QISmaS botIvjaj!

QISmaS yItIvqu' jay'!

tugh Dor tera' DIS 2022, 'ej Dorpu' QISmaS. DISvam maloptaHvIS mutlhejlaHbe' bangwI'. latlh veng Dab SoSDaj 'ej pa' tay'taH ghaH, SoSDaj, be'nI'Daj, SoSnI'Daj, be'nI'Daj jupna' je. vengwIjDaq lopwI' puS maH: jIH, vavwI', be'nI'wI', puqbe'Daj je. loS maH. ghobe', loSmaH maHbe'. loS ghot neH maH.

be'nI'wI' QISmaS Sor

qaSDI' QISmaS ram wa'DIch, vavwI' pa'meyDaq 'uQHom wISop. DoyIchlanDaq loQ jum lurDechvam: motlh ramvetlh 'uQ'a' wISopbe', 'ach patat 'oQqar ghIH Ha'DIbaH ghargh je tISop. maSoppa' nobmey tInob. jIHvaD ghIrep HIq, paSta', yuch je munob. vavwI'vaD SojHom 'ey vInob, be'nI'wI'vaD yuch naH qulcher je vInob 'ej SojHom wIb Hev lorbe' (parHa').

lurDech 'uQ

QISmaS jaj wa'DIch megh'a' wISop: Da'vI' ronglu'pu'bogh, patat 'oQqar taplu'pu'bogh moQmey, majaj Doq je tISop. 'eyqu'bej 'ej cha' ngop vIlo'. ngugh be'nI'wI' pa'meyDaq maSop. pa'meywIj vIcheghDI' jIpI'qu' 'e' vIjem, 'ej quSlabDaq jIQotchoH neH.

QISmaS megh'a' motlh

QISmaS jaj cha'DIch 'oH jajvam'e'. tennuSwI' quS 'oH je, vaj jungwoq Qe'Daq megh wISop. 'eyqa' Soj, 'a jungwoq Sojna' 'oHbe'. jungwoqqoq Soj 'oH, 'a vIyetnamnganpu' chaH jabwI''e'. qay'be'. vIparHa'.

DaHjaj SoSwI' wISuch vavwI' jIH je. ghIq bangwI' vISuch. tagha' maghomqa'! ghaHvaD nobmey vIje'ta' je net Sov. 'ej cha'leS 'eSperanto Hol qep'a' wISuch! DISvam 'oranyenburghDaq qaS «JES» (HojnIy 'eSperanto Hol Hogh). 'eSperanto Hol qepDaj wa'DIch 'oH! loQ jIbIt, HghHghHgh...

DIS veb macheghpu'DI' malaDchuqqa'!

1800 HaSta muchmey

HaSta muchmey botIv'a'? vItIvqu' neHHa', vabDot HaSta muchmey vImuSHa'bej! HaSta much vIbejta'DI' reH weQmoQnaQDaq vuDwIj vIchel. vInaD 'ej vInaDHa'. cha'maH wa' ben jItaghpu'. qen HaSta much wa'SanID chorghvatlhDIch vIbejta'. naDev 'Internet HaSta much qawHaq naD tetlhwIj (IMDb) botu'. yInuD! ghaytan pIj DoSmey law' DIqIp. 😅

'ej mI' poj Daj lIng IMDb. jIHvaD Dajqu' gher'ID, vaj DaH naDev tlhIHvaD vIbon...

(1)

qawHaqvetlhDaq HaSta much naDmeH DujtlhuQ lulo'lu'. HaSta much QIvqu'vaD DujtlhuQ puS noblu'. Dunqu'chugh HaSta much, DujtlhuQ law' vInob. toH... bIng mIllogh yIbej. pIjHa' 1 DujtlhuQ, 10 DujtlhuQ ghap vInob. pIj 6, 8 DujtlhuQmey vInobba'. qatlh pIjHa' 7 DujtlhuQmey vInob? jIjanglaHbe'...

chaq SuHIttaH: «10 DujtlhuQ HaSta muchmeylIj tIngu'!» 'ej vIngu'qangbej. tlhaQmo' permeychaj vImugh vIneH:

• yIqaw! (2000)
  
• SangwI' cha': yoj jaj (1991)
• veQqoq (2008)
• pagh 'Iv? (2009)
• 'amelIy San Dun (2001)
• SIr'o''a' (1999)
• Hov leng: neqjung wa'DIch (1996)

HaSta muchmeyvam vImuSHa'chu'. vabDot wejmaH javlogh «Hov leng: neqjung wa'DIch» vIbejta'. 'ej ghaytan wejmaHlogh «SangwI' cha'» vIbejta'. not jIpuQlaw'.

(2)

DaH Dung mIllogh yIbej! DISmey 'ang 'ay' cha'DIch. HaSta muchmey vIbejta'bogh vIbuSchugh, vaj tera' poH rav DIS 1995 'aqroS 2005 lulInglu'pu'.

muchmey ngo' vItIvbej, 'ej 'op muchmey tIQvaD 9 DujtlhuQmey vInobpu' (ghantoH: «12 loD QeH», «poH Duj» je).

(3)

nuq bop much? Dajqu' tetlhvam! QeD torSIv vImuSHa' 'e' Sov Hoch. 'ej 555 QeD torSIv HaSta muchmey vIbejpu'. law'. 'ach QIv QeD torSIv HaSta muchmey law' net Sov je, qar'a'? qarbej. meqvetlhmo' Seghvam vImaSbe'law'. ghot yIn, mIllogh qol, Sov, parmaq, veS je bop vagh Seghmey'e' vImaSqu'bogh.

veS? toH... pIjHa' veS bopbogh HaSta muchmey vIbej, 'ach vIbejDI' pIj QaQ. reH Sagh veS, 'ej pIj QubmoH much Seghvam. tlhoS not pIqcho' HaSta muchmey vIbej, 'ej meq vISov: vIpar. 'e' tobchu' mI' pojvam. HghHghHgh! 😂

(4)

DISmey DIrIchqa'jaj. tera' DIS 2014 muchmey vImaSqu'law'. meq vISovbe' je jIH. 'ach DIS 1985 HaSta muchmey vIparHa'qu' je. DISvetlh jIboghpu'... chaq muSIgh ngoDvam? ghaytanHa'. jIqID neH. 😁

pItlh!