Suchtuv: nuq jatlh qeSHoS?

wa'Hu' ram jInajtaHvIS ghu' tlhaQ vIghom! bangwI' juHDaq qaSpu', vaj SIbI' ghaHvaD lutvam vIja'. 'ej DaH tlhIHvaD vIja'qang je. toH... ghu'vam jInajpu:

maghIQlaw' jIH bangwI' je 'ej ghIQmeH juH qach wIDablaw'. maQongtaHvIS, pay' tlhImwIjDaq vay' tun vItu': mIylo 'oHba', be'nI'wI' vIghro'. muvemmoH 'e' nID, 'ach jIvem vIneHbe'mo', bangwI'Daq jaH. «Soj poQ mIylo» jIjatlh. jang bangwI'; jatlh «'eQ mIylovaD Soj vInobta'». lugh. 'ej Soj DuqDaj ghoS vIghro' 'e' vIlegh. 'ach ravDaq vIghro' chabHommey tu'lu' 'ej law'qu'. rav HochDaq rIbmoH'a' mIylo? jISIv, vaj ghu' vI'olmeH jIHu'. ghIq vutpa' vI'el 'ej pa' ravDaq QongtaH qeSHoS ghumey law'qu'! ghaytan wa'maH vagh qeSHoS ghumey vIlegh! Qongbe' Hoch, reHtaH 'op. 'IHbej 'ej mach. tunqu' 'ej beqpuj rur veDchaj. muleghDI' 'op, SIbI' Haw'. QongwI' pa' vIchegh 'ej bangwI'vaD ghu' vIja'. Hu' je ghaH. pa'majDaq qeSHoSmey tu'lu' je. law'qu'! QongDaq 'emDaq, DeSwarmey 'emDaq je qungmeyvo' pa'maj 'ellaw'pu' 'e' wItlhoj. vaj DIghIj 'e' wInID. Haw'meH qungmeychaj lo' bIH wIneH. 'op ghumey vIwoH 'ej qung tlhopDaq vIroQ. ngIjbej cha' qeSHoS. mejqangbe'ba' 'ej Ho'Du' 'ang. pay' nuboQ je vavwI'. tagha' Hoch qeSHoS DImejmoHta'.

ghIq nIteb muD Duj verghDaq jIHtaH 'ej jImoDnISlaw'. ghopDu'wIjDaq Hampong mach vItu'. reghbe', 'a mulotlaw'pu' qeSHoS namwechDu'. loQ 'oy' neH, 'ach Qob Hampongvetlh 'e' vIqaw. Human lotDI' Ha'DIbaH tlhab, chaq 'aD 'ellaH javtIm. ghIq Ha'DIbaH maw' ropmo' Heghbej. ghopDu'Daq wojmeH taS vIghay. bangwI' vIrI' 'ej muja' «ghorgh Ha'DIbaH maw' rop javtIm ngeb raS'IS vISIQpu'? DaSov'a'? qaSpu'DI' wa'maH DIS, pochqa'nISlu'!» 'ej SIbI' javtIm raS'IS paqHomwIj vI'ol. loQ jIlImchoH...

ghIq jIvem. taQ Suchtuvvam. taQ 'ej tlhaQ. 'IHqu' qeSHoS ghumey 'ej tlhaQ ghu'vetlh, 'ach namwechDu'chajmo' jIropvIpchoH. 'eQ javtIv raS'IS paqHomwIj vI'ol 'ej tera' DIS 2010 javtIm raS'ISvam pochlu'ta', jungwoq vIlengpa'. lughchu' yab qoD: jIHDaq Ha'DIbaH maw' rop javtIm ngeb raS'IS pochqa'nISlu'!

po Dargh HIvje'vam mujabpu' bangwI'! 🦊

juH chu' Dab SoSoy

wejHa' QonoSwIjDaq SoSwI' rop vIrIchpu'. SochmaH wa' ben boghpu' 'ej loS ben QoghIj HarqInDaj lughovpu' Qel. 'altlhaymer rop SIQtaH 'ej reH 'arghlI'. Do'Ha' ropvam vorlaH pagh. ngoStaH QoghIjDaj, vaj nenHa'choHlaw'. HochHom qawlaHbe'. Qu'mey nap HochHom turlaHbe' je. yItlaH, ba'laH, HaSta jIH bejlaH, jatlhlaH, yajlaH. 'ach pIj mu'tlheghmey yajchu'be' SoSwI'. 'ej nIteb puch lo'laHbe'. vaj qaStaHvIS loS DIS, Qorghqu'nIS vavwI'. pem Hoch 'avnIS, QorghnIS, Soj vutnIS, SopmeH boQnIS, HerghDaj nobnIS, QongDaqDajDaq DevnIS. rut vavwI'vaD Qatlhqu' Qu'meyvetlh 'ej 'ItmoH ghu'vam. moghqu'DI' HIq tlhutlhqu'pu' 'e' wItu' jIH be'nI'wI' je. pIj vavwI' wIboQ 'ej SoSma' wI'av. pIj Du'HomDaq pormey qet'uy je vIboS pagh chal chuch vIteq. SoSoy wImuSHa'qu'ba', 'a juHDaq QorghnIStaHchugh vavma', maw'choHbej. tagha' qaSpa' QISmaS QaQbogh De' chu' wIHev. juH chu' DabchoHlaH SoSma'!

