yInwIj De' chu'

tlhIngan Hol vIlo'qu'be'taHmo' loQ jI'IQ. 'ej qaSmo' wanI' chu' ghu' chu' je QonoSwIj vIqonqa' vIneH. 'ach jISov'egh... chaq tagh qonmeH poH vIHutlh. vabDot QonoSvam laDtaH'a' vay'?!

toH... Hoch vIgherlaHbe'ba'. vaj meqmey potlh vIqon:

 

qorDu'wIj

DISvam jar vagh jaj cha'maH wejDIch pov Heghpu' SoSwI'. yab HarqIn SIQtaH qaSlaw'taHvIS Soch DIS. jIpupHa', HarqInDaj bI'reS jISovbe'mo'. jarvetlh nughovchu'be', not jatlh, reH QongDaqDajDaq Qot. yInna' 'oHbe'bej. vaj numerbe' HeghDaj wanI'. ma'IQ net Sov, 'ach qaq ghu'vam chu' net jallaH, qar'a'? qaSpu' nol 'IH 'ej SaH qorDu'maj naQ. Huj wa' ngoD 'ej Do'Ha': vavwI' qoS 'oH SoSwI' Hegh jaj'e'.

Qu'wIj

ghe'be' Qu'wIj ghu'. vengwIj rewbe' DuSaQDaq DoyIchlan Hol vIghojmoHtaH. cha' ghojmoHwI' ghuD vIghaj. Qup wa' (24) 'ej qan latlh (77) 'ej jIH mumaSlaw' ghojwI'pu'ma'. Qu'vam vIparHa'qu'taH, 'ach rut jIHon'egh, QIt ghojlaw'mo' 'op. tagha' Qu' chu' Samta' bangwI' je! jar chorgh vengwIjDaq wa' malja'Daq vumchoH.

 

Holmey

pIjHa' tlhIngan Hol vIlo'. poH vIHutlh. vaj QIt jIjatlh 'ej rut ghot vIyajbe'. rut mu'mey vIqawbe'. qab ghu'vam. rut DeSDu' «cha' monmey» vIlaD, 'a QIt jIlaD. DISvam SarbruqenDaq qaS qepHom 'ej Denmargh monDaq qaS 'ewrop qep. maSIr no' Hol vIghojtaH 'ej DaH 2607 mu'mey vISov. Hoch ghItlhjaj 'InternetDaq Sum wIlo' 'ej ghItlh tIQ DIlaD. DaH «'ovjeq'ISpu' 'IQDoy'» wIlaDlI'. Denmargh Hol vIghojchoHpu', DenmarghDaq qaSmo' wa' tlhIngan Hol qep. 'ej 'I'ran Hol vIghojtaH. tlhoS Hoch Hogh vengwIjDaq Holmey qeqmeH qep vIjaH, 'ach 'eSpanya' Hol, raSya' Hol, DoyIchlan Hol, 'eSperanto Hol je neH vIlo'. pa' qubqu' 'I'ran Hol jatlhwI'pu'.

 

parmaq

wa' parmaqqay vIghajtaH: telratlh, SanDIyHom, bangwI' joq vIpong. qaStaHvIS loS DIS matay'taH. ghaH'e', latlh parmaq ghaj je, 'eSSal 'oH pongqoqDaj'e'. loD tam ghaH, 'a naSHa'. rut Suqram ghom bangwI'. naSHa' je ghaH. ghaHvaD lIwnal vIper vIneH, 'a mItHa'law' mu'vam. batlh Hutlhbe'bej. chu' wa': pIra'HaDaq qaStaHvIS Holmey law' jatlhwI'pu' qep, wa' be' Dun vIghom... vIqIHqa' jIjatlh vIneH. naDev yInyIv vIpong. DoyIchlangan ghaH, berlInDaq boghpu' 'ej DaH layIpSISDaq 'ewrop QeD HaDlI'. Dunbej ghaH! val, tlhaQ, 'IHqu'. Holmey ghoj 'e' muSHa'. jatlhtaHvIS vIHqu'law' qabDaj SomrawDu'. tlhoS rap parmaq qangtlhInmaj, 'a wej parmaqqaypu' ghaj... muparHa'law' je ghaH, 'ach reH vIHon. jar jav, qaStaHvIS wejmaH jaj 'amerI'qa' SepjIjQa' Such. pa' Dab wa' parmaqqayDaj. ngugh pIjHa' maQum 'ej mulImmoHpu' ghu'vam. loQ mumaw'moH ghaH. 'ej jar chorgh jar Hut je vIraS 'Italya' je Suchqa' 'e' nab yInyIv. taHlaH'a' tIqwIj? DIch vIHutlhchu'.

 

bel Qu'

jIHvaD Supghew ngIp 'eSSal (bangwI' latlh parmaqqay)! 'oH vIchu' 'e' vIghojchoH. wIlmo' nItlhDu'wIj, leSpal vIchu'vIp. Qatlhqu'be' Supghew chu'meH mIw. mach 'ej loS SIrgh neH ghaj. DaH QeD torSIv maghpub vIlaDlI': «poH puqpu'». muchuppu' yInnej. Daj. voDchuch val ngaS. meqvetlhmo' not lulaDbej bangwI' yInyIv je. voDchuch Hajqu'.

