qoro'na javtIm raS'ISwIj wa'DIch

DaH cheghlI' bangwI', vaj DaHjaj jIghItlhmeH poH vIghajchoH. nIteb jISaHqa', 'a jI'ubbe'. javtIm vIrIch vIneH.

tera' poH povjaj, jar vagh, jaj wa'maH chorghDIch qoro'na javtIm ngeb raS'IS wa'DIch vISIQ! Qatlhqu' jaj rep je vIHevmeH Qu' jay'! SuwISya'Daq raS'IS SIQ neH qabDu' law'. Do'bej ghu'vam, 'ach SIbI' loj Qel SuchmeH repmey Hoch. tagha' rep vIHevDI', vengwIjDaq qaSbe', 'ach bIwlaH vengDaq. tlhIwrI vengDaq Sum vengvam mach'e' 'ej mulup lupwI' mIr. pa' vaS tIn tu'lu' 'ej tlhopDaq loSlI' lanSoy. javtIm raS'IS luSIQ luneH ghot law'! jIloS je, 'ej nom Duv lanSoyvam. QuchwIj Hat juvmeH 'uD lo' lojmIt 'avwI', ghIq vaS vI'ellaH. pa' vay'vaD jIngu''eghnIS 'ej chaw'wIj vI'aghnIS. ghIq latlh lanSoyDaq jIloSnISqa'. jIbItqu', mughIjqu'mo' QInmeH janmey. tugh pa'Hom vI'ellaH.

qachvetlhDaq javtIm raS'IS lupoch

pa'HomvamDaq ba'taH Qel, rachwI' Qup, latlh QelHey je. chaw'wIj nuDqa' Qelna', ghIq mIw Hoch muchuH rachwI'. Moderna 'oH javtIm raS'IS per'e'. pay' bong Hergh QaywI' chagh rachwI'. woH 'ej mutlhqa'rupDI', jatlh latlh QelHey: «ruchQo'! chu'wI' lo'!», vaj jIloStaHvIS Hergh QaywI' chu' luqemnIS. rachwI'vaD jIjatlh: «jIbIt, 'a Do' bIt je latlh.» 😅 poSwIj DeSDaq raS'IS pochtaHvIS 'oy'qu'be'. ghIq loSmeH pa'Daq jIba', qaStaHvIS cha'maH tup. rIntaHDI', juH vIchegh.

qoro'na javtIm raS'IS Seghvam vISIQpu'

jIchurchoHrup, 'ach qaS pagh. loQ jIDoy' ('ach reH jIDoy'), DeSwIj vIpeplaHchu'be', 'ach jIchurchoHbe'. nItebHa' HaSta much wIbej jIH bangwI' je. jar jav, jaj wa'maH vagh raS'IS cha'DIch vISIQ.

DaH jIvur'a'? 'e' vItulqu'. 😆

yupma' wa'DIch: po'wI' yupma'wIj.

muSuchtaHvIS bangwI', wejlogh malop. DaH jupDaj Suchmo' yupma'meyvetlh vIDel vIneH...

tera' poH jaj wa', jar vagh, jaj wa'maH jav jIHvaD yupma' pegh luqaSmoHta' jupwI' bangwI' je 'ej mumerta', po'wI' chaw'wIj vIHevpu'mo'. jaj vISovchu', 'a nabchaj vISovbe'. pov muSuch wej jup: 'ar'on, SIqela', nIvlem (bangDaj) je. jIHvaD ngajrun lumuch. wej Holmey wab qonlu'pu'bogh muQoymoH 'ej Hochlogh wejlogh mughel:

1. Holvetlh yoS yIngu'!
2. Holvetlh Hol tuq yIngu'!
3. HolvetlhDaq pIm'a' wab Ham wab pun je?

ngajrunvam Dun gherlaw'ta' yewyew.

