'angweD ram

Hoch DIS vengwIjDaq qaS «'angweD ram»: Hoch 'angweD 'elmeH wa' chaw' neH je'laH vay' 'ej qaS muchmey law'. majeS je jIH bangwI' je. meQHam qaStaHvIS ramna', 'angweDmey DI'ellaHbe', vaj 'angweD choS pongnISlu'ba'. Hoch 'angweDmey wI'elmeH yapbe'chu' poH. 'ach Dajqu'bej wanI'vam. ngIq 'angweD wISuchbogh vIDel.

  1. nughQeD 'angweD: nughmey nov bop 'angweDvam. ben law'qu' vISuchpu' 'ach choHlu'law'ta'. qaS much: pa'meyDaj DIvegh 'ej Dochmey nu'ang. wa' pa'Daq pIw chovnatlhmey wIwaHlaH. latlh pa'meyDaq wabmey lu'anglu', naghbochmey luQIjlu', taH taH taH... puqpu'vaD Dajbej. 😅 'aSya' tIng chan pa' ghaj je 'angweDvam, 'ach Do'Ha' law'be' mIyama lubopbogh vIqraq'e' roSqa''e' je. reH jIHvaD Daj ngutlhmey ngaSbogh vIqraq roSqa' je. Do'Ha' qub bIH. latlh pa'Daq QoQ jan lu'anglu' 'ej muchtaH po'wI'. wab SIr tlhen ngIq jan net Sov, 'ej pImmoHbogh HapQeD ngoD nuchuH. rInDI' SoQDaj, 'op jan DIwaHlaH. 'ey'bej ghav 'uSqan 'In (qegh 'In?) wab.
  2. maSIr tIQ 'angweD: DaH maSIr tIQ Hol vIghojqa'taHmo' 'angweDvam vI'el vIneHqu'! 'ej Dajqu'bej vIqraqmeyDaj, law'qu'mo' ngutlhmey. Do'Ha' loQ maSIr tIQ Hol vIlaDlaHtaH, vaj mu'tlhegh pagh vImughlaH. taQ, qar'a': muvuQqu' Holvetlh tIQ, 'a qunchaj lalDanchaj je vISaHqu'be'. ghurDI' maSIr tIQ Hol laHwIj, jIcheghbej. 😍
  3. meHghem vur 'angweD: bangwI' vuQqu'be' QeD; meHghem maS, vaj 'angweDvetlh wISuch je. pa' law' nagh beQmey, mIlloghmey qonlu'ta'bogh je. vurba' Hoch, pagh vIyajmo'. chumqu' 'ej maw'moHlaw'. 'op HaSta ta tu'lu' je. 'angweDqoqvam vItIvbe'qu'... peqIm DeSDu'! QonoSwIj DalaDchugh, vaj ghaytan SoHvaD Daj 'angweDvam. wa' jaj HISuch!
  4. Sep Hung tum Deq 'angweD: cha' DoyIchlan tu'lu'taHvIS, DoyIchlan chan ngan naQ ghoq «Sep Hung tum» net Sov. ngugh qummo' bepchugh vay', SIbI' SovchoH tumvetlh. pIj rewbe' tlha', juHchajDaq wab qonwI'mey pegh jom, qoj qama'pu' yu'chu'. Sep Hung tumvammo' Heghpu' rewbe' law'. DaH Do' wa' DoyIchlan neH tu'lu' 'ej wejmaH wej ben tumvam mIgh cherHa'lu'ta'. 'angweD mojpu' vengwIj Sep Hung tum qach Deq. tlhoy ngaj poHmaj, vaj jIcheghbej. chaq pa' vavwI' bopbogh Hung ta tu'lu'? Sovchu' neHbe' vavwI', 'a muvuQ nuHvam... tlhIH vuQchugh je bovvetlh, tumvam mIwmey je, vaj DoyIchlan HaSta much SachupnIS: Hung yaS bop «latlhpu' yIn» — Seyqu'moH muchvam! yIbej!

 

bangwI' belqu'moH 'angweD wa'DIch tamghay.

berlIn tI Soj qep

DorDI' jar vorgh, berlIn wIjaH bangwI' jIH je. pa' qaS «VeggieWorld Berlin 2022» (berlIn tI Sop qo'). Ha'DIbaH puS vISop, 'ach Sopbe' bangwI'. 'a tI neH Sopbe' ghaH — QIm, DayqIr, nIm, ghotI' Sop je. maSop 'e' wItIvqu'mo' maHvaD Dajqu' qepvetlh.

qaStaHvIS cha' ram DoyIchlan monDaq maratlh. pa' nojbogh loD wItu', 'ej waghqu'be' qav'ap. 'IDraH 'oH pongqoqDaj'e' 'ej pIj luSuch mebpu'. juHDaj wIrIchmeH, berlInDaq lengHom wIlIDnIS. 'ach wovqu' jul 'ej 'IHqu' pem, vaj mayIt 'e' vIwuq. poH nI' wIghajmo', cha' yotlhmeyDaq mayev:

  1. mowabIt bIghHa' Deq yotlh: mangghaDaq Sumqu' yotlhvetlh 'ej Dech tlhoy' (berlIn chevwI' tlhoy' 'oHbe'). pa' maba'choH. loQ jul wItIvtaHvIS cheS mach vIlegh! QIt wIchol 'ej lav bIngDaq QemjIq retlhDaq cha' cheS tu'lu'. Qupqu' 'ej machbejtaH. DIyachlaHbe' net Sov, cheSmey tlhab bIHmo', 'ach 'IHqu'!
  2. Ha'DIbaH Du'Hom mach: pa' jul lutIv qabDu' law'. HaDwI' chaHlaw' HochHom'e'. mayItqu'pu'mo' magh yotlhDaq maQot 'ej vabDot bong maQongchoH.

cheSHom!

mach 'IDraH pa', 'ach maHvaD yap. tlhoy tun Qongmaj, 'ach qay'be'. 'ej naHHa'bej 'IDraH. Qe' chup 'ej 'InternetDaj wIlo' 'e' chaw'. choSvam mayItqa'. Sorvo' bom 'IH bomqu' bo'Degh 'e' wIQoy 'ej vIngu'meH QumwI'wIj vIlo', bo'Degh ngu'meH nIqHom vIghajmo'. tera' nay'tIngghel 'oH! bo'Deghvam Sov Hoch, 'ach not vIQoy... pagh vIQoyDI' not vIghov. Dajbej. vabDot tlhoy'Daq Dep qub vItu': Supbogh voDchuch nu'. Do'Ha' voDchuch tlho'laHbe' bangwI', ghaH lughIjmo'. jIH muvuQ. ghIq SIpre' bIQtIq HeHDaq maba' 'ej loQ HIq wItlhutlh 'ej maghungchoHDI' pItSa' chab Qe' wIjaH. pa'maj vIcheghpa' tach wISuch wIneH, 'ach Sum wa' neH: «Luna» (tera' maS pong) 'oH pongDaj'e' 'ej tlhoS chIm.

jaj cha'DIch tI Sop qep wISuch. vaSDaq qaS 'ej waghbe' 'elmeH chaw'. vaSvetlhDaq law' raywal, raSmey je. raSDaj tlhIn ghaj ngIq malja'. Ha'DIbaH Hap ngaSbe'chu'bogh Soj lungev. 'ej Dat Sojchaj luwaHlu' net chaw'. law'qu' Soj: yuch, nImqoq wIb ngogh, qulcher Sar, chab, ghevI', na'ran rurbogh SojHom, HIq... 'ej Ha'DIbaH, QIm, nIm, DayqIr je ngaS pagh. 'ey'qu' 'ej Hoch wIwaH. 'op SojHom DIje'ta'. DaH DeSwarwIj bIrDaq nImqoq wIb ngoghmey tu'lu', 'ach nImna' ngaSbe'. qurme''a'chaj 'oHlaw' naHlet'e'. vaSvamDaq mayItqu'mo' 'oy' 'uSDu'maj, vaj tach wISuchqa'. berlIn jorchan wItIvmo' beb tach wISam. jenbej qachvetlh. 'ey'qu' je HIqmaj, 'ach waghqu'.

raSvamDaq 'Italya' nImqoq wIb ngogh wIje'ta'.

jaj wejDIch 'IDraH pa' wItlheD. berlIngan jupwI' wIghom vIneH, 'ej «qa'vIn Qe' qIj» nuchup marta. wejHa' wejlogh berlInDaq marta vIghomta'. pongna'Daj vIlo', wej wab jabbI'ID mIrmey ghajmo' ghaH loDnI'Daj (tlhuba) je: «voya'jer wIbejqa'», «DISqa'vI'rIy wIbejtaH», «QeD rorgh» je. wa' ben nItebHa' wa' wab ta wIqon 'ej Holmey lu'oghlu'ta'bogh DIrIch (yIlaDqa'!). ngugh tlhIngan Hol je wIrIch. DoyIchlan Hol boyajchugh, vaj Hoch wab jabbI'ID mIrmeychaj vIchuplaH. 'ej tuQoy boneHchugh, vaj wab tamaj yI'Ij! toH... maba' 'ej maja'chuq. pIj marta vIHaghmoHta'. loy'qu'wI'na' ghaH, 'ej maghomDI' reH tIqwIj ghunmoH ghu'vetlh. 'ach Do'Ha' povvetlh majawDI', tugh meqmey DIHutlhchoH. maghomHa'pu'DI' latlh qa'vIn Qe' wIjaH bangwI' jIH je, pa' maba', 'ej ghotpu', HaSta lut mIr je wIbej. ghIq vengwIj wIchegh.

pItlh.