Hoch bolaDta'chugh QInHom HIghItlh!

pItlh!

qaSDI' JES, reH jIjeS

toH, tagh DIS chu'. 'ej tagha' qaSqa'pu' 'eSperanto Hol HojnIy Hogh (JES). DorDI' DIS ngo', taghDI' DIS chu', motlh matay' latlh 'eSperanto Hol jatlhwI'pu' jIH je. rop'a'mo' cha'logh qaSbe', 'ach DISvam qaSbejpu'! 'oranyenburghDaq Sumbogh vengHomDaq maghom 120 QupwI'pu', 'Qupqu'be'wI'pu' je 'ej nItebHa' malop. reH bel law'qu' 'oS 'eSperanto Hol qepmeyvetlh. vabDot mutlhejta' bangwI'! taghwI' ghaH, 'ach ghojtaH. parHa' 'e' vItulqu', 'ach loQ 'e' vIHon. Do' jIHonHa'. parHa'qu' ghaH! peqIm...

jaj wa'DIch: Hopqu'be' vengvetlh, vaj lupwI' mIrDaq maba'taHvIS poH nI' wIlIDnISbe'. pov mapaw. ghIq QIt juppu'wI' ngo' vIvan 'ej chaHvaD bangwI' vIlIH. nom pa'maj wI'ellaH 'ej qabbe' 'e' wItu': bIrbe' 'ej QongDaqmeyDaq machurHa'. vabDot DeSwar bIr tu'lu'. 'ach tlhoS 'Internet wIHutlhchu'. Hachlaw' DoyIchlan, 'a rut 'op vengHomDaq 'Internet tu'lu'be'. pawpu'DI' HochHom, tagh HIl'eghmeH wanI'. vaS'a'Daq Hoch lIqlu' ghIq maQuj. yu'chuqnIS 'ej qoSmaj wIghelnIS, chennIS ghomHommey, taH taH taH... jajvetlh choS qaSlaw' vay' 'ach vIqawbe'.

qep Daq

jaj cha'DIch: jar wa'maH cha', jaj cha'maH HutDIch nIQ wISop. qabbe' je. ghIq qaSbe' vay' Daj, vaj pagh wItur jIH bangwI' je... ghaHvaD Dalqu' 'e' vIHaj. tlhoS 400 'ewro' luDIlpu' Hoch jeSwI', waghbej qepvam. megh wISoppu'DI' 'Italya' bopbogh SoQ vISuch. tlhaQ 'ej Daj! pImqu'law' 'Italya' yoHmey. 'eSperanto Hol paqmey lungevqa'lu' 'ej cha' paq vIje'pu': «La Faraono» (paq wa', paq cha' je). qonta' polISqa'ngan, Bolesław Prus, 'ej maSIr tIQDaq qaS lutDaj. maSIr ta'puq ghaH ghot'a''e'. pov loQ mayIt 'ej ngeng Sum wISuch. bIr 'ej Dajqu'be' yoH 'ach nutlhejmo' vIraS jup tlhaQ (Emĉjo), pIj maHagh. DaH vIraSDaq DoyIchlan Hol ghojmoH je ghaH; murur. choS QoQ luchu' bomtaHvIS 'eSperanto Hol QoQ ghom noy, «La Perdita Generacio» (puq poH Hutlhlu'pu'bogh). QoQchaj vISov 'ej vIparHa', 'ach choSvetlh QIvqu' laHchaj. pIj jan chu'Ha', bomchu'be', qay' je chamchaj. jumbej much.

pImqu'law' 'Italya' paSta'.

jaj wejDIch: SoQ vImuch! maSIr no' Hol 'ej mIllogh ngutlhmey vIrIch. chaq mu'Ij wejmaH jeSwI' 'ej rut mughelpu'. SoQ vItIv je jIH, meqvam vImuSHa'mo'. pov qaSpu' «aligatorejo» (tera' bIQ lung'a' pa'). qaStaHvIS wa' rep 'eSperanto Hol Hol wa'DIch je jatlh net tuch, vaj nuv Hol lo'nISlu'. nuvpu'vaD 'eSpanya' Hol, vIraS Hol, raSya' Hol, DIvI' Hol je vIjatlh. ghIq qaS Jonny M QoQ much. DoyIchlangan ghaH 'ej nubelqu'moH QoQDaj. reH 'eyqu'bej! ghaH QoQDaj je tIvqu' bangwI'. ghIq Sepmey law' Soj wISoplaH 'ej wItlhutlhlaH. Soj waHmeH wanI' 'oH 'ej reH Dajqu'. vaj maSopqu', matlhutlhqu', ghIq mamI'qu' 'ej paSqu'DI' maQongchoH.

bomtaH Jonny M!

