'e' lupIHba', 'ach... 'ach... jIghunlaHbe'! Qu' chu' vepchajDaq ghunwI' lunejbe'law', 'ej jIghunlaH not 'e' vImaq. muyu' rInDI' jIbaw'Ha'chu'choHpu'. DaH Qu'vam vIHevbe'bej. jI'IQ. 'ach qawHaq ghunwI' lunejchugh, vaj mItchuqbe' Qu'vam jIH je. ghaytan layIpSIq HolQeD yejHaD chu'Daq Qu' vISamnIS...

DaH rejmorgh vIDa 'e' vImev. tugh juHwIj vIpaw 'ej jIQuchchoH.

(lupwI' mIrDaq)

qawHaq vu'wI' vImojrup!

qen pagh vIghItlh 'e' vISovbej, poH tlhab vIHutlhmo'. tughel; «qatlh?» Saja'...

DuSaQ'a'majDaq jInmol chu' tu'lu', «chay' chenpu' QIch?» 'oH pongDaj'e'. yeq SuwISya' DuSaQ'a' law' tejpu' law' je. HolQeD, yIn QeD, yab QeD je bop. 'op wen ruSvep mungeHpu' cha' 'a'ghen: DIS veb jInmolvamDaq qawHaq vu'wI' gheS jIH 'e' lugheS! Dunqu'! 😱

HolQeD qawHaqmey vISovqu', 'ej tugh DuSaQ'a' Qoyje'wIj wejDIch vIHevta'DI' Qu' vIHutlhlaw'. vaj jIHvaD pov Qu'vam! jItlhobpu', De'wIj vIlabpu', ghIq... Hogh veb povjaj muyu' luneH wej 'a'ghen (SabIy'ne, baltaSar, rIHaD je)! ngugh qaStaHvIS cha'maH tup, wej ghIgh vIturnIS:

1. jIrIch'eghnIS. nuq vIHaDta'? chay' rarchuq qawHaqmey HaDta'ghachwIj je? 😎
   
2. chay' tera' HolmeyDaq DIp Delbogh mu'tlhegh'e' pojlu'meH qawHaq vIchenmoHlaH? 🔡
   
3. chay' wabmey chu' ghojmeH Ha'DIbaH mIwmey pojlu'meH qawHaq vIchenmoHlaH? 🐦
   
4. chay' «N400» pojlu'meH qawHaq vIchenmoHlaH? nuq 'oH? yoq yabDu' Qullu'taHvIS, nuvvaD mu'tlhegh 'aghDI', 'ach jumDI' mu'tlheghvam mu' Qav, tIw QoghIj. SIbI' tIwbe', 'ach qaSpu'DI' pagh vI' loS lup tIw! QoghIj 'ul juvlu'DI', ngIng choHvam. meqvammo' wanI'vetlhvaD «N400» lupong. 👀
   

HolQeD vISovchu', 'ach yIn QeD yab QeD je vISovchu'be'mo' 'ej qawHaq Hoch Seghmey vISovbe'mo', De' law'qu' vIlaD 'ej po'wI'pu' vIghel. DaHjaj wabmey chu' ghojmeH Ha'DIbaH mIw muQIj nIqol, meqvam HaDmo'. jIHvaD «N400» rIch SebaSyan. DaH ghurchu'pu' Dochmeyvetlh SovwIj. 'ach jIbIttaH. wa'leS 'anna, 'a'leQ je vIrI'.

DaHjaj ram yejHaD vImejpu'DI' taw lupwI' mIrDaq jIba'pu'DI' jIH 'emDaq ba'taH SabIy'ne 'a'ghen pay' 'e' vItu'. pa' ba'taH je loDnI'Daj baltaSar! SaHtaH je puqbe'chaj ta'ra! mubItmoHqu'! 'ach ghaytan mughovbe'pu'... 😳

