qo'vID rop vISIQqa'taH

jIropqa'. 'ach Do' jIbechbe'qu'. Hogh vorgh ghItlhjaj bangwI' juHvo' juHwIj vIcheghpu'DI' loQ jIchurlaw'. jItuS 'ej gheghchoH ghoghwIj. loQ jIpuj 'e' vIjem, vaj ramvetlh jImI'meH jItlheDbe'. pem veb jInuD'eghDI' jIrop 'e' vItob. tlhoS Dem yamtaw, 'ach tob. wa' ben qo'vID wa'maH Hut vISIQpu' net qaw, 'a DaH ropna' rurbe' ghu'wIj. jItujbe', jIQotnISbe', jIDoy'qu'be', ghIchwIjDaq 'IqnaH tu'lu'be', jImumlaHtaH. tera' ghIch rop chur law' ghu'wIj chur puS. Qel vISuchbe' je, vaj Do'Ha' mutoghbe'ba' DoyIchlan qo'vID mI' poj.

Dem yamtaw, 'ach ropwIj tobbej.

Do' Hoghvam jIvumnISbe'. Hogh veb taghqa' paQDI'norghwIj. DoyIchlan Hol ghojmoHmeH paq chu' wIlo'choH 'ej chaq ghojwI'pu'wI' vIchovlaH. latlh De' chu' vIchel vIneH: loSleS qaS qoSwIj wejmaH chorghDIch. qaSDI' jar cha', jaj wa'maHDIch HIbuS! 😁

wej muchmey DISuchta'!

'op wanI' DISuchpu' bangwI' jIH je. 'ej DaHjaj latlh wanI' vISuch.

vengwIjDaq much qaSmoH Faisal Kawusi, DoyIchlan HaghmoHwI'. ret law' muchDaj chaw'mey DIje'ta'. DoyIchlanDaq boghpu' 'ach 'avghanIStan qaytu'pu' ghaj. vaj pIj novpu', DoyIchlanganpu', meHghem Qat bop qIDmeyDaj. qabqu'be' muchDaj, 'a QaQqu'be' je. tlhaQ qIDmey law', 'ach tlhaQbe' 'op. 'ej rInpa' SIbI' wup. tlhaQbe' bomDaj 'ej bomwI' QIvqu'bej ghaH. nubelbe'moH. much wIjaH 'e' wIpaybe', 'ach ghaytan wISuchqa'be'.

povjaj vorgh qaSpu' QoQ much. bomwI'vam maSqu' bangwI'. LEA 'oH pongDaj'e' 'ej pIj QoQDaj Qoy 'e' vISov. qaStaHvIS wa' DIS LEA rIchtaH. vengwIjDaq qaS QoQ muchDaj muja'pu' 'ej 'ISjaHDaq muchvam tu'lu'. 'a jIQIp! reH jIHIt: ghaytan bangwI' tlhej chajDaj. ghaytan nItebHa' muchvam luSuch chaH. pIj mumer bangwI' net Sov. 'e' tIvqu'. lengmaj vorgh boqaw'a'? mumerlu' 'e' vItIvqu' je. jIH'e', pIjHa' mermeH qech QaQ vIghaj. pImbej «parmaq Hol» DIlo'bogh. 'ach ret bangwI' vImer neH ghaH. 'e' vIyajHa'chu', vaj pagh 'elmeH chaw' vIje'ta'. DaSjaj ghaH vIghel, jIjatlh: «toH, wa'leS QoQ much DajaH'a'? Dutlhej 'Iv?» jang ghaH, jatlh: «teH'a'? choghelnIS'a'?» ghIq qaStaHvIS poH nI' maja'chuq. tagha' maHvaD cha' chaw'mey vIje'. chaw'mey vIje' 'e' qapbe'chu' 'ej muraDbe'. yajHa'ghachna' 'oHbej. bomwI'vam Qoy neH ghaH 'ej vItlhej neH. jItuHqu'... povjaj qaS QoQ much. wIghoS 'ej wI'el. loQ neH 'op bommey vISov. chaq wa'logh, cha'logh DIQoypu'. QoQ vImaSbogh 'oHbe'bej. reH vInglaw' bomwI'. loQ 'IQmoH bommeyDaj, 'a QuchmoHbogh QoQ vImaS. much yaHDaq maSum, 'ach law' bejwI'pu'. ghIq bom. 'ej qabbe' bommeyDaj. bommey law' vIghov 'ej motlhHa' 'ey bIH! much yaHDaq bommeyDaj QaQ law' Spotify bommeyDaj QaQ puS. muchDaj vIparHa'choH 'ej nItebHa' wISuchmo' jIQuchqu'. pe'vIl tIv je bangwI' net jallaH.

QaQbej LEA QoQ much

latlh QoQ much wInabpu' je: lepSISDaq bommeyDaj much The Kiffness! vIghro' HaSta tameyDajmo' 'InternetDaq noyqu'choHpu'. reH tlhaQ tamey, reH Daj bommey. Set'avrIqa'ngan ghaH 'ej DaH vengwIj machDaq muchDaj much! SIbI' 'elmeH chaw'mey DIje'ta' bangwI' jIH je. 'ach qaSpa' muchDaj, pay' ropchoH bangwI'. qo'vID wa'maH Hut SIQ. qaStaHvIS wa'maH jaj rop 'a Do' bechqu'be'. meqvammo' mutlhejlaHbe' QoQ much vISuchtaHvIS. Do' Sap DuSaQ jupwI', 'enyI'baS. 'ej nutlhej je 'eSperanto Hol jatlhbogh jup, tIr'ebor. toH... Dunqu'qu'qu'qu' QoQ muchDaj! wItIvqu' Hoch! much yaHDaq HaSta ta muchtaHvIS QoQ janmey cha'. pIj De' chel 'ej bom qun ja'.

vIghro' QoQ 'ey law' Hoch 'ey puS!

