robwIl

wa'Hu' ram jIQongtaHvIS robwIl vInaj. pIjHa' SuchtuvwIj vIqawlaH, 'ach wa'Hu' Suchtuv vIqaw. jInajtaHvIS DuSaQ'a'Daq jIHtaH 'ej ghItlh'a'wIj vIHubnIS. 'InternetDaq qaSbe', 'ach DuSaQ'a' ghojmeH pa'Daq qaS. SaHtaH 'a'ghenpu' law', 'ach chaH vIghovlaHbe'law'. 'ej mIyama Holmey vIrIchbe', 'ach qavqaS chan Holmey vIrIchnIS. jIbaw'Ha'chu' 'ej ghIHqu' mu'tlheghmey vIjatlhbogh. teywI' 'echletDaq DIpmey, mojaqmeychaj tetlh lughItlhlu'pu'. Holvam vIghovchu'be', chaq Darghan Hol 'oH. vaj 'a'ghenpu' HujvaD mojaqmeyvetlh vIQIj 'e' vInIDnIS. ghanchuq 'ej Huy'Du' wanHa'moH. rIntaHDI' SoQwIj, muyu'be'. loQ ja'chuq 'ej gher'ID muja': yonqu'be' 'a'ghenpu', 'ach jIQap, patlh wej vIchavta'. Dunbe', qabbe'. jISaQchoHlaw', ghIq jIvem.

Do' robwIl neH vISIQ. mubItmoHba' HubwIj lIb, 'ej jIjeQqu'be'bej. cha' Hogh pIq jIHub'eghnIS. Qapla'! 😬

magh yotlh wIjaH jIH 'ara'te je

wa'Hu' maghom jIH 'ara'te je. DuSaQ'a'wIjDaq HaDwI' ghaH je.

qen QaQqu'mo' muD Dotlh, HurDaq jul wItIv wIneH, vaj maghom. wa'DIch juHwIj ghoS 'ej cha' nav let 'aplo'mey munob, vItlhobpu'mo'. ghIq lupwI' wItIj 'ej ngengDaq Sumbogh magh yotlh wIghoS. jungwoq Du'Hom tlhopDaq tlhImmeymaj wIroQ 'ej maba'choH. 'ach mamobbe': qech nIb lughaj qabDu' law' 'ej qev botlhDaq malan'egh. wov jul, ghun rewve', 'ej tIvqu'moH pem naQ. latlhpu' rItta' 'ara'te, 'ach nutlhej pagh. qay'be'. maja'chuqtaHvIS qaS poH nI'. yoHqu' ghaH, ngeng bIQ bIrDaq Qalmo'. jIHvaD tlhoy bIr, 'ach bIrvIpbe'law' 'ewuSqa'nganpu'. maja'chuqtaHvIS leng Soj wISop 'ej wItlhutlh. Hogh pIq qoro'na javtIm raS'IS SIQ muja'. majQa'! 'ej Hogh pIq SuwISya' Suchqa' bangDaj. chaq murIt, vutwI' chong ghaHmo' bangDaj. toH... vutwI'na' ghaHbe'. QoQ jan ghojmoHwI' ghaH, 'ach vutchu'laHlaw'.

magh yotlhDaq maba'

 

DalchoHDI' magh yotlh, Dochmeymaj wItlhap 'ej belvIw yotlh wIjaH. pa' ngevwI' machvo' HIq wIje'. wornagh je' ghaH. ghIrep HIq Doq vIje' jIH. HurDaq waghqu' wa' bal jay'! tlho'ren bID bal vIDIlmeH cha'maH cha' 'ewro vInobnIS... Qu'vatlh! mumIpHa'moHbejlI' vengvam! ghIq nagh letlhDaq maba'choH, maja'chuqqa', 'ej matlhutlh 'e' wItIvqu', chumtaHvIS tlhom. vabDot chuSwI' wIlegh! DoyIchlan Hol jatlhbe'chu'mo' bepmo', nab wIwuq: DoyIchlan Hol ghojmeH ghaH vIboQchugh jIH, 'ewuSqa' Hol vIghojmeH muboQ ghaH. vaj pIj maghomrup!

'IHqu' tlhom chum!

SIbI'Ha' juHwIj vIcheghtaHvIS chalDaq pumtaHbogh chunDab vIlegh! meQchu'. ngogh chabal vIjIn net jallaH... 😊

relleghDaq lo'laH bangwI'!

jIqIDbe', relleghDaq lo'laHbej bangwI'! 🧠

toH... loQ jIqID. vIQIjbej:

ngongDI' tejpu', HochDIch jeSrup bangwI'. pa'logh 'oy' bopbogh ngonglu'DI' jeS ghaH. 'Iw HaDlu'DI' jeS je. QoghIjDu' poQDI' tejpu' jeS je. QaHlaHmo', vay' ghojlaHmo', Huch Hevmo' Quchqu'. DaH qaSqa' QeD ngong 'ej jeSqa' bangwI'. DoyIchlan yejHaDDaq Human yab QoghIj je HaDlu'. QoghIj De'wI' je rarchuqmoH luneH. ghIq De'wI' ra'meH QubnIS neH Human. 'opleS ghIv HutlhwI'vaD lI'qu' mIwvam. mIwvam lo'meH QaHbogh Hergh'e' tu'lu''a'? meqvam luqeltaH tejpu'. qaStaHvIS ngongvam, wa' rImbey (serotonin ponglu') luHaD.

