'IQ QISmaS nobmey!

tugh Dor DISvam, tugh tagh DIS chu'. vaj DIS 2023 ghItlh Qav 'oH ghItlhvam'e'. 'ej paSqu'qa'mo' jImoDnIS. qatlh? wa'leS 'eSperanto Hol qep vIjaHba'mo'! berlInDaq Sumbogh vengHomDaq qaSqa' qepvetlh 'ej «HojnIy 'eSperanto Hol Hogh» (Junulara E-Semajno = JES) ponglu'. 'eQ qaSpu'mo' QISmaS, loQ vIrIch vIneH...

DISvam jIHvaD Qatlhbej QISmaS. jar wa'maH cha' vIparchoHlaw'... reH nobmey vIbuSnIS, qorDu' bangpu'wI' je nabmey vIqelmeH jIgharnIS. qaS wanI'mey law' 'ej reH juppu' vIghommeH poH vIHutlh. 😩

DoyIchlanDaq rut QISmaS 'ISjaH wInob. cha'maH loSlogh Hoch jaj lojmItHom poSmoH SIQwI' 'ej qoDDaq vay' tu'lu'. DISvam wej 'ISjaHmey vIHev! yuch ngaSbogh QISmaS 'ISjaH munobpu' vavwI'. 'ISjaH mutlhta' bangwI' chu', yennIj, 'ej yuch, na'ran rurbogh SojHom je ngaS. 'ej Hov leng QISmaS 'ISjaH munobta' latlh bangwI', telraQ. wej Hoch Duj vImutlh 'ach naDev mIllogh vIqon:

DujHommey rotlh!

DISvam qaStaHvIS jar wa'maH cha', jaj cha'maH loSDIch, cha' qorDu'Daq jIlop. pov vavwI' pa'meyDaq maghom vavwI', be'nI'wI', jIH je. QISmaS chab, chabHommey je DISop 'ej loQ maja'chuq. lengDaj mIllogh nu'ang vavma'. ghIq Ha'le Dabbogh bangwI' vISuch. pa' malop telraQ, be'nI'Daj (ne'yaD), SoSchaj je. QISmaS qIrqoDna' ghaj telraQ. 'ej bIngDaq nuloSlI' nobmey law'qu'! va... nobmey puS vInobrup, 'ach pa' law'qu'ba' nobmey. 😱 'Iq nobmeychaj! toH... 'uQ wISop. «raqlet» wISop: raSDaq 'oH qerjIqqoq'e' 'ej barghHommeyDaq Ha'DIbaH, naH, 'atlhqam, nIm wIb law' je luchellu' 'ej qerjIqqoqvamDaq tujmoH. belmoH 'ej 'ey. qaStaHvIS QISmaS, DIS chu' jaj ghap «raqlet» luSop DoyIchlangan law'. ghIq nobmey DInob, DIHev 'ej DIqatHa'. tugh ghItlhvamDaq nobmeywIj vI'agh...

'ey! 'ej Ha'DIbaHna' ngaSbe'!

wa'Hu' qaS jaj cha'maH vaghDIch. juHDaj cheghta'DI' neyaD, qorDu'wIj wISuch telraQ, SoSDaj, jIH je. be'nI'wI' pa'meyDaq maghom 'ej Da'vI' ronglu'pu'bogh wISop (Hoch DIS rur). 'eyqu'! 'ej puH Ha'DIbaH Sopbe'mo' bangwI', ghotI' Sop. jeS vavwI' (ratol), be'nI'wI' ('ayna'), lorbe'wI' ('aDnIl), bangwI' (telraQ), SoSDaj ('eqyaH), jIH (toH... 'eDna' vIpong'eghqangbe') je. maSop rIntaHDI' nobmey DIqatHa'. loQ maja'chuq 'ej HIq wItlhutlh. ghIq Ha'le luchegh telraQ SoSDaj je, po veb vengDaj cheghnISmo' SoSDaj 'ej latlh bangDaj Suchmo' bangwI'. loQ Qatlh parmaq ghu'maj, qar'a'? 😉

'ach latlh bangwI', yInnej, vIleghlaHbe', berlInDaq lopmo' ghaH loDnalDaj je. DIS chu' maghomqa'.