rInDI' much, yIvbeH DIje'laH 'ej vabDot noywI'vam retlhDaq mIllogh DIqonmoHlaH. loQ ghaHvaD jIjatlh 'ej bangwI'vaD HaSta taHom qon ghaH 'ej ghaHvaD jatlh. jIQuchchu'! vabDot yIvbeHwIj naD. 😃

maHoy qar'a' The Kiffness jIH je? 😉

qo'vID wa'maH Hut vISIQtaH

tagha' qaStaH... jIrop. mungejpu' qoro'na javtIm 'ej DaH qo'vID wa'maH Hut vISIQnIS. 'a Do' jIbechqu'be'. loQ jIrop neH. vaghHu' jIropchoHlaw'. jaj wa' ram, DaSjaj po ghap loQ jIchur. loQ jIwuQ 'ej jIDoy'. loQ 'oy'law' DIrwIj. tera' tlhup rop motlh rurbej 'ach SIbI' qoro'na javtIm vIpIH net Sov. DaSjaj jI'ol: wa' yamtaw neH 'ang ghIch nejwI'. povjaj jIwuQtaH. 'oy' mInDu'wIj, DubwIj, DIrwIj je. 'ej jItuj, ghIq jIbIr. baQ. jItuSchoH je 'ach ghIchwIjDaq 'IqnaH tu'lu'be'. HatwIj vIjuvta' — 216 SImyon vIgheH. Hu'ma... toH, 216 SImyon; Dunbe', Qobbe'. 'aj loQ vItlh.

216 SImyon vIgheH. tujqu'be'.

qo'vID wa'maH Hut rurbej DotlhwIj. 'ej Duy'laHbejmo' wa' nejwI', povjaj nejwI' cha'DIch vIlo'. tlhonDu'wIjDaq SeDveqqoq vIvev, vIjIrmoH, vIlel 'ej taSDaq 'oH vIvev. ghIq nejwI' qungDaq wej 'onroSmey vIchagh. jIloS... QIt DoqchoH yamtaw cha'DIch: teH. qo'vID wa'maH Hut vISIQchu'.

ropwIj tob nejwI'vam.

bangwI' vIrI' 'ej ghu'wIj vIDel. ghIq qorDu' Qel vIrI'. jatlh: «ropyaHmajDaq PCR wIlo'laH, vaj DaHjaj jughoSlaH.» ropwIj vItobchu' vIneH, ghaytan 'opleS lI'mo' Qoyje'. QaQmo' muD Dotlh 'ej jIbechqu'be'mo' QelwI' ropyaH vIjaH. jIyIt. cha'maH cha' tup lID. jIpawDI' pagh vIHot, 'a pa'Daq jIba'meH mutlhob rachwI'. tlhonDu'wIjDaq SeDveqqoq vev. qotlhqu' 'ach 'oy'be'. muja' qaSpu'DI' Soch jaj 'ej jIropbe'law'taHDI', vaj latlh tobmeH yaH vIghoSlaH. pa' javtIm luSamlaHbe'chugh, jIweghHa''egh net chaw'. qaSpa', juHwIjDaq jIwegh'eghnISbej.

vaj juHwIjDaq jIwegh'egh. jIHvaD qay'be'bej ghu'vam. jajvetlh choS murI' bangwI'. choghvat pa'Daq muloSlaw'lI' nobHey. 'ej pa' Soj law' vItu'! chatlh lungaSbogh cha' balmey, vIychorgh, wej na'ran wIb, tanje'rInmey, nIm wIb ngogh, Dargh, paSta' je tu'lu'. law'bej Soj! vabDot mutlhejlaHbe' bangwI', 'ach pe'vIl muQorgh. 💝

tugh jIpIvqa'jaj! 😷

 

loghjaj 'oH jajvam'e'. loQ 'oy'taH DubwIj DIrwIj je. loQ ghegh ghoghwIj. pIjHa' jItuSnIS, 'ej jIwuQbe'. vaj QIt jIpIvchoHba'lI'. chatlhDaj vI'epchu'ta'. 'ey'qu'! murachbej. 'a nom jIDoy'choH. jIvumqangbe' 'ej Do'Ha' paqmey vIlaD vIneHbe'taH. chaq wa'leS «cha' monmey» vIlaDtaH vIneHqa'. 'ach pIj HaSta much lut mIr vIbej: «'oQqarmey», «Qel QaQ», «rIq mortIy je» je vIbej. «HuD chang'eng» vIbejchoHpu' 'ach vIpar. DaHjaj «Hov leng: DISqa'vI'rIy» vIbejbej 'ej wa'leS «Hov leng: pIqarD» lut chu' vIbej vIneH. Dalbe'ba' pemmeywIj. 😄

'ach chay' mungejpu' javtIm? nuqDaq qaSpu'? jIna'be', 'a jI'IrlaH. wa' Hogh ret loghjaj qa'vIn Qe'Daq maghompu' bangwI' Deq ('aS'Il) jIH je. tulwI' Hol wIjatlhtaHvIS Dargh wItlhutlh, chab wISop, 'ej maja'chuq. chaq pa' mungejpu' qoro'na javtIm. 'ach ropbe' 'aS'Il. 'olta'. chaq ghInjaj tlhutlhmeH Soj ngevwI' vISuchDI', pagh DIngbogh Ha'DIbaH ngevwI' vIjaHDI' vay' vIHot 'ej mungejpu' javtIm. jISovlaHbe'bej, vaj jISaHqu'be'. Do' wejlogh qoro'na javtIm ngeb raS'IS vISIQta', vaj jIHvaD Qobqu'be' ropvam.