jaj loSDIch 'oH tera' DIS 2022 jaj Qav'e'. qaSbe' potlh. 'ach 1800 rep tagh 'uQ'a'. law'qu' Soj 'ej 'eyqu'. Dochmey law' DIwIvlaH 'ej maba'taHvIS nutlhej tlhebor 'onIl je. wejHa' jupwI' ghaH tlhebor'e', 'ach wej 'onIl vISov. majawtaHvIS mumerqu' wa' ngoD: vengHomwIj Dab je ghaH! juHDaj vIghoSmeH wa'vatlh 'uj'a' neH vIlIDnIS! vabDot DuSaQwIj ghojwI' ghaHpu', 'a not maqIHchuqpu'. DorDI' DIS pe'vIl mamI', mabom 'ej matay'DI' matogh: wa'maH, Hut, chorgh, Soch, jav, vagh, loS, wej, cha', wa' — pe'vIl majach — DIS chu' yItIv! ramvetlh mamI'qu'. 

jaj vaghDIch: DIS 2023, jar wa', jaj wa'DIch. qaSpa' maQongtaH. pov qaS ja'chuqmeH ghom Devbogh bangwI' Deq, 'unay. parmaqqay law' qangtlhIn bop 'ej bangwI'vaD jIHvaD je Dajqu' meqvam, parmaqqay law' DIlajmo' je maH net Sov. Do'Ha' Dajbe' ja'chuqghachvam. wanI' ja' pagh. nger neH wIrIch. ram chorno'bIl Qugh bopbogh SoQ much cheSqa'ngan. woj choHwI'Daq vum je ghaH, vaj chorno'bIl woj choHwI' cham Sovqu' 'ej maHvaD Hoch chuH. jIHvaD loQHa' Daj SoQDaj.

jaj javDIch: jIqawqu'be'... ghaytan jajvetlh qaS Hoqmey. berlIn lujaH 'op, SaqSenHaw'Sen lIqmeH raQ luSuch latlh, QalmeH tlheD je vay', 'ach maratlh. tlhoS chIm Daq, 'ach wa' pa'Daq De'wI' Qujmey QujtaH qach, tIDuy', 'aynat, latlh je. vaj mamuv. «chab che'ron», «'aqroS qughDo», «gharghpu'» je DIQuj 'ej mabelchu'! SIbI'Ha' numuv Sanoy', 'ener, 'aqul je. ngugh megh nujabbe'mo' Dajvam, pItSa' chab ghotI' tetlh je DIvun. pup jajvetlh!

jaj SochDIch: qaS SoQ Dajqu': «chay' Sawlay lo' 'Italya'nganpu'?» 'ej much 'Italya'ngan run; 'Inna'voj 'oH pongDaj'e'. maHaghqu', tlhaQqu'mo' 'op Sawlay. 'ej law'qu' Sawlaychaj! megh wISoppu'DI' mIn pargh, Hutvav rarwI' je bop latlh SoQ. Daj je. reH QeDmey bopbogh SoQ vItIv. ghIq tagha' Quj vImaSqu'bogh wIQuj: «Cambridge Mao» (qemrIj maw). 'echletHom Quj 'oH 'ej chutmey 'otHa' net tuchchu'. QujtaHvIS chutmey tu'nISlu'. wejHa' luSov 'Italya'nganpu', 'a jaS 'Italya'Daq Qujba'lu'. numISmoH. SIbI'Ha' «qo' ram» wIbej bangwI' jIH je. much yaH luSal qabDu'law' 'ej bom, ghuQ rev, jan chu', much tlhaQ(Ha') much, taH taH taH... 'IHqu' 'op, qetlh latlh. ghIq QoQ muchlu' 'ej mamI'qa'. ram Qav 'oH ramvam'e', vaj pe'vIl mamI'. vabDot QongchoHpu'DI' bangwI' jImI'taH. ghaytan 430 rep jIQong je jIH...

cham vur rIchtaH 'atram.

La Internacia Vespero

jaj chorghDIch: Do'Ha' mamejnIS. pa'maj wISay'moH, leng buqmeymaj wIteb, ghIq chob'a'Daq mavan. reH 'IQmoH mejmeH ghu'. 'ach nutlhej 'op nuv. lepSISDaq mej bangwI' 'ej 'engelDov wIchegh jIH 'onIl je.

muQuchqu'moHpu' wanI'vam. 'eSperanto Hol vIparHa'qu' net Sov, 'ach 'eSperanto Hol jatlhwI' nugh vImuSHa'! latlh qo'Hey rur. loplu', mI'lu', jawlu'... 'ej qay' yIn net lIj qaStaHvIS wa' Hogh. 'ej wanI'vam parHa' je bangwI'. 'e'mo' jIQuchqu' je! qImroqvam tuj latlh 'eSperanto Hol qep vIjaHlaH 'e' vIHon, vaj chaq wa' ben tagha' jIjeSqa'laH. reH 'eSperanto nugh taHjaj!

pItlh.

wej muchmey DISuchta'!

