jul naptop naQHa'

DaHjaj 'ewropDaq qaSpu' jul naptop. Do'Ha' naQHa' 'ej vengwIjDaq jul lutlhoDmoH 'engmey law'. jul po'oH neH vel maS 'ej jul chotlhbe'lu'chugh, ghaytan wanI' tu'laHbe'. 'ej wovqu'mo' jul, chotlhbe'nIS Human, 'a le'bogh mIn QanwI' nguv lo'nIS. cha' De' ngop vIlo' jIH. Qapbej mIwvam 'e' vISov. qaSpu'DI' latlh jul naptop, mIwvam vIlo'pu'. vabDot mIllogh vIqonta'!

 

DaHjaj qaS: jul velpu' maS. toH... naptop 'oH!

'ewrop botlh poH wa'maH cha' vatlh wa'maH wej rep qaS 'aqroSDaj. ngugh mIlloghvam vIqon. 🌞 🌝

Sor toSlaH'a' tangqa'?

wej jIHegh. motlhchoHlaw'pu' tIqwIj jaghIv. wej meqDaj Sovlu'. 'ach DaHjaj Suchtuv jum vIrIch. motlh nom SuchtuvwIj vIlIj 'ej jInajtaHvIS Qatlhqu'be' SuchtuvwIj 'ej Dajqu'be'. pIm wanI'vam. cha'Hu' ram pe'vIl jInajlaw' 'ej Do' HochHom vIqawlaH. jIvemDI' SIbI' bangwI'vaD Hoch vIja' 'ej jIHu'DI' Hoch vIghItlh. jInajtaHvIS mIlloghmey vIqonlaHbe' (quSDaq jIba'), 'ach Do' mIlloghmey chenmoHlaH valwI' pargh, vaj jIHvaD mIlloghmeyvetlh chenmoHpu' DALL·E 2.

toH... jInajtaHvIS HurDaq jIyIttaH. juHwIj taw 'oH. pay' nargh veD tangqa''a'. Qobqu' SIbI' 'e' vItlhoj. 'ach muyovbe' 'oH, SetqIn Sor tIn toSchoH. jumbej wanI'vam! bartIqDaq ba'taH veD tangqa''a'vam 'ej luHIv notqa'. QeHqu'choHbej pumDI' 'e' vISov, vaj nom tlhoy' vItoS. pumDI' tangqa', QeHchoH 'ej tIngvo' 'evDaq chanDaq qetchoH. vIjotmoHmeH tlhoy'wIjvo' qet'uymey vIvo' 'ej bIH SopchoH tangqa'. 'op pIq ngab Ha'DIbaHvam tIn.

bartIqDaq ba'taH veD tangqa''a'.

tlhoy'vo' jIghIrpu'DI' tawmajDaq Du'Hommey botmeH naQmey je Qaw'pu' tangqa'. rab way'ar. juHwIj wutlh vI'el 'ej pa' cha' nuv tu'lu'. wa' pa'Daq Sut QaDmoHwI' jan tlhopDaq ba'taH Ha'DIbaH mach. vIghro'maj (mIylo) 'oH 'e' vIHarchoH, ghIq ngavyaw' puq 'oHlaw' 'e' vIlegh. «SojDaj nejtaH ngavyaw' puqvam» muja' wa' HujwI', «ghunmoHwI' pa'Daq Heghpu' 'oH.» muleghDI' puqvam, QeHchoH je 'ej muchop 'e' nID. nom Sut Say'moHwI' jan vItoS 'ej puq vIyutnIS. janDaq ghu waqmey vItu' 'ej vIjaD. tugh ngab je Ha'DIbaHvam mach. ghIq wutlh pa'Daq maQamtaH 'ej ghu' wI'ol. teH. rav'eq Qaw'pu' tangqa' 'ej vavwI' vutpa'vo' tlheptaH SIrghmey, latlh cham Dochmey.

qo' ngavyaw' puq mach.

jImejlaw'pu', ghIq vengHom Sum (Baalsdorf) vIghoSlaw'lI'mo'. pa' ta'meywIj vIqawlaHbe'. 'ach jIcheghtaHvIS QalmeH DoQmIv'a' poS vIjuS. QumwI' vIweSpu' pay' 'e' vItlhoj. vengHomvetlhDaq 'oHbejtaH! 'a tlhoy paS, tlhoS Hurgh. ngugh mumer wanI'Hom: ghopwIjDaq QumwI' tu'lu'! juH vIcheghmeH vIlo'taH! toH... nuq vIchIlpu'? vay' vIweSchu'pu'. QumwI'wIj vIlo'qa' 'ej qabpaqDaq vengHomvetlh ghom vISam. chaq pa' DochwIj tu'lu'pu'. 'ej jIlugh: QumwI' tu'pu' vay'. paS 'ej HurghchoH, 'ach vengHomvetlh vIchegh...

tIr yotlhmey vItol 'ej pay' SoSwI' vIghom! motlhlaw' ghaH, HarqInDaj SIQbe'ba'. muja' «DaHjaj 'aDnIl DuSaQ vIjaHtaH. pa' qaS qaytu' qep.» loQ taQ ghu'vam: lorbe'wI' ghaH 'aDnIl'e', 'ej SoSnI'Daj ghaH SoSwI''e'. be'nI'wI' ghaH 'aDnIl SoS'e' net Sov. chay' pIvqa' SoSwI' yab? 'ej qatlh 'aDnIl DuSaQ wa'DIch ghoSlI' SoSwI'. DaH latlh DuSaQDaq ghoj ghaH. Baalsdorf vengHomDaq 'oHbe' DuSaQvetlh'e'. 'ej qatlh paSqu' qepvetlh? toH... jInajtaHvIS munuQbe' De'vetlh. SoSwI' vItlhej 'ej DuSaQ lojmIt vegh SoSwI'. jItlha' vIneH ghIq jIHIt: «DuSaQwIj 'oHbe' 'ej vav jIHbe'. chaq jI'el net chaw'be'.» meqvetlhmo' HurDaq SoSwI' vIloS. HurghtaH Hur 'ej loQ jIyIt. Dal ghu'vam. jIyot'eghmeH jIyIt 'ej jIqet. wa' juH qachDaq Doqbogh Qorwagh 'IH vIlegh. jIQubbe', 'a Qorwaghvam cha' telqoqmey vIpoSmoH. Qorwagh Dop DopDaq ba'taH loD 'ej bong vIghIjpu'. jItlhIjqu' 'ej Qorwagh vISoQmoH. ghIq juHwIj vIchegh jIqetqu'.

bong loDvetlh vIghIjpu' 'ej jIyay' je jIH.

juHwIjDaq qaSlaw' latlh wanI'mey. loQ letlh, rav tlhIm je vIqaw. chaq quSlabDaq jIQotchoH 'a vIqawbe'... jumqu'bej SuchtuvwIj. not lut nI'qu' vInajpu'!