DIS chu' wItIv maQujtaHvIS

DorDI' wa' DIS 'ej taghDI' DIS chu', motlh DoyIchlanDaq po'lISqa'Daq ghap qaS tulwI' Hol qep. 'ej tlhoS reH jIjeS je jIH. motlhbe'chu'mo' DISmeyvam, Do'Ha' qaSbe' tulwI' Hol qepmey. wa' ben juHwIjDaq DIS chu' wIvan jIH bangwI' je. chu'choH DISvam vI'tenberghDaq qaS tulwI' Hol qep «QupwI'pu' tulwI' Hol Hogh» (JES) net nab, 'ach 'arghqu'pu'mo' javtIm ghu', vaj qep luqIl. not tulwI' Hol qep jaHpu' bangwI', 'ej loQ Hol jatlhlaH neH, 'ach ghojbejlI'.

toH... latlh nab wI'oghnIS. 'ej Do' latlh nab lu'oghta' berlIn juppu'wI'. wejHa' 'ul Quj qep lucherta' 'ej 'ul Quj qep chu' lucherqa' luneH. berlInDaq Sumbogh vengDaq (Halbe) qaS 'ul Quj qepvam 'ej majeS jIH bangwI' je. jeSpu' latlh tulwI' Hol jatlhwI'pu': wa' bIraSIwngan ('an'a'), wej DoyIchlanganpu' (jIH, bangwI', tID'uy), wa' 'eSpanya'ngan ('oyna'), wa' ne'Derlangan ('aynat), wa' nIqaraghwa'ngan (lIr'u'), wa' raSya'ngan ('unay = bangwI' Deq), wa' Suverya'ngan (vel'ar), wa' 'amerI'qa' SepjIjQa'ngan (qach) je. 'ej reH tulwI' Hol wIlo'! manggha qach ngo'Daq qepvam lucherta' 'ej 'ul QujmeH janmey law' tu'lu'. qaStaHvIS cha' jaj neH DImuv, vaj wa' ram wISIQ. pa'majDaq Qong je 'an'a' 'unay je. Do'Ha' chuSqu'bej 'an'a' 'ej tlhoS maQonglaHbe' bangwI' jIH je. reH vIH ghaH 'ej wabmey taQ tlhen. Qatlhqu' ramvetlh.

'ach Dunqu' qep! 'elaDya' Qe' wIjaHqa' 'ej 'ey'qu' Soj. Qujmey DIQuj: «gharghmey», «chab may'», «maryo' DoylI'», «maryo' yupma'» je DIQuj. 'ej DI'ruj velqa' neqratlhmey DIlo'taHvIS, «jaghIv 'etlh» wIQuj. DaH DI'ruj velqa' neqratlh vIneHqu'!

DI'ruj velqa'Daq jItlharghtaH 😎

'ej wa' DoyIchlan HaSta much ngo'qu' much tID'uy: «qul chechtlhutlh» (1944). qIj 'ej wov. tulwI' Hol mughbogh per mughta' tID'uy. not DuSaQDaq ghojpu'bogh loD nen bop muchvam. reH juHDajDaq paQDI'norgh Hevpu'. wa' jaj qul chechtlhutlh lutlhutlhtaHvIS ghaH juppu'Daj je, nab tlhaQ 'ogh: loch chIp 'ej ghojwI' ghetmeH DuSaQ jaH. reH ghojmoHwI'pu' chem. tlhaQ muchvam, 'ach taQqu' je. 'ach HaSta much wIbejtpa' qul chechtlhutlh vut tID'uy! DoyIchlan lurDech 'oHlaw', 'ach not vIleghpu' jIH. maHpInDaq HIq tu'lu' 'ej maHpIn DungDaq Su'ghar qut gho 'Impey' tIn lanlu'. ghIq Su'ghar qutDaq HIq lIchlu' 'ej meQ. tuj, na'ran rur, 'ej chechmoH HIqvam. Dajbej wanI'vam. 'ej cha'maH loSlogh Qoylu'DI' HIvje'meymaj wIpaw', maghep, ghIq HurDaq Halbe veng jorwI' ngeb DIbej. 'IH. bangwI''e' belmoHbej!

qul chechtlhutlh vutlI' tID'uy

 

 'ach DIS veb qaSqa'laH tulwI' Hol qepna' 'e' wItulqu'qu'qu'qu'! teH, tulwI'pu' maHba'. 😉

DIS 2021 QISmaS

DIS chu' botIvjaj Hoch! pIvtaHjaj juppu'wI' qorDu'wIj je! 'ach DaHjaj DIS ret QISmaS vIrIch vIneH. latlh jaj DIS chu' lopwIj vIrIch. SuH...

DISvetlh loQ Qatlh QISmaS lopmaj. jar wa'maH cha' ropchoHmo' wej tuqnIgh. qo'vID wa'maH Hut luSIQ. wa'DIch ghaH lorbe'wI', 'aDnIl. wa'maH cha' ben boghpu'. ghaytan DuSaQDaq ngejlu'. wegh'egh ghaH 'ach be'nI'wI' (SoSDaj, 'ayna') ngejbe'law'pu'. jum. SIbI'Ha' ropchoH SoSwI', 'a Do' tlhoS bechbe'. loQ ghIt neH 'IqnaH. pIvqa'DI' ropchoH vavwI', 'ej bechqu'be' je ghaH. qaStaHvIS poH nI' tuqnIghpu'wI' vISuchlaHbe'. jumqu' ghu'vam, 'ach qaytu'pu'wI'vaD Soj vIje'ta' 'ej tlhoS Hoch jaj maQum. cha'logh javtIm ngeb raS'IS luSIQta' vavwI', SoSwI', be'nI'wI' je. chaq meqvammo' vItlhbe' ropchaj? jIH'e', wejHa' javtIm raS'IS wejDIch vISIQta' je jIH.

ropchoHbe' vavwI' net jalchugh, vaj qorDu'wIj Such bangwI' SoS 'e' wInab. 'uSlar veng Dab, nupawmeH 130 qelI'qam lIDnIS. not vavwI' SoSwI' je qIHpu' SoSDaj, 'ach DISvetlh Qapbe'. ghaytan DISvam nuSuchlaH. 'ach muSuch bangwI'.