'op wanI' DISuchpu' bangwI' jIH je. 'ej DaHjaj latlh wanI' vISuch.

vengwIjDaq much qaSmoH Faisal Kawusi, DoyIchlan HaghmoHwI'. ret law' muchDaj chaw'mey DIje'ta'. DoyIchlanDaq boghpu' 'ach 'avghanIStan qaytu'pu' ghaj. vaj pIj novpu', DoyIchlanganpu', meHghem Qat bop qIDmeyDaj. qabqu'be' muchDaj, 'a QaQqu'be' je. tlhaQ qIDmey law', 'ach tlhaQbe' 'op. 'ej rInpa' SIbI' wup. tlhaQbe' bomDaj 'ej bomwI' QIvqu'bej ghaH. nubelbe'moH. much wIjaH 'e' wIpaybe', 'ach ghaytan wISuchqa'be'.

povjaj vorgh qaSpu' QoQ much. bomwI'vam maSqu' bangwI'. LEA 'oH pongDaj'e' 'ej pIj QoQDaj Qoy 'e' vISov. qaStaHvIS wa' DIS LEA rIchtaH. vengwIjDaq qaS QoQ muchDaj muja'pu' 'ej 'ISjaHDaq muchvam tu'lu'. 'a jIQIp! reH jIHIt: ghaytan bangwI' tlhej chajDaj. ghaytan nItebHa' muchvam luSuch chaH. pIj mumer bangwI' net Sov. 'e' tIvqu'. lengmaj vorgh boqaw'a'? mumerlu' 'e' vItIvqu' je. jIH'e', pIjHa' mermeH qech QaQ vIghaj. pImbej «parmaq Hol» DIlo'bogh. 'ach ret bangwI' vImer neH ghaH. 'e' vIyajHa'chu', vaj pagh 'elmeH chaw' vIje'ta'. DaSjaj ghaH vIghel, jIjatlh: «toH, wa'leS QoQ much DajaH'a'? Dutlhej 'Iv?» jang ghaH, jatlh: «teH'a'? choghelnIS'a'?» ghIq qaStaHvIS poH nI' maja'chuq. tagha' maHvaD cha' chaw'mey vIje'. chaw'mey vIje' 'e' qapbe'chu' 'ej muraDbe'. yajHa'ghachna' 'oHbej. bomwI'vam Qoy neH ghaH 'ej vItlhej neH. jItuHqu'... povjaj qaS QoQ much. wIghoS 'ej wI'el. loQ neH 'op bommey vISov. chaq wa'logh, cha'logh DIQoypu'. QoQ vImaSbogh 'oHbe'bej. reH vInglaw' bomwI'. loQ 'IQmoH bommeyDaj, 'a QuchmoHbogh QoQ vImaS. much yaHDaq maSum, 'ach law' bejwI'pu'. ghIq bom. 'ej qabbe' bommeyDaj. bommey law' vIghov 'ej motlhHa' 'ey bIH! much yaHDaq bommeyDaj QaQ law' Spotify bommeyDaj QaQ puS. muchDaj vIparHa'choH 'ej nItebHa' wISuchmo' jIQuchqu'. pe'vIl tIv je bangwI' net jallaH.

QaQbej LEA QoQ much

latlh QoQ much wInabpu' je: lepSISDaq bommeyDaj much The Kiffness! vIghro' HaSta tameyDajmo' 'InternetDaq noyqu'choHpu'. reH tlhaQ tamey, reH Daj bommey. Set'avrIqa'ngan ghaH 'ej DaH vengwIj machDaq muchDaj much! SIbI' 'elmeH chaw'mey DIje'ta' bangwI' jIH je. 'ach qaSpa' muchDaj, pay' ropchoH bangwI'. qo'vID wa'maH Hut SIQ. qaStaHvIS wa'maH jaj rop 'a Do' bechqu'be'. meqvammo' mutlhejlaHbe' QoQ much vISuchtaHvIS. Do' Sap DuSaQ jupwI', 'enyI'baS. 'ej nutlhej je 'eSperanto Hol jatlhbogh jup, tIr'ebor. toH... Dunqu'qu'qu'qu' QoQ muchDaj! wItIvqu' Hoch! much yaHDaq HaSta ta muchtaHvIS QoQ janmey cha'. pIj De' chel 'ej bom qun ja'.

vIghro' QoQ 'ey law' Hoch 'ey puS!

rInDI' much, yIvbeH DIje'laH 'ej vabDot noywI'vam retlhDaq mIllogh DIqonmoHlaH. loQ ghaHvaD jIjatlh 'ej bangwI'vaD HaSta taHom qon ghaH 'ej ghaHvaD jatlh. jIQuchchu'! vabDot yIvbeHwIj naD. 😃

maHoy qar'a' The Kiffness jIH je? 😉

Har'eyngan boghoy 🌈

DaH 215 SImyon gheH DoyIchlan 'ej HurDaq jIyItvIpmo' pa'meywIjDaq jIratlh neH. tujbej jajmeyvetlh...

