Du'Hom lop

Du'Hom ghaj qorDu'wIj net Sov. 240 morgh men Du'Hommaj. pa' juH qachmaj, raywal mach, HuDyar, puH Duj vergh, magh yotlh, Sormey law', QalmeH DoQmIv'a' tIn je lutu'lu'. 'e' Sov je juppu'wI', 'ach pIjHa' juHwIjDaq maghom. vaj mughelpu' lu'ap, bangwI' jup: «toH, ghorgh Du'Hom lop DaqaSmoH?»

vaj cha'Hu' qaSpu' Du'Hom lopvetlh. wa'maH loS ghotpu' vIrIt, muv wa'maH jav (qay'be'). vabDot jeS be'nI'wI'! maloplaHpa', qaStaHvIS 'op pem, QalmeH DoQmIv'a'maj vISay'nISmoH. jIQap, DaH Say'chu' 'ej ghun bIQ. maQal, bIQDaj mareH, Soj wIrong, naH HIq je maHpIn wIchImmoH 'ej «Privacy» ghoqwI' je DIQuj. leSpal Supghew je yach vay'. Qapbej lopvam! 'ej muQaHqu' bangwI'!

bI'reS

QaQ je QoQmaj, «Spotify» bom tetlhvaD ghaq qabDu' law'.

chaq DISvam Du'Hom lop wIqaSqa'moH. 😃

bertlham

'IQ QISmaS nobmey!

tugh Dor DISvam, tugh tagh DIS chu'. vaj DIS 2023 ghItlh Qav 'oH ghItlhvam'e'. 'ej paSqu'qa'mo' jImoDnIS. qatlh? wa'leS 'eSperanto Hol qep vIjaHba'mo'! berlInDaq Sumbogh vengHomDaq qaSqa' qepvetlh 'ej «HojnIy 'eSperanto Hol Hogh» (Junulara E-Semajno = JES) ponglu'. 'eQ qaSpu'mo' QISmaS, loQ vIrIch vIneH...

DISvam jIHvaD Qatlhbej QISmaS. jar wa'maH cha' vIparchoHlaw'... reH nobmey vIbuSnIS, qorDu' bangpu'wI' je nabmey vIqelmeH jIgharnIS. qaS wanI'mey law' 'ej reH juppu' vIghommeH poH vIHutlh. 😩

DoyIchlanDaq rut QISmaS 'ISjaH wInob. cha'maH loSlogh Hoch jaj lojmItHom poSmoH SIQwI' 'ej qoDDaq vay' tu'lu'. DISvam wej 'ISjaHmey vIHev! yuch ngaSbogh QISmaS 'ISjaH munobpu' vavwI'. 'ISjaH mutlhta' bangwI' chu', yennIj, 'ej yuch, na'ran rurbogh SojHom je ngaS. 'ej Hov leng QISmaS 'ISjaH munobta' latlh bangwI', telraQ. wej Hoch Duj vImutlh 'ach naDev mIllogh vIqon:

DujHommey rotlh!

DISvam qaStaHvIS jar wa'maH cha', jaj cha'maH loSDIch, cha' qorDu'Daq jIlop. pov vavwI' pa'meyDaq maghom vavwI', be'nI'wI', jIH je. QISmaS chab, chabHommey je DISop 'ej loQ maja'chuq. lengDaj mIllogh nu'ang vavma'. ghIq Ha'le Dabbogh bangwI' vISuch. pa' malop telraQ, be'nI'Daj (ne'yaD), SoSchaj je. QISmaS qIrqoDna' ghaj telraQ. 'ej bIngDaq nuloSlI' nobmey law'qu'! va... nobmey puS vInobrup, 'ach pa' law'qu'ba' nobmey. 😱 'Iq nobmeychaj! toH... 'uQ wISop. «raqlet» wISop: raSDaq 'oH qerjIqqoq'e' 'ej barghHommeyDaq Ha'DIbaH, naH, 'atlhqam, nIm wIb law' je luchellu' 'ej qerjIqqoqvamDaq tujmoH. belmoH 'ej 'ey. qaStaHvIS QISmaS, DIS chu' jaj ghap «raqlet» luSop DoyIchlangan law'. ghIq nobmey DInob, DIHev 'ej DIqatHa'. tugh ghItlhvamDaq nobmeywIj vI'agh...

'ey! 'ej Ha'DIbaHna' ngaSbe'!

wa'Hu' qaS jaj cha'maH vaghDIch. juHDaj cheghta'DI' neyaD, qorDu'wIj wISuch telraQ, SoSDaj, jIH je. be'nI'wI' pa'meyDaq maghom 'ej Da'vI' ronglu'pu'bogh wISop (Hoch DIS rur). 'eyqu'! 'ej puH Ha'DIbaH Sopbe'mo' bangwI', ghotI' Sop. jeS vavwI' (ratol), be'nI'wI' ('ayna'), lorbe'wI' ('aDnIl), bangwI' (telraQ), SoSDaj ('eqyaH), jIH (toH... 'eDna' vIpong'eghqangbe') je. maSop rIntaHDI' nobmey DIqatHa'. loQ maja'chuq 'ej HIq wItlhutlh. ghIq Ha'le luchegh telraQ SoSDaj je, po veb vengDaj cheghnISmo' SoSDaj 'ej latlh bangDaj Suchmo' bangwI'. loQ Qatlh parmaq ghu'maj, qar'a'? 😉

'ach latlh bangwI', yInnej, vIleghlaHbe', berlInDaq lopmo' ghaH loDnalDaj je. DIS chu' maghomqa'.