juHmaj wIjaHpa', vengDajDaq «tlhat loS» wIbej bangwI' jIH je. loQ taQ HaSta muchvam. ghu'mey law' DIpIHbe', 'a qabbe' muchvam. much wa'DIch vIparHa'qu', QIvqu'bej much cha'DIch wejDIch je, 'ach QaQ much loSDIch 'e' wIDam. 'a QISmaS vIrIchnIStaH...

toH... roppu' vavwI'. qaSDI' jaj cha'maHDIch javtIm qengbe' net tob, 'ach wej Dor wegh'eghmeH poHDaj. meqvammo' nabvetlh wIgher: maghomlaH jIH, bangwI', be'nI'wI', parmaqqayDaj ('In'or) je neH, 'ach vavwI' SoSwI' je DIghomlaHbe'. qaStaHvIS poH ngaj neH Du'HomDaq maghom Hoch 'e' wIHech. maHojqu' wIneH... 'ach nabvam choHchu'pu' be'nI'wI'. ngejmeH Qob wIrIchqa'taHvIS bo'DaghHom lo', 'ej wIlobnISlaw'. loQ maQeH jIH bangwI' je, 'ach QISmaS lop wIQaw' wIneHbe'bej.

jaj cha'maH loSDIch Du'HomDaq maghom jIH, bangwI', vavwI', SoSwI', be'nI'wI', parmaqqayDaj je. SIStaH, 'ach vavwI'vaD wa' nob wIje'ta' bangwI' jIH je: 'IHbogh qul HaySIn tIn wIje'. Sor Hap qeng 'In'or 'ej chechtlhutlh vut bangwI'. 'eyqu' chechtlhutlh 'ej qul HaySInmo' Quchqu' vavwI'. ghIq be'nI'wI' pa'meyDaq maghomqa' 'ej pa' DoyIchlan QISmaS lurDech Soj wISop: patat 'oQqar char luH tlhut je. 'ej matay' Hoch. bI'reS taQ ghu'vam, 'ach tugh wIlajchoH. ghIq nobmey DInob. bangwI'vaD cha' tu'lum, taj bey', 'alpa'Ha paSlogh tun, «ngoq pong» Quj, 'uSgheb 'ISjaH je vInobta'. Quchqu'bej Dochmeyvetlh tIvqu'mo'. 'ej nobmey munobta' je nuvpu':

Dochmeyvetlh vIHevpu'!

• mIv — SuD 'ej tun. mIvwIj vIweSpu'mo' mIv chu' munobta' bangwI'!
• yuch — yuch law' munobta' vavwI'. marSIpan ngaS. 'ej vaghmaH 'ewro HIrmoHta'.
• naH HIq — 'oH vutta' bangwI'. na'ran rurqu' 'ej vItIvqu'.
• chab ngat — vISop 'e' vImuSHa'mo' munobta' bangwI'.
• Trivial Pursuit Quj — yu'meH Quj noy 'oH 'ej pongDaj vImughlaHbe'. chabalwIj 'oHmo', mungeHta' bangwI' SoS.
• mIllogh qonwI' velwI' — reH poStaH De'wI' mIllogh qonwI' 'e' par bangwI', vaj velwI'Hommeyvetlh munobta'. DaH qonwI' vIpoSmoH 'ej vISoQmoH. maj.
• vIghro' 'ISjaH — motlhbe' vIghro' 'ISjaHvam. qeQ ghImtaHbogh vIghro'mey cha'. tlhaQqu'! ghaytan puchpa'wIjDaq vIHuS.
• 'ayItI boq Hol mu'ghom — mu'ghomHomvam munobta' bangwI' SoSnI'.
• roSghaH poj vey — tugh MyHeritage vInaw'laH 'ej pa' 'emrIghpu'wI' vISamlaH. gher'ID vIghojDI', QonoSvamDaq no'QeD vIrIchqang. bangwI' qatlho'qu'!
  

jaj cha'maH vaghDIch pagh wItur. «Qel QaQ» wIbej jIH bangwI' je 'ej Qujmeymaj DIQuj. jajvetlh maleS. vabDot loQ peDpu'. qaStaHvIS QISmaS, motlh peDbe', 'ach DISvam maDo'. yIbej!

loQ peDpu'. 'IH jorchanvam, qar'a'?

jaj cha'maH javDIch maghomqa' jIH, bangwI' qorDu'wIj je. wa'ben QISmaS rur 'uQmaj, Qe'Daq wIvunta'mo' 'ej juHDaq maSopmo'. vengHommajDaq «laSvargh loS» Qe' tu'lu' 'ej pa' QISmaS nay' je'laH vay'. Da'nal, majaj Doq, patat chab je lungevlu'. nay' wIwoH jIH be'nI'wI' je 'ej vavwI' SoSwI' je no'laS pa'Daq maSop. Da'nal tuj jablu'DI' reH QaQqu' nay' net Sov! Ha'DIbaH HochHom Sopbe'mo' bangwI', ghaHvaD ghotI' vutta'. vabDot Sopqu' SoSwI'. 'arghqu'pu' SoSwI QoghIj HarqIn, Do' Qatlh SopmeH Qu'Daj. 'ach 'eychugh Soj, vaj pay' puq chonnaQ taj je lo'qa'laH. 'ej tagha' jeSlaH je lorbe'wI', 'aDnIl. ghaHvaD 'otlh tlhuDwI' mIr chum vInobta'. DaH pa'DajDaq qalmuS lIng. rInDI' 'uQ'a' 'ayna' pa'mey DIjaH QopwI'pu'qoq 'ej pa' HIq wItlhutlhtaHvIS bommey DIbom; bommeH tach rur be'nI'wI' no'laS pa'. nubelqu'moH ramvam!