loQ tuj je ghInjaj vorgh. 'ej vengwIjDaq qaS «Har'eyngan boghoy», «le'yo' boghoy» ghap (Christopher Street Day). not jIjeSpu' 'ach DISvam qaSDI' majeS bangwI' jIH je. Har'eyngan ghaH, loDpu' be'pu' je ngelqangmo'... Qejmo'... muSHa'mo'...? 'op mu' Hutlhlaw'taH tlhIngan Hol. jIHvaD Har'eynganna' vIDambe', 'a Har'eyngan jIH 'e' Dam 'op. qatlh? toH... loD jIH 'ej be'pu' neH vIngelqang. 'ach parmaqwIj vIvuSrupbe', vaj cha' parmaqqaypu', wej parmaqqaypu' ghap vImuSHa'qang 'ej rapchu' bangwI'. latlh loD, latlh be' joq muSHa' 'e' vIchaw'bej 'ej jIHvaD ghu' rap chaw' je bangwI'. DaH tagha' naDev peghvam vI'otHa'qang. 😄 mamuSHa'chuqtaHvIS, latlh parmaq qepmey DItIv 'e' wIlajchu'. parmaqmaj Qaw'be' ghu'vam. vabDot cha' ben SuwISya'Daq maqIH, qaSDI' parmaqqay law' muSHa'qangbogh nuv qep. ngugh qepvetlh vIcher 'ej meb chu' ghaH. 'ach qunmaj vIchuH vIneHbe'. qaStaHvIS parmaq qep chu', reH ghotvetlhvaD qangtlhInmaj wI'otHa'. mapeghQo'. reH mayuDHa', parmaq wIchIwpa' net Sov. 'op ben cha' bangpu' vIghaj. raSya' Hovtej ghaH wa''e' 'ej vIyetnam HuchQeD HaDwI' ghaH latlh'e'. SuDbe' veqlargh mInDu'. DaH wa' parmaq neH vIghaj, 'ach qay'be'. jIH neH mughaj bangwI', 'a rut latlh loD be' ghap ghom...

Do' SoQvam tu'lu' 'ej DaH Dochmeyvetlh DIrIchlaH je maH, yIbej:

DaH le'yo' boghoy vIqelqa'. majeSpa' Sut chum DItuQmoH. Har'ey joqwI' chu' tuQmoH bangwI'. manggha wIpawDI' numuv tlhel'a' DIv'aD je. SuwISya' jupwI' ghaH tlhel'a''e' 'ej bangDaj ghaH DIv'aD'e'. latlh parmaqpu' laj je chaH, vaj marap. veng botlh wIjaH 'ej qev wImuv. chumbogh nuvpu' law'qu' tu'lu' 'ej joqwI', vep 'echletmey je qeng. 'IHqu'bej Hoch! motlhHa' 'IHchugh vay', vaj pIj ghotvam vIparHa'. loQ mayIt ghomHommaj, bangwI'vaD jIjatlh: «chaq bong naDev ghot vISovbogh vIghom.» 'ej mu'tlheghvam vIjatlhpu'DI' muvan wa' be' Sum. nIr'aq ghaH! DuSaQwIj jup ghaH 'ej ghaytan qaStaHvIS wa'maH ben maghomchuqbe'. 'ej pay' maghomqa'. QaQqu' neqjungvam. vaj numuv je ghaH juppu'Daj je. tInchoHtaH ghommaj. ghIq vIHchoH boghoy 'ej QIt veng botlh bav. law'qu'bej nuvpu'. lutoghlaHchu' pagh net Sov.

qalmuSvam vIQejbej! (mIlloghvam qonta' Tobias Möritz)

mabavtaHvIS latlh juppu' ghom bangwI' 'ej Daq wa'DIch wIpawqa'DI' maba'choH 'ej loQ leng Soj wISop 'ej HIq wItlhutlh. qevpobmajDaq parmaqqay law' muSHa'qangbogh nuv Deghmey DIDIj. 'ejyaH ngutlh ngaSbogh tIq 'oH Deghvam'e'. parmaq vuSlu'be' 'e' 'oS.

SIbI'Ha' DIreS'en luchegh tlhel'a' DIv'aD je. ghIq roSental (ro'Sa' ngech?) wIjaH bangwI' jIH je. pa' qaS latlh wanI': «Klassik Airleben». magh yotlh tInDaq qaS QoQ tIQ much 'ej DIlnISlu'be'. ghompu' tulwI' Hol jatlhwI'pu' 'ej DImuv. roD mubelmoH QoQ tIQ, 'ach ngugh loQ qetlh QoQchaj. rInpa' much mamej.

'IH QoQ muchvam jorchan.

le'yo' boghoywIj wa'DIch vItIvqu'qu'qu'! 😍 jar Hut, jar wa'maHDIch Ha'leDaq qaSqa' le'yo' boghoy. 'ej majeSqa'laH 'e' vItulqu'.

