HaSta much DawI'Hom jIH!

DoyIchlan HaSta much chu'Daq DawI'Hom vImojpu'! DIS veb tuleghlaH. 😀

«baghlu'ta'» (DoyIchlan Hol: «Gefesselt») 'oH HaSta muchvam per'e' 'ej tera' DIS 2022 bID cha'DIch Amazon PrimeDaq bejlaH vay'. qaSlaw'taHvIS cha' tupmey vIleghlu'. ghu' vIDelnIS. Dajqu' lutvam, vaj peruch!

DoyIchlan Do ghItlhmeH Ho'DoS vIghItlhlaH 'e' boSov'a'? 'op ben vIghojchoH 'ej nom vIghItlhlaH. po'wI' jIHbe', vaj jatlhtaHvIS vay' mu'meyDaj vIghItlhlaHchu'be', 'ach nom buSHachmeywIj vIgherlaH. rut lI' laHvam. 'ej lI' je cha' Hogh ret! qabpaqDaq Do ghItlhmeH Ho'DoS bopbogh ghomDaq ghelpu' vay'; jatlh: «layIpSISDaq Do ghItlhwI' tu'lu''a'? HaSta much wIqontaH 'ej Do ghItlhmeH Ho'DoS Sovbogh DawI'Hom wInejtaH.» poH vIghaj 'ej HaSta jIH vIleghlu' 'e' vItIvqu'mo' jISap. jISapta'DI' muja': «Gefesselt» HaSta much qonlu'lI' 'ej HeS teH bop. loQ vIDel vIneH: DIS 1992 HamburghDaq 'op be' jonta' loD, ghIq wutlhpa'Daq wegh 'ej ghongqu'. chot 'ej pey qeghDaq lommeyDaj vev. ghIq Du'HomDajDaq qeghmeyvetlh molta'. 'ach wa' be' jonHa'pu' 'ej chotwI' pum ghaH. bo'DIj pa' 'ay' 'oH 'ay''e' qonlu'lI'bogh.

➊ jaj wa'DIch vaS vIjaH. pa' ghotpu' law' tu'lu', latlh DawI'Hompu' chaHlaw'. DIS 1992-vaD mItbogh jech luwuv jechmoHwI'pu'. bo'DIj Do ghItlhwI' vIDanIS jIH 'ej bo'DIj bejwI'pu' chaH latlh'e'. vaj jIHvaD malja' Sut SeQ luwuvpu'. Du'ranwIjDaq loch ngeb lungammoH. tlhoy vurmo' neqratlhwIj, neqratlh ngo' munob luneH, 'ach neqratlhna' vIHutlhDI' pagh vIleghlaHmo' latlh qech vIchup: neqratlh ngevwI' ghaHmo' be'nI'wI''e', ghaH vItlhoblaH. chaq neqratlh ngo' vIlo'laHbogh ghaj. 'ej bIlugh: neqratlh ngo' ghajbej be'nI'wI' 'ej tlhoS vIleghlaHchu' 'oH vIlo'taHvIS. 'ej juHwIjvo' buq ngo' vIqeng je.

ngebba' lochwIj!

➋ jaj cha'DIch po jIchegh 'ej buqwIj ngo'mo', neqratlhwIj ngo'mo' Quchqu' jechmoHwI'pu'. 'ach qabbogh De' chu' muja': Do ghItlhwI' Da be' 'e' poQ DevwI'. vaj bejwI' neH vIDanIS. wIyqap cha'DIch muba'moH 'ej jIH retlhDaq be'nalqoqwI' luba' (SIbI'Ha' pongDaj vIghoj; naDev ghaHvaD 'eqyIrneH vIpong). qaStaHvIS pem Hoch bo'DIj pa' ghu'Hom qonlu'. bo'DIj pIn'a' tu'lu', chotwI' tu'lu', HubwI'Daj tu'lu' je. jIH be'nalqoqwI' tlhopDaq ba'taH jIb tIqHa' ghajbogh be' run'e', ghan'Iq QulwI' ghaH 'ej mayevtaHvIS loQ maja'chuq. bo'DIj pa'Daq wa' jantor je tu'lu'. jantor ghaH be'vetlh, 'ach pa'logh be'vetlh jonta' chotwI', chotbe', ghIq jonHa'pu'. taQ ghu'vam. 'ej pIj qID chotwI' HubwI', 'ej qIDmeyDajmo' maHaghnIS maH. 'oplogh HaSta much Hoch 'ay'Hom luqonlu'. chaq wa'maHlogh, cha'maHlogh wa' mu'tlhegh wIQoynIS, luqonlu'taHvIS. Hochlogh loQ qonwI' Daq luchoH. yItlhbej je DevwI'. reH qon, ghIq qonta' 'ej pIjHa' Quchqu'law'. 'ach pIj maloSnIS qaStaHvIS poH nI'. pa' megh wISoplaH je, 'ach 'ey'qu'be'. qaS wa'maH rep maqontaHvIS.

bo'DIj pa'qoqDaq DarupchoH Hoch

➌ jaj wejDIch bo'DIj pa'Daq latlh ghu' qonlu' 'ej quSwIjDaq jIba'qa'. 'ach nuqDaq ghaHtaH be'nalqoqwI''e'? Qaghlaw'pu' DevwI' boQpu' (mIt, Sena'Hoy, 'an'aH je). qay'qu' ghu'vam. tlhoS Qay' DevwI'. 'ach lurI' 'ej qaSpu'DI' cha' rep paw. tagha'. mayevtaHvIS maja'chuq 'ej mumerqu' wa' De': noybej chotwI' DawI' — Oliver Masucci ghaH 'ej «Hurgh» lut mIrvaD Data'. pIj mIghwI'pu' Dalaw'. taQqu' wa' ghu' qonlu'ta'bogh: jantor qoghDaq tlhup chotwI'; pe'vIlHa' jatlh: «ghongwI' QaQ jIH.» 😱

➍ jaj loSDIch latlh bo'DIj pem wIqon. vaj latlh Sut vItuQnIS 'ej latlh quSDaq maba' jIH be'nalqoqwI' je. Do' nI'qu'be' pemvam. muyIvqu'bej loch ngeb jay'!

mubelqu'moH Qu'vetlh. chaq 'opleS latlh HaSta much qonlu'taHvIS DawI'Hom vImojqa' vIneH. Huch puS neH vIHev, 'a Dajqu'. HaSta jIHDaq vIbejlu' 'e' vItIv je. HaSta lut mIrvam'e' — Dajqu' je 'ej muchlu'DI' SIbI' bejnIS Hoch!

De'chel; DoyIchlan Hol boyajchugh 'ej HeSvam teH boQoy boneHchugh, vaj bIngDaq bo'IjlaH:

De'wI'Daq bIQ vIQoy'moHpu'...

'op Hu' qaSpu' lot, 'a Do' tagha' jIDo'qu'. qaStaHvIS ram «Soj tlhol» qep cherta' ghunchu'wI'. pa' tlhIngan Hol neH jatlhlu' 'ej Dochmey law' DIrIch. 'amerI'qa' SepjIjQa'ngan ghaHmo' ghunchu'wI', pa' qaSDI' choS qepvam cher, vaj 'ewropDaq qaS ram. mo'vammo' pIjHa' jIjeS, 'ach ramvam jIjeS. loQ ghIrep HIq Doq vItlhutlh, weQmey vImeQ, 'ej raSwIjDaq bIQ HIvje' tIn vIlanpu' je. ramvetlh wej jeSwI'pu', loS jeSwI'pu' maH 'ej maja'chuq. ghIq... pay' bIQ HIvje' vIqaw'moH, pe'vIl jIjatlhmo' 'ej Sawlay vIlo'law'mo'. vaj De'wI'HomwIj nItlh 'echletDaq bIQ law' vIQoy'moH. law'bej bIQ 'ej SIbI' jIlImchoH 'a nom jIvang. «bIQ vIQoy'! jImejnIS!» jIjatlh. ghIq 'ul rarwI' vIteq (potlhqu' net Sov!). vutpa'wIjvo' QaDmoHwI' nav vIqem 'ej nom bIQ vIbummoH. law'bej bIQ. De'wI'wIj vIchu'Ha' je 'ach 'epIl De'wI' 'oHmo' reH chu''egh, yuvtlhe' vIpoSmoHDI'. ghuy'cha'!

ramvetlh vIchu'qa'be' 'ach tujmoHwI' retlhDaq vIyoymoH. pem veb vengwIjDaq De'wI' tI'wI'vaD vInob 'ej nuDchu' ghaH. reH ghu'vam vIHajbej. Do' 'engqoqDaq De'wIj potlh HochHom tu'lu', 'a Hochna' 'oHbe'. waghqu'bej je 'epIl De'wI'. 'ach jaj veb murI' tI'wI'. «bIDo'qu'! De'wI'lIj wIpoSmoH 'ej loQ yIQ. 'a bIQ Hoch wIQaDta' 'ej Qapchu'taH. DaHjaj DawoHlaH.» muja'. jIDo'qu'bej! 'ej lutI'nISbe'mo' tI'wI'pu', 39 'ewro neH vInobnIS.

DaH Qapchu'taH, 'ach → leQ vI'uyDI' rIS tlhen. qay'be' 'e' vItul...

berlIn QujmeH qep, QeD torSIv wab ta je

ghItlh chu' vIqon vIneH 'ach 'opHu' qaS vay', vaj vIrIchnIS, latlh wanI' vIrIchpa', qar'a'?

toH... berlInDaq qaSpu' «LUDO» (Quj). QujmeH qep 'oH 'ej qaSmoHpu' jupwI'. tulwI' Hol jatlhwI' ghaH, 'ach qepmey qaSmoH 'e' tIvqu'. vIqar'eghnISmoH: berlInDaq qaSbe', 'ach Halbe'Daq qaSpu' «LUDO». berlInDaq 'oHbogh vengHom 'oH 'ej pa' manggha qach je'ta' wa' tulwI' Hol jatlhwI' 'ej qepmeH qach chenmoHta'. pa' De'wI' QujmeH qep lucherta' ghaH latlh je. jan Qujmey ngo', jan Qujmey chu' je QujlaH jeSwI'pu'. 'ej jIjeS je jIH! vItIvqu'! naH jajmeywIj Qujmey law' vIQujpu'.

jeS je bIraSIw jupwI'. DaH berlInDaq qabpaqDaq vum, 'ach Qujmey tIv je, vaj matay'taHvIS majeS. mangghaDaq QujmeH janmey law' tu'lu'. wej roDSer jan tu'lu' je, 'ej vIlo' 'e' vItIvqu'! nachwIjDaq janvam vItuQchoH 'ej 'aplo'mey vISIjmeH 'otlh 'etlh vIlo'nIS, QoQ vIQoytaHvIS. «Beat Saber» (jaghIv yan) 'oH Qujvam pong'e'. ghIq «Worms» (gharghmey) wIQuj jIH latlh tulwI' Hom jatlhwI'pu' je. nubelqu'moHbej! tugh De'wI'wIjDaq Qujvam vIjom vIneH je, ghIq bangwI' latlh QujwI'pu' je vISuvlaH! jeSpu' je puqpu' 'ej Suv reH 'e' poQ wa' loDHom, «Mortal Kombat» (jubbe'wI' may'). Qujvam vItIv je, 'ach vIpo'qu'be'. wa' jaj «Top Gear» (Do nIv?) wIQuj wa' jup jIH je. nubelqu'moH je Qujvam.