QISmaS 'uQ'a'maj

toH... QISmaSmaj Qaw' 'e' nID javtIm, 'a tagha' lopmaj wItIvlaH Hoch. maDo'qu'bej. 'a qaSDI' QISmaS veb, qoro'na javtIm wIrItQo' jay'! 😉

SoSwI' bopbogh De' chu'

SoSwI' bopbogh De' chu' vI'otHa'pa' mubopbogh De' chu' vImaq vIneH: porghwIjDaq qoro'na javtIm raS'IS cha'DIch pochlu'ta'DI' qaSpu' poH yap, vaj DaH DIbmey Hoch vIghajchoH! 'ej muQanchu' raS'ISvetlh. majQa'!

DaH SoSwI' vIrIch vIneH. chaq boSovtaH: yab HarqIn SIQ SoSwI', vaj Hoch lIjtaH. SabtaH yabDaj Hoch laHmey. 'ej 'op Hogh ret ropyaH qach 'elnIS, qaw'pu'mo' 'ej 'IvtIHDaj 'oy'moHpu'mo'. Hom ghorbe' ngugh net Qub, 'ach SIbI'Ha' SuDchoH DIrDaj 'ej pujchoH porghDaj. SuDchoH je mInDu'Daj 'ay' chIS, vaj ropyaH qach 'el 'e' chup QorghwI'pu'Daj (Hoch jaj po QaHmeH juHchaj luSuch). vaj ropyaH qach lu'elmoH. pa' SoSwI' lunuDchu' 'ej qaSpu'DI' 'op jaj, cha' gher'ID tu'lu':

1. qay' chejDaj net tu'. chej mej'aD botlu'law', vaj SuDchoH DIrDaj mInDu'Daj je. luHaq 'ej chej mej'aDvetlhDaq tlhat tut luvev luneH. baS yughbogh tut nu' 'oH 'ej mej'aDDaq lanlu'ta'DI', Sach 'ej ghItmoHchu'. 'ach luHaqchoHpa' lunuDDI' botbe'law' mej'aDDaj net tu'. qay'be' chejDaj 'ej motlhchoH DIrDaj mInDu'Daj. loQ pIvchoH SoSwI' porghDaj.
2. 'uS nev'obDaj Hom ghorpu'bej net tu'! nachqoq mongqoq je ghaj Homvetlh 'ej qaw'pu'DI' Homvetlh mongqoq ghorpu'law'. ghu'vetlhmo' yIttaHvIS 'oy'qu'law' 'IvtIHDaj. Homvetlh nachqoq mongqoq je qa' baS qa'meH 'e' luchup Qelpu', 'ej mIlloghmey leghpu'DI' vavwI' SIbI' laj. bovmaj Do' Hoch jaj Haqvam lutur Qelpu', vaj Qatlhbe'bej. 'ej Qapchu'! DaH baS yugh 'uS nev'ob Hom 'ay' 'ej 'oy'be'law'. Qapla'!

qaStaHvIS wej Hogh ropyaH qach Dabpu' SoSwI', 'ej wa'Hu' juH cheghlaH. maghommeH Skype wIlo' 'ej vaj SoSwI'vaD jIjatlhqa'laH. 'oy'be' 'IvtIHDaj, 'ach mISqu' yabDaj. maja'chuqtaHvIS rut latlh lurghmey Qeq 'ej meghDaj 'uQDaj je qawlaHbe'. Do' DI'on naSHa' ghajtaH. jarvam, jaj cha'maH SochDIch qoSDaj SochmaHDIch wIlopmeH juHwIj vIchegh.

vaj DaH juH Dabqa' SoSwI' 'ej QorghnIS vavwI', 'a boQ ghaj. Hoch jaj po SoSwI' luSuch QorghwI' po'. qaStaHvIS wa' Hogh cha'logh QorghmeH qach qemlu', wa'logh yab yI'var SIQ, 'ej loQ porghDaj qeq wa' rachwI'. yabDaj Dotlh DublaHbe'ba' boQvetlh, 'ach porghDajvaD QaQlaw' 'ej vavwI' boQlaH je.

qoro'na javtIm raS'ISwIj cha'DIch

wejHu' qoro'na javtIm raS'ISwIj cha'DIch vISIQpu'. DaH naQ SurchemwIj! ... 'e' vItul. wa' wen Daq rapDaq raS'ISwIj wa'DIch vISIQ net qaw, 'ej ngugh pagh gher'ID qab vISIQnISlaw'. qen pIm.

jajvetlh bIwlaH veng vIjaH 'ej pa' veng vaS tlhopDaq tIqbe' lanSoy. vaj loQ jIloSnIS neH. nom DeSwIjDaq raS'IS pochlu' 'ej loQ 'oy', pe'vIl mughIDmo' Qel. qaStaHvIS wa'maH vagh tup loSmeH pa'Daq jIloS. ghIq juHwIj vIchegh.

cha'logh raS'ISvam vISIQpu'. vey mI' vI'ot.

 

qaSchoHDI' ram, jIwuQchoH 'ej 'oy'choH wIlle'Du'wIj DIrwIj je; tera' tlhuH rop rurchu'. 'ach vItlhbe' porghwIj Hat 'e' vIHar. 'ej jIDoy'qu'choH. pov qaStaHvIS cha' repmey jIQong. ram jIQongchu'be', reH jItachmo', jIbIrmo', jIchurmo'. jaj veb jIvemDI' jIwuQtaH 'ej 'oy'taH porghwIj. 'oy'qu'be', 'a jItIv'eghbe'. DungluQ HurDaq Qu' mach vIturnISmo' nuch Hergh vISop. muQaHchu'. wa'Hu' jIwuQbe' 'ej jI'oy'be', 'ach reH jIDoy'taH. Doy'moH javtIm ngeb raS'ISvam net Sov. 'ej muDoy'moH je muD Dotlh tuj.