 

jIHvaD Qatlhqu'be' Qu'vam. Holmeyvetlh vIghovchu'be', 'ach yoSchaj vIghovlaH 'ej wab Ham wab pun je vIghovlaH je. jIHvaD cha' ghIrep HIq Doq HIvje'mey qangpu' SIqela'. HIq Doq vIparHa'qu' net Sov. Hochlogh jIjangchu'DI', loQ wa' HIvje' HIq vItlhutlhnIS — HIq Doq vImaSqu'bogh 'oHbej nom 'e' vIghov. cha'logh jIjangDI' jIQagh, ghIq latlh HIvje' HIq vItlhutlhnIS — HIq Doq 'oHlaw' je, 'ej loQ QIv wejwa'Daj, 'ach qabbe'. chay' pIm? jISovchu'be'. Hol ngajrun vIpanpu'DI', HIq QIv mu'ang Qela': nguvbogh ghIrep HIq chIS 'oH! va! ghIrep HIq chIS vIpar, 'a lunguvmoHta'DI' vIghovbe' 'ej vaj vIparHa' je! muHaghmoH ngoDvam! 😂

'ej wej rIn! Hochlogh jIlughDI', ngutlh vIHev. ghochmaj veb per lunaQmoH ngutlhmeyvetlh. wa'maH 'olQan yugh pervetlh, 'ej rIntaHDI'  ESCHERHÖHE  laDlu'. «'eSer yor» 'oS pervam. HuD Sum yorDaq Daqvam tu'lu'. pa' magh yotlh tIn qachHom je lutu'lu'. pa' mapaw'DI' latlh juppu'wI' tu'lu': navech, 'IchngIy, 'uSera, rep, yewyew, 'aS'aS, 'et'ara, SIQ, neb'ur je. wa'maH loS ghot maH, vaj mubtaH ghommaj. qul luchenmoHta' 'ej pItSa' chab wItujmoH, chabmey wISop, HIq law' wItlhutlh, pe'vIl majaw, QoQ wI'Ij, 'ej pIj maHagh. yupma' quv lucherta' Hoch. ramvam vItIvqu'!

maHvaD 'ejyo' Degh ngaSbogh chab vutta' SIqela'! 'eyqu' 'ej Dunqu'! yIlegh:

batlh chabvam Dun vutta' SIqela'!

chaq SuSIv: qatlh taQ juppu'wI' pongmey? vIQIjrup. pongmeyna'chaj vIlo'qangbe' 'e' vIwuq. tlhIngan Hol jatlhwI'pu' chaHbe'chugh, vaj pegh pongmey vIlo'. 'ach peghchu'be' je — pongchaj vIyoymoH.

Qapla'! DaH po'wI' vImojta'!

qen jIghItlhmeH poH vIHutlh, muSuchtaHmo' bangwI'. vaj chu'be'law' De'wIj chu'.

Hogh ret HolQeD po'wI' vImojta'! nuq 'oH po'wI''e'? QeD HaDlu'chugh wej Qoyje'mey HevlaH vay'. tlhIngan Hol mu'na'mey tu'lu'be'. chaq bachelorvaD «taghwI'» wIponglaH, mastervaD «'ItlhwI'» wIponglaH 'ej doctorvaD «po'wI'» wIponglaH? jISovchu'be'. ghaytan latlh qechmey ghaj latlh jatlhwI'pu'. DIvI' Hol vIqelchugh, vaj doctoral degree, PhD joq jatlhlu'. vaj... DaH po'wI' jIH!

jajvetlh jIbItqu' 'ej pem Hoch jIlaD 'ej muchwIj vIbuS. muboQqu' bangwI'. ghIq wa'maH javlogh Qoylu'pu'DI' SumDaq maghom jIH, 'a'ghenpu'wI' je. qaSpu'DI' wa'maH vagh tup jeS je latlhpu'. muchwIj vImuch 'ej Qapchu' muchvam. qaSpu' cha'maH wej tup, ghIq rIntaH 'ej muyu' cha' 'a'ghenwI'. wa'maHlogh, cha'maHlogh mughelta' chaH. naSbe' chaH, 'ach pIj Qatlh jIjangmeH Qu'. pupbe'chu' ghItlh'a'wIj net Sov. 'ej qay' 'ay'mey qechmeywIj je law'. qaStaHvIS SochmaH tup muyu'. ghIq qaStaHvIS vagh tup, ja'chuqmeH ngab 'a'ghenpu'. cheghta'DI', yojchaj muja': jItob'eghta'! jIQap! po'wI' vImojchu'ta'! Qapla'! 💪

'InternetDaq qaSpu'mo' jajvetlh maloplaHbe' jIH qabDu' law' je. juHwIjDaq SaH neH bangwI', 'ej loQ malopbej. SIbI'Ha' qaSpu' lopna', 'ach latlh jaj vIrIchrup...

mu'meyvetlh boplaw' ghItlh'a'wIj. 👀