SachuHnIS...

ropDaj rurbogh ropmey SIQDI' vay', wej DuH tu'lu':

1. juHDajDaq ratlhlaH 'ej luQorgh tuqnIghpu' Qorghpu' po' je.
2. QorghmeH ropyaH qach 'ellaH.
3. QorghmeH juH muvlaH.

'ej nIvqu'law' qech wejDIch. ropyaH qach rurbe'chu' QorghmeH juH, 'a nIteb Dabbe'. latlh SIDpu' tu'lu' 'ej chaH Qorgh po'wI'pu'. juH rur, vaj churHa' SID. Demenz-WG 'oH DoyIchlan Hol perDaj'e'. motlh QorghmeH ropyaH qachDaq law'qu'bej SIDpu' 'ej ngIq SID Qorghchu'meH yapbe' poH. 'ach pIm QorghmeH juH. cha' wen Daqvetlh nuchup vay' 'ej SIbI' rI' vavwI' ghIq mab qI'. taw'HaDaq juHqoqvetlh tu'lu'. vengHommajDaq Hopbe'. puH Duj SeDlu'chugh chorgh tup lIDnIS. yItlu'chugh wa' rep lIDnIS. loQ Qatlh lupwI' jey. juHvetlh luSuchpu' be'nI'wI' vavma' je 'ej parHa'. ghIq SoSwI' Sutmey latlh Dochmey je wIqem jIH vavwI' je 'ej pa'Daj wI'IHmoH. Dochmey Sov(pu')bogh DIlan 'ej yuch ngaSwI' vIchel. jar wa', jaj wa'maH vaghDIch juHDaj chu'Daq SoSwI' qem vavwI'. 'ISjaH mIlloghmey je ghovpu' SoSoy jatlh. 'ej SIbI' pa'Daj chu' parHa'choHlaw'. Do' nom Quch 'ej churHa' SoSwI'. pIjHa' bep. yInDaj chu' bItlhlaHmeH SID, wISuchbe' qaStaHvIS wa' Hogh net chup. ghIq Suchpu' be'nI'wI'.

SoSoy pa' chu' (HaSta jIH tu'lu' je)

 

wa' Hogh ret SoSoy vISuchpu' jIH. jI'elDI' no'laS pa'Daq quSlabDaq ba'taH SoSwI' 'e' vIlegh. HaSta jIH bejtaH. no'laS pa'Daq ba'taH je latlh SIDpu'. qan Hoch (wa'maH lIjwI'pu'). megh veb luvutlI' cha' QorghwI'. SoSwI' retlhDaq jIba'choH 'ej jIHIl'egh. vISuchmo' Quchqu'law' SoSoy. DotlhDaj vIghel 'ej jang ghaH; jatlh «jIchurHa'. naDev 'IH.» napchoHpu' yabDaj 'a bepbe'. QaQlaw' Hoch. naDev 'ey'law' Soj jatlh, 'ach «meghlIj yIngu'!» jIjatlhDI', qawbe' ghaH. 'ach 'ey'. «DuSuchpu' 'ayna'?» (be'nI'wI') jIjatlh. Sovbe', qawbe' je. loQ majaw, 'ach Dochmey puS neH DIrIchlaH. chaq juHna'Daj qawbe' je? pagh ghelbe'. qaSpu'DI' wa' rep, maghep ghIq jImej. loQ taQ ghu' 'ach mu'IQmoHbe'. pa' churHa'bej SoSwI'. maDo' Hoch.

no'laS pa'

wa'Hu' Suchpu' vavwI'. Suchpa' bItqu', SuchvIpqu'mo'. «chaq mughovbe'. chaq chur. chaq QeH, vIghImta'mo'. chaq juHDaj chu' par.» HIt vavwI'. poHvamDaq wItungHa'qu' be'nI'wI' jIH je. lutungHa' Hoch jup, Hoch jIl je. tagha' Suchta'... 'ej nuja'; QaQ Hoch. SIbI' ghovpu' SoSoy, gheppu' 'ej vabDot 'eppu'. jIchurHa'bej jatlh. 'IHqu' pa'wIj jatlh. 'ej pa'DajDaq qorDu' mIlloghmey bejtaHvIS HochHom ghovlaH. ghov'egh, vavwI' ghov, 'ayna' ghov. vIghro'maj, mIylo, ghov. mughov je 'ach pongwIj qawbe'law'. be'nI'wI' bang pong, bangwI' pong Sovbe'law' je. qay'be'. wanI'vam nuja'DI' vavwI', QepHa'bej.