berlIn Holmey qep'a'

qaStaHvIS buqjaj ghInjaj je, berlIn vISuch, pa' qaSmo' «EXPOLINGUA Summer Festival 2022». Holmey bopbogh lop 'oH wanI'vam'e' 'ej berlIn te'ghel ngeng HeHDaq chermoHlu'. tlhoS Hoch DIS qaSlaw' wanI'vam 'ej DISvam 'eb vIjonta'.

ngengvetlh HeHDaq jo'ley' law' tu'lu' 'ej Hol bopbogh malja'Daj 'oS nuvpu' law'. jIpawDI' tulwI' Hol jo'ley' vItu' 'ej pa' loQ tulwI' Hol jatlhwI'pu'vaD jIjaw. raSchaj bIngDaq buq'a'wIj vIlanlaH, vaj latlh jo'ley'mey vISuchtaHvIS tep 'ugh vIqengnISbe'. SoQ jatlh nuvpu' je. Hol bopbogh Qu'na'mey rIch wa' be' 'ej jIHvaD lI'bej De'meyvetlh, Qu'na' vInejlI'mo' jIH. Dajbej. 'ej rInDI' SoQDaj, ghaHvaD jIHIl'egh. pongwIj vIjatlhDI' SIbI' mughov — qabpaqDaq Hol ghommeyDaq maqIHpu' 'ej pIj ghItlhmeymaj DIlaDpu'. QonoSvamDaq mayIrIm vIpong. maja'chuqtaHvIS mughovlaw' loDHom. toH, loDHom ghaHbe', 'ach ghojwI'Hey Qup. «tulwI' Hol, tlhIngan Hol je jatlhlaHbogh ghot SoH'a'?» jatlh. HIja', jIHbej! 'Inot 'oH pongqoqDaj'e' 'ej pIj YouTubeDaq HaSta tameywIj bejpu'. ghIq Dolna wu'jItSa' Hol bopbogh jo'ley''e' vI'el 'ej maja'chuq jIH Holvetlh jatlhlaHbogh be' je. Daj je. maja'chuqtaHvIS tlhoS jo'ley'Daj nge' SuS. lopna' muv je 'op Holmey law' jatlhwI'pu' noyqu': Richard Simcott, Judith Meyer je. jajvetlh DoyIchlan Hol, DIvI' Hol, 'eSpanya' Hol, tulwI' Hol, jungwoq Hol, raSya' Hol je vIjatlh.

'Ityopya' Qe'Daq 'uQ wISop 'ej Holmey DIrIch. ghIq juHwIj ru' vIghoS: wa' jup no'laS pa'Daq jIQonglaH. polISqa'ngan ghaH 'ana''e' 'ej SuwISya'Daq jungwoq QeD HaDta'. DuSaQ'a'wIj DeqDaq noSu Hol ghItlhmeH Ho'DoS Qulpu'. DaH berlIn luDab ghaH parmaqDaj je (jungwoqngan ghaH).

tulHa'wI' Hol jo'ley' 😜

ghInjaj wanI' Daq vIghoSqa' 'ej majatlhqu' berlIngan be': 'ayI'ram. Holmey law' jatlhlaH je 'ej tlhaQqu'. maHaghqu'bej! ghIq qaSpu' Hol Quj: cha'maHlogh ghellu'pu' 'ej reH Holmey bop. vaj maqaD 'ayI'ram, jIH, latlh mebpu' je. qaS cha' qaDmey 'ej cha'logh jIQap! yuch ngugh tInqu' vIHev! ngugh latlh ghot Daj wISovchoH: 'ayIDIl. raSya'ngan ghaH 'ach 'Italya' Dab. nIteb loQHa' maHagh. qaStaHvIS latlh Quj, wa' be'HomvaD jIjatlh 'ej jungwoq Hol ghojtaH 'e' vISovchoH. wejHa' jungwoq Suchta', 'ach wej DuSaQ'a' ghojwI' ghaH. ghaytan wa'maH chorgh ben boghpu'. 'ach maja'chuq 'ej ghaH vIqeS. 'opleS berlIn vIcheghDI' maghomqa' 'ej jungwoq wIrIchqa'. ghIq SISqu'choH 'ej lulIghmaj mojnIS jo'ley'. SISbe'choHpu'DI' paw vengwIj wa' jup: SatIStI'lev. tlhaQqu' je ghaH 'ej nIteb maqID 'ej Holmey DIrIch. ghIq vengmaj wIcheghmeH lupwI' mIr wIlo'. loQHa' potewatmI Hol wIrIch, HaDtaHmo' ghaH.