DaHjaj jIDoy'taH je, 'ej loQ jIwuQqa'. 'oy'be' wIlle'Du'wIj, DIrwIj, DeSwIj joq. 'ach tujqu' muD Dotlh! 211 SImyon gheH SuwISya'. juHwIj vImejqangbe', 'ach chaq ram jIyIt.

qaSnIS wa'maH loS jaj, muQanchu'pa' raS'ISvetlh. ngugh DIbmey chu' vIghajchoHlaw'. 'ach wej DIbmeyvetlh Sovlu'.

qoro'na javtIm raS'ISwIj wa'DIch

DaH cheghlI' bangwI', vaj DaHjaj jIghItlhmeH poH vIghajchoH. nIteb jISaHqa', 'a jI'ubbe'. javtIm vIrIch vIneH.

tera' poH povjaj, jar vagh, jaj wa'maH chorghDIch qoro'na javtIm ngeb raS'IS wa'DIch vISIQ! Qatlhqu' jaj rep je vIHevmeH Qu' jay'! SuwISya'Daq raS'IS SIQ neH qabDu' law'. Do'bej ghu'vam, 'ach SIbI' loj Qel SuchmeH repmey Hoch. tagha' rep vIHevDI', vengwIjDaq qaSbe', 'ach bIwlaH vengDaq. tlhIwrI vengDaq Sum vengvam mach'e' 'ej mulup lupwI' mIr. pa' vaS tIn tu'lu' 'ej tlhopDaq loSlI' lanSoy. javtIm raS'IS luSIQ luneH ghot law'! jIloS je, 'ej nom Duv lanSoyvam. QuchwIj Hat juvmeH 'uD lo' lojmIt 'avwI', ghIq vaS vI'ellaH. pa' vay'vaD jIngu''eghnIS 'ej chaw'wIj vI'aghnIS. ghIq latlh lanSoyDaq jIloSnISqa'. jIbItqu', mughIjqu'mo' QInmeH janmey. tugh pa'Hom vI'ellaH.

qachvetlhDaq javtIm raS'IS lupoch

pa'HomvamDaq ba'taH Qel, rachwI' Qup, latlh QelHey je. chaw'wIj nuDqa' Qelna', ghIq mIw Hoch muchuH rachwI'. Moderna 'oH javtIm raS'IS per'e'. pay' bong Hergh QaywI' chagh rachwI'. woH 'ej mutlhqa'rupDI', jatlh latlh QelHey: «ruchQo'! chu'wI' lo'!», vaj jIloStaHvIS Hergh QaywI' chu' luqemnIS. rachwI'vaD jIjatlh: «jIbIt, 'a Do' bIt je latlh.» 😅 poSwIj DeSDaq raS'IS pochtaHvIS 'oy'qu'be'. ghIq loSmeH pa'Daq jIba', qaStaHvIS cha'maH tup. rIntaHDI', juH vIchegh.

qoro'na javtIm raS'IS Seghvam vISIQpu'

jIchurchoHrup, 'ach qaS pagh. loQ jIDoy' ('ach reH jIDoy'), DeSwIj vIpeplaHchu'be', 'ach jIchurchoHbe'. nItebHa' HaSta much wIbej jIH bangwI' je. jar jav, jaj wa'maH vagh raS'IS cha'DIch vISIQ.

DaH jIvur'a'? 'e' vItulqu'. 😆

javtIm raS'IS wa'DIch SIQta' bangwI'

Hogh ret qo'rona javtIm ngeb raS'IS wa'DIch SIQta' bangwI'. DaH pIvqa', 'ach churmoHbogh gher'ID SIQnIS je.

Soj QeD HaDtaH bangwI', 'ej rut vengDaj ropyaH qachDaq vum. SIDpu' Suchbe', 'ach qawHaqDaq De' chelmeH De'wI' lo'. rut ghotpu' rI'nIS je. 'ach DoyIchlanDaq ropyaH qachDaq qo'rona javtIm raS'IS SIQlaH Hoch vumwI'. meqvetlhmo' buqjaj ret lurI' 'ej raS'IS SIQ. DIlnISbe'. raS'ISvam lIngpu' AstraZeneca. DungluQ raS'ISvam pochlu', ghIq juH chegh bangwI'. gher'ID qab SIQ QupwI'pu' law' net Sovmo', wejHa' Soj law' je'ta'. qaSchoHDI' ram, tujchoH porghDaj Hat 'ej wuQchoH ghaH. ropHey rur, 'ach motlh qaS net ja'. ramvetlh 'eqDI' QongDaq yong 'ej nom QongchoH.

jaj cha'DIch chur je. qaStaHvIS ram, bIrqu', vaj yIvbeH jeD tuQtaH 'ej vel'eghmeH wej tlhImmey lo'! pa' tujmoHwI' jan chu'ta' 'ej bIQ tuj qoch'uq bal lo'. 'ach bIrtaHlaw'. 'emnISbe', 'a churqu'be' burghDaj. 'oy' je ghIvDu'; jatlh. SoplaH 'ej Dargh tlhutlh. 'ach pemvetlh QIt churHa'choHlI'...

jaj wejDIch wuQbe' 'ej bIr 'e' jembe'. 'ach wej pIvlaw'. loQ wuQtaH 'ej mInDu'Daj vIHmoHtaHvIS – pagh mInDu'Daj DermoHtaHvIS? – 'oy'taH mInDu'. motlh raS'IS Seghvam SIQlu'pu'DI' qaStaHvIS cha', wej jaj roplaw' net jem, 'ach qaStaHvIS wa' Hogh naQ bech bangwI'. DaHjaj maja'chuq 'ej muja'; wuQbe', tujbe', bIrbe', 'a loQ 'oy'taH mInDu'.

