wej yupma'mey

tera' poH jar vagh, jaj cha'maH wa'DIch qoSDaj cha'maH SochDIch lop 'et'ara, vaj juHDajDaq maghom 'ej malop. nob mach wIje'ta' jIH bangwI' je. ghaHvaD DuQwI' ghajbogh San'emDer QaD wIwuq. ghobe', roSa' 'oHbe', 'ej naHjej 'oHbe' je. motlh Deb Dab San'emDer Seghvam. mach chovnatlhvam 'ej rutlh; moQHom rur. 'InSong Doq lIng. 'oHvaD 'et'araHom wIpong 'ej ghaHvaD nobta'.

'IHqu' nobmaj, qar'a'?

 

latlh mebpu' tu'lu' je: 'ar'on qele' je. juH pa'meyDaj chu'Daq maba', maja'chuq, pItSa' chab wISop 'ej HIq wItlhutlh. nubelmoH choSvetlh. wej qele' vISov. loD ghaH. DuSaQ'a'maj Holtej chu' ghaH, 'ach jInmol turtaHbogh vIlIj. Holmey Qulba' je 'ej Human yab boplaw' Qu'Daj.

tera' poH jar vagh, jaj cha'maH cha'DIch juH pa'meywIjDaq cha' wanI' wIqaSmoH. qaStaHvIS pem, Horghen wIjaH 'ej pa' bangwI' juppu' wISuch. 'oQam 'Ir'em je bIH pongchaj'e' (yIqaw: reH pongmey vIyoymoH!). juHchajDaq maHvaD SuwISya' paSta' vutta' 'oQam. 'ey'qu'bej. vaj maja'chuq. yorghchajDaq «chuch qul je bom» paqmey vItu' 'ej loQ vIghan. lutvam cha' yuwey cha'bogh pu'jInmey ngaS 'e' vItIvqu'. jIHvaD Dajqu', DaH HaSta lut mIr vIbejlI'mo'. «quS'a' Quj» 'oH perDaj'e' net Sov. SIbI'Ha' vIbejchu' rIntaHDI' lut mIrvam vIrIch... ghIq veng wIjaH 'ej pa' nIm qulcher taD wISop. ngeng HeHDaq Sumbogh tawmey wIghoS. QaQbej pemvam!

SurIH ngeng jorchan

choSvetlh maghomqa' jIH, bangwI', 'ar'on, 'et'ara je, juHwIjDaq «'ewrop bom qaD» wIbej 'e' wIHechmo'. Hoch DIS qaS qaDvam. ngIq bomwI' ngeH Sepmey, 'ej bom chu' bom ngIq bomwI'. Do'Ha' DIvI' Hol lulo' bomwI'pu' HochHom. pa'meywIj wISay' rIntaHpa' paw 'ar'on. tlhoy 'eq! 'a qay'qu'be'. Sutra'ber naHmey qeng. maj! SIbI'Ha' QongDaqwIjDaq maba'taH wej be'pu' 'IH, jIH je. pIjHa' qaS ghu'vam! bangwI' De'wI' wIlo' 'ej «'ewrop bom qaD» much wIbej 'ej bommey, bomwI'pu' wIrIch. DoyIchlan, raSya', 'uqrayI'na', lIyetuva' je bommey vImaSqu' jIH. 'ach Qap 'Italya' bomwI' ghom. bomDaj vItIvbe'qu'. tlhoS Qappu' vIraS, 'ach qetlh bomchaj. patlh wejDIch Hev SuwISya'. qabbe'bej bomchaj, 'ach QaQqu'be' je 'e' wIDam. vaj loQ mubelHa'moH qaDvam. 'ach mubelmoH poHmaj. 😊

'ewrop bom qaD gher'ID

 

jIbuD 'ej QapHa' mIllogh choHmeH nIqHomwIj, vaj DIvI' Hol neH lulo' mIlloghvam. jIQoSbe'mo' jItlhIjQo'.