Heghpu' vavwI' 'e'mamnal

wa'Hu' murI' vavwI' 'ej jatlh; cha'Hu' Heghpu' 'e'mamnalDaj. QISta' 'oH pongDaj'e' 'ej SoSnI' chaj ghaH. tera' DIS 1924 boghpu' 'ej qaStaHvIS DISDaj cha'maH HutDIch, vavnI'wI' loDnI' nayta'. layIpSIq veng luDabtaHvIS wa' puqloD lughaj. ngugh pIj wISuch. reH loy' QISta' 'ej nuHaghmoHlaH. cha'maH wej ben Heghpu' loDnal. 'IDnar lIllaHchu', vaj reH mutIvmoH. qanchoHDI', qemnItlh vengDaq qanwI'pu' juH qach DabchoH, pa' Summo' puqloD wa' puqnI'be' je.

DaH SuwISya' vIDabmo' pIjHa' ghaH vISuchlaH, 'ach rut vIrI' 'ej maja'chuqmeH ghogh HablI' wIlo'... 'ach qaS DIS 2020 'ej qanwI'pu' juH qachDaj HIvpu' mIv'a' javtIm. 'op QorghwI' ngejlu'pu', ghIq rIb rop'a'. pIvHa'be'pu' QISta', 'ach javtImmo' qaStaHvIS wej jaj ropyaHDaq QotnIS. HutmaH loS ben boghpu' vavwI' 'e'mamnal, 'ach cha'Hu' Heghpu'. pe'vIlHa' leSjaj. 😢

maghomta' 'ara'te jIH je!

DuSaQ'a'wIj HolQeD yejHaDDaq vum be' Dajqu'. 'ara'te* 'oH pongDaj'e' 'ej 'ewuSqal Hol jatlh. jupwI' QaQ ghaH 'ej majatlh 'e' vItIvqu'. Hut ben Holvetlh vIghoj 'ach Do'Ha' HochHom vIlIjpu'. vaj reH DIvI' Hol wIlo'. wa'leS juHDaj cheghmo' ghaH, DaHjaj choS maghom 'ej nItebHa' 'uQ wISop.

 

naDev juH ngo'vo' 'el neHmo' 'ara'te, 'ej DIS veb jar wa' juH chu' nejnISmo', juHwIj wutlh pa'Daq wa' buq polta'. vaj ghaHvaD pa'meywIj vI'ang. mer paqmeywIj law', 'a juHwIj parHa'. naDev loQ marSa'la' HIq wItlhutlh. nuq 'oH? HIq Doq, ram HIq, Su'ghar qut but je DuDnISlu' 'ej qa'vIn qurgh chelnISlu', ghIq qaStaHvIS cha' jar barDaq polnISlu'taH. ghIq qa'vIn qurgh teqnISlu'. na'ran rurchu' 'ej qa'vIn wejwa' ghaj. 'eyqu'! wa' bal munobta' bangwI' SoS, SoSDaj juH wISuchDI'. vabDot parHa'qu'law' 'ara'te, 'ach DaHjaj HIq law' tlhutlh neHbe', loQ wuQmo'.

 

ghIq maghungchoH, vaj jungwoq Qe' «Soj naQ» wIjaH. pa' 'ey nay' 'ej law'. muja' ghaH: 'opwen ngejpu' mIv'a' javtIm! ngugh 'eSpanya'Daq ghaHtaHvIS loQ ropchoH 'ej qaStaHvIS wej jaj chur... 'ach churHa'choHDI' Soj mumbe'choH! yuch Sop, naHmey Sop, chabHom na' Sop, 'ach mumlaHbe'. meqvetlhmo' HIvpu' mIv'a' javtIm 'e' Sovbej. ghIq nujDaj Hutvav tob neHmo' nIpon 'uSu' tlhutlh! 'ach wejwa'Daj mumbe'!

maSop rInDI', «'eDIy HIq tach» wI'el wIneH, 'a Do'Ha' SoQ. poS «volter tach», vaj pa' wa' HIq Doq wItlhutlh, mejnISpa' ghaH. HolDaj vIghojqa' vIneHqu', 'ach 'Iq Holmey vIghojtaHbogh... 'ewuSqal Hol vIghojchoHpa' wej latlh Holmey vIghoj 'e' vImevnISlaw'. vaj wej jIbej. 'ach muvuQ be'vetlh HolDaj je. 😊

