De'Hom chu'

tugh Dor jar cha', 'ach De' chu' vI'otHa' vIneH. chu'qu' pagh, 'ach qaSpu' wanI'Hommey Daj:

1. ghItlh'a'Daj Hubta' jupwI'.
   DuSaQ'a' Qoyje' wejDIch HevmeH yIngchIy, jungwoq Holtej. 'opHu' ghItlh'a'Daj Hubta' 'ej 'InternetDaq muchDaj wIbejlaH. Dun ghaH 'ej Qapbej. qaStaHvIS cha'maH tup much, ghIq qaStaHvIS loSmaH vagh tup luyu' cha' 'a'ghen. pe'vIl luyu' 'ej Qatlhlaw' jangmeH Qu'. jar vagh, jaj wa'maH wa'DIch ghItlh'a'wIj vIHubnIS je jIH. jImuchvIpbe', 'ach muyu' 'e' vIHajqu'.
   
   
2. 'InternetDaq jup qoS wIlop.
   qoS SIQpu' SIte'van, DuSaQ'a'wIj latlh HolQeD HaDwI'. maghomlaHbe'mo' wa'Hu' 'InternetDaq wIlop. ram naQ maja'chuq, maHagh, 'ej maHaH'egh. tlhaQqu'bej.
   
   
3. tlhIngan Hol mu'mey chu' wIHevpu'.
   chu'chu'be' mu'meyvetlh, 'ach DISvam lI'qu'! tera'Daq qabDu' law' ngejpu' qoro'na javtIm net Sov, 'ej DaH roghvaHvaD Hergh lunob Qelpu'. 'ach ngejlu' 'e' bot Herghvam, vaj wejHa' roplu'chogh, vorbe'. wej mu'vam wISov. DaHjaj matlh luHchu'ta' marq 'oqranD 'ej wISovchoH: «javtIm raS'IS», «javtIm ngeb raS'IS» pongnISlu'. wej porghwIjDaq qoro'na javtIm ngeb raS'IS poch Qel, jIpIvmo'. 'ach wejHa' javtIm raS'IS SIQlaH qanwI'pu'. majqa'. latlh mu'qoq chu' vISuq: «Sum». ghItlh'a'Daj HubtaHvIS jupwI', Sum wIlo'. 'ej SumDaq jupma' qoS wIlop je.
   
   
4. jIl chu' vIghaj.
   DIS vorgh juH qachwIj luDabHa'choH DoyIchlangan jungwoqngan je. naHHa' jIlpu'wI' Deq. not chuS chaH 'e' vItIv. DaH pa'meyvetlh Dab turIqya'ngan. jIlwI' chu' pong vISovbe'. Do'Ha' loQ chuS. rut QoQ taQ 'IjtaH qoj HaSta jIH bejtaH. loQ muyIv. 'ach Do' vumnISlaw', vaj motlh ram cha'maH wejlogh Qoylu'DI' QoQDaj chu'Ha' ghaH. ghIq jIQonglaH. pa'meywIj Dop Dop Dab pagh. wejHa' DabHa'choHpu' jIlwI' maw'. DabHa'choHmoHta'. DaH veng yoS vagh Dab net ja'. maj. not vIleghqa' 'e' vItulbej!
   

DaH jIQongpa' jIvumqa'. pItlh!

QeD torSIv vIbumtaHbogh

QeD torSIv vImuSHa'qu' net Sov! HaSta much, HaSta ta, paq... Hoch vIbej 'ej vIlaD. 'ej pIj vItIv. vaj DaH nuq vIbum?