Do qaDmeH puH Dujmey DISeDnIS.

Halbe'Daq jISaHtaHvIS wa' pa'Daq jIQonglaH 'ej pa' Qong je bIraSIw jupwI' je. 'opleS jIchegh vIneHqu'. DISvam qaSbe'mo' «JES» (tulwI' Hol QupwI'pu' qep), chaq qaStaHvIS «LUDO» wejDIch wIjeSlaH jIH bangwI' je, vaj chaq berlIn vIchegh...

qaSpu'DI' «LUDO», berlIn vIjaH 'ej pa' wa' jup loDnI'Daj je vISuch 'ej loDnI'Daj pa'meyDaq wab ta wIqonta'. Holmey 'oghlu'ta'bogh DIrIch 'ej loQ Hov leng wIrIch. tlhIngan vIQIj 'ej romuluS Hol vIrIch je. DoyIchlan Hol DajatlhlaHchugh, vaj wab tamaj boQoylaH — «Fantastische Wissenschaftlichkeit» (QeD rorgh) 'oH wab tameychaj per'e'! tlhaQqu' 'ej Dajqu' 'e' vIDambej! reH QeD, QeD torSIv lujatlh marta, tlhuba je. 'ej wab tameychaj vI'Ij 'e' vItIvqu', Dajmo' 'ej tlhaQmo'. pIj Haghqu' marta 'ej reH muQuchmoH HaghtaHghachDaj. wab tameychaj vIchupqu'laH! Hov leng: vo'yajer, Hov leng: DISqa'vI'rIy je rIch je. Dajqu', vaj tI'Ij! ngop vISay'moHtaHvIS pagh Du'Hommaj pormey vIyIrtaHvIS, reH marta, tlhuba je wab tamey vIQoy 'ej vItIvqu'. reH jajwIj luDublaH. 'ej tagha' Ho'pu'wI' vISuchlaH. wab tamaj wIqontaHvIS, pIj Hagh marta 'ej chulbej tlhuba, maja'chuqtaHvIS. 'ej maqonta'DI', nepal Qe' wIjaH 'ej pa' maSoptaHvIS, pe'vIl maja'chuq. ramvam vItIvqu' net jallaHbej!

tlhIngan Hol je wIrIchpu'!

ngabpu' DISqa'vI'rIy jay'!

DaHjaj nIteb juH pa'meywIjDaq jISaHtaH, vaj Hov leng vIbejmeH pup pemvam. 'ach 'eQ 'IQmoHbogh De' chu' vItu': Hov leng: DISqa'vI'rIy peSbe'choH Netflix 'e' raD Paramount jay'! DIS veb HaSta much peSmeH tum tlhIn chenmoHlu' 'ej Paramount+ ponglu'. meqvetlhmo' QIt tumvetlhDaq Hov leng luQollaw'lI'. jajwIj 'arghbej ghu'vam.

'oplogh Hov leng Hoch vIbejta' net Sov. 'ej wa'leS Hov leng: DISqa'vI'rIy DIS loSDIch muchlu' net Sov je. DISDaj loSDIch vIbejchoHpa' HaSta lut mIr Hoch vIbej vIneH, qabmo' qawwIj (net Sov je). 'ej 'eSpanya' Hol laHwIj vIDubmeH NetflixDaq 'eSpanya' Hol vIlo'. 'eSpanya' Hol puq poH veb vIbejta', ghIq logh Hop Hut tengchaH, vo'yajer je vIbejta' 'ej vItIvqu'! laHwIj Dubpu'bej Ho'DoSvam. HochHom vIyajlaH 'ej latlhDaq 'eSpanya' Hol vIlaD qoj vIQoy, vaj tlhoS Hoch vIyaj je. majQa'! Hov leng: HaSta much wa'DIch vIbejlI' (DISDaj wejDIch vIbam), 'ej Do' NetflixDaq SaHtaH. DISqa'vI'rIy DIS wejDIch vIbejchoHpu', 'ach DaH Soch lutmey vIHutlhba', 'ej lIb DISDaj loSDIch. ghu'vam vIlajQo' jay'! woghba' Paramount! 😭

ngabba'pu' DISqa'vI'rIy!

tlhIngan Hol mughbogh permey ngaS DISDaj wa'DIch net Sov, qar'a'? Dach je permeyvetlh. QI'yaH!

DaH Hov leng: DISqa'vI'rIy vIbejmeH, nuqDaq 'eSpanya' Hol vIlo'laH? Sov'a' vay'?

tlhapragh yupma'

'opHu' qaSpu' «tlhapragh yupma'» 'ej majech'egh bangwI' jIH je. yupma'vetlhmo' not jIjech'egh, DoyIchlan yupma' 'oHbe'mo' 'ej motlh jech'egh puqpu'. 'ach jech'egh 'e' tIvqu' bangwI' 'ej Hoch nab. vengDajDaq malop. 'Il'ev, jupDaj juHDaq maghom. pa' latlh juppu' DImuv. maba', maja'chuq, maHagh, maSop 'ej matlhutlh. maghaqmeH pItSa' chab le' wIvut. chay' le'? toH... motlhbe'bej, pItSa' chab beQ rurbe'mo', 'ach luHDu' rur! qoDDaq qurme'mey vIvevta' 'ej yorDaq qettlhup wIlIch, vaj loQ 'Iw rur. Hoch ghIj gher'ID, 'a 'ey'qu' pItSa' luHDu' chabmaj.

luHDu'qoq chab

'ej chay' majech'egh? toH, rachwI' jech tuQmoH bangwI' 'ej loy'qu'bej! 'InternetDaq mIlloghDaj 'angqangbe'mo' naDev qabDaj vISo'nIS. jIH'e', 'ejyo' HIp vItuQmoH; qIrq HoD vIrur. mamI' 'e' wInabmo' pu'HIch, Hoqra', QumwI' ngo' joq vIqengbe', 'ach qabwIjDaq tI'rIlngan 'oDtu'mey DIj bangwI'. jI'IHbe''a'? Do'Ha' poH wIHutlh, vaj mongwIjDaq 'oDtu'mey DIDIjbe'.

'etlhna' Sogh, telraQ rachwI' je 😜

qaSDI' ramjep, mI'meH vaS wIjaH. «Дружба» (Klub Drushba) 'oH vaSvetlh pong'e'. tInqu'be', 'ach law' mI'wI'pu'. QoQ vImaSqu'bogh lumuch, vaj jImI' 'e' vItIvqu'! tera' DISmey rav 1980 'aqroS 1999 QoQ lumuch. 'eyqu'bej! mamI' 'ej loQ HIq wItlhutlhqa' 'ej poHmaj wItIvbej. pa' jech'egh latlh je. jImI'taHvIS loQ jIpum 'ej nIHwIj DeS vI'oy'moHpu'. DaHjaj loQ 'oy'taH. loSlogh Qoylu'pu'DI' mamej 'ej juH wIchegh. Dunqu'bej ramvetlh!

DoyIchlan vIcheghta'!

wa' wen DoyIchlan vIcheghqa'. DaH SuwISya' vIDabbe'choHpu'.

ghorgh? jar Hut, jaj wa'maH wejDIch SuwISya' juHwIj vImejpu' 'ej DoyIchlan vIDabqu'.

qatlh? toH... meqmey law' tu'lu':

• rop SoSwI' 'ej QorghnISmo' vavwI' 'Itqu'. vaj qaytu'pu'wI' vIboQ vIneH. ghaytan 'op nem yInbe' SoSwI'.
  
• chaq tej vIgheSqa' vIneHbe', 'ach wej jIna'. Qu' chu' vISamnIS 'ej SuwISya'Daq tlhoy wagh yIn vumbe'lu'DI'. juH qach ghajmo' qorDu'wI' naDev jIratlh 'ej Qu' vISam vIneH. naDev qav'ap vIDIlnISbe'.
• DoyIchlan Dab je bangwI' 'ej ghaHDaq jISum vIneH.

chay'? lut nI' 'oHbej...

juHwIj ngo'Daq paqmey law' vIghajpu' net Sov. mu'ghommey pab paqmey je vIboS, vaj vatlh law' vIghaj. meqvetlhmo' Qatlh lengwIj. chay' paymeywIj Hoch vIluplaH? qabpaqDaq jItlhob 'ej QaHwI' vItu'. 'IqqIr 'oH pongDaj'e', tuqjIjQa'ngan ghaH 'ej qaSpa' qoro'na javtIm lot, QoQ ngop DIngmoH, 'ach DaH nuvpu' QaH. puH Duj tIn SeD, tlhoS tongDuj 'oH. qoDDaq Hoch vIlanlaH 'ej jIHvaD DoyIchlanDaq lupqang. lengDaj vIDIlmeH 640 SuwISya' DeQ neH vInobnIS. law'bej Huchvam, 'ach chuq'a' lIDnIS je. vaj jIlaj.

muboQ bangwI' HoS!

jItlheDpa' muSuchpu' bangwI' 'ej pe'vIl muboQta'. wa'maH Soch 'aplo'mey vIlo' 'ej DochmeywIj DIqatta'. law'qu' Dochmey 'ej 'ughbej. qav'ap juHwIj DabchoHpa' DabwI' chu', Hoch wISay'nISmoH 'ej HochHom wISay'moHta'. jaj wa'maH wejDIch po nughoS 'IqqIr 'ej tongDujDajDaq Hoch 'aplo'mey DIqem. tlheDpu'DI' ghaH, nughoS DabwI' chu' ('al'en, be' ghaH), SoSDaj je. 'olwI' ngeHpu' qav'ap juH malja' 'ej pa'meywIj 'olchu'. ravngI'mey Hoch nuDchu'. yorghwIj vISay'nISqa'moH. 'ej poH wIHutlhmo' bangwI' jIH je, Qorwagh baS HurghmoHwI' wISay'moHbe'pu'. bep 'olwI' 'ej vaj Say'moHwI' po' wIDIlnIS. yItlhbej be'vetlh. 'ach yItlhHa'law' DabwI' chu', bepbe'mo'.

mab wIqI'pu'DI' matlheD bangwI' jIH je. wejHa' HIjlI' 'IqqIr, cha' buqmey DIluplI' maH. jungwoq Qe'Daq megh wISop. ghIq lupwI' SuD, lupwI' mIr je DItIj. SuwISya' vImejta'mo' 'ej ghaytan vIDabqa'be'mo' loQ jI'IQchoH 'ej ngonDer vISIQ. juHwIj ngo' vIcheghrup, vaj tagh yInwIj 'ay' chu'. bangwI' veng cheghnIS ghaH, 'ach jIruch 'ej vengwIjDaq muloStaH vavwI'. puH Duj ghaj, vaj juHmajDaq muqem. pa' loQ maja'chuq 'ach jIDoy'qu'mo', qaSpu'DI' poH ngaj, choQwIjDaq letlh vISal. pa' 'aplo'meywIj vItu' 'ej ngaQba'. maj. Qapla'! Qapba'pu' 'IqqIr Qu'.

toH... layIpSIS veng vIDabqa'! 😊

DoyIchlanDaq laplu'

qaStaHvIS poH nI' QonoSwIj vIqonbe', 'ach jIpIv 'ej jIQuch! 'op Hu' SuwISya' vImej 'ej DaH DoyIchlan vIDabqa'. SIbIHa' lutvam vIrIch... DaHjaj latlh De' chu' vIDel vIneH: laplI' DoyIchlan!