'ewuSqal Hol boQoy boneHchugh, QoQ ghomvam vIchupqu': KOBAN

*) tlhIngan Hol vIghItlhtaHvIS 'ej latlh Hol pongmey permey je vIlo'chugh, motlh ngutlh tu'qom chongHa'moH. vaj tlhIngan Hol mu' 'oHbe'chu' net SovlaH.

quq cha' QeD qep

wa'Hu' (ghItlhjaj), DaHjaj, wa'leS je 'InternetDaq qaS qep; Holmey 'oghlu'ta'bogh bop. SoQDaj muchmeH DoyIchlan Hol lulo'meH jatlhwI' HochHom. 'ej mIlloghHommey lo'bogh Holmey bop SoQmey HochHom'e'. DaHjaj DuSaQ'a'Daq jIvumtaHvIS cha' SoQmey vIbej (vI'Ij). Dajqu'be', 'oghwI' bopmo' neH SoQmeyvetlh... jIHvaD Holmey 'oghlu'ta'bogh Daj law' 'oghwI'pu'chaj Daj puS. 'ach qaStaHvIS poH ngajqu', tlhIngan Hol rIch wa' loD! 'ej cha'logh Qagh...

1. tlhIngan Hol DIb Hoch ghaj marq 'oqranD; jatlhpu' loDvelth, 'ej ghuQ qon neHlu'chugh, marq tlhobnIS. teHbe'chu'! DIb ghajbe'bej ghaH, 'ach Hoch DIbmey ghaj Paramount Pictures'e' net Sov.
2. tlhIngan Hol QIch wab Ho'DoS Sovlu'bejbe'; jatlhpu' loDvetlh, vaj Holvam qolchugh vay', QaghlaHbe'. Hoch ghojwI' Ho' chaH DawI'pu''e'; jatlh... nuqjatlh jay'?! ghobe'! tlhIngan Hol mu'ghomDaq QIch wab Ho'DoS Dellu'chu'. meqvammo' paqvam pablu'.

DaHjaj tulwI' Hol lubopbogh 'op SoQmey vI'Ijrup... 'ach quq latlh qep! DuSaQ'a'majDaq qaS HolQeD qep, 'ej SIghchuqbogh Hol Sarmey bop. pagh vImuch, 'a jI'Ij vIneH. vaj DaHjaj wa'leS je qaStaHvIS jaj Hoch SoQmey vI'IjnIS. Daj 'e' vItul.

Hov leng: DISqa'vI'rIy

'eQ «Hov leng: DISqa'vI'rIy» lut chu' vIbejchu'ta'. DISDaj wejDIch lut vaghDIch 'oH, 'ej «bInaDtaHvIS bIHeghlaH» ponglu'. HaSta muchvam muchchoHlu'DI' wej vImuSHa', 'ach vIparHa'. qabbe'law', 'ach latlh Hov leng lut mIrmey rurbe'bej. 'InternetDaq meqvammo' lumuS qabDu' law'. 'ej jIQochbe': pImba' DISqa'vI'rIy! reH potlhmey vur boppu' Hov leng, 'ej potlhmey vur bopqa' DISqa'vI'rIy net tu'nIS.

rInDI' DISDaj cha'DIch, vIbta' Dujchaj 'ej DaH tera' DIS 3189 chaHtaH. naw'wat 'oHlaw' yuQjIjDIvI''e' 'ej Dujmey puS neH ghaj. jorpu'mo' Hoch cha'puj, pIvghor lo'laH pagh. 'ach SanmIr QuQ ghajtaH DISqa'vI'rIy, vaj 'u'Daq lenglaHtaH! Dunqu'! vaj tuchDaq tu'HomI'raH 'oHbe'law' Dujvam'e'. 😎