1. Hov leng. pIjHa' Hov leng (HaSta much mIr wa'DIch) vIbej, 'ach vIbejtaHvIS DoyIchlan Hol pagh DIvI' Hol vIlo'be', 'ach 'eSpanya' Hol vIlo'. Holvam vIghojtaH 'ej vaj muchmey vISovchu'bogh vIbejtaHvIS Holvam laHwIj vIDub. 'eSpanya' Hol Hov leng: puq poH veb, Hov leng: logh Hop Hut tengchaH, Hov leng: vo'yajer je wIbejchu'ta'DI' Hov leng wa'DIch vIbejchoH. qIrq HoD ghor'In je may' bop DaHjaj lut vIbejpu'bogh
2. ba'bIlon vagh. boSov'a'? chaq 'oHvaD babIlIm vagh tengchaH vIpongnIS? ben law'qu' vIbejchoHta', 'ach HochHom vIlIjpu'mo' DaH vIbejqa' vIneH. Hov leng: logh Hop Hut tengchaH rurqu'law'. Heghpu' DawI'pu' bID 'e' vItu'. qatlh?! yIntaH Hov leng: puq poH veb Hoch. loScha' neH 'oH'a'? 😬
3. 'aS 'IDnar pIn'a' Dun. paqvam mughta' DeSDu' Dun! lutvam vIghov, pongDaj vISov, 'ach DoyIchlan DuSaQDaq paqvam wIlaDbe'. wej HaSta muchDaj vIbej. DIvI' Hol tenwalmey mughpu'bogh ghajbe'mo' paqvam, vIyajmeH tlhIngan Hol neH vIlaDnIS. Dunqu'! cha' 'ay'mey vIlaDta' 'ej vItIvqu'. QaQchoHba'lI' tlhIngan Hol laHwIj!

'ej jInmol chu' vItaghta': «ghIrIm loDnI'pu' puq lutmey rorgh» vImughlI'! cha'vatlh ben puq lutmey rorgh boS cha' DoyIchlan loDnI'. Holtej chaH 'ej DoyIchlan Hol mu'ghom lugherta' je. tera' HochDaq noy'qu' lutmeychaj 'ej SIbI'Ha' lutmeyvam laDlaH tlhIngan Hol jatlhwI'pu'. jIDun'a' pagh jIDunbe''a'? 😉

Hov leng: ghom'a' wejmaH chorghDIch

wa'Hu' SuwISya' juHwIj vIcheghta'! nI' lengwIj 'ej qaStaHvIS cha' rep mIm lupwI' mIr, 'ach chaq DoyIchlan lupwI' mIr tumvo' Huch vIHevlaH.

'opHu' «Hov leng: ghom'a' wa'DIch» wIbej jIH bangwI' je. Hov leng HaSta much vImaSqu'bogh 'oHbej 'ej wejmaH chorghlogh vIbejta'. HIja', jInepbe'. wejmaH chorghlogh HaSta muchvetlh vIbejta'. 'ej vIbejqa'taHvIS Dalbe'chu'. tlhoS Hoch mu'tlheghmey vISovchu', Hoch ghu' ram vISov, Hoch Qagh vItu'pu'. QoQDaj vI'IjtaHvIS, vabDot quqbogh ghu'mey vIqawlaH. HaSta muchvam vIparHa'qu'ba'. Hoch DIS wa'logh vIbej vIneH.

'ej HochDIch vIbejqa'taHvIS, ngoDHom chu' vItu'. nItebHa' wIbejtaHvIS, meHDaq QamtaH jIb tIqHa' ghajbogh yaS be' vItu'. ghobe'! vItu'be' jIH, 'a tu' bangwI'.

pItlh.

qoSwIj

vaghHu' qaS qoSwIj wejmaH javDIch. jIqanchoHtaH. 🎉 🎈 🎊

DoyIchlanDaq jIHtaHmo' malopmeH mutlhej bangwI' qorDu'wIj je. juHwIjDaq ghaH bangwI''e', vaj nItebHa' malop. vavwI' SoSwI' juH pa'meyDaq chab wISop 'ej qa'vIn nIm joq wItlhutlh. jaSHa' pa' 'uQ wISop 'ej nutlhej be'nI'wI' bangDaj je. pItSa' chab wIvunta' 'ej 'eyqu'. maSop rIntaHvIS pa'meywIj wIchegh jIH, bangwI', be'nI'wI', bangDaj je. HIq wItlhutlh 'ej Qujmey wIQuj. mubelqu'moH!

