qo'vID wa'maH Hut vISIQtaH

tagha' qaStaH... jIrop. mungejpu' qoro'na javtIm 'ej DaH qo'vID wa'maH Hut vISIQnIS. 'a Do' jIbechqu'be'. loQ jIrop neH. vaghHu' jIropchoHlaw'. jaj wa' ram, DaSjaj po ghap loQ jIchur. loQ jIwuQ 'ej jIDoy'. loQ 'oy'law' DIrwIj. tera' tlhup rop motlh rurbej 'ach SIbI' qoro'na javtIm vIpIH net Sov. DaSjaj jI'ol: wa' yamtaw neH 'ang ghIch nejwI'. povjaj jIwuQtaH. 'oy' mInDu'wIj, DubwIj, DIrwIj je. 'ej jItuj, ghIq jIbIr. baQ. jItuSchoH je 'ach ghIchwIjDaq 'IqnaH tu'lu'be'. HatwIj vIjuvta' — 216 SImyon vIgheH. Hu'ma... toH, 216 SImyon; Dunbe', Qobbe'. 'aj loQ vItlh.

216 SImyon vIgheH. tujqu'be'.

qo'vID wa'maH Hut rurbej DotlhwIj. 'ej Duy'laHbejmo' wa' nejwI', povjaj nejwI' cha'DIch vIlo'. tlhonDu'wIjDaq SeDveqqoq vIvev, vIjIrmoH, vIlel 'ej taSDaq 'oH vIvev. ghIq nejwI' qungDaq wej 'onroSmey vIchagh. jIloS... QIt DoqchoH yamtaw cha'DIch: teH. qo'vID wa'maH Hut vISIQchu'.

ropwIj tob nejwI'vam.

bangwI' vIrI' 'ej ghu'wIj vIDel. ghIq qorDu' Qel vIrI'. jatlh: «ropyaHmajDaq PCR wIlo'laH, vaj DaHjaj jughoSlaH.» ropwIj vItobchu' vIneH, ghaytan 'opleS lI'mo' Qoyje'. QaQmo' muD Dotlh 'ej jIbechqu'be'mo' QelwI' ropyaH vIjaH. jIyIt. cha'maH cha' tup lID. jIpawDI' pagh vIHot, 'a pa'Daq jIba'meH mutlhob rachwI'. tlhonDu'wIjDaq SeDveqqoq vev. qotlhqu' 'ach 'oy'be'. muja' qaSpu'DI' Soch jaj 'ej jIropbe'law'taHDI', vaj latlh tobmeH yaH vIghoSlaH. pa' javtIm luSamlaHbe'chugh, jIweghHa''egh net chaw'. qaSpa', juHwIjDaq jIwegh'eghnISbej.

vaj juHwIjDaq jIwegh'egh. jIHvaD qay'be'bej ghu'vam. jajvetlh choS murI' bangwI'. choghvat pa'Daq muloSlaw'lI' nobHey. 'ej pa' Soj law' vItu'! chatlh lungaSbogh cha' balmey, vIychorgh, wej na'ran wIb, tanje'rInmey, nIm wIb ngogh, Dargh, paSta' je tu'lu'. law'bej Soj! vabDot mutlhejlaHbe' bangwI', 'ach pe'vIl muQorgh. 💝

tugh jIpIvqa'jaj! 😷

 

loghjaj 'oH jajvam'e'. loQ 'oy'taH DubwIj DIrwIj je. loQ ghegh ghoghwIj. pIjHa' jItuSnIS, 'ej jIwuQbe'. vaj QIt jIpIvchoHba'lI'. chatlhDaj vI'epchu'ta'. 'ey'qu'! murachbej. 'a nom jIDoy'choH. jIvumqangbe' 'ej Do'Ha' paqmey vIlaD vIneHbe'taH. chaq wa'leS «cha' monmey» vIlaDtaH vIneHqa'. 'ach pIj HaSta much lut mIr vIbej: «'oQqarmey», «Qel QaQ», «rIq mortIy je» je vIbej. «HuD chang'eng» vIbejchoHpu' 'ach vIpar. DaHjaj «Hov leng: DISqa'vI'rIy» vIbejbej 'ej wa'leS «Hov leng: pIqarD» lut chu' vIbej vIneH. Dalbe'ba' pemmeywIj. 😄