DaHjaj pagh vIta'. lengbuq vItebta'. vaj DaH nobmey vIHevpu'bogh vIrIch. mIlloghvam yIbej!

'Iq nobmeywIj!

1. 'entepray' baS velqa' mach vIHevpu', qaStaHvIS Hov leng ngotlhwI'pu' qep. qaSpa' QISmaS nobHommey DInobchuq. vo'yajer maghpub vInobpu' 'ej velqa'vam vIHev. Qatlhlaw', 'a 'opleS vInID.
2. «jey'naS mu'mey» Quj munobta' ghojwI'pu'wI'! jIQuchqu'! 'opHu' veng botlhDaq pubtaHbogh naH HIq wItlhutlh ghojwI'pu'wI', jIH, ghojmoHwI' ghuD ('ara'mat), telraQ je. 'ej Qujvam munobmeH Huch luboS. mu' qIDmey boplaw'. «jorbogh vIghro'mey» Quj Hev ghojmoHwI' ghuD. loQ QujDajmo' jIghal, mochmo'.
3. Ha'le logh chal je 'angweD chu' chaw' munobta' vavwI'. 'ej chaw'vam Hevpu' be'nI'wI' puqbe'Daj je. vaj qaSDI' jar wa', pa' wIghoS. wejHa' chorgh wen vISuchpu'. 'ej chaq nutlhej bangwI'.
4. «Hov leng ngoDHommey qaD» paq munobta' telraQ, bangwI'. Dajqu' 'ej qaSqa'DI' Hov leng qep, chaq maqaDchuq. qaD lajlu'pu'! 😏
5. cha' «ta'puqpu'» chaw' je'ta' bangwI'. nItebHa' jar cha' wIjaH. DoyIchlan QoQ ghom noy chaH ta'puqpu''e' 'ej naH jajmeywIj. vengwIj nganpu' chaH je.
   
6. DoyIchlan Hol 'eSperanto' Hol je mu'ghom tIn munobta' bangwI' SoS! tInbe', 'a rabba'! 1600 tenwal yugh. 'eSperanto Hol mu'ghomvam tIn law' Hoch 'eSperanto Hol mu'ghom tIn puS net Sov. chabalwIj tetlh paqvam tu'lu', 'ach waghqu'mo', jIHev 'e' vItulbe'. mumuSHa'ba' bangwI' SoS!
   (De'chel... qatlh *SoSnal wIjatlhlaHbe'?)
7. «maSIr tIQ HolQeD lIHmeH paq» munobta' telraQ. wa' chabal 'oH je paqvam'e'. maSIr Hol tIQ vIghojtaHmo' jISeyqu' 'ej tugh vIlaDchoH vIneH! vurchu'be', 'ach Dajqu'bej.
8. DujtlhuQ wovmoHwI' munobta' telraQ be'nI', ne'yaD. wejpuH. 'ach nuqDaq vIHuS...?
9. vIbmeH leng bopbogh 'elHa' Quj munobta' latlh bangwI', yInnej. jIHvaD Daj 'ej wejlogh QujlaHlaw' vay'. ghaytan wa'logh nItebHa' maQuj.
10. gho re'Hom'at nIqta' yInnej! batlh mongwIj tujmoHjaj Dochvam! 'IH 'e' vIDam, 'ej lI'. weSjech tunqu' lo'ta' ghaH, 'oy' vISIQqangbe'mo' jIH. muSovqu'ba'. 😊
    
    cha' nob cha'be' mIllogh, telraQ qav'ap juHDaq vIlIjpu'mo':
    
    
11. QIm chab beQ vutmeH bargh munobta' telraQ. chaq ghaHvaD vIvut 'e' tul? beQmoHwI' naQ ngaS je.
12. tera' wutlh 'atlhqam qulcher munobta' ghaH. ghaytan jIHvaD 'eyqu'!
    

'ej yuch law' vIHevpu' je. jIHvaD chabHommey ngeSmoHta' 'ara'mat, ghojmoHwI'wI' ghuD. loy'qu'! SIbI'Ha' 'uQ maSopmeH vItlhob vIneH. 😋

toH... batlh DIS 2024 yI'el! Qapla'! 👋

jar wa'maH cha' De' chu'

Qu'vatlh! QonoSwIj vIlonlaw'... naDev vIqon reH 'e' vIlum. jISov, jISov... lumbe' tlhInganpu'. 'ach tlhIngan jIHbe', vaj vItlhbej lummeH QowIj. jav wen ghItlh vIqonta'. DaHram jIqonqa' 'e' vInID.

toH... chu' nuq?