DaHjaj woQ ghom wIvnIS DoyIchlan. qaStaHvIS wa'maH jav DISmey Sepmaj che' CDU 'ej che'wI' ghaH Angela Merkel'e'. DoyIchlan Qang ghaH, 'ej pIj ghaHvaD «Sep SoSoy» ponglu'. DaH paj neH Angela Merkel, 'ej chaq latlh woQ ghom wIvqang DoyIchlan roghvaH. loSmaH woQ ghommey tu'lu', 'ach potlh 'op neH. Do'Ha' qum bopbogh mu'mey law' Hutlh tlhIngan Hol, vaj Qatlhqu' ghommey DelmeH Qu'...

lapmeH navvamDaq cha' me'cheD ghItlhnISlu'.

• «QIStoS lalDan DIvI'» 'oH CDU/CSU'e'. loQ notlh qangtlhInmeychaj. woQ yutlheghDaq botlh nIH je jojDaq chaHtaH. mIghbe'bej 'ach Har'eynganpu' tlhogh lulajchu'be', novpu' law' lajbe' je. pIj CDU HoS law' latlh woQ ghommey HoS puS.
• «DoyIchlan jIj woQ ghom» 'oHlaw' SPD'e'. HoS je ghomvam, 'ej loQ yejquv poSDaq tu'lu'. qay'be' 'e' vIDam, qangtlhInwIj 'oS qangtlhInchaj je.
• «SuDwI'pu'» bIH Bündnis 90/Die Grünen'e'. chaHvaD potlhqu' 'umber, 'ej yejquv poSDaq tu'lu' je. 'ul butvaD Huch lughaq, ghantoH: SuS 'ul, bIQ 'ul. ghav laSvargh mutlhHa' luneH.
• «DoyIchlan DIvI' woQ ghom» 'oH FDP'e'. chaHvaD potlhqu'law' Huch 'ej mIpwI'vaD QaQ woQ ghomvam.
• chaq AfDvaD «DoyIchlan panwI'pu' chu'» ponglaH vay'. mIgh. nIHDaq ba' 'ej notlhqu'bej qangtlhInchaj. novpu' muS, Har'eynganpu' par, 'ej ghomtaHvIS yejquv reH qoHpu' QeH Da.
• «poS woQ ghom» 'oH Die Linke'e'. poSDaq ba'ba' 'ej loQ SPD lurur.

Qatlhchugh wIvmeH Qu', «Wahl-O-Mat» lo'laH Hoch. jIHvaD 'op ghom chup, 'ach ghommey machqu' vIwIvqangbe'. qangtlhInwIj 'oSqu'mo' SuDwI'pu', vaj SuDwI'pu' vIwIv, jIlaptaHvIS. DoyIchlan Hol Dajatlhchugh, janvam yInID!

'ej chay' malap? toH... Hochlogh jaj wa' 'oH lapmeH jaj'e', 'ej rav chorghvatlh rep 'aqroS wa'maH chorghvatlh rep Sumbogh qach jaHlaH Hoch lapwI'. pIj DuSaQ 'oH. DuSaQwIj DeqDaq jIlappu' je jIH. jIngu''eghnIS, ghIq lapmeH nav vIHev 'ej mep tlhoy' 'emDaq jIba' 'ej me'cheD vIghItlh. ghIq jIngu''eghqa'nIS 'ej 'aplo'Daq navwIj vIchagh. rIn.

DuSaQwIj DeqDaq jIlappu'.

Hov leng DISjajwIj!

«Hov leng» bop jajwIj Hoch! 'op meq vIrIch vIneH. peqIm!

(1)

cha'maH Hut ben «Hov leng» vIlle' vImoj! tera' DIS 1992, jar chorgh, jaj cha'maH chorghDIch, 16:05 rep, DoyIchlanDaq «Hov leng: puq poH veb» «DIlmeH Huch» much HaSta jIH Se' cha'DIch. qaSpa' wanI'Homvam 'u'vetlh vISovbe'chu'. 'ach mujatlh cham parHa'bogh vavwI''e':

«DuvuQ HovQeD, qar'a'? DaH logh bopbogh lut mIr much HaSta jIH. 'entepray' 'oH Duj pong'e'. Dabej DaneH'a'?»

vIbej vIneHbej! vaj jIHvaD lut wa'DIch 'oH lutvam'e'. 'ej qabbe'law'. logh mIn bop lutvam. ngugh Hov leng vImuSHa'choH 'ej Hoch lut vIbej. DISvetlh qaStaHvIS QISmaS, Hov leng bopbogh nobmey vIHev: Hoqra', pu'HIch, 'entepray' velqa', paqmey. jIQuchqu'ba'! 😊

poSchoH logh mIn 'e' lubej 'entepray' yaSpu'.

(2)

DaHjaj Hov leng lut chorghvatlhDIch vIbejta'! «Hov leng: choQ 'eS» wa' lut 'oH 'ej 'oHvaD «reH tam pa'rIS wIghajtaH» ponglu'. tlhaQ 'ej vItIv. choQ 'eS tlhaQ law' latlh Hov leng lut mIrmey tlhaQ puS. nom jatlhlu' je, 'ej pIj lut mIrmey vorgh bop qIDmeyDaj. lutvam vIbejtaHvIS loQ pIqaD leghlu'. mIlloghDaq yIbej. bolaDlaH'a'?

tlhIngan lutmey pong

(3)

(tlhoS) Hoch jar qaS SuwISya' QeD torSIv bopbogh qep'e', «Galactic Alliance» (qIb boq). jIHvaD Qav qepvam, vaj loQ jI'IQ. pIj cha'maH pagh wejmaH nuvpu' maH, 'ach DaHjaj Hut boqwI' neH maH. mutlhej cha' juppu': Qam SIqIl'ev je. reH So'vISe pItSa' chab Qe'Daq maghom 'ej pIj Hov leng, latlh logh torSIv 'u'mey je DIrIch. DaHjaj «pe'bIl», «DC», «Marvel» je DIrIch jIH, Qam, SIqIl'ev je. 'InternetDaq mIlloghmey boleghlaH. tlhIngan Hol yIvbeH vItuQtaH. mughov'a'? 😋

pa' 'eybej pItSa' chab, 'ach 'Iq tlhagh

latlh De' chu': qoSDaj cha'DIch lop be'nI'wI' vIghro'. jagh lucharghlu'ta'bogh HuH namwechDu'lIj lungaSjaj, mIylo! tugh maghomqa'! 😺

Qel vISuchqa'ta'

cha'Hu' QelwI' vISuchqa'ta'. chaq boqawtaH: jar jav cha' rajma' naghHommey vISIQpu'. tugh latlh naghHommey chenmoH rajma'Du'wI' 'e' vIHajmo' Qel vISuch 'ej munuDqa'. chaDvay' vItlh wab noch lo' 'ej chorwIj Hotlh. Do' latlh naghHommey tu'lu'be'law', vaj qaStaHvIS poH veb 'oy'vetlh vISIQnISbe'. cha' naghHommeywIj vIpol 'ej QelvaD vI'ang. Daj 'e' Dam. bIH poj Qulpa' 'e' chup, 'ach tugh SuwISya' vIDabbe'mo' maruchbe'. 'opleS DoyIchlanDaq naghHommeywIj vIpojmoHlaHbej. 'apraQ luyughchugh, ghaytan qay' wa' rImbey 'ej QIt HomDu'wIjvo' 'apraQ teq. jarvam jar veb je rajma'Du'wIj vIQepnISbe'. maj.

'ej HuH 'enDeq nuD je Qel. 'op ben mIyamaDaq, mangtayDaq, vItnamDaq jIHtaHvIS 'oy'pu' chorwIj Dop 'ej tlhaw HuH 'enDeqwIj net tu'. tlhIngan Hol mu'na' 'oHbe'mo' HuH 'enDeq'e', vIDel: 'enDeq mach 'oH 'ej tlhagh rIDmeH taS lIng. SuD taS net Sov 'ej HuH rurlaw'. ngugh tlhaw HuH 'enDeq 'ej muvor Hergh. cha'Hu' Qel vISuchDI' HuH 'enDeqwIj HotlhmeH chaDvay' vItlh wab noch lo'. Sovchu'be'mo' latlh Qel rI' 'ej jIH lubej cha'. naghHom ngaSbe'law' HuH 'enDeqwIj, 'ach wa' ghul nu' lulegh. nu'chugh HuH 'enDeq ghul, vaj qay'be'. 'ach machchoHchugh HuH 'enDeq naQ teq HaqwI' net chup. meqvetlhmo' DoyIchlan vIcheghDI' ngIq DIS wa'logh HuH 'enDeqwIj nuDnIS Qel.

yaq rebma' je

loSHu' cha' juppu' vIghomqa': yaq rebma' je. chaH 'Iv? 'op ben SuwISya' DuSaQ'a'Daq HaDwI'pu'vaD HolQeD wImuch jIH latlh Holtejpu' je. reH muchmeyvetlh vItIvqu'. nucholpu' wa' HaDwI'. be'Hom ghaHlaw' 'ej tIqHa' jIbDaj. ghaHvaD Dajlaw' HolQeD DIvI' Hol QeD je 'ej qaStaHvIS poH nI' maja'chuq 'ej maHagh. ngugh juppu'na' wImoj. pIj maghom 'ej nItebHa' maSop, mavum, maja'chuq... reH jajwIj wovmoHlaH. rebma' 'oH parmaqqayDaj pong'e' 'ej ne'Derlangan ghaH. rI'Qe* vengHom luDab cha' be'pu'vam. pIj vIngngerteDaq bommeH tach wIjaHta' pagh yaq vav qav'ap juHDaq HaSta much DIbejta'.