jeSlaHpa' bangwI' lunuDnIS. 'IwDaj lunuD 'ej QoghIj lunuDmeH peQ HotlhwI' lulo'. Hoch pup, vaj jeSlaH. Hoghvam qaS ngongna'. Hoch jaj Hergh SopnIS, 'ach rImbeyna' Su'ghar qut neH yughbogh rImbey ngIb'e' ghap 'oH. ghIq nachDajDaq nochmey law' ngammoH. DeSDu'Daj nochmeyvetlh je tu'lu'. 'ul  ghIq latlh pa'Daq ba'nIS 'ej HaStaDaq DeSDu' mIlloghmey legh. rI'wI'vo' «poS», «nIH», «leS» ghap QoyDI' poSDaj ghop, nIHDaj ghop pagh pep pagh leSmoH 'e' jalnIS. yIlaDchu'! ghopDu'Daj vIHmoHbe' ghaH, 'ach jalnIS neH! jalDI' lughov nochmey 'ej HaStaDaq vIHchoH DeS lIlpu'bogh. torSIv 'oHlaw', 'ach teH! Hoghvam yejHaDvam ghoSnIS 'ej qaStaHvIS wej rep, jeSnIS. Hoch jaj loSmaH Hut 'ewro Hev. qabbe', qar'a'?

qatlh wanI'Daj vIrIch? Hu'ma... naDev qaSmo' pagh. jIQong. jIvum. jISop. tlhIngan Hol vIjatlh. Hogh ret cha' juppu' vIghom 'ej nItebHa' maja'chuq, HIq Doq wItlhutlhtaHvIS. pa'meywIj vISay'moHlI'. wej Hogh pIq muSuchmo' jItIvqu'! 😍

nochmey mIvDaj

SoSwI' HarqIn

pIvqu'be' SoSwI'. yab HarqIn ghaj, 'ej DaHjaj HarqInDaj vIrIch vIneH.

javmaH Hut ben boghpu' SoSwI' 'ej qaStaHvIS yInDaj ropqu'be'. 'ach loS ben Qapchu'be' yabDaj 'e' wItu'. be'nI'wI' vavwI' je chaH tlhojwI' wa'DIch'e'. ngugh qImbe'law' SoSwI' 'ej pIj Dochmey lIj. wa' jaj Soj ngevwI' qach jaHmeH qam Do Duj lo', 'ach cheghmeH yIt. pa' qam Do DujDaj verghpu' 'e' lIjba'. latlh jaj mIv tI' 'e' tlhob be'nI'wI'. pay' weSjech janDaj lo'be' SoSwI'. be'nI'wI' merqu'. ghIq yabDaj nuD Qel 'ej roplaw' yabDaj 'e' tu'. chay' rop? 'alSaymer HarqIn SIQ SoSwI'.

DaH qaStaH ropvam DIS wejDIch DIS loSDIch ghap. reH mIStaH. reH Dochmey nap lIj. reH luvnup SIQlaw'. majatlhtaHvIS mu'mey puS neH jang. juHchajDaq lumISmoH lojmItmey. reH QaHnIS vavwI'. pIjHa' nIteb puch lo'laH, vaj pIj loQ Seng. Hoch jaj SoSwI' QorghnIS vavwI', rut boQ be'nI'wI'. 'ej 'arghlI' HarqIn net Sov. 'alSaymer HarqIn luvorlaHbe' Qel. QIt ngablI' DI'on... DoyIchlan vIDabbe'mo' vavwI' vIboQlaHbe', jIH mu'IQmoHba' ngoDvam. qaStaHvIS Hogh wa'logh Such QorghwI' 'ej yI'var lutur. rut HurDaq yIt chaH. rut mIlloghmey ngo' legh 'ej DelnIS SoSwI'. rut Quj napqu' luQuj. QorghwI'vam parHa' SoSwI', 'ej qaStaHvIS yI'var, latlh Qu' DIghlaH. moghqu'bej vavwI', pIj bep. 'ej rut boH 'ej SoSwI' qun, 'ach pIch ghajbe'bej be'nalDaj, Qubchu'laHbe'mo'. jatlh vavwI'; po QaptaH SoSwI' yab, 'ej pov chImchoH 'ul 'aplo'qoqDaj. SIbI'Ha' QorghmeH juH DabnIS 'e' wISovbej. poHvetlh wIHajbej, 'ach vavwI'vaD qaq. QIt maw'choH 'e' vIyajchu' jIH. SaH'eghnIS je ghaH!