way-ghay-tay

jar jav jaj wej, jaj vagh je qubbID vengwIjDaq qaSpu' Wave-Gotik-Treffen. naDev (tlhoS) Hoch DIS qaS qepvam 'ej jeS 'op bIp nuvpu'. Qatlhqu' qepvam meq QujmeH Qu', vaj 'InternetDaq yIlaD. 'ach lumuv Sut qIj toQtaHwI'pu', botlh bov parHa'wI'pu', SeS vIlle'pu', latlh je. qaS je QoQ muchmey law'qu'. QoQvetlh, Sutvetlh vImaSbe' jIH, 'ach reH Dajbej wanI'vam. meqvetlhmo' majeS je bangwI' jIH je. 'ejyo' HIp vItuQtaH, 'a meQHam tu'qomwIj motlh law' latlhpu' tu'qom motlh puS! 😂

buqjaj wa' magh yotlhDaq qaS «Viktorianisches Picknick». yotlhvetlhDaq yIr qabDu' law' 'ej tlhImmeychajDaq, raSmeychajDaq Soj Sop, HIq tlhutlh qoj ja'chuq. nutlhej je bangwI' jup latlh jup je, vaj Soch maH. law' je Sojmaj 'ej 'ey'. maSop, matlhutlh 'ej Sut qIj tuQwI'pu' DIbej. Do' QaQqu' muD Dotlh. 'ej taghDI' choS, matlheD 'ej vengDaq 'op ngevwI' raywalmey DISuch. 'ejyo' HIpwIjmo' muja' cha' nuvpu': «yIvbeHlIj vIparHa'!» Hov leng lughovba'!

ghInjaj «Heidnisches Dorf» wISuch 'ej nutlhejqa' 'op jup. loQ botlh bov rur vengHomqoqvetlh 'ej law'qu' Soj raywal, HIq raywal, jech ngevwI' je. wa' raywal retlhDaq HurwI'na' wIwaHlaH 'ej naQjejHommey DIbach. 'e' vItIvqu'. DayqIr HIq wItlhutlh je. ngaghbe'pu'wI' lervaD ngeb wIbej; tlhaQqu' muchvam! wa' taw maghoStaHvIS pay' jIHvaD jach wa' loD; «Hov leng!!!» jatlh (DIvI' Hol pong lo'ba') HIpwIj leghDI'. 'ej tlhIngan Degh yIvbeH tuQtaH ghaH, vaj «tlhIngan wo'!» jIjatlh jIjachtaHvIS. ghIq logh'ob (tlhIn!) wIqIp 'ej majachqa'; majatlh: «Qapla'!!!» ('ej tlhIngan Holna' wIlo'). majQa'! Dunqu'bej ghu'vam! 😎

Do'Ha' waghqu' vengHomqoqvetlh 'elmeH chaw'. DIlmeH cha'maH 'ewro' nobnIS Hoch 'elwI'. 'op ben waghqu'be' 'e' vIqawchu'.

mIllogh vIqonbe', 'ach tlhab mIlloghvam 'ej lo'laHlaw' Hoch (chaw': CC BY-SA 2.0):

DIS 2013 WGT; qonta' Peter Samow.

tlhapragh yupma'

'opHu' qaSpu' «tlhapragh yupma'» 'ej majech'egh bangwI' jIH je. yupma'vetlhmo' not jIjech'egh, DoyIchlan yupma' 'oHbe'mo' 'ej motlh jech'egh puqpu'. 'ach jech'egh 'e' tIvqu' bangwI' 'ej Hoch nab. vengDajDaq malop. 'Il'ev, jupDaj juHDaq maghom. pa' latlh juppu' DImuv. maba', maja'chuq, maHagh, maSop 'ej matlhutlh. maghaqmeH pItSa' chab le' wIvut. chay' le'? toH... motlhbe'bej, pItSa' chab beQ rurbe'mo', 'ach luHDu' rur! qoDDaq qurme'mey vIvevta' 'ej yorDaq qettlhup wIlIch, vaj loQ 'Iw rur. Hoch ghIj gher'ID, 'a 'ey'qu' pItSa' luHDu' chabmaj.

luHDu'qoq chab

'ej chay' majech'egh? toH, rachwI' jech tuQmoH bangwI' 'ej loy'qu'bej! 'InternetDaq mIlloghDaj 'angqangbe'mo' naDev qabDaj vISo'nIS. jIH'e', 'ejyo' HIp vItuQmoH; qIrq HoD vIrur. mamI' 'e' wInabmo' pu'HIch, Hoqra', QumwI' ngo' joq vIqengbe', 'ach qabwIjDaq tI'rIlngan 'oDtu'mey DIj bangwI'. jI'IHbe''a'? Do'Ha' poH wIHutlh, vaj mongwIjDaq 'oDtu'mey DIDIjbe'.

'etlhna' Sogh, telraQ rachwI' je 😜

qaSDI' ramjep, mI'meH vaS wIjaH. «Дружба» (Klub Drushba) 'oH vaSvetlh pong'e'. tInqu'be', 'ach law' mI'wI'pu'. QoQ vImaSqu'bogh lumuch, vaj jImI' 'e' vItIvqu'! tera' DISmey rav 1980 'aqroS 1999 QoQ lumuch. 'eyqu'bej! mamI' 'ej loQ HIq wItlhutlhqa' 'ej poHmaj wItIvbej. pa' jech'egh latlh je. jImI'taHvIS loQ jIpum 'ej nIHwIj DeS vI'oy'moHpu'. DaHjaj loQ 'oy'taH. loSlogh Qoylu'pu'DI' mamej 'ej juH wIchegh. Dunqu'bej ramvetlh!