ghotmey chu' vIparHa'choHbej je. reH Saru vIparHa', meqmo'. 'ej Burnham la' vIparHa' je; DaH DI'onmeyDaj wISovchoHchu'law'. 'ach ghotmey chu' lutu'lu'bogh vIparHa'choH je: yItlh Vance 'aj, 'a yaS ngoy' ghaHba', 'ej ghot Daj ghaH 'e' vIHar. neqratlh lo'bogh yaS'e' tu'lu', pongDaj vISovbe', 'ach pe'vIl ja'chuq Georgiou ta' ghaH je. peghmey law' ghajbej, chaq tlhach 31 yaS ghaH? wej maSov... Adira Tal ghaH chu'bogh ghot wejDIch'e', 'ej vIparHa'qu'! jIb tIqHa' ghajmo' vIparHa' net Sovbej, 'a ghot Dajqu' ghaH! 😍 Humanna' ghaH, 'ach porghDaj yIntaH tI'rIl boqyIn. lutmey vebDaq ghaH bopbogh De'mey chu' wISovlaH 'e' vItul.

toH... cha'pujqutmey jormoHpu' 'Iv nuq ghap? nuq pegh neqratlh tuQwI'*? nuq' 'oH patmor mIr'e'? latlh tuch cham wIlegh'a'? SochleS De' chu' wISuqbej! tlhoS jIloSlaHbe'... 😁

*) Da David Cronenberg DaH 'e' vIlaD! Dunqu'! ghIjbogh muchmey jech chenmoHta', vabDot «ghew» jech chenmoHta' ghaH! wej jIHDaq vIleghpu'!

 

wa'Hu' pe'vIl jIvum

wa'Hu' qaS wanI' law', 'ach ghItlh vIqonmeH poH vIHutlh.

DuSaQ'a' Qe'Daq maghom weywey jIH je (meqvetlhmo') 'ej Soj maSoptaH Qu'meymaj wIrIch. mIv'a' javtImmo' SuwISya'Daq DoyIchlanDaq je Hung mIw ghurmoHtaH qummey. vaj DISvam qaSpa' QISmaS, DoyIchlan Dabbogh qorDu'wIj bangwI' je vIcheghDI' juHwIjDaq jIwegh'eghnISlaw'. ghIq muSuchlaH'a' bangwI'? nItebHa' qorDu'wIj juHDaq maSoplaH'a'? wej jISov. 'ej qaSpu'DI' QISmaS, berlIn wIjaH wIneH bangwI' jIH je, pa' tulwI' Hol jatlhbogh juppu'wI''e' wISuchmeH. DaH ghaytan napbe'law'.

ghIq DuSaQ'a' HolQeD qach vIjaH, pa' jIvumrupDI' muSuch natanyel, vIraS Hol jatlhbogh SuwISya'ngan'e'. DIS 2021 be'rInDaq Qoyje'Daj wejDIch SuqmeH HaDchoH neH. bama Hol jatlhlaH, vaj mIyama Hol mach Qul neHlaw'. wej Holvetlh perlaH, 'a chaq ghanan Hol wIv. rarchuq Holvetlh jIngpo' Hol vIHaDtaHbogh je, 'ach yajlaHbe'chu' jatlhwI'pu'chaj. ghaytan DIS veb QulchoHlaH, 'ach wej mIyama 'ellaH. toH... maja'chuq 'ej Holmey wIrIch, ghaHvaD mIyama Holmey bopbogh tamey law'qu' vIlab, 'ej nuSuch je pInwI', matyaS.

mejpu'DI' natanyel, tagha' jIvumchoHlaH jIH. DaH Qu'wIjmo' turung Hol bopbogh pab paq vIlaDlI' 'ej tlhoS vIlaDchu'. jIngpo' Hol rurchu' Holvam, 'ach baratDaq jatlhlu'. wot patchaj vIQul 'ej Qurmeychaj pIm vIDel 'e' vIHech. qachvo' vImejtaHvIS mej cha' juppu': Sa'Sa' Sanra' je. nIteb mamejDI' jIjatlh «'uQ wISop'a'?» 'ej Qochbe' chaH. vaj 'oberHov Qe'Daq maSop 'ej maja'chuq. tlhaQqu' choSvetlh, qID 'e' tIvqu'mo' Sa'Sa'. nIm wIb ngogh ngaSbogh ghab'e' tlhagh patat 'oQqar naQHommey je vISop. 'eyqu' jay'!