'ach chay' mungejpu' javtIm? nuqDaq qaSpu'? jIna'be', 'a jI'IrlaH. wa' Hogh ret loghjaj qa'vIn Qe'Daq maghompu' bangwI' Deq ('aS'Il) jIH je. tulwI' Hol wIjatlhtaHvIS Dargh wItlhutlh, chab wISop, 'ej maja'chuq. chaq pa' mungejpu' qoro'na javtIm. 'ach ropbe' 'aS'Il. 'olta'. chaq ghInjaj tlhutlhmeH Soj ngevwI' vISuchDI', pagh DIngbogh Ha'DIbaH ngevwI' vIjaHDI' vay' vIHot 'ej mungejpu' javtIm. jISovlaHbe'bej, vaj jISaHqu'be'. Do' wejlogh qoro'na javtIm ngeb raS'IS vISIQta', vaj jIHvaD Qobqu'be' ropvam.

'ewropDaq qaS noH

wejHa' luSov Hoch, 'ach jIjatlhqa' vIneH: 'ewropDaq taghpu' noH. 'uqrayI'na HIvta' raSya' 'ej DaH Sepvam yotlI'.

po'wI' jIHbe'bejmo' ghu'vam vIQIjlaHchu'be', vaj loQ ghu'vam vIDellaH. wa' Hogh ret, loghjaj, 'uqrayI'na chanDaq «QI' tuH le'» tur pu'tIn, raSya' DevwI' 'ej SIbI' 'uqrayI'na yer HochDaq vengmey HIv raSya'. negh law' HoHpu', 'ach rewbe' motlh HoHpu' je. DaHjaj HIvtaH. wej rIn raSya' QI'. ghar 'e' lunID cha' Sep gharwI'pu', 'a wej wuq. DaH Hay'taH bIp law' 'ej po'lISqa'Daq, maDyarDaq, SIlovenISqa'Daq latlh SepmeyDaq je lulIgh Sam. DoyIchlanDaq pawta' je 'op. qo' putIn ta'mey qIch qo' HochHom 'ej raSya' bot 'e' lunID 'ewrop Sepmey law'. Hoch jaj 'arghtaH ghu'vam... pagh boQbej noHvam. bech 'uqrayI'nanganpu', 'ach bech je raSya'. 'ej bech je 'ewrop roj. DaH 'uqrayI'navaD nuHmey, Huch, ngaq je ngeHtaH Sepmey law', 'ej mangghomchajvaD vuyqu'law' Hoch. 'ach jatlh pu'tIn: «munchugh latlh Sepmey, woj nuHmeymaj vIlo'vIpbe'.» vaj DaH maHajnIS'a'? jISovbe', 'ach mughIjbej mu'meyDaj.

chorgh ben 'uqrayI'na wISuchta' jIH, bangwI' Deq je ('unay). ngugh DoyIchlan vIDab 'ej raSya' Dab ghaH. 'uqrayI'na wI'elmeH chaw' DIpoQbe'mo', monDajDaq wIghom. monvaD qIyIw vIpong, HolDaj QIch wab Ho'DoS vIpabtaHvIS. ngugh veng tlhop'a'Daq qaSlI' Daw' 'ach wej Qob. puH Dujmey lubotlu'. jo'ley' law' tu'lu', 'ewrop DIvI' joqwI' Qutlhbogh may'ron raS tu'lu', morghwI' law' tu'lu'bej je. 'ach Qobbe'law'. loplaw' Hoch, SepDaj DevwI' (yanuqo'wIch) lupajmoH luneHmo' morghtaHvIS. pa' maSaHtaHvIS mubelqu'moH Sepvetlh. naHHa'qu'bej ghotpu' 'ej poHmaj wItIvqu'. DaH HaSta jIH vIbejtaHvIS jISaQ vIneH, qIyIw ghu' vIleghDI'. valqu' 'ej yoHchu' DevwI'vam (SeleSqIy), lunaDqu'chu' tlhIngan.

DIS 2014 qIyIw «mayDan» tlhop'a'Daq DIS chu' wIlop

 

tugh HIvbe' raSya' mangghom 'ej roj 'e' vItulqu'.