qatlh DaH HarqInDaj vIrIchtaH? cha' Hogh ret Sut choHtaHvIS qaw' SoSwI' 'ej 'IvtIH wa' mIn je banmoH. qay'qu'be' mInDaj, 'ach banmo' 'IvtIHDaj, yItlaHbe' 'ej 'oy' SIQ. qaStaHvIS wej jaj, ropyaH qachDaq ratlhnIS. lunuDta' Qelpu', 'ach ban neH; jatlh. 'oy'Ha'moHwI' Hergh ghupnIS. cha'Hu' chaH vIrI' 'ej maja'chuq. ngugh bechbe'law' SoSwI' 'ej jIHvaD jatlhlaH, vaj jIQuchchoH. 'ach qaytu'pu'wI'vaD QatlhchoHtaHmo' yIn, vIvupqu'. chaq waQ puS DoyIchlan vIchegh. wej jIbej. DISvam jar Soch jaj cha'maH SochDIch qoSDaj SochmaHDIch wIlopmeH jIcheghbej.

javtIm raS'IS wa'DIch SIQta' bangwI'

Hogh ret qo'rona javtIm ngeb raS'IS wa'DIch SIQta' bangwI'. DaH pIvqa', 'ach churmoHbogh gher'ID SIQnIS je.

Soj QeD HaDtaH bangwI', 'ej rut vengDaj ropyaH qachDaq vum. SIDpu' Suchbe', 'ach qawHaqDaq De' chelmeH De'wI' lo'. rut ghotpu' rI'nIS je. 'ach DoyIchlanDaq ropyaH qachDaq qo'rona javtIm raS'IS SIQlaH Hoch vumwI'. meqvetlhmo' buqjaj ret lurI' 'ej raS'IS SIQ. DIlnISbe'. raS'ISvam lIngpu' AstraZeneca. DungluQ raS'ISvam pochlu', ghIq juH chegh bangwI'. gher'ID qab SIQ QupwI'pu' law' net Sovmo', wejHa' Soj law' je'ta'. qaSchoHDI' ram, tujchoH porghDaj Hat 'ej wuQchoH ghaH. ropHey rur, 'ach motlh qaS net ja'. ramvetlh 'eqDI' QongDaq yong 'ej nom QongchoH.

jaj cha'DIch chur je. qaStaHvIS ram, bIrqu', vaj yIvbeH jeD tuQtaH 'ej vel'eghmeH wej tlhImmey lo'! pa' tujmoHwI' jan chu'ta' 'ej bIQ tuj qoch'uq bal lo'. 'ach bIrtaHlaw'. 'emnISbe', 'a churqu'be' burghDaj. 'oy' je ghIvDu'; jatlh. SoplaH 'ej Dargh tlhutlh. 'ach pemvetlh QIt churHa'choHlI'...

jaj wejDIch wuQbe' 'ej bIr 'e' jembe'. 'ach wej pIvlaw'. loQ wuQtaH 'ej mInDu'Daj vIHmoHtaHvIS – pagh mInDu'Daj DermoHtaHvIS? – 'oy'taH mInDu'. motlh raS'IS Seghvam SIQlu'pu'DI' qaStaHvIS cha', wej jaj roplaw' net jem, 'ach qaStaHvIS wa' Hogh naQ bech bangwI'. DaHjaj maja'chuq 'ej muja'; wuQbe', tujbe', bIrbe', 'a loQ 'oy'taH mInDu'.

 

'ach chaq QupwI'pu'vaD Qoblaw' AstraZeneca qoro'na javtIm raS'IS DaH net SovchoH. DoyIchlanDaq tuqjIjQa'Daq je ropchoH raS'ISvam SIQpu'bogh 'op ghot. loQ 'aDDu'chajDaq jeDchoH 'Iw, 'ej rut QoghIjDaq qaSpu'mo' Hegh ghot puS. HeghmoH'a' raS'ISvam? wej luSovchu' Qelpu' tejpu' je. reH pay' qaSlaH ropvetlh, vaj ghaytan qaSmoHbe' Herghvam. ghaytan quq, 'ach rarchuqbe'. tugh Sovlu' 'e' vItulqu'. 'opleS raS'IS vISIQ vIneHbej je, 'ach jIlImnIS vIneHbe'.

DoyIchlanDaq QupwI'pu'vaD AstraZeneca raS'IS pochbe'choHlu'. vaj raS'IS cha'DIch SIQnISDI' bangwI', ghaytan latlh malja' raS'IS SIQ. SuwISya''e'? naDev wej AstraZeneca raS'IS muchlu', latlh meqmo'. qaSpa' jar Soch raS'IS SIQlaH Hoch SuwISya'ngan. ngugh vISIQlaH je jIH 'e' vIHar. loQ vIHajbej. not qoHpu''e' neH lughIjlu'. chaq ngugh 'uchgha' raS'IS Segh vISIQlaH...