Quj wa'

«veng, Sep, bIQtIq» Sar Dajqu' 'oH Quj wa'DIch'e'. bangwI' Quj 'oH. Sar motlh Qujlu'chugh, wa'chawDaq veng, Sep, bIQtIq, pong, yuQ, Ha'DIbaH, latlh Dochmey lughItlhlu'nIS, 'ach nIbnIS mu'meyvam ngutlh wa'DIch. ghantoH: ngutlh Haw «nay» wIwIv, ghIq qaStaHvIS cha' tup, ghItlhnIS Hoch... veng: nuyorgh, Sep: nu'SIylan, bIQtIq: nayjer, pong: nIylo, yuQ: nImbuS wej, Ha'DIbaH: naQ 'er, taH taH taH... Hoch HanDI'Daq mu' ghItlhlaHchugh QujwI', «mevyap!» jachnIS, ghIq ghItlhtaH net chaw'be' 'ej pe''egh Hoch. nap Qujvam, 'a tlhaQ. 'ej SarmajDaq veng, Sep, latlh Dochmey ram wIpernISbe', 'ach yaHDaq mItHa'bogh Dochmey pernISlu'! ghantoH: 'InSep 'oSbogh latlh mu', nenwI' HaSta much DawI' pong, HeghmeH meq, HIq per, ngagh'egh 'oSbogh latlh wot... 'ej reH nIbbogh ngutlh Haw 'oHnIS ngutlhchaj wa'DIch'e'. tlhaQqu' jay'!

Quj cha'

Quj cha'DIchvaD «ghotpu' tamey» vIpong vIneH. bangwI' Quj 'oH je. ghelmeH mu'tlhegh ngaS 'echletHommey. mu'tlheghvam laDnIS wa', ghIq jangnIS Hoch QujwI'. pIj nga'chuqghach lubop mu'tlheghvetlh. janglu'meH HIvje'Daq «HIja'» «ghobe'» ghap ngaSbogh ngopHom'e' lannISlu'. latlh QujwI' jangmeH jengva'Hom leghlaHbe' QujwI'. ghIq ghellu': HIvje'Daq «HIja'» 'ar tu'lu'? mI'vam loynISlu'. yajlu'meH QaHjaj ghantoHvam: loS QujwI' maH. HochvaD ghelmeH mu'tlhegh wa'DIch vIlaD jIH: «rut latlh nuv rejghun Dalargh'a'?» ghIq ghelmeH jengva'Hom wIv Hoch QujwI', 'ej HIvje'Daq wIlan. ngopHom wIleghlaHbe'mo', maloynIS. chaq wa'logh «HIja'» janglu'pu' 'e' vIloy jIH. cha'logh «HIja'» janglu'pu' 'e' loy bangwI' be'nI'wI' je. «HIja'» tu'lu'be' 'e' loy be'nI'wI' bang. ngugh loS ngop wIDuD 'ej HochvaD vIlaD: ghobe', ghobe', HIja', ghobe'. wa'logh neH «HIja'» janglu'law', vaj jIlugh. wa'logh pe''egh. tlhaQqu' Qujvam! pe'vIl maHagh 'ej rut De' chu' wISovchoH. chechchoHtaHvIS Qujvam QujnISlu'bej! 😂

nobmeywIj:

qaSmo' qoSwIj, nob law' vIHev 'ej jIQuchqu'. mIllogh vIqonta' 'ej nobmeywIj vIDel:

• logh QongDaq tlhIm ngogh tun je velwI' munobta' bangwI' SoS! tunqu' 'ej logh 'IH 'agh. 'IHqu' 'ej SuwISya'Daq vIlo'choH. ngugh loghDaq jIQonglaH!
• vagh 'uS ghajbogh QumwI' 'uchwI' qal'aq munobta' be'nI'wI' bang. lI'qu'. SoHDuS HaSta ta vIqonrupchugh, ghaytan qal'aqvam vIlo'.
• yuch munobta' bangwI' vavwI' je. yuch vItIvqu' net Sov. qoS chab machqu' munobta' bangwI', loS weQ ghajpu'. 'a wejHa' vISopta'.
• jav HIq Doq HIvje' munobta' vavwI'. naDev DoyIchlan HIq Doq HIvje' vIHutlh 'e' Sov. 'ach HIq Doq vItlhutlh 'e' vItIvqu'. vaj lI'bej nobvam.
• cha' HIq Doq bal wa' 'eyre' qulcher HIq bal je munobta' vavwI', be'nI'wI', bangDaj je. HIq vItIvqu' net Sovba'! 😅
• «chorno'bIl» HaSta much lut mIr munobta' bangwI'! lut mIrvam vImuSHa'qu'! tera' DIS 1986 chorno'bIl vengDaq jorpu' woj choHwI' 'ej woj law' tlhuDmo' Heghpu' qabDu' law' net Sov. meqvam 'agh lut mIrvam, 'ej tlhoS DI'ruj rurchu'. cha'logh wIbejta' 'ej wa'Hu' qaStaHvIS parmaqqay jaj, nItebHa' wIbej. parHa'qu' je bangwI'.
• jIHvaD wep ghun yopwaH tun je vIje'ta' jIH. le'be' yopwaH, 'ach 'IHqu' wep. qaStaHvIS qImroq bIr, wepvam vItuQlaH. SuD wep; QIm SuqSIv rur.

 

qaStaHvIS qoSwIj nobmeyvam vIHevpu'!

 

De'chel... mIlloghvetlhDaq vIchel 'e' vIlIj, 'ach tuj bal munobta' bangwI'. nuq 'oH? qoch'uq yughbogh ngaSwI' 'oH. bIrchugh vay', bIQ tuj lIchlaH 'ej burghDaq lanlaH. ghaytan pIjHa' vIlo' jIH, 'a pIj lo'bej bangwI'. chItaHvIS 'oy'qu'mo' burghDaj!

QapHa' DeSwarwIj bIr

Qu'vatlh! QapHa'choHlaw' DeSwarwIj bIr!

'opHu' Ha'le-vo' macheghpu'DI' jIH bangwI' je DeSwarwIj bIrDaq nonpu' 'op Soj 'e' wItu'. 'epIl qulcherDaq rIbchoHtaH 'atlhqam tun. tera' yav 'atlhqam HIvje'Daq 'atlhqam tun tu'lu' je. tlhoy vItlh DeSwar bIr Hat 'e' tu' bangwI'. vavwI' vIja' 'ej jonwI' ghaHmo' DeSwarwIj bIr nuDchu', 'ach Sengna' SamlaHbe'law'. chaq Duy' Hat noch Hat lISmeH jan joq... maSovbe'. tI' 'e' nIDpu'DI' Qapbe' je qoD wovmoHwI'. Qapchu'taH chuch bo'voD. qoDDaq bIQ HIvje' wIpolta', ghIq taD bIQvam. 'ach latlh bo'voDDaq tlhoy vItlh Hat. wa'vatlh HutmaH chorgh SImyon gheH qoDDaj. SojvaD QaQbe'chu'.

wItI'laHbe'mo' chaq wutlh pa'vo' ngo'bogh DeSwar bIr wIlupnIS 'ej juH pa'meywIjDaq wIpolnIS. 'ach choQ wejDIch vIDab. 'ej tInqu' ngo'bogh DeSwar bIr. muboQnISbej vavwI' be'nI'wI' parmaqqay je. tlhoy jIpuj jIH. ghaytan Hogh veb mavang.

«DeSwarwIj buj» 😠