DoyIchlanDaq jIHqa'taH (Hogh wejDIch)

DaH SuwISya'Daq jISaHqa' 'ej tagha' Hogh wejDIch vIDellaH. peqIm!

Soch Hu' vengwIj Hu wISuch jIH bangwI' je. tuj jajvetlh 'ej wov jul. law'qu' Ha'DIbaHmey 'ej Hoch DIleghlaHbe'. vaj qa'put 'e'levan je DISuchbe'. 'a bo'Deghmey DIparHa'qu'mo', qaStaHvIS poH nI' bo'Degh qachmeyDaq maHtaH. mo' tIn 'oH wa' bo'Degh qach'e' 'ej qoDDaq maba'laH 'ej maH tlhopDaq puvtaH 'aSralya' parbIng. SuDqu' HochHom 'ej SuD 'ej wov 'op. nubelqu'moH. 'ej reH jawtaH parbIngpu'vetlh parbIngmeyvetlh. 🐦 Do'Ha' bIQDep qach wI'ellaHbe' tI'lu'lI'mo'. ghonDavana' yuwey'a' qachDaq maSaHtaHvIS bIQ DujHom leng wItIv je. mamejDI' 'oy'qu' 'uSDu'maj mayItqu'pu'mo'.

vabDot tlhoy 'avrI'qa' Ha'DIbaHmeyvaD tuj muD Dotlh!

SIbI'Ha' DuSaQ'a'Daq Sumbogh HaDwI' tach wIjaH. pa' nuloS bangwI' jup, lu'ap. tugh paw je jupwI', 'enIbaS. ben law' wa' DuSaQDaq maghoj 'enIbaS jIH je. ngugh ghaH vISaHqu' 'a not bangpu' DImoj. qatlh maghom loS? tach Sov qaD 'oH meqmaj'e'! reH Sov qaDmey vItIvqu'! 'ej HochHey SuvwI'pu' maH 'enIbaS, lu'ap, jIH je. 😎 ghommajvaD «Norıyah!» wIpong. chaq tachDaq wa'maH vagh ghommey tu'lu'. wejmaHlogh nughelpu' cherwI'. navDaq majangnIS 'ej cherwI'vaD navmaj vInobnIS. wej 'ay'mey yugh qaD. meq lI' bopbe' 'ay' wa'DIch, 'ej wa'maHlogh nughel cherwI'. Qatlhqu'be'mo' Hochlogh malugh, vaj 'ay' wa'DIchDaq maQap 'ej maHvaD chertIS HIq HIvje'Hommey nob. majQa'! QoQ bop 'ay' cha'DIch 'ej Qatlhqu'bej! vabDot Sovbe' targhwIj 'enIbaS. wejlogh neH malugh. va. 'ach yuQQeD leng je bop 'ay' wejDIch 'ej leng po'wI' maHlaw' jIH, lu'ap, 'enIbaS je. wa'maHlogh nughel 'ej chorghlogh malugh. mayevpu'DI' QapwI''a' maqlu': «Norıyah!» maQapchu'! ghommajvaD 'evlu' 'ej pop nunobta': macheghDI' tachvamDaq vay' wIDIlchugh vagh 'ewro DInobnISbe' maH loS. maj! vaj 'opleS macheghbej. 🏆

ghInjaj malopqa'. Ha'leDaq qaSmo' mI'meH yupma' 'ej tagha' mamI'qa'laH! majeS jIH bangwI' je. 'ej jeS je cha' be'pu'. chaHvaD lIj 'alwap je vIpong. bangwI' jup lI' ghaH lIj'e'. parmaqna' chaHbe', 'ach... ghaytan SIbI'Ha' qay'be'chu'bogh ghu'vetlh vIDel. lIj jupna' ghaH 'alwap'e'. mI'meH tachDaq waghqu'mo' HIq, bangwI' qav'ap juHDaq HIq law' wItlhutlh. mabaw''eghmoH, qar'a'? 🍻🍷🍹🍸🍺 machechDI' ram matlheD 'ej mI'meH tach wIghoS. So're vaS 'oH perDaj'e'. tera' maH DIS poH HutmaH, maH DIS poH pagh QoQ tlhenlu'. law' qabDu', 'a Do' 'Iqbe'. 'ej HojnIy tu'lu'be' je. mamI' 'ej HIq wItlhutlhqa'. jIH'e', QoQ ngo' vImaS, 'a qay'be'. tugh tachvam parchoH 'alwap 'ej latlh mI'meH yupma' wIjaH 'e' chup. pale'te 'oH tachvetlh per'e'. mubelmoH QoQchaj, loQ ngo'mo'. vaj mamI'qa' 'ej maHvaD HIq je'ta' 'alwap jup. cha'logh Qoylu'DI' juH luchegh cha' be'pu'. pujwI'pu'! 😂 wej maDoy' jIH bangwI' je, vaj mamI'taH. vaghlogh Qoylu'DI' macheghchoH. bangwI' chuch law' jIH chuch puS, 'ach mapIv 'ej maSengbe'. juHDajDaq bIQ law' wItlhutlh 'ej SIbI' maQongchoH. pem veb loQ ma'uH, vaj pagh maDIgh. juHDaq maratlh 'ej HaSta muchmey DIbej neH. quSlabvo' Hu' neHbe'mo' bangwI', ghaHvaD Soj vIvut jIH. 😊 Dunqu'bej ramvam 'ej 'opleS mI'meH tach wIjaHqa'laH 'e' wItul!

mI'meH tach wa'DIch

Hoghvam povjaj SuwISya' vIchegh jIH. mulup lupwI' SuD 🚌 'ej naghHom ghImbe'mo' rajma'wIj leng vItIvlaH. jar Hut, jaj wa'maH wejDIch SuwISya' vImej 'ej DoyIchlan vIDabqa'.