rIn. Dunqu'bej wanI'vam 'ej qaSqa'DI' jIjeS vIneHqu'.

qam Do Duj leng

cha'Hu' lengHom wItur vavwI' jIH je. qam Do DujDaj lo' ghaH 'ej SoSwI' qam Do Duj vIlo' jIH, malengtaHvIS. ghaytan qaStaHvIS 'op DIS qam Do Duj vIlo'be', 'ej tlhoS jImI'be' net Sov, vaj jIbItlhnISbej. nabwI' po' ghaH vavwI''e', vaj lengmaj nabchu'ta'. puH Duj tawmey DIjun, 'a qam Do Duj tawmey, ngem tawmey DIghoS. mIv DItuQtaH je — potlhqu' Hung! 🚴 🚴

po Hutvatlh rep 'engeSDov wItlheD, ghIq tIHmey retlhDaq tawHomDaq maghoS 'ej 'alten wIjaH. pa' reHmeH yotlhDaq mayev, boSDov ngem wItolpa'. ngemvam ngeng tu'lu' 'ej mayevtaHvIS nuchol Da'vI' qorDu' (SoS, chorgh puqpu' je). ghIq nom SIvenvut vengHom wItol 'ej tagha' boy'Sa wIpaw. pa' HuD chIrgh mu'ang vavwI'. qojDaq chIrgh mach tu'lu'bej. mayevqa' 'ej QIt chIrghvam vIbav. chIrgh chalqach luDab 'apuStoQmey 'e' vItu'. 'IHqu' bo'Deghvetlh! jIHvaD Haru (𓅃) luqawmoH, DaH maSIr no' Hol vIghojqa'taHmo'. ghIq maghungchoH, vaj Qe' wInej. SoQtaH Qe'na', vaj ghab ngevwI' Do Qe'Daq meghmaj wISop. paSta' Ha'DIbaH ghIH je vISop. marach'eghpu'DI' matlheDqa'. qam Do Duj DIlItqa' 'ej boy'Sa taw'a' ngeng wIjaH. ngugh jav qelI'qam DIlIDpu'. ngeng wIbav 'ej cheghmeH leng wItagh. He rap wIghoSbe', 'ach vengHommeyvetlh DItolqa'. po loQ jul lutlhoDmoH 'engmey, 'ach qaStaHvIS pov wovqu'bej jul 'ej tuj. 'engeSDov wIpawqa'DI', Hemeymaj DIchev. juH chegh vavwI', 'a SoSwI' vISuch vIneH jIH. vaj So'merveD vItol 'ej taw'Ha vIjaH.

pa' Dab SoSwI'. QoghIj HarqInmo' qawDaj weSlI' 'ej qachvetlhDaq ghaH latlhpu' je luQorghlu'. quSlabDaq maba' 'ej loQ maja'chuq 'e' vInID, 'ach loQ jang neH. 'a loQ latlh be' qanvaD jIjatlh, 'ej maja'chuq wa' QorghwI' (loy'qu'), jIH je. qaSpu'DI' wa' rep, jImej 'ej SubwayDaq 'uQ 'eq vISop. reH Qe'meyvetlhDaq tIr ngogh, ghotI' 'Ir, naHmey je vISop. pImbe' nay'vam. tagha' juH vIchegh 'ej Du'HommajDaq ba'taH vavwI', be'nI'wI', jIH je, pa'meywIj vIcheghchu'pa'.