juHwIjDaq latlh Qu'wIj vItur 'ej Dene SutlhIne' Hol vIpojqa' 'ej «choS mIch» vIbej. toH... wa'Hu' qaStaHvIS 7.5 rep jIvummo' jIQuchqu'. jIbuDbe'. 😋

choS mIch

QeD torSIv vItIvqu' net Sov. vaj 'opHu' HaSta much chu' vIbejchoH. chu''a'? ghobe'. chu'be'bej HaSta muchvam, 'ach ngo'qu'! «choS mIch» 'oH perDaj'e', 'ej wa'DIch tera' DIS 1959 muchlu'. tlhoS DISDaj wa'DIch Hoch lut vIbejchu'pu' 'ej vItIvqu'. Dajqu' lutmey ngaj, muvuQbogh qo' lu'ang, 'ej QeD torSIv ghantoH Dun bIH. wej DIS cha'DIch vIbejchoH, 'ach wa' lut neH vISov, lutvamDaq Damo' William Shatner («Hov leng» jemS tIy qIrq HoD Dapa'). 284 lutmey yugh HaSta muchvam, 'ej Hoch vIbej 'e' vIHech. QeD torSIv muchmey ngo' je vIparHa'qu'mo' «choS mIch» vIparHa' je net HonlaH.

jIbuDqu' jay'!

jIbuDqu' jay'! DIS veb DuSaQ'a' Qoyje'wIj wejDIch vISuqmeH ghItlh'a'wIj vIrInnISmoHchu', vaj DaH pe'vIl jIvumnIS, qar'a'? 'ach loQ jIvum neH... jIHvaD qay' ghu'vam. Hu'DI' latlhpu' 'eq, jIHu'DI' jIH qaStaH pov. jIvumnIStaHvIS qabpaq latlh 'Internet Daqmey vISuch 'ej poHwIj vIlo'Ha'. qatlh? jISovchu'be', 'a Qu'wIj vIparHa'qu'be'mo' bel vISuq vIneH. jIjaw 'e' vItIv. Holmey vIghoj 'e' vItIv. HaSta muchmey vIbej 'e' vItIvqu'. juppu' vISuch 'e' vItIvbej je. Qu'wIjvaD jIlaD 'ej jIqon 'e' vItIvbe' neH. reH jIjatlh «wa'leS vIturlaH!»

'ej jIHvaD qay'mo' ghu'vam, maja'chuqpu' DuSaQ'a' yab po'wI' jIH je. loSlogh maghom 'ej ghaHvaD ghu'wIj vIQIj. loQ boQlaH yab po'wI', 'ach jIDub'eghtaH:

• muboQqu' bangwI'. Hoch nab neH 'ej Hoch nablaH ghaH. muvawlaH ghaH. qechmey QaQ mujatlh.
• DuSaQ'a' jup chu' vIghaj, nIqol 'oH pongDaj'e' 'ej jaSHa' qay' buDtaHghachDaj. qep muchup: wa'leSqoq Hoch lutur luneHbogh HaDwI'pu'vaD qep cher DuSaQ'a' yab po'wI'. wejlogh maghom 'ej muboQlaH 'e' vItul.
• reH 'ISjaH vIlo', wanI'mey qoSmey vIchIlbe'meH. 'ach DaH Qu'Hommey vIvev. ghantoH: jup jabbI'IDmo' jIjangnISchugh, 'ISjaHwIjDaq Qu'Hom vIghItlh 'ej jIlIjlaHbe'.
• Hoch jaj jIvum rInDI' wa'chawDaq vummeH poH vIvev.
• Hoch Hogh wa'logh DuSaQ'a'Daq nIQ wISopmeH wa' jup vIghom. 'ara'te 'oH pongDaj'e'. maSopmeH jIHu'nIS 'eqDI', vaj DuSaQ'a'Daq jIvummeH poH nI' vIghaj.
• Hoch Hogh wa'logh megh wISopmeH latlh jup vIghom. weywey 'oH pongDaj'e'. vaj reH juHwIjDaq jIbuD 'ach yaHwIjDaq jIbuDlaH jIvumchoHlaH.
  

ghaytan not Heghchu' quvyaHwIj. 'ach chaq 'opleS jIbuDbe'choH. jItultaH.