DaHjaj pagh vIta'. lengbuq vItebta'. vaj DaH nobmey vIHevpu'bogh vIrIch. mIlloghvam yIbej!

'Iq nobmeywIj!

1. 'entepray' baS velqa' mach vIHevpu', qaStaHvIS Hov leng ngotlhwI'pu' qep. qaSpa' QISmaS nobHommey DInobchuq. vo'yajer maghpub vInobpu' 'ej velqa'vam vIHev. Qatlhlaw', 'a 'opleS vInID.
2. «jey'naS mu'mey» Quj munobta' ghojwI'pu'wI'! jIQuchqu'! 'opHu' veng botlhDaq pubtaHbogh naH HIq wItlhutlh ghojwI'pu'wI', jIH, ghojmoHwI' ghuD ('ara'mat), telraQ je. 'ej Qujvam munobmeH Huch luboS. mu' qIDmey boplaw'. «jorbogh vIghro'mey» Quj Hev ghojmoHwI' ghuD. loQ QujDajmo' jIghal, mochmo'.
3. Ha'le logh chal je 'angweD chu' chaw' munobta' vavwI'. 'ej chaw'vam Hevpu' be'nI'wI' puqbe'Daj je. vaj qaSDI' jar wa', pa' wIghoS. wejHa' chorgh wen vISuchpu'. 'ej chaq nutlhej bangwI'.
4. «Hov leng ngoDHommey qaD» paq munobta' telraQ, bangwI'. Dajqu' 'ej qaSqa'DI' Hov leng qep, chaq maqaDchuq. qaD lajlu'pu'! 😏
5. cha' «ta'puqpu'» chaw' je'ta' bangwI'. nItebHa' jar cha' wIjaH. DoyIchlan QoQ ghom noy chaH ta'puqpu''e' 'ej naH jajmeywIj. vengwIj nganpu' chaH je.
   
6. DoyIchlan Hol 'eSperanto' Hol je mu'ghom tIn munobta' bangwI' SoS! tInbe', 'a rabba'! 1600 tenwal yugh. 'eSperanto Hol mu'ghomvam tIn law' Hoch 'eSperanto Hol mu'ghom tIn puS net Sov. chabalwIj tetlh paqvam tu'lu', 'ach waghqu'mo', jIHev 'e' vItulbe'. mumuSHa'ba' bangwI' SoS!
   (De'chel... qatlh *SoSnal wIjatlhlaHbe'?)
7. «maSIr tIQ HolQeD lIHmeH paq» munobta' telraQ. wa' chabal 'oH je paqvam'e'. maSIr Hol tIQ vIghojtaHmo' jISeyqu' 'ej tugh vIlaDchoH vIneH! vurchu'be', 'ach Dajqu'bej.
8. DujtlhuQ wovmoHwI' munobta' telraQ be'nI', ne'yaD. wejpuH. 'ach nuqDaq vIHuS...?
9. vIbmeH leng bopbogh 'elHa' Quj munobta' latlh bangwI', yInnej. jIHvaD Daj 'ej wejlogh QujlaHlaw' vay'. ghaytan wa'logh nItebHa' maQuj.
10. gho re'Hom'at nIqta' yInnej! batlh mongwIj tujmoHjaj Dochvam! 'IH 'e' vIDam, 'ej lI'. weSjech tunqu' lo'ta' ghaH, 'oy' vISIQqangbe'mo' jIH. muSovqu'ba'. 😊
    
    cha' nob cha'be' mIllogh, telraQ qav'ap juHDaq vIlIjpu'mo':
    
    
11. QIm chab beQ vutmeH bargh munobta' telraQ. chaq ghaHvaD vIvut 'e' tul? beQmoHwI' naQ ngaS je.
12. tera' wutlh 'atlhqam qulcher munobta' ghaH. ghaytan jIHvaD 'eyqu'!
    

'ej yuch law' vIHevpu' je. jIHvaD chabHommey ngeSmoHta' 'ara'mat, ghojmoHwI'wI' ghuD. loy'qu'! SIbI'Ha' 'uQ maSopmeH vItlhob vIneH. 😋

toH... batlh DIS 2024 yI'el! Qapla'! 👋

HuDmey

cha' Hogh ret jupwI' vItlhej 'ej HuDmey Sum DISuch. jupvetlh pongqoq 'oH 'aSIl'e'. 'uqrayI'nangan be' ghaH 'ej DIS vorgh maqIHpu'. 'IHqu' 'ej SuDqu' jIbDaj. reH ghan 'ej HoS law' ghajlaw'. qaStaHvIS Holmey qepHom pIj