mutlhu'moH wovbogh jul

wejHu' wov jul 'ej ghun muD Dotlh, vaj megh luSopmeH ghom DuSaQ'a' juppu'wI'. qen pIjHa' HurDaq jISopmo' vImuv. taylan* Do Qe'Daq ray' tIr, Ha'DIbaH, naHlet ghevI' je vIje' 'ej DuSaQ'a'maj Qe' tlhopDaq maba', maja'chuq, 'ej maSop. Dunqu'! qaStaHvIS poH nI'qu' maghombe', 'ej HurDaq maghomchugh, vItlhqu'be' mangejchuqmeH Qob. jeSpu' vagh HolQeD HaDwI': yISra'elngan ghaH nur'e', SuwISya'ngan ghaH juwaqIn'e', 'eSpanya'ngan 'ewuSqa'ngan ghap ghaH 'aytor'e', DoyIchlanganpu' maH QISyan'e' jIH'e' je. maSop 'ej maja'chuq rIntaHvIS, juHwIj vIcheghrup 'ej yaHDaj cheghrup nur, 'ach majatlhqu'mo' 'ej vum neHbe'law'mo' nur, mutlhej. tIq yItmeH He, 'ach wovtaH jul, vaj Hemaj wItIv.

HuDHom yorDaq juHwIj tu'lu' net Sov, 'ej 'oH Sum magh yotlh. jorchan naQ leghlaH vay', pa' quSlabDaq ba'DI'. maba' 'ej jorchan wItIv, 'ej maja'chuqqu'. quSlabmaj retlhDaq latlh quSlabDaq ba'taH cha' be'pu' qan. raSHom qengta' 'ej yorDajDaq HIvje', HIq ngon bal, nIm wIb nghogh, ghIrep naHmey lan. chaq jaj le' lulop? nubelmoHqu'mo' qechchaj, jaSHa' maghom wIneH. vaj jaj veb juppu'ma' wIrIt. 'ach muvqang pagh! jupqoq chaHlaw'... 😜

'ach wovqa'mo' jul, quSlabvamDaq jIba'choH. nur vIloStaHvIS, «'aS 'IDnar pIn'a' Dun» vIlaD 'ej «Qel 'awje'» vItlhutlh. 'IH poHvam, 'ach vumtaH nur... qaSpu'DI' wa' rep, bIrchoH muD Dotlh, 'ej jIbIr je. 'awje' vInatlhta' 'ej 'ay' HutDIch vIlaDchu'ta'. tagha' paw nur. maja'chuq 'ej majoS. buqwIjDaq nIm wIb ngogh, ghIrep HIq Doq wIqemtaH, quSlabDaq 'uQHom wISoplaHmeH. 'ach nIm wIb ngogh HIqvetlh je parHa'qu'be' nur. vaj vISop neH jIH...

tlhoy bIrchoHDI' ngIq juHmaj wIchegh. pItlh.

yInvam vItIvlaHbej...

*) SepvamvaD nuq vIpongnIS? «Thailand» jatlh DIvI' Hol jatlhwI', vaj rut taylan vIjatlh jIH. 'ach «ประเทศไทย» jatlh Sung, 'ej [pɾətʰêːt tʰaj] qollu'. pIj tammo' rayvam, ghaytan patet tay, pateD tay, patetay ghap wIjatlhlaH. wej vIwIv. tugh 'InternetDaq qaS «qep'a'», vaj chaq marq 'oqranD jIghel. chabal tetlh vIgherlI'.

taQbogh De' chu'

jarvam jaj wa'maH wa'DIch bo'Hum vengDaq tlhIngan wo' joqwI' lapmoH vay'. DIvI' joqwI' lapmoH je. 'ach tlhIngan wo' joqwI' leghDI' juSwI', ghan'Iq 'Irta', Degh'e' tuchbogh qum 'oS joqwI'vam 'e' Har. ghaytan DoyIchlan HI'tuy joqwI' ngo' 'oHlaw' 'e' Har juSwI'vetlh. ngugh joqwI' DoqDaq gho chIS lo'lu' je HI' vIlle', 'ej me'cheDHey qIj lulo' net Sov. vaj loQ tlhIngan «ghob tIq» (no' Hol: tIq'ghob) rurlaw'. Hov leng ngotlhwI' ghaHbe'ba' bepwI''e'.

ghan'IqvaD mIllogh qonta'bogh ngeH, 'ej tugh joqwI' lughov yaSpu'. tuchbe'bej, 'ach tlhIngan wo' joqwI' neH 'oHlaw' 'e' lutu'. jatlh ghan'Iq yaSpu': «jagh ghaHlaw'be' joqwI' lapmoHwI''e', yuQjIjDIvI' joqwI' lapmoHmo' je, 'ej DIvI' ghanHa' 'oS joqwI'vetlh SuD. HaSta muchmey 'u'qoqDaq juppu'na' chaHbe' tlhIngan wo''e' yuQjIjDIvI''e' je, 'ach bo'Hum vengDaq rojlaw'ta'.»