 

'ach chaq QupwI'pu'vaD Qoblaw' AstraZeneca qoro'na javtIm raS'IS DaH net SovchoH. DoyIchlanDaq tuqjIjQa'Daq je ropchoH raS'ISvam SIQpu'bogh 'op ghot. loQ 'aDDu'chajDaq jeDchoH 'Iw, 'ej rut QoghIjDaq qaSpu'mo' Hegh ghot puS. HeghmoH'a' raS'ISvam? wej luSovchu' Qelpu' tejpu' je. reH pay' qaSlaH ropvetlh, vaj ghaytan qaSmoHbe' Herghvam. ghaytan quq, 'ach rarchuqbe'. tugh Sovlu' 'e' vItulqu'. 'opleS raS'IS vISIQ vIneHbej je, 'ach jIlImnIS vIneHbe'.

DoyIchlanDaq QupwI'pu'vaD AstraZeneca raS'IS pochbe'choHlu'. vaj raS'IS cha'DIch SIQnISDI' bangwI', ghaytan latlh malja' raS'IS SIQ. SuwISya''e'? naDev wej AstraZeneca raS'IS muchlu', latlh meqmo'. qaSpa' jar Soch raS'IS SIQlaH Hoch SuwISya'ngan. ngugh vISIQlaH je jIH 'e' vIHar. loQ vIHajbej. not qoHpu''e' neH lughIjlu'. chaq ngugh 'uchgha' raS'IS Segh vISIQlaH...

De'Hom chu'

tugh Dor jar cha', 'ach De' chu' vI'otHa' vIneH. chu'qu' pagh, 'ach qaSpu' wanI'Hommey Daj:

1. ghItlh'a'Daj Hubta' jupwI'.
   DuSaQ'a' Qoyje' wejDIch HevmeH yIngchIy, jungwoq Holtej. 'opHu' ghItlh'a'Daj Hubta' 'ej 'InternetDaq muchDaj wIbejlaH. Dun ghaH 'ej Qapbej. qaStaHvIS cha'maH tup much, ghIq qaStaHvIS loSmaH vagh tup luyu' cha' 'a'ghen. pe'vIl luyu' 'ej Qatlhlaw' jangmeH Qu'. jar vagh, jaj wa'maH wa'DIch ghItlh'a'wIj vIHubnIS je jIH. jImuchvIpbe', 'ach muyu' 'e' vIHajqu'.
   
   
2. 'InternetDaq jup qoS wIlop.
   qoS SIQpu' SIte'van, DuSaQ'a'wIj latlh HolQeD HaDwI'. maghomlaHbe'mo' wa'Hu' 'InternetDaq wIlop. ram naQ maja'chuq, maHagh, 'ej maHaH'egh. tlhaQqu'bej.
   
   
3. tlhIngan Hol mu'mey chu' wIHevpu'.
   chu'chu'be' mu'meyvetlh, 'ach DISvam lI'qu'! tera'Daq qabDu' law' ngejpu' qoro'na javtIm net Sov, 'ej DaH roghvaHvaD Hergh lunob Qelpu'. 'ach ngejlu' 'e' bot Herghvam, vaj wejHa' roplu'chogh, vorbe'. wej mu'vam wISov. DaHjaj matlh luHchu'ta' marq 'oqranD 'ej wISovchoH: «javtIm raS'IS», «javtIm ngeb raS'IS» pongnISlu'. wej porghwIjDaq qoro'na javtIm ngeb raS'IS poch Qel, jIpIvmo'. 'ach wejHa' javtIm raS'IS SIQlaH qanwI'pu'. majqa'. latlh mu'qoq chu' vISuq: «Sum». ghItlh'a'Daj HubtaHvIS jupwI', Sum wIlo'. 'ej SumDaq jupma' qoS wIlop je.
   
   
4. jIl chu' vIghaj.
   DIS vorgh juH qachwIj luDabHa'choH DoyIchlangan jungwoqngan je. naHHa' jIlpu'wI' Deq. not chuS chaH 'e' vItIv. DaH pa'meyvetlh Dab turIqya'ngan. jIlwI' chu' pong vISovbe'. Do'Ha' loQ chuS. rut QoQ taQ 'IjtaH qoj HaSta jIH bejtaH. loQ muyIv. 'ach Do' vumnISlaw', vaj motlh ram cha'maH wejlogh Qoylu'DI' QoQDaj chu'Ha' ghaH. ghIq jIQonglaH. pa'meywIj Dop Dop Dab pagh. wejHa' DabHa'choHpu' jIlwI' maw'. DabHa'choHmoHta'. DaH veng yoS vagh Dab net ja'. maj. not vIleghqa' 'e' vItulbej!
   

DaH jIQongpa' jIvumqa'. pItlh!

DoyIchlanDaq jIHtaH

qaStaHvIS poH nI' naDev jIghItlhbe', Qu'mey law' vIturnISmo' 'ej latlh Dochmey vIbuSnISmo'. 'ach DaH 'op tup vIjon, jIH mubopbogh De' chu' vIja'meH...

DaH lupwI' mIrDaq jIba'taH 'ej mung juHwIj vIchollI'. DoyIchlanDaq jIboghpu' net Sov, 'ej layIpSIq luDab vavwI', SoSwI', be'nI'wI', puqbe'Daj, vIghro'chaj je. Ha'le Dab bangwI'. wa' veng Sumqu' latlh veng, DoyIchlan chanDaq tu'lu'. nItebHa' QISmaS DIS chu' je wIlop wIneH, vaj pa' jIratlh 'ej DIS veb jar wa' SuwISya' vIcheghrup.