 

wej yupma'mey

tera' poH jar vagh, jaj cha'maH wa'DIch qoSDaj cha'maH SochDIch lop 'et'ara, vaj juHDajDaq maghom 'ej malop. nob mach wIje'ta' jIH bangwI' je. ghaHvaD DuQwI' ghajbogh San'emDer QaD wIwuq. ghobe', roSa' 'oHbe', 'ej naHjej 'oHbe' je. motlh Deb Dab San'emDer Seghvam. mach chovnatlhvam 'ej rutlh; moQHom rur. 'InSong Doq lIng. 'oHvaD 'et'araHom wIpong 'ej ghaHvaD nobta'.

'IHqu' nobmaj, qar'a'?

 

latlh mebpu' tu'lu' je: 'ar'on qele' je. juH pa'meyDaj chu'Daq maba', maja'chuq, pItSa' chab wISop 'ej HIq wItlhutlh. nubelmoH choSvetlh. wej qele' vISov. loD ghaH. DuSaQ'a'maj Holtej chu' ghaH, 'ach jInmol turtaHbogh vIlIj. Holmey Qulba' je 'ej Human yab boplaw' Qu'Daj.

maghomta' 'ara'te jIH je!

DuSaQ'a'wIj HolQeD yejHaDDaq vum be' Dajqu'. 'ara'te* 'oH pongDaj'e' 'ej 'ewuSqal Hol jatlh. jupwI' QaQ ghaH 'ej majatlh 'e' vItIvqu'. Hut ben Holvetlh vIghoj 'ach Do'Ha' HochHom vIlIjpu'. vaj reH DIvI' Hol wIlo'. wa'leS juHDaj cheghmo' ghaH, DaHjaj choS maghom 'ej nItebHa' 'uQ wISop.

 

naDev juH ngo'vo' 'el neHmo' 'ara'te, 'ej DIS veb jar wa' juH chu' nejnISmo', juHwIj wutlh pa'Daq wa' buq polta'. vaj ghaHvaD pa'meywIj vI'ang. mer paqmeywIj law', 'a juHwIj parHa'. naDev loQ marSa'la' HIq wItlhutlh. nuq 'oH? HIq Doq, ram HIq, Su'ghar qut but je DuDnISlu' 'ej qa'vIn qurgh chelnISlu', ghIq qaStaHvIS cha' jar barDaq polnISlu'taH. ghIq qa'vIn qurgh teqnISlu'. na'ran rurchu' 'ej qa'vIn wejwa' ghaj. 'eyqu'! wa' bal munobta' bangwI' SoS, SoSDaj juH wISuchDI'. vabDot parHa'qu'law' 'ara'te, 'ach DaHjaj HIq law' tlhutlh neHbe', loQ wuQmo'.

 

ghIq maghungchoH, vaj jungwoq Qe' «Soj naQ» wIjaH. pa' 'ey nay' 'ej law'. muja' ghaH: 'opwen ngejpu' mIv'a' javtIm! ngugh 'eSpanya'Daq ghaHtaHvIS loQ ropchoH 'ej qaStaHvIS wej jaj chur... 'ach churHa'choHDI' Soj mumbe'choH! yuch Sop, naHmey Sop, chabHom na' Sop, 'ach mumlaHbe'. meqvetlhmo' HIvpu' mIv'a' javtIm 'e' Sovbej. ghIq nujDaj Hutvav tob neHmo' nIpon 'uSu' tlhutlh! 'ach wejwa'Daj mumbe'!

maSop rInDI', «'eDIy HIq tach» wI'el wIneH, 'a Do'Ha' SoQ. poS «volter tach», vaj pa' wa' HIq Doq wItlhutlh, mejnISpa' ghaH. HolDaj vIghojqa' vIneHqu', 'ach 'Iq Holmey vIghojtaHbogh... 'ewuSqal Hol vIghojchoHpa' wej latlh Holmey vIghoj 'e' vImevnISlaw'. vaj wej jIbej. 'ach muvuQ be'vetlh HolDaj je. 😊

'ewuSqal Hol boQoy boneHchugh, QoQ ghomvam vIchupqu': KOBAN

*) tlhIngan Hol vIghItlhtaHvIS 'ej latlh Hol pongmey permey je vIlo'chugh, motlh ngutlh tu'qom chongHa'moH. vaj tlhIngan Hol mu' 'oHbe'chu' net SovlaH.