• DaH cha' parmaqqay vIghaj. HIja'. «parmaqqay law' qangtlhIn» vIpabtaH 'ej jIHvaD chu'qu'be' ghu'vam. 'op ben cha' parmaqqay vIghajpu' je. yInnej 'oH pongDaj'e' 'ej nurarmoHpu' nIqHom. vengwIj Dab, loDnal ghaj, 37 ben boghpu', vaj tlhoS rap nenmaj. jar jav maqIHpu' 'ej qaStaHvIS wa' Hogh wa'logh maghom. cha'leS nItebHa' qoSDaj wIlop. valqu' 'ej 'IH (wIl jIbDaj 'ej chum) 'ej jotqu'. 'e' vIHo'! qangtlhInvetlh lupab je ghaH, latlh parmaqqaywI' je. latlh parmaqqay ghaj je telraQ'e'. 'eSSal 'oH pongDaj'e' 'ej bomwI' pov ghaH. Qatlhlaw' ghu'maj, 'ach Dunqu'bej! 😍
  

 

pagh mu' 😉

• tugh qaS QISmaS 'ej jIbItqu'. QISmaS'e' vIparHa', 'ach jar wa'maH cha' vImuSchoHtaH... nobmey law' vIje'nIS 'a puS qechmeywIj. 'ej nobmey puQ QISmaS neHHa'! DoyIchlanDaq jar jav 'ISjaH wInob. 24 lojmItHommey ngaS 'ej ngIq lojmIt 'emDaq nobHom tu'lu'. pIj yuch ngaS. vaj parmaqqaypu'wI'vaD 'ISjaHmeyvam vIje'nIS pagh vImutlhnIS... cha' 'ISjaHmey vIHev: Hov leng Duj velqa'Hommey ngaS telraQ 'ISjaH 'ej na'ran rurbogh SojHom ngaS yInnej 'ISjaH. 'ej qaS yInnej qoS, ghaHvaD nob vInobnIS je. vaj ngem Sarghmey law' vItlha'lI' 'e' vInID. 😨
  

tlhIngan toQDuj, 'entepray', QumwI' je

• Qu'wIj vIparHa'bej! vengwIjDaq DoyIchlan Hol vIghojmoH. DaH latlh vengDaq jIvumbe'. DaSjaj povjaj je wa' ghom vIghojmoH. DaH patlh A2 luchavlI'. SIrya', 'aljayIr, Hanghuq, banglaDeS, SIchIyparIy, qoStarI'qa, raSya', nIpon, vIraS je nganpu' chaH. wa'leS chaH vIghojnISqa'moH. loghjaj buqjaj je latlh ghom vIghojmoH. patlh C1 luchavlI'. chaH'e', qolombIya', barat, 'I'ran, bIraSIw, SIrya', lIbnen, jungwoq, 'eSpanya', nepal, SawtavrI'qa', 'arHentInya', chI'le je nganpu' chaH. vaj Hoch Hogh jIghojmoH 16 rep qaStaHvIS. tlhoS yap Huchvam, 'ach ghaytan DIS veb 4 rep 8 rep ghap vIchelnISlaw'. 😌
  

Hoch ghojwI'pu'ma' nungmey

• maSIr tIQ Hol vIHaDtaH. 'op paqmey, ghItlhmey je vIlaDta' 'ej Hoch jaj mu'mey vIqeqmeH «Anki» vIlo'. Hoch ghItlhjaj 'InternetDaq lut tIQ wIlaDmeH maghom. DaH «SIghnaHa' lut» wIlaDlI'. SIbI'Ha' maSIr tIQ Hol lutmey vImughmeH tlhIngan Hol vIlo' vIneH. De'chel, wa'leS DaHjaj je 'Internet qaSpu' «qo'Hey qepHom» 'ej maSIr tIQ Hol muchmey DImuchta' E.T. jIH je! 😎
  

'opleS lutvam tIQ vImughchu'...

DaH jIQongnIS. DISvam QonoSwIjDaq ghItlh vIqonqa'laH 'e' vItul... puSqu' poHwIj.