DaH SuwISya'Daq qabDu' law' ngejpu' qoro'na javtIm (mu' chu' vIlo'!), 'ach rap DoyIchlan SaqSen yoS. 'ej vavwI' SoSwI' je vISuchmo', pa' juHwIjDaq jIwIgh'eghnISbe'law'. loQ jum chetmaj, 'a jIbepbe'. qorDu'wIj bangwI' je neH vISuch. juppu' vISuchbe'. berlInDaq latlh juppu' wISuch 'e' wInabpu', 'ach DaH qItbe'choH, vaj layIpSIqDaq wIratlhnIS.

toH... qabbogh De' chu' vIghaj je: DaHjaj muyu'ta' wej 'a'ghenwI', qawHaq vu'wI' vIgheS vIneHmo'. pe'vIl jIqeq, De' law' vIboS, latlh tejpu' vIrI', 'ej much vIchenmoHta'. jImuchDI' qay'be'law', 'ach ghIq mughelqu'. Qutlhqu' jangmeH Qu'! jIghunlaH 'e' lupIHba', 'ach... 'ach... jIghunlaHbe'! Qu' chu' vepchajDaq ghunwI' lunejbe'law', 'ej jIghunlaH not 'e' vImaq. muyu' rInDI' jIbaw'Ha'chu'choHpu'. DaH Qu'vam vIHevbe'bej. jI'IQ. 'ach qawHaq ghunwI' lunejchugh, vaj mItchuqbe' Qu'vam jIH je. ghaytan layIpSIq HolQeD yejHaD chu'Daq Qu' vISamnIS...

DaH rejmorgh vIDa 'e' vImev. tugh juHwIj vIpaw 'ej jIQuchchoH.

(lupwI' mIrDaq)

Heghpu' vavwI' 'e'mamnal

wa'Hu' murI' vavwI' 'ej jatlh; cha'Hu' Heghpu' 'e'mamnalDaj. QISta' 'oH pongDaj'e' 'ej SoSnI' chaj ghaH. tera' DIS 1924 boghpu' 'ej qaStaHvIS DISDaj cha'maH HutDIch, vavnI'wI' loDnI' nayta'. layIpSIq veng luDabtaHvIS wa' puqloD lughaj. ngugh pIj wISuch. reH loy' QISta' 'ej nuHaghmoHlaH. cha'maH wej ben Heghpu' loDnal. 'IDnar lIllaHchu', vaj reH mutIvmoH. qanchoHDI', qemnItlh vengDaq qanwI'pu' juH qach DabchoH, pa' Summo' puqloD wa' puqnI'be' je.

DaH SuwISya' vIDabmo' pIjHa' ghaH vISuchlaH, 'ach rut vIrI' 'ej maja'chuqmeH ghogh HablI' wIlo'... 'ach qaS DIS 2020 'ej qanwI'pu' juH qachDaj HIvpu' mIv'a' javtIm. 'op QorghwI' ngejlu'pu', ghIq rIb rop'a'. pIvHa'be'pu' QISta', 'ach javtImmo' qaStaHvIS wej jaj ropyaHDaq QotnIS. HutmaH loS ben boghpu' vavwI' 'e'mamnal, 'ach cha'Hu' Heghpu'. pe'vIlHa' leSjaj. 😢

maghomta' 'ara'te jIH je!

DuSaQ'a'wIj HolQeD yejHaDDaq vum be' Dajqu'. 'ara'te* 'oH pongDaj'e' 'ej 'ewuSqal Hol jatlh. jupwI' QaQ ghaH 'ej majatlh 'e' vItIvqu'. Hut ben Holvetlh vIghoj 'ach Do'Ha' HochHom vIlIjpu'. vaj reH DIvI' Hol wIlo'. wa'leS juHDaj cheghmo' ghaH, DaHjaj choS maghom 'ej nItebHa' 'uQ wISop.

 

naDev juH ngo'vo' 'el neHmo' 'ara'te, 'ej DIS veb jar wa' juH chu' nejnISmo', juHwIj wutlh pa'Daq wa' buq polta'. vaj ghaHvaD pa'meywIj vI'ang. mer paqmeywIj law', 'a juHwIj parHa'. naDev loQ marSa'la' HIq wItlhutlh. nuq 'oH? HIq Doq, ram HIq, Su'ghar qut but je DuDnISlu' 'ej qa'vIn qurgh chelnISlu', ghIq qaStaHvIS cha' jar barDaq polnISlu'taH. ghIq qa'vIn qurgh teqnISlu'. na'ran rurchu' 'ej qa'vIn wejwa' ghaj. 'eyqu'! wa' bal munobta' bangwI' SoS, SoSDaj juH wISuchDI'. vabDot parHa'qu'law' 'ara'te, 'ach DaHjaj HIq law' tlhutlh neHbe', loQ wuQmo'.

 

ghIq maghungchoH, vaj jungwoq Qe' «Soj naQ» wIjaH. pa' 'ey nay' 'ej law'. muja' ghaH: 'opwen ngejpu' mIv'a' javtIm! ngugh 'eSpanya'Daq ghaHtaHvIS loQ ropchoH 'ej qaStaHvIS wej jaj chur... 'ach churHa'choHDI' Soj mumbe'choH! yuch Sop, naHmey Sop, chabHom na' Sop, 'ach mumlaHbe'. meqvetlhmo' HIvpu' mIv'a' javtIm 'e' Sovbej. ghIq nujDaj Hutvav tob neHmo' nIpon 'uSu' tlhutlh! 'ach wejwa'Daj mumbe'!

maSop rInDI', «'eDIy HIq tach» wI'el wIneH, 'a Do'Ha' SoQ. poS «volter tach», vaj pa' wa' HIq Doq wItlhutlh, mejnISpa' ghaH. HolDaj vIghojqa' vIneHqu', 'ach 'Iq Holmey vIghojtaHbogh... 'ewuSqal Hol vIghojchoHpa' wej latlh Holmey vIghoj 'e' vImevnISlaw'. vaj wej jIbej. 'ach muvuQ be'vetlh HolDaj je. 😊

'ewuSqal Hol boQoy boneHchugh, QoQ ghomvam vIchupqu': KOBAN

*) tlhIngan Hol vIghItlhtaHvIS 'ej latlh Hol pongmey permey je vIlo'chugh, motlh ngutlh tu'qom chongHa'moH. vaj tlhIngan Hol mu' 'oHbe'chu' net SovlaH.