wa' ben belghIya' luDabchoH 'ej DaH Hop. Hoghvam SuwISya' luSuchqa' 'ej maghommeH 'eb wIjon! tlhu'rI wa' paq ngevwI' qachDaq maghom 'ej SubwayDaq tIr ngogh DISop. ghIq tlhutlhmeH Soj DIje' 'ej juHwIj wISuch. DuckTales wIbej 'e' wInab, 'ach Do'Ha' yapbe' poHmaj, vaj NetflixDaq «Pui Pui Molcar» «Molang» je DIbej. wej HaSta lut mIrmeyvam boSovchugh vaj SIbI' bobejnISqu'!

rebma', yaq, jIH je

*) Sep veng je pongmey'e' (tlhoS) reH Sung permey lo' tlhIngan Hol net Sov. mIwvam vImaS je jIH. SuwISya'Daq loS Holmey lujatlhlu', 'ach Sep Hol Sarmey lutu'lu' je. meqvetlhmo' Hochlogh vengmeyvaD Sung per vIpongchu'. ghantoH: Rikon 'oH vengHomchaj pong'e', vaj tlhIngan Hol vIlo'taHvIS 'oHvaD rIyqon vIponglaHbej. 'ach [ˈrik͡χə] vengHom Sungpu', vaj rI'Qe vIlo' 'e' vIwuq. rut 'Internet Daqvam vIlo', Hoch Hol Sarmey vIjatlhbe'ba'mo'. vaj permeyvam vIchup:

• Zürich → tlhu'rI
• Bern → ber'In
• Basel → ba'Sel
• Genf → jenev
• Lausanne → loSan
• Winterthur → vIngngerte
• Fluntern → vIluntere
• Oerlikon → 'erlIQe
• Schaffhausen → Savvu'Se
• St. Gallen → Sangqa'le
• Glarus → ghIla'rIS
• Schlieren → SIlye're
• Horgen → Horghe
• Seebach → Se'baH
• Adliswil → 'atlhISvIl
• Jona → yo'ne
• Chur → quy'ra
• Fribourg → vIrIbwa'
• Neuchâtel → neSatel
• Luzern → lotSe'rIn
• Lugano → lI'ghang
• Biel → bIyew
• Thun → tun
• La Chaux-de-Fonds → laSoDvong
• Schwyz → SuvItlh
• ... 

wa'vatlh ben boghpu' Hov leng 'oghwI'

DaHjaj potlhwI' qoS wa'vatlhDIch wIloplaH. qoSDaj tlhIn loplaHbe' potlhwI'vetlh, Heghpu'mo'. Gene Roddenberry vIrIchba'taH.

Hov leng 'oghwI' 'entepray' je

wa'vatlh ben teqSaSDaq boghpu' 'ej tera' DIS 1966 «Hov leng» 'oghta'. tlhIngan Hol 'oghbe'bej, 'ach Hov leng wIHutlh net jalchugh, tlhInganpu' tu'lu'be' 'ej meqvetlhmo' Holchaj 'oghbe'ba' marq 'oqranD.

naH jajmeywIj Hov leng vIbejchoH 'ej SIbI' vImuSHa'choH. ngotlhwI' vImoj 'ej DaH ngotlhwI' jIHbejtaH. Hoch vIbejta' 'ej vIbejqa'ta'. 'u'qoq'e' chenmoHta'bogh wIghvam vIQej 'ej 'u'qoq chenmoHta'bogh wIghvam'e' vInaD. yInwIj SIghchu'pu'. jIHvaD QeD DajmoH 'ej Hov lengmo' QaQ Human tuch 'e' vItul. reH Human nugh SIla' lu'oS je lutmeyDaj.

meqmeyvetlhmo' potlhwI'vam vItlho'qu'. qoSDaj wIlopjaj! 🙌

DoyIchlanDaq jIHqa'taH (Hogh wejDIch)

DaH SuwISya'Daq jISaHqa' 'ej tagha' Hogh wejDIch vIDellaH. peqIm!

Soch Hu' vengwIj Hu wISuch jIH bangwI' je. tuj jajvetlh 'ej wov jul. law'qu' Ha'DIbaHmey 'ej Hoch DIleghlaHbe'. vaj qa'put 'e'levan je DISuchbe'. 'a bo'Deghmey DIparHa'qu'mo', qaStaHvIS poH nI' bo'Degh qachmeyDaq maHtaH. mo' tIn 'oH wa' bo'Degh qach'e' 'ej qoDDaq maba'laH 'ej maH tlhopDaq puvtaH 'aSralya' parbIng. SuDqu' HochHom 'ej SuD 'ej wov 'op. nubelqu'moH. 'ej reH jawtaH parbIngpu'vetlh parbIngmeyvetlh. 🐦 Do'Ha' bIQDep qach wI'ellaHbe' tI'lu'lI'mo'. ghonDavana' yuwey'a' qachDaq maSaHtaHvIS bIQ DujHom leng wItIv je. mamejDI' 'oy'qu' 'uSDu'maj mayItqu'pu'mo'.

vabDot tlhoy 'avrI'qa' Ha'DIbaHmeyvaD tuj muD Dotlh!

SIbI'Ha' DuSaQ'a'Daq Sumbogh HaDwI' tach wIjaH. pa' nuloS bangwI' jup, lu'ap. tugh paw je jupwI', 'enIbaS. ben law' wa' DuSaQDaq maghoj 'enIbaS jIH je. ngugh ghaH vISaHqu' 'a not bangpu' DImoj. qatlh maghom loS? tach Sov qaD 'oH meqmaj'e'! reH Sov qaDmey vItIvqu'! 'ej HochHey SuvwI'pu' maH 'enIbaS, lu'ap, jIH je. 😎 ghommajvaD «Norıyah!» wIpong. chaq tachDaq wa'maH vagh ghommey tu'lu'. wejmaHlogh nughelpu' cherwI'. navDaq majangnIS 'ej cherwI'vaD navmaj vInobnIS. wej 'ay'mey yugh qaD. meq lI' bopbe' 'ay' wa'DIch, 'ej wa'maHlogh nughel cherwI'. Qatlhqu'be'mo' Hochlogh malugh, vaj 'ay' wa'DIchDaq maQap 'ej maHvaD chertIS HIq HIvje'Hommey nob. majQa'! QoQ bop 'ay' cha'DIch 'ej Qatlhqu'bej! vabDot Sovbe' targhwIj 'enIbaS. wejlogh neH malugh. va. 'ach yuQQeD leng je bop 'ay' wejDIch 'ej leng po'wI' maHlaw' jIH, lu'ap, 'enIbaS je. wa'maHlogh nughel 'ej chorghlogh malugh. mayevpu'DI' QapwI''a' maqlu': «Norıyah!» maQapchu'! ghommajvaD 'evlu' 'ej pop nunobta': macheghDI' tachvamDaq vay' wIDIlchugh vagh 'ewro DInobnISbe' maH loS. maj! vaj 'opleS macheghbej. 🏆

ghInjaj malopqa'. Ha'leDaq qaSmo' mI'meH yupma' 'ej tagha' mamI'qa'laH! majeS jIH bangwI' je. 'ej jeS je cha' be'pu'. chaHvaD lIj 'alwap je vIpong. bangwI' jup lI' ghaH lIj'e'. parmaqna' chaHbe', 'ach... ghaytan SIbI'Ha' qay'be'chu'bogh ghu'vetlh vIDel. lIj jupna' ghaH 'alwap'e'. mI'meH tachDaq waghqu'mo' HIq, bangwI' qav'ap juHDaq HIq law' wItlhutlh. mabaw''eghmoH, qar'a'? 🍻🍷🍹🍸🍺 machechDI' ram matlheD 'ej mI'meH tach wIghoS. So're vaS 'oH perDaj'e'. tera' maH DIS poH HutmaH, maH DIS poH pagh QoQ tlhenlu'. law' qabDu', 'a Do' 'Iqbe'. 'ej HojnIy tu'lu'be' je. mamI' 'ej HIq wItlhutlhqa'. jIH'e', QoQ ngo' vImaS, 'a qay'be'. tugh tachvam parchoH 'alwap 'ej latlh mI'meH yupma' wIjaH 'e' chup. pale'te 'oH tachvetlh per'e'. mubelmoH QoQchaj, loQ ngo'mo'. vaj mamI'qa' 'ej maHvaD HIq je'ta' 'alwap jup. cha'logh Qoylu'DI' juH luchegh cha' be'pu'. pujwI'pu'! 😂 wej maDoy' jIH bangwI' je, vaj mamI'taH. vaghlogh Qoylu'DI' macheghchoH. bangwI' chuch law' jIH chuch puS, 'ach mapIv 'ej maSengbe'. juHDajDaq bIQ law' wItlhutlh 'ej SIbI' maQongchoH. pem veb loQ ma'uH, vaj pagh maDIgh. juHDaq maratlh 'ej HaSta muchmey DIbej neH. quSlabvo' Hu' neHbe'mo' bangwI', ghaHvaD Soj vIvut jIH. 😊 Dunqu'bej ramvam 'ej 'opleS mI'meH tach wIjaHqa'laH 'e' wItul!

mI'meH tach wa'DIch

Hoghvam povjaj SuwISya' vIchegh jIH. mulup lupwI' SuD 🚌 'ej naghHom ghImbe'mo' rajma'wIj leng vItIvlaH. jar Hut, jaj wa'maH wejDIch SuwISya' vImej 'ej DoyIchlan vIDabqa'.

 

DoyIchlanDaq jIHqa'taH (Hogh cha'DIch)

DaHjaj Hogh vorgh vIrIch. tera' poH jar chorgh, jaj wa'DIch Ha'le Dabbogh bangwI' vISuch. 'ej luSuch je be'nI'Daj (neyaD), be'nI'Daj bangwI' (SIQ) je. motlh 'ervut luDab. neyaD vIqIHpu', 'ach wej SIQ vISovpu'. naSHa'law' 'ej tlhaQ. jajvetlh Ha'leDaq Quj vaS wISuch 'ej pa' tlhIngan Hol per Hutlhbogh Quj'e' wIQuj. vaj vIDelnIS. peqIm!

yavDaq QujmeH moQ machqu' tu'lu'. baS naQ tIq 'uch ngIq QujwI' 'ej naQ tIq megh'anDaq baS 'echlet mach tu'lu'. QemjIqDaq moQ vo'meH naQvetlh lo' QujwI'. wa'loH moQ vo'lu'DI' wa'logh pe''eghlu'. pIjHa' moQ vo'nISlu'chugh, Qaplu'. Qujvam cha' Sar vISov: magh yotlhmey tInDaq wa' Quj Sar Qujlu'. rut QemjIq pawmeH wa'vatlh 'uj'a' lIDnIS QujmeH moQ. 'ach latlh Quj Sar wIQuj. wa' 'uj'a' cha' 'uj'a' ghap 'aD Hoch yotlh. vaj chuq'a' wIlIDnISbe'. wa' vaSDaq 'oH Quj Hoch'e'.