SoSwI' chab tlherwI' tlhol HIl'aD

pIjHa' chab vIvut net Sov, 'ach vutlaHqu' SoSwI'. reH chab vutDI' qerjIqDaq chab vevpa' loQ jIHvaD qulcher tlhol nob. Su'ghar qut law'qu' ngaSbej, 'ach motlh porgh pIvHa'moH Soj 'eyqu''e'. toH, tagha' DaHjaj SojHomvam vIvutta'! 'ej tlhIHvaD HIl'aDDaj vIbon. nupqu' mIw:

1. raSDaq maHpIn yIlan.
2. 0.043 cheb nIm tlhagh yIvev.
3. 0.064 cheb Su'ghar qutmey yIchel
4. 0.085 cheb tIr Say'qIS yIchel.
5. SenwI' SIqwI' je jojDaq Do'ol na' Da'uchlaHbogh yIchel. law'qu'nIS.
6. Hoch DuDmeH ghoplIj, 'un naQ, DuDmeH jan joq yIlo'.
7. rIntaH! DaH chab yorDaq tlherwI'meyvam DaghomHa' pagh tlholtaHvIS DaSoplaH.

'eyqu', na'ran rurchu', 'ej nIm tlhagh law'qu' lungaS. tlhoy yISopQo'!

SuvwI' SojHom 'oHbej!

narghpu' QonoS chu'!

chu' nuq? chu' QonoSvam! quSDaq jIba' 'e' vISov... 😅

'ach 'Iv jIH? André 'oH pongwIj'e', tlhIngan Hol pong vIghajbe', 'ach Holvam vIghojtaH. vaj 'opHu' QonoS vIqonmeH qech vIghaj 'ej qaSchoHmo' jar chu', jIqonchoH. toH... wejmaH vagh ben DoyIchlanDaq jIboghpu' 'ej DaH SuwISya'Daq DuSaQ'a'Daq HolQeD vIHaD. DIS veb jIHaD rInlaw' 'ej Qoyje' wejDIch vISuq 'e' vIHar. mIyama Sep Holmey vIHaD, 'ach loQ jIbuD. mubopbogh latlh De'mey'e' latlh ghItlhDaq vIqonbej. 'opleS tuSovchu'. 👌

'ej DaHjaj nuq vIta'? bangwI'vaD jIjatlh. DoyIchlan Dab ghaH, 'ach Do' maja'chuqmeH 'Internet wIlo'laH. wa'Hu' qa'lopDaj wIrIch: pe'vIl lopta'law' ghaH juppu'Daj je. Do'Ha' pa' matay'laHbe'! ghIq 'InternetDaq qaStaHvIS «qa'vIn qep» tlhIngan Hol wIjatlh jIH, DeSDu', ghunchu'wI', cha'Qargh je; Hoch jaj wa' rur. Dunqu'! DaH ngopwIj vISay'nISmoH, ghIq vavwI' SoSwI' je vIrI'. DoyIchlan luDab je, 'ej qaStaHvIS wa' Hogh wa'logh maja'chuq.

Hoch jaj naDev jIqonqangbe' 'e' vIQub, 'ach poH tlhab vIghajchugh qoj qaSpu'DI' wanI' Daj, vIja'laH. toH... HItlha'!

'ej De' vIchel: pongwIj 'oHbe' Holtej'e'. Holmey vIQulmo' Holtej jIH. «Holtej» 'oH latlh tlhIngan Hol jatlhwI' pong'e', 'ach ghaH jIHbe'. latlh Holtej jIH, vaj ghomISmoHQo'!