Do' Hov leng Sovchu' veng ghan'Iq!
 

monnIS ghan'Iq yaSpu', 'ach Qaghbe'bej jantor. reH Hoch nuH luqelnIS. tagha' «'enterpray' ta» luSoQmoHlaH.

«bI'reS vavwI' luHoH» (HaSta much)

'eQ HaSta much vIbej rIntaH. «bI'reS vavwI' luHoH» 'oH perDaj'e'.
pagh «មុនដំបូងខ្មែរក្រហមសម្ថាប់ប៉ារបស់ខ្ញុ៓» 'oHlaw' perna'Daj'e'.

tera' DIS 1975 qampuchya'Daq qaS lutvam teH. Sepvam mong charghDI' qamay Doq negh, Haw'nIS qorDu'. qum yaS ghaHmo' vav, luHoH luneHbej negh. vaj Haw'nIS Hoch 'ej Hatlh lughoS. neghvaD Hoch Dochmeychaj nob net raD. nIbnIS Hoch rewbe' 'ej mIpwI' tu'nISlu'be' 'e' ra'chu' qamay Doq qangtlhIn. lut potlh 'otHa' HaSta muchvam per: vav lughov, ghIq ngemDaq luHoH. puqbe'Daj bop lutDaj. taHlaH be'Homvam 'ej SIbI'Ha' paq qon 'ej wov'onmeyDaj nuja'.

be'Homvam bop. luweng 'oH pongDaj'e'.

muDuQqu' lutDaj 'ej rut muSaQmoH. ral negh Ho'DoS 'ej pagh vup. chunchu' be'Hom qorDu'Daj je, vaj DIvupnIS, lut wISovchoHtaHvIS. mubelmoH je qalmuSDaj, 'aSya' tIng chan tIng rurchu'mo' jorchan'e'. not qampuchya' vISuchpu', 'ach mIyama, pateD tay, law, yetnam je vISuchta'. 'ej Holchaj vIQoy 'e' vItIvqu'. chaq 'opleS vIghojchaH...

toH... HaSta muchvam Sachupchu'!


ba'bIlon vagh — DIS wa'DIch

 'eQ «ba'bIlon vagh» DIS wa'DIch lut Qav vIbej rIntaH. 'ej mubelmoH. cha'maH ben HaSta much lut mIrvam DIS wa'DIch vIbejta', 'ach Hoch vIlIjmo', DaH vIbejqa'lI'. «Hov leng: logh Hop Hut tengchaH» rurbej.

tera' DIS 2258 tengchaH lumutlhta' tera'nganpu' 'ej 'oHvaD «ba'bIlon vagh» lupong. wa'bIp cha'netlh cheb'a' ngI'bogh baS'e', nIteb ramDaq jIrtaH... luDab Humanpu' novpu' je. tengchaH luDab je 'op 'oSwI' nov: Senta'rIngan, mInbarngan, na'rIngan, vorlongan je. wa'maH ben Suvchuq tera'nganpu' mInbarnganpu' je, 'ach pay' jegh mInbarnganpu'. meqchaj Sovlu'be'. na'rInganpu' charghta' Senta'rInganpu', 'ach DaH tlhabqa'taH na'rInganpu'. HochvaD poymar chaH vorlonganpu''e' 'ej yIn 'eSqa'chajmo' tu'qomna'chaj Sovchu' pagh. vabDot maw'choHpu' vorlonganna' leghpu'bogh vay' net joS. 'erwI'Daq lughajbogh nuvpu' lutu'lu' je. 'ej Dorpu'DI' DISvetlh nargh jagh chu': QIbpu'!

QIt qaS DISDaj wa'DIch lut'a'. Dal 'op lut. jolpat tu'lu'be', 'ach tengchaHDaq Sum logh mIn lIngwI'. 'oHvaD «SupmeH lojmIt» ponglu'. verenganpu' rurqu' Senta'rIngan. 'ej lut mIrvamDaq DataH Hov leng DawI'pu' law'qu' jay'! ngIq lut vIbejtaHvIS Hov leng DawI' vIghovlaH! tlhaQqu'! 'ach Hujqu' latlh ngoD:

Heghlaw'pu' DawI''a'pu' bID'e'!

qIj 'ej wov 'op, boleghlaH'a'? Heghpu' DawI'chaj. DISvam jar wa' Heghpu' bIDDaq QamtaHbogh be' DawI'. qaSpu' nuq? SuQ'a' jorchan velqa'? qanqu' pagh. ngo'qu'be' lut mIrvam. DIS 1987 tagh «Hov leng: puq poH veb», yIntaH Hoch DawI''a' 'e' yIqel! DIS 1994 tagh «ba'bIlon vagh» Hujqu' qar'a'?

wa'leS DISDaj cha'DIch vIbejchoH. jISeyqu'...