wa'maH Hut qelI'qam vIlIDpu'. jIHvaD law'qu'! 'ej 'oy'qu' je qIvDu', movDu', yebDu' je. wej jIbItlhba'. 'ach 'oy'be'lu'chugh Qapbe'lu' jatlhlu'. lengmaj vItIv 'ej tIvba' je vavwI'. chaq rut lengmeyvelth DItur. 'IH vengmaj Dechbogh Hatlh'e'. 😊

SoSwI' qam Do Duj vIlo'.

mIv vItuQ je.

boy'Sa HuD chIrgh

'apuStoQ vIleghpu'!

'IHqu'be' ngengvam, 'a He potlh law' ghoch potlh puS.

19 qelI'qam vIlIDpu'. jIHem.

way-ghay-tay

jar jav jaj wej, jaj vagh je qubbID vengwIjDaq qaSpu' Wave-Gotik-Treffen. naDev (tlhoS) Hoch DIS qaS qepvam 'ej jeS 'op bIp nuvpu'. Qatlhqu' qepvam meq QujmeH Qu', vaj 'InternetDaq yIlaD. 'ach lumuv Sut qIj toQtaHwI'pu', botlh bov parHa'wI'pu', SeS vIlle'pu', latlh je. qaS je QoQ muchmey law'qu'. QoQvetlh, Sutvetlh vImaSbe' jIH, 'ach reH Dajbej wanI'vam. meqvetlhmo' majeS je bangwI' jIH je. 'ejyo' HIp vItuQtaH, 'a meQHam tu'qomwIj motlh law' latlhpu' tu'qom motlh puS! 😂

buqjaj wa' magh yotlhDaq qaS «Viktorianisches Picknick». yotlhvetlhDaq yIr qabDu' law' 'ej tlhImmeychajDaq, raSmeychajDaq Soj Sop, HIq tlhutlh qoj ja'chuq. nutlhej je bangwI' jup latlh jup je, vaj Soch maH. law' je Sojmaj 'ej 'ey'. maSop, matlhutlh 'ej Sut qIj tuQwI'pu' DIbej. Do' QaQqu' muD Dotlh. 'ej taghDI' choS, matlheD 'ej vengDaq 'op ngevwI' raywalmey DISuch. 'ejyo' HIpwIjmo' muja' cha' nuvpu': «yIvbeHlIj vIparHa'!» Hov leng lughovba'!

ghInjaj «Heidnisches Dorf» wISuch 'ej nutlhejqa' 'op jup. loQ botlh bov rur vengHomqoqvetlh 'ej law'qu' Soj raywal, HIq raywal, jech ngevwI' je. wa' raywal retlhDaq HurwI'na' wIwaHlaH 'ej naQjejHommey DIbach. 'e' vItIvqu'. DayqIr HIq wItlhutlh je. ngaghbe'pu'wI' lervaD ngeb wIbej; tlhaQqu' muchvam! wa' taw maghoStaHvIS pay' jIHvaD jach wa' loD; «Hov leng!!!» jatlh (DIvI' Hol pong lo'ba') HIpwIj leghDI'. 'ej tlhIngan Degh yIvbeH tuQtaH ghaH, vaj «tlhIngan wo'!» jIjatlh jIjachtaHvIS. ghIq logh'ob (tlhIn!) wIqIp 'ej majachqa'; majatlh: «Qapla'!!!» ('ej tlhIngan Holna' wIlo'). majQa'! Dunqu'bej ghu'vam! 😎

Do'Ha' waghqu' vengHomqoqvetlh 'elmeH chaw'. DIlmeH cha'maH 'ewro' nobnIS Hoch 'elwI'. 'op ben waghqu'be' 'e' vIqawchu'.

mIllogh vIqonbe', 'ach tlhab mIlloghvam 'ej lo'laHlaw' Hoch (chaw': CC BY-SA 2.0):

DIS 2013 WGT; qonta' Peter Samow.