'ach motlhbe'qu' vaSvetlh! Hurgh 'ej pa'mey wovmoH tamghay'e' tlhoS luleghlaHbe' Human. 'ach wovqu'moH rItlh Doq rItlh SuD je. pa' reDmeyDaq jorchanmey luDIjlu'pu' 'ej SIntlhermey, QelIS boqHarmey, logh may', bIQ beb bIng qo' luDIjlu'pu'. 'IHbej! 'ej tamghay 'IH parHa'qu' bangwI'. maQujtaHvIS neqratlh DItuQ. rItlh DoqvaD rItlh SuDvaD je wej roDSer rurmoH neqratlhmeyvetlh. mIlloghmey vIqonta' 'ach Do'Ha' DI'ruj 'oSlaHchu'be'. rInDI' tuch wIjaH 'ej loQ HIq wItlhutlh maja'chuqtaHvIS.

chumbej qo'vam 'ej logh mInHey ngaS!

DaSjaj 'ervut lucheghpu'DI' neyaD SIQ je, HaSta much qach wIjaH jIH bangwI' je. tagha' HaSta much qach Suchqa'laH vay'! «qan» 'oH HaSta muchvam pong'e'. nuq bop? DaqavDaq ghIQ 'op ghIQwI' 'ej pay' qaS poymar: nom qanchoH 'op. HaSta muchvam qech vItIv QeD torSIv vIparHa'qu'mo', 'ach meq Hutlh ghIQwI'pu' 'ej ja'chuqtaHvIS QIplaw'. loQ maw' much 'ej bong tlhaQ.

buqjaj qorDu'wIj Du'HomDaq vavwI' vIboQ 'ej qet'uymey vIboS 'ej bartIqHommey ngo' vIpe'. motlh Du'Hom Qu'mey vItIvbe', 'ach QoQ vI'IjtaHvIS jIbel. 'ej SaH be'nI'wI' vIghro'! 'IHqu' qabDaj! tunqu' veDDaj! tIqHa' 'uSDu'Daj! loy' je! vaj pIj vIyachlaH. juHwIjDaq jIHtaHvIS «yIDHa'» vIbej. HaSta lut mIr ngaj 'oH 'ej bejlu'meH Netflix lo'lu'. loS lutmey neH ghaj, 'ej jIHvaD luchuppu' bangwI' DeSDu' je. pIj Hol yID lujatlh 'ej vabDot jIHvaD Qatlhqu' yajmeH Qu'. DoyIchlan Hol vIjatlhlaH 'ej rurqu' Hol yID net Sov, 'a nom jatlh DawI'pu' 'ej yISra'el Hol law' lulo'. toH... lut mIr vItIv 'ej HochvaD vIchup.

mIylo 'oH pongDaj'e'

ghInjaj vorgh Ha'le vIchegh 'ej maghomqa' jIH bangwI' je, qaSmo' qep. wej qepvam vIQIjrupbe', ghaytan 'opleS ghItlh tlhIn vIqonnIS, loQ Qatlhmo' qoj taQmo' meq. 'ach Dajqu' qep 'ej nuvpu' Daj DIqIH. rInDI' tuch wIjaH. pa' 'eyqu' HIq! muDuQqu' paSjav HIq mach.

'ey HIqmeymaj

DoyIchlanDaq jIHqa'taH (Hogh wa'DIch)

qaStaHvIS wej Hogh DoyIchlan vISuchqa'taH. SoSwI' qoS SochmaHDIch 'oH meq'e'. DaH loQ cha' Hoghmey vorgh vIDel vIneH.

tera' poH jar Soch, jaj cha'maH SochDIch SoSwI' qoS SochmaHDIch wIlop jIH, vavwI', SoSwI', be'nI'wI', lorbe'wI', bangwI'. potlhmo' qoSvam, juH vIchegh. jajvetlh po Soj je'meH tlheD vavwI' 'ej vItlhej. ngevwI' qach'a'Daq Qe' tu'lu' je, vaj pa' megh wISop. macheghpu'DI' loQ jIleS vIneH, 'ach buy'qu'mo' burghwIj, SIbI' jIQongchoH jIQotDI'. juHwIj lojmItDaq pawDI' bangwI', pe'vIl jIvem 'ej yInbogh lom vIrurlaw'. meqvetlhmo' motlh not pov jIQong. mumISqu'moH ghu'vetlh. choS maghIr 'ej SoSwI' wIHoy'. ngonbogh HIq wItlhutlh. ghIq loQ maje'meH Paunsdorf Center wIjaH jIH be'nI'wI', bangwI' je. 'ach jaj veb lopna' wIcher. po SoSma'vaD, vavma'vaD nIQ'a' wIchenmoH jIH be'nI'wI' je, 'ej nuboQ bangwI'. tIr ngogh baQ je'ta' be'nI'wI', qa'vIn pubmoH vavwI', 'ej nIm wIb ngogh, qulcher, naHmey, Ha'DIbaH baylaDmey, vIychorgh je wIje'ta' je. batlh wISop Hoch. pov jIvumnIS, DaH Dene SutlhIne' Hol wab tameymaj wISay'nISmoHmo' DuSaQ'a' jInmolmaj Holtejpu'. choS maghomqa' qorDu'maj 'ej Du'HommajDaq 'uQ wIvut 'ej wISop. tlhIngan mu'na' tu'lu'be'law', 'ach ghu'vetlh Sovlu'bej: baS jan wIghaj, qoDDaq ghav vevlu', 'ej tlhat lanlu', vaj ghav meQlu', ghIq tlhatDaq Ha'DIbaH, naHmey, tIr ngogh joq lanlu'. 'eyqu' 'ej qaStaHvIS qImroq tuj, mItqu'.

jaj veb jIH muquchta' bangwI' 'ej layIpSIHDaq mutlhejmoH. jInmolDaj vISovbe'chu'. tugh beb Qe' wIpaw. pa'vo' 'IHqu' jorchan wIleghlaHbogh, 'ej 'eyqu' Soj. tIr ngoghmey Sar, tlhagh patat 'oQqar naQHommey je wISop 'ej na'ran rurbogh HIq chum wItlhutlh. pa' HIvje'He chu'taHvIS bom be', 'ey ghoghDaj 'ej bommey ngo' vISovbogh je jIH bommo' jIbel. vengvam vIDabqa'DI' pIj Qe'vam lururbogh Qe'meyvetlh'e' vISuchtaH vIneHbej!

'uQmaj

buqjajvetlh mavumnISqa' jIH bangwI' je, ghIq pov vengDaq maghomqa'. vengwIjDaq vIghro' Qe'Hom tu'lu'. pa' Soj SoptaHvIS vIghro'mey yachlaH vay'. mubelqu'moHbej, vIghro' vIparHa'qu'mo'. ngugh mutlhej bangwI' jup, 'ISnan. tlhoS QoylaHbe', 'ach nachDajDaq jan ghaj, vaj QoylaH. maSop 'ej maja'chuq. Ha'le paq nojwI' qachDaq vum 'ISnan. tugh Qu'na' chu' vISamnISmo', Daq muchup — DoyIchlan botlh De' tamey tum. wej 'Internet Daqchaj vInuD, 'ach chaq pa' jIvumlaH. Dajlaw'. chaq vabDot Holmey laHwIj vIlo'laH?

vIghro' vIyach 'e' vItIvqu' net Sov...

jar Soch jaj HochDIch malengqa' jIH bangwI' je. vengwIjDaq Sum vengHom, na'wunHov 'oH pongDaj'e'. lengvam nabta' 'aSyIl. jupna'wI' 'ej wa' bangwI' Deq ghaH. tulwI' Hol jatlh je 'ej layIpSIH mangghaDaq maghom tulwI' Hol jatlhwI'pu'. jav nuv maH: jIH, bangwI', 'aSyIl, 'oynuS, DIv'eD, QID je. wej DIv'eD vIqIH, 'ach Dajlaw'. nuyorghDaq boghpu', ye'naDaq barat 'ewrop je HolQeD HaDta' 'ej DaH layIpSIHDaq mughwI' ghaH. na'wunHovDaq mayIt 'ej ngem wItol 'ej cha' ngengmey HeHDaq maba' 'ej leng Sojmaj wISop. pup jajvetlh muD Dotlh 'ej 'IH je jorchan. qaStaHvIS jajvetlh wa'netlh chorghSaD Hutvatlh wa'maH cha'logh jIgho'pu' 'e' juv QumwI'. malengtaHvIS reH tulwI' Hol wIjatlh. 'ej jatlh je bangwI'. taghwI' ghaH, 'ej Holvetlh ghojlI', 'a HochHom yaj 'ej QIt jatlhlaH. muHemmoH ghaH. 😌 naDev jIDabqa'taHvIS pIj tulwI' Hol wIjatlhmeH 'eb wIghaj 'e' vItulqu'. tulwI' jIHba'. 😉

ngeng Ho'taH 'oynuS

DaH yap. wa'leS HoghwIj cha'DIch vIDel.

qep'a' cha'maH chorghDIch

cha' Hogh ret qaSpu' qep'a' cha'maH chorghDIch. qoro'na javtImmo' DI'rujDaq qaSbe', 'a 'InternetDaq qaSpu'; DIS vorgh rur. DISqoDDaq ghom tlhIngan Hol jatlhwI'pu' law'qu'. ja'chuqlu', ghojlu', muchlu', mI'lu', bomlu'. ngugh SuwISya'Daq jIHtaH 'ej jIjeSbej je!

qep'a'vam yIvbeH!

 

ghItlhmeH janmey rIchta' DeSDu'. muchDaj vItIvqu', ghItlhmeH jan ngo' vIghaj je jIH. vavwI' wutlhDaq tu'lu' 'ej ghaytan rItlh Hutlh qoSta', 'ach Qapbej. latlh jaj tera' jeqqIj pIqcho' Qujmey rIch je DeSDu'. Do'Ha' jIjeSlaHbe', 'ach Do' 'InternetDaq HaSta taDaj vIbejlaH. qachmey'e' renta'bogh Le Corbusier rIchtaHvIS jIjeSqa'laH, 'ach jIH muvuQqu'be' qach meHghem. SuwISya' qurbuSwI' gha ghotvam 'e' luSov mo'rISqa' hol Sar jatswI'pu' 'ej SuwISya' wa'ma DeQ huch navDaq qabDaj leghla. 😉

qaStaHvIS qep'a', pIj poS jawmeH pa' 'ej ghom jeSwI'pu'. maja'chuqmeH tlhIngan Hol DIvI' Hol je DIlo', 'a jIHvaD Dajqu' tlhIngan Hol ja'chuqghachmey, vaj pIj vImuv. Dochmey law' DIrIch 'ej rut HIq wItlhutlh qoj Soj wISop. jeSpu' je jatlhwI'pu' wej vISovbogh. wa' ram qaStaHvIS loS repmey tlhIngan Hol neH vIjatlh, vaj loQ jIHem. 😌

DISvam law'qu' mu'mey chu''e' peSta'bogh marq 'oqranD! muQuchqu'moH ghu'vam, 'ach Do'Ha' chabalwIj («automatically») mughpu'be' Ho'maj. 'ach tagha' mangtay vIrIchlaH! mangtay Hol pongDaj tutlhHa' 'oH เมืองไทย'e' ([mɯ̄ə̯ŋ ˈtʰāj] qollu'), vaj mItbej pongvam. marq wIyu'meH 'eb tu'lu' je. loQ mu'mey chu', pab je QIjpu', 'ach matlh ghelnISqa'law'.

jIHvaD Dajqu' wa' much. Har'eyngan bopbogh mu'mey lurIchlu'. Har'eynganpu' 'Iv? toH... mu' ghoQ 'oH 'ej nuvpu' tlhIn Del, ghantoH: be' muSHa'bogh be', loD muSHa'bogh loD, loD be' je lubuvHa'lu'bogh boghDI', jInay'ngan rurbogh nuvpu', DopwI'pu', taH taH taH... tera'Daq joqwI' chum lulo'mo', DaH chaHvaD «Har'eynganpu'» lupong qabDu' law'. mItbej mu'vam 'e' vIDam! 🌈

jaj wejDIch jeS Mary Chieffo! «Hov leng: DISqa'vI'rIy» lIr'el DawI' ghaH! yu' Qov. Dajqu' wanI'vam! tlhIngan Hol qollaHchu' 'ej tlhIngan DameH qeqqu'. tlhInganpu' bopbogh Hoch HaSta lut bejta' 'ej Holmey parHa'mo' tlhIngan Hol QIch wab Ho'DoS ghojchu'ta'. majQa'!

lIr'el Qang, Human DawI'Daj je

rInpa' qep'a', muchmey law much jeSwI'pu'. bomlu' 'ej wIHaghlu'moH. muchmeyvetlh vItIvqu'bej.

De'chel... cha'logh tlhIngan Hol patlh qaD vIqaDta' 'ej jIQapta'! rut jIQaghpu', 'ach DaH Hol patlh ghojwI' jIH. ghaytan wa'nem tlhIngan Hol patlh wejDIch vIqaDrup. Qapla'!

rajma' naghHom vISIQpu'!

Hay'DelberghDaq jIghIQ cha'leS 'e' vIrIch, qar'a'? 'ach jajwIj Qav vIDelbe', qaSpu'mo' lotHom. DaH tagha' lotHomvetlh vIrIchrup...

ngugh jIHu'pa' loQ 'oy' chorwIj. 'oy'qu'be', 'a jIchur. nItebHa' nIQ wISop 'anay' jIH je, 'ach vIychorgh neH vItlhutlh, Soj Sub vISopqangbe'mo'. ghIq jItlheD 'ej manggha vIjaH. jIpawDI' ghurchoH chor 'oy'wIj. 'oy'qu'choH. jIropchoH'a'? 'oy'wIj Hal vIperlaHchu'be'. 'oy''a' luHwIj? 'oy''a' turmIq 'enDeqwIj? 'oy''a' latlh 'ay'? jISovbe'... manggha tlhopDaq lupwI' SuD vItIj. pa'vo' SuwISya' vIchegh 'e' vInID. 'ach lupwI'Daq jIba'taHvIS 'oy' vISIQbe'choH. 'oy'mo' chorwIj nIH 'eS, lo'laHbe'bogh luH 'ay'Homvetlh vIpIH. tlhawchugh pagh jorchugh qay'qu'laH. vaj lupwI' SeDwI'pu' vIja' «'oy'qu' chorwIj. jISIQlaHbe'. veng vebDaq jItIjHa' 'ej ropyaH qach vI'elnIS.» — 'Italya'ngan chaH 'ej DoyIchlan Hol jatlhlaHchu'be', vaj 'Italya' Hol laHwIj QIv vIlo'nIS jay'. Do' «l'appendice» mu'vam vISov. SIbI' muyaj SeDwI'pu'. ropyaH qach vIrI' 'ej veng vebDaq mapawDI' ropyaH puH Duj vI'ellaH. qa'lISru 'oH veng pong'e'. 😖

puH DujDaq jIQotlaH 'ej munuD cha' Qelpu'. chorwIj Hot wa' 'ach mu'oy'moHbe'mo' «qay'be'law' luHlIj» jatlh. ropyaH qachDaq muluptaHvIS puH Duj, QIt nup 'oy'wIj. mapawDI' jIyItqa'laH. loQ 'oy'taH, 'a jIchergh. pa' tIqwIj joqmeH mIw nuDlu', 'IwwIj yInSIp juvlu', 'op 'Iw tlhaplu'. Qatlhqu' 'IwwIj tlhapmeH mIw, reH So''eghmo' DeSwIj paw'aDDu'. tagha' latlh pa'Daq muDev Qel'a' 'ej chorwIj munuD, chaDvay' vItlh wab jan lo'taHvIS. qay'be' luHwIj, 'ach Senglaw' rajma'wIj! 😱 nIH rajma'vo' lengchoHlaw'pu' naghHom 'ej QIt turmIq 'enDeq ghoS. mu'oy'qu'moHba' lengDaj! 'ej leng rIntaHDI' SIbI' 'oy'be'choH jatlh Qel. ghIq 'enDeqwIjDaq naghHomvam Samchu'. machqu', chaq 0.003 'uj neH 'aD. 'ej machqu'mo' ghaytan mu'oy'qa'be'. bIQ law' vItlhutlhDI' vujlu' neH jatlh. buy' ngop! 'ej pIvlaw' 'IwwIj, 'ach loQ vItlh 'apraQ'e' ngaSbogh 'Iw. chen rajma' naghHom chaq 'e' boQ. 'opleS latlh Qel vISuchnISlaw'.

ghIq lupwI' mIr 'elmeH chaw' chu' vIje'nIS 'ej juHwIj vIjaHqa'. 'ej 'oy'be'taHvIS jIpawchu'ta'. juHwIjDaq qIvon vIbelmoHtaHvIS cha' naghHommey luvujlu'! Doq 'ej wovbe'. 0.003 × 0.006 'uj 'aD wa' naghHom 'ej 0.006 × 0.006 'uj 'aD latlh naghHom. loQ mughIj ghu'vetlh. chaq rajma'Du'wIjDaq So''egh latlh naghHommey? 'op ben mIyamaDaq jIHtaHvIS 'oy' je chorwIj 'ej ropyaH qachDaq HuH 'enDeqwIjDaq, rajma'Du'wIjDaq naghHommey lutu'lu' net tu'.

cha' rajma' naghHommey, Huch jengva' je

Hay'DelberghDaq jIghIQ

Hoghvam Hay'DelberghDaq jIghIQ. qaStaHvIS loS jaj pa' jupwI' vISuch. 'anay' 'oH jupvetlh pongqoq'e' 'ej bangwI' Deq ghaH, 'ach jupna' maHtaH. logh HapQeD HaDta' 'ej DaH Hay'DelberghDaq HovQeD yejHaDDaq vum. qaStaHvIS cha' DIS maghombe', tagha' DuHqa'! 'op ben matay'taHvIS reH tulwI' Hol neH wIjatlh, raSya'ngan ghaHmo' 'ej DoyIchlangan jIHmo'. tera' DIS 2012 vIraSDaq tulwI' Hol qepDaq maqIHchuqpu'...

vengDaj vIpawmeH lupwI' SuD vIlo', qutlhmo'. nIteb Dab 'anay', 'ach jIHvaD meb pa' ghaj. Do'Ha' pe'vIl vumnIS, vaj rut nIteb veng vISuchnIS jIH. jIpawpu'DI' 'uQ wISop 'ej maja'chuqqu'. bangDaj chu' wIrIch, yab HarqInHeyDaj wIrIch, Qu'Daj wIrIch je. yejHaDDaq 'u' tat chenqa'ghach HaDtaH. ghIq maDoy'qu' 'ej maQong.

Hay'Delbergh QI ngo'

jaj cha'DIch vengDaj mucha' 'anay'. Qe'HomDaq chatlh wI'ep, jul wItIv, veng ngo' wISuch 'ej maleSmeH magh yotlhDaq maba'. vumnISmo', juHDaj chegh 'ej nIteb jIruch jIH. qay'be'. paq ngevwI' law' vISuch. bangwI'vaD 'uSgheb 'ISjaH vIje'pu' 'ej jIHvaD Hol yID pab paq ngo' vIje'pu'. Holvetlh vIghojbe', 'a pab paqmey mu'ghommey je vIboS net Sov. 'IHbej vengvetlh, HaDwI' law' tu'lu'. jIcheghpu'DI' jupwI' juHDaq Quj wIQuj.

jaj wejDIch yejHaD jaHnISmo' jupwI', nIteb vengDaq jIyItqa'. taw tIq vIghoS 'ej 'op Qe'Daq jISop. qaStaHvIS choS latlh jup vIqIH — naDev ghaHvaD luwap vIpong. 'Internet ghommo' maSovchuq. mayIt 'ej loQ maSop 'ej matlhutlh, ghIq «qangtlhIn HaDwI' tawHom» mucha' 'ej pa' mayIt. macheghmeH 'ul Do DujHommey wISeD. DujHommeyvetlh boSov'a'? cha' rutlh mach ghaj, 'echletDaq Qamlu', 'ul lulo', 'ej DaH 'op vengDaq ngIplaH vay'. luDIlnISlu' 'a waghqu'be'.

ram jorchan

jaj loSDIch poH ghajbe'qa' jupwI', vaj nIteb jem'IH vISuch. 'IHqu', 'ej qoDDaq Hergh ngevwI' 'angweD tu'lu'. Hoch vIbej, ghIq 'anay' vIchegh. Soj wIvutqangbe'mo' nIpon Soj wIvun. ray' tIr Duq, naH qatbogh ray' tIr tut vISop. maQongpa' Do qaD Quj wIQuj.

jIH Hay'Delbergh je

 

jaj veb SuwISya' vIcheghnIS, 'ach qaSpu' lotHom... vaj ghItlh veb vIqonDI' wanI'vetlh vIrIch vIneH.

pItlh!

«chuch qul je bom» paq wa'DIch vIlaDta'

qen «quS'a' Quj» HaSta lut mIr vIbejta' net Sov, 'ej ngotlhwI''a' vImojpu'. mubelqu'moH qo'Daj, qunDaj, tuqmeyDaj, ghotpu'Daj je. ghIq, qaStaHvIS cha'maH loS jaj paq'e' qonta'bogh George R.R. Martin vIlaDlI', 'ej DaHjaj rIn. «chuch qul je bom» 'oH paq lut pong'e'. paq wa'DIch pong neH 'oH «quS'a' Quj»'e'. nIb HaSta lut mIr DIS wa'DIch paq wa'DIch je. 'ej (tlhoS) nIbbej lutmeyDaj 'e' vItIvqu'. vIlaDtaHvIS ghotpu' qun, buSHach, ngoQ vIyajqu'laH.

«quS'a' Quj»

loQ nIbbe' lutmey. HaSta lut mIrDaq 'IH Tommen Baratheon, 'ej qab motlh ghaj Tyrion Lannister, 'ach moH chaH 'e' Del paq. Doq 'ej SuD mInDu' Targaryen tuqnIghpu' 'e' Del je paq, 'a HaStaDaq mInDu' motlh ghaj. paq ghotpu' Qup law' HaSta ghotpu' Qup puS, 'ach vIlajlaHbej. Qupqu'taHvIS nga'chuq 'op ghot, 'ej HaSta jIHvaD mItbe'bej.

lutDaj vIja'qa' vIneHbe'. nI'qu' lut 'ej Qatlhqu'. law'qu' ghotpu'. vIlaDtaHvIS jIQubtaH: 'Iv tuq vImaSqu'? — Qatlhqu' jangmeH Qu'. ghaytan Stark tuq lumaS laDwI'pu' law', ghotpu' QaQ chaHmo' tuqnIghDaj law'qu''e' 'ej tlhab luQej. tlhab vIQejbej je jIH, 'ach tuqchaj tuqnIgh jIH not 'e' vIjallaH. jIHvaD Dajqu' Lannister, Targaryen tuqmey. wej vIwIv. 'opleS tuq Degh yIvbeH vIje' vIneH, vaj vIje'pa' tuq vIwIvnIS.

'op Hu' jupwI', SIqela', vISuchta'. qen 'oberghlat DabchoH. vengHom 'IH 'oH, 'a 'IHbe' juH qachDaj. 'ach qoDDaq 'IH juH pa'meyDaj. SaH je bangDaj, nIvlem. nItebHa' pItSa' chab wIvut 'ej wISop. «chuch qul je bom» paqmey Hoch ghaj SIqela', vaj paq cha'DIch mungIppu'. «qaDchuq ta'pu'» 'oH pongDaj'e'. chaq DaHjaj wa'leS vIlaDchoH... tlhoS jIloSqangbe'. 😃

SoSwI' bopbogh De' chu'

SoSwI' bopbogh De' chu' vI'otHa'pa' mubopbogh De' chu' vImaq vIneH: porghwIjDaq qoro'na javtIm raS'IS cha'DIch pochlu'ta'DI' qaSpu' poH yap, vaj DaH DIbmey Hoch vIghajchoH! 'ej muQanchu' raS'ISvetlh. majQa'!

DaH SoSwI' vIrIch vIneH. chaq boSovtaH: yab HarqIn SIQ SoSwI', vaj Hoch lIjtaH. SabtaH yabDaj Hoch laHmey. 'ej 'op Hogh ret ropyaH qach 'elnIS, qaw'pu'mo' 'ej 'IvtIHDaj 'oy'moHpu'mo'. Hom ghorbe' ngugh net Qub, 'ach SIbI'Ha' SuDchoH DIrDaj 'ej pujchoH porghDaj. SuDchoH je mInDu'Daj 'ay' chIS, vaj ropyaH qach 'el 'e' chup QorghwI'pu'Daj (Hoch jaj po QaHmeH juHchaj luSuch). vaj ropyaH qach lu'elmoH. pa' SoSwI' lunuDchu' 'ej qaSpu'DI' 'op jaj, cha' gher'ID tu'lu':

1. qay' chejDaj net tu'. chej mej'aD botlu'law', vaj SuDchoH DIrDaj mInDu'Daj je. luHaq 'ej chej mej'aDvetlhDaq tlhat tut luvev luneH. baS yughbogh tut nu' 'oH 'ej mej'aDDaq lanlu'ta'DI', Sach 'ej ghItmoHchu'. 'ach luHaqchoHpa' lunuDDI' botbe'law' mej'aDDaj net tu'. qay'be' chejDaj 'ej motlhchoH DIrDaj mInDu'Daj. loQ pIvchoH SoSwI' porghDaj.
2. 'uS nev'obDaj Hom ghorpu'bej net tu'! nachqoq mongqoq je ghaj Homvetlh 'ej qaw'pu'DI' Homvetlh mongqoq ghorpu'law'. ghu'vetlhmo' yIttaHvIS 'oy'qu'law' 'IvtIHDaj. Homvetlh nachqoq mongqoq je qa' baS qa'meH 'e' luchup Qelpu', 'ej mIlloghmey leghpu'DI' vavwI' SIbI' laj. bovmaj Do' Hoch jaj Haqvam lutur Qelpu', vaj Qatlhbe'bej. 'ej Qapchu'! DaH baS yugh 'uS nev'ob Hom 'ay' 'ej 'oy'be'law'. Qapla'!

qaStaHvIS wej Hogh ropyaH qach Dabpu' SoSwI', 'ej wa'Hu' juH cheghlaH. maghommeH Skype wIlo' 'ej vaj SoSwI'vaD jIjatlhqa'laH. 'oy'be' 'IvtIHDaj, 'ach mISqu' yabDaj. maja'chuqtaHvIS rut latlh lurghmey Qeq 'ej meghDaj 'uQDaj je qawlaHbe'. Do' DI'on naSHa' ghajtaH. jarvam, jaj cha'maH SochDIch qoSDaj SochmaHDIch wIlopmeH juHwIj vIchegh.

vaj DaH juH Dabqa' SoSwI' 'ej QorghnIS vavwI', 'a boQ ghaj. Hoch jaj po SoSwI' luSuch QorghwI' po'. qaStaHvIS wa' Hogh cha'logh QorghmeH qach qemlu', wa'logh yab yI'var SIQ, 'ej loQ porghDaj qeq wa' rachwI'. yabDaj Dotlh DublaHbe'ba' boQvetlh, 'ach porghDajvaD QaQlaw' 'ej vavwI' boQlaH je.

ghomqa'laH «qIb boq»

wa'Hu' ghomqa' «qIb boq» 'ej jIjeS je. nuq 'oH boqvetlh'e'? SuwISya'Daq QeD torSIv tIvbogh nugh'e' tu'lu', 'ej nuHevpa' qoro'na javtIm lot, Hoch jar vengHom pItSa' chab Qe'Daq maghom 'ej maja'chuq. «Hov leng» ngotlhwI' chaHbe'bej Hoch, 'ach HochHom. «Hov noHmey» tIv je qabDu' law'.

DaH SuwISya'Daq QaQchoHtaH javtIm ghu'. poSqa'laH Qe'mey, ghomqa'laH nuvpu'. SoQtaHvIS Qe'mey, maghombe', 'ach 'InternetDaq ghom latlh. 'InternetDaq qaSmo' qepmey 'Iq, not jIjeS. 'ach wa'Hu' So'vISe vengHom vIjaHqa'. mutlhej je cha' juppu': qIr'am SIqIl'ev je. mI'QeD HaDta' qIr'am, 'ej HapQeD HaDtaH SIqIl'ev. pItSa' chab paSta' je DISoptaHvIS, pe'vIl QeD torSIv paqmey, HaSta muchmey, HaSta much lut mIrmey DIrIch. HaSta much lut mIr muchuppu' qIr'am: «pe'bIl». lut wa'DIch wIbejta' 'e' vIQub, 'ach Hoch vIlIj. tIvqu'law' qIr'am 'ej tIv je bangwI', vaj chaq 'opleS vIwaHqa'.

pItSa' chabwIj

latlh mIllogh vIqonbe', 'ach chelegh boneHchugh, Galactic Alliance Daq yISuch 'ej pa' mIlloghmey yInuD! jIH tungu'laH'a'? 😁

 

 

qoro'na javtIm raS'ISwIj cha'DIch

wejHu' qoro'na javtIm raS'ISwIj cha'DIch vISIQpu'. DaH naQ SurchemwIj! ... 'e' vItul. wa' wen Daq rapDaq raS'ISwIj wa'DIch vISIQ net qaw, 'ej ngugh pagh gher'ID qab vISIQnISlaw'. qen pIm.

jajvetlh bIwlaH veng vIjaH 'ej pa' veng vaS tlhopDaq tIqbe' lanSoy. vaj loQ jIloSnIS neH. nom DeSwIjDaq raS'IS pochlu' 'ej loQ 'oy', pe'vIl mughIDmo' Qel. qaStaHvIS wa'maH vagh tup loSmeH pa'Daq jIloS. ghIq juHwIj vIchegh.

cha'logh raS'ISvam vISIQpu'. vey mI' vI'ot.

 

qaSchoHDI' ram, jIwuQchoH 'ej 'oy'choH wIlle'Du'wIj DIrwIj je; tera' tlhuH rop rurchu'. 'ach vItlhbe' porghwIj Hat 'e' vIHar. 'ej jIDoy'qu'choH. pov qaStaHvIS cha' repmey jIQong. ram jIQongchu'be', reH jItachmo', jIbIrmo', jIchurmo'. jaj veb jIvemDI' jIwuQtaH 'ej 'oy'taH porghwIj. 'oy'qu'be', 'a jItIv'eghbe'. DungluQ HurDaq Qu' mach vIturnISmo' nuch Hergh vISop. muQaHchu'. wa'Hu' jIwuQbe' 'ej jI'oy'be', 'ach reH jIDoy'taH. Doy'moH javtIm ngeb raS'ISvam net Sov. 'ej muDoy'moH je muD Dotlh tuj.

DaHjaj jIDoy'taH je, 'ej loQ jIwuQqa'. 'oy'be' wIlle'Du'wIj, DIrwIj, DeSwIj joq. 'ach tujqu' muD Dotlh! 211 SImyon gheH SuwISya'. juHwIj vImejqangbe', 'ach chaq ram jIyIt.

qaSnIS wa'maH loS jaj, muQanchu'pa' raS'ISvetlh. ngugh DIbmey chu' vIghajchoHlaw'. 'ach wej DIbmeyvetlh Sovlu'.

quS'a' Quj

vaghmaH wa'Hu' «quS'a' Quj» vIbejchoHpu' 'ej 'eQ HaSta lut Qav vIbej rIntaH. DaHjaj HaSta lut mIrvam vIrIch vIneH.

quS'a' Quj

QeD torSIv vItIvqu' net Sov. lutmey rorgh vIpar net Sov je. motlh yanwI', 'IDnar pIn'a', bov tIQ, lung'a', voDleH je bopbogh HaSta muchmey lutmey je vIjun. meqvetlhmo' paqmeyvetlh laDtaHvIS Hoch qoj HaSta lut mIrvetlh bejtaHvIS Hoch, jItlhu'be'. 'ach DISvam jar loS pay' «quS'a' Quj» vIbejchoHpu'. 'ej vItIvqu'! Qatlhqu' lutDaj, voDleHpu', wo'mey je bopmo' lutDaj. law'qu' ghotpu', 'ej Qatlhqu' pongmeychaj qawmeH Qu'. jIbejtaHvIS pIj ghot vIghovlaHbe' qoj pong vISovbe'. mumISqu'moH ghu'vam. 'ach jItaH. muvuQ lut mIrvetlh 'ej wanI'mey veb vISovchoH reH vIneH. SochmaH wej lutmey ghaj lut mIrvam, 'ej Hoch vIbejta'. tlhInganpu'vaD mItqu' je: 'Iw law' tu'lu'mo', pIj Suvchuqmo' ghotpu', nga'chuqmo' je ghotpu' law'. «quS'a' Quj» rIchmeH mItbej tlhIngan Hol mu'tay'! vaj loQ lutDaj bI'reS vIDel:

tera'Daq maHbe'. qo'vamDaq cha' yuwey tu'lu'. chan yuweyvaD 'eSSoS ponglu', 'ev yuweyvaD weSteroS ponglu'. weSteroS ghatlh wa' wo', 'a Soch Sep ngaS. ngIq Sep che' latlh tuq joH, 'ej Hoch Sepmey che' voDleH. 'uSqan quS'a'Daq ba' voDleHvetlh. qaSpa' lut, qen voDleH Deq HoHta' latlh tuq yanwI', ghIq voDleH chu' mojnIS 'e' lumaq joHpu' law'. yuweyvetlh 'ev chan 'evDaq chevwI' tlhoy''a' tu'lu', 'ej tlhoy''a'vetlh Hay luDab tlhabwI'pu', yItwI'pu' chIS je. wIch 'oH neH yItwI'pu'vetlh chIS net Har, 'ach tlhoy''a' luchollI', ngoStaHvIS wo'. 'eSSoSDaq quq latlh wanI'mey. yuweyDaq Haw'ta' voDleH Deq puqbe', Day'nerIS targharyen. Dotlhaqnganpu' ta', Hal DIro'gho, naynIS neH loDnI'Daj...

qo' Sovlu'bogh

Daj latlh: HaSta lut mIrDaq cha' Holmey lujatlhlu'. Holmeyvetlh 'oghta' David J. Peterson. vIHaDtaHbe', 'ach loQ pabchaj vIlaDpu' 'ej HaSta lut mIrvam bejlu'taHvIS, pIj Holmeyvetlh luQoylu'.

• valIrya' Hol — loQ roma' Hol 'elaDya' no' Hol je rur, Qatlhqu' pabDaj 'ej HaD neHlu'chugh wa'chawmey law' qawnISlu'. no' Hol 'oH, vaj (lutDaj) DaH pagh Hol wa'DIch 'oHlaw' valIrya' Hol'e'. 'eSSoSDaq Sep Hol Sarmey jatlh nughmey. weSteroSDaq Holvetlh lujatlhlaH 'op chulwI'. DuolingoDaq valIrya' Hol ghojlaH vay'. pIj cha' mu'tlhegh lujatlh 'op ghot: «Valar morghulis — valar mohaeris.» (= HeghnIS Hoch loD — toy'nIS Hoch loD.)
  
• Dotlhaq Hol — loQ 'Iran Hol rur'a'? jISovbejbe'. 'ach SuvwI' Hol 'oHbej. Qatlhqu'be'law'. 'eSSoS luDabbogh Dotlhaqnganpu' Hol 'oH 'ej pIj Qoylu' je. cha' ben wej ben ghap Holvetlh bopbogh paqHom vIje'ta'.

mujonqu' HaSta lut mIrvam, 'ej muvuQ qo'vetlh. Hoch jaj ghotpu' Sanmey vISovtaH vIneHqu'. DIS chorghDIch lupar qabDu' law' 'e' vIQoy. vIparbe' jIH. nom qaS Hoch. 'ach bertlhamvetlh vIlajlaH. tlhoS reH paqmey qonwI', George R. R. Martin, lulob, 'ach wej paq Qav qonmo', bertlham luqonlaw' lIngwI'pu'. vaj QIvqu' bertlhamvetlh 'e' luDam bejwI'pu'. chaq 'opleS paqmey vIlaDnIS. «chech qul je bom» 'oH perDaj'e'. mubelqu'be'moHbogh 'ay'mey vIngu' vIneH: lung'a'mey, yInbogh lommey (lompu'?), 'IDnar. chuv vIparHa'qu'. 😅

porgh qo'mey

tera' poH buqjaj, jar vagh, jaj cha'maH wa'DIch 'angweD wISuchta' jIH bangwI' je. «porgh qo'mey» 'oH pongDaj'e' 'ej porghQeD bop (quSDaq jIba'). le'qu' 'angweDvam, ngebbe'mo' nobmeDmey, porghmey je. 'op ben Humanpu'na' bIHpu' porghmeyvetlh'e'! Heghpa' Sap ghotpu', ghIq Heghpu'DI' porghchaj choqmeH mIw le' lo'lu'. DaH mepHey yughlaw' porghmeyvetlh.

porghmey naQ tu'lu'be', Hoch porgh pe'lu'pu'mo'. rut nobmeD leghlu', rut SomrawDu' leghlu', pIj Human Qur naQ lu'ang. 'op pa'meyDaq tIqDu', taghDu', chejDu', QoghIjDu' je lutu'lu'. Human pIv tagh retlhDaq tlhIch purpu'wI' tagh lu'ang, 'ej pImqu'. qIjqu' tlhIch purpu'wI' tagh. latlh pa'Daq QoghIjDu' leghlu', Dajqu'bej. 'ach HaStaDaq SoSwI' QoghIj HarqIn lumuch, 'ej tlhoS muDuQ. mu'IQmoH muchvam.

Dajqu'bej 'angweDvam, 'ach rut ghIj. Humanna' porgh bIH net qelDI', taQqu'. wanI'vam vIpaybe', 'ach vISuch vIneHbe'. vabDot naDev mIllogh vIqonpu'bogh vIcha'qangbe'. lutIvbej latlhpu' law'.

DoyIchlan ghop Hol

'eQ 'InternetDaq qaSpu' DoyIchlan ghop Hol ghojmeH mIw 'ej majeS jIH bangwI' je. wIDIlmeH vagh 'ewro neH wInobnIS. maHvaD chuppu' jupDaj, 'ISnen, tlhoS QoylaHbe', 'ach teS jan ghajmo' DaH QoylaHchu'. ghojmeH mIwvam cherta' DIvI': GebärdenVerstehen. chaq 'oHvaD «Sawlay Hol» vIpongnIS, 'ach «ghop Hol» vImaS, Hol 'ay' bIHbe'law'mo' Sawlaymey'e' 'e' vIHar. vuDraj nuq?

toH, SumDaq wa'maH wej ghojwI'pu' maH 'ej nughojpu' QoylaHbe'bogh wa' loD. ghopDu'Daj lo', mu'mey ghItlh 'ej much cha', vaj HochHom wIyajlaH. vanmeH mIw, mI'mey, nItlh ngutlhmey, mu'mey potlh, mu'tlheghmey puS wIghojta', ghantoH: «... 'oH pongwIj'e'. ponglIj nuq?», «... ben jIboghpu'.», «QaQ'a' porghlIj Dotlh?», taH taH taH...

DoyIchlan ghop Hol nItlh ngutlhmey

'IHqu' Holvetlh 'ej Dajqu' jay'! DoyIchlan Hol pab rurbe'bej pabDaj, 'ach loQ 'aSya' Holmey pabmey rur. DoyIchlan Hol qellu'DI', «nuq 'oH ponglIj'e'?» jatlh neHchugh vay', *nuq 'oH -lIj pong?, *chay' 'oH -lIj pong?, *chay' pong SoH? ghap jatlhnIS. 'ach ghop Hol lo'taHvIS DoyIchlangan, vaj *SoH pong nuq? jatlhnIS. loQ tay Hol pab rurlaw'. pImqu' mu'tlhegh Qur. ghellu'meH Huy'Du' lupepnISlu' (😯). ghop pong lo' QoylaHbe'wI'pu' net Sov. Steffen 'oH ghojmoHwI' pong'e', 'a ghop pongDaj 'oS «rol», rol ghajmo'.

Do'Ha' SuwISya'Daq latlh ghop Hol lo'lu'. yajchuqlaHchu'be' QoylaHbe'bogh DoyIchlangan SuwISya'ngan je. 'ach QoylaHbe'bogh wa' jup vIghaj je: 'atI'na 'oH pongna'Daj'e' — naDev HaSta taDaj tu'lu', yIbej! DaH berlIn Dab, 'ach mungmaj vengDaq maHtaH, rut maghom. maja'chuqtaHvIS, jIHvaD QIch lo', 'ej QIt QIch vIlo' je jIH, wuSDu'wIj laDlaHmo' 'atI'na. vaj mayajchuq. 'ej QIch jatlhtaHvIS jIHvaD ghop Hol lo' 'e' vIpoQ. meqvetlhmo' wejHa' ghop Hol mu'mey puS vIghojta'. Dajqu'bej Holvetlh! 'opleS vIghojchu' vIneH.

vaj DoyIchlan jatlhlaHwI'pu'vaD ghojmeH mIwvetlh vIchupqu' je! 👍😃

wej yupma'mey

tera' poH jar vagh, jaj cha'maH wa'DIch qoSDaj cha'maH SochDIch lop 'et'ara, vaj juHDajDaq maghom 'ej malop. nob mach wIje'ta' jIH bangwI' je. ghaHvaD DuQwI' ghajbogh San'emDer QaD wIwuq. ghobe', roSa' 'oHbe', 'ej naHjej 'oHbe' je. motlh Deb Dab San'emDer Seghvam. mach chovnatlhvam 'ej rutlh; moQHom rur. 'InSong Doq lIng. 'oHvaD 'et'araHom wIpong 'ej ghaHvaD nobta'.

'IHqu' nobmaj, qar'a'?

 

latlh mebpu' tu'lu' je: 'ar'on qele' je. juH pa'meyDaj chu'Daq maba', maja'chuq, pItSa' chab wISop 'ej HIq wItlhutlh. nubelmoH choSvetlh. wej qele' vISov. loD ghaH. DuSaQ'a'maj Holtej chu' ghaH, 'ach jInmol turtaHbogh vIlIj. Holmey Qulba' je 'ej Human yab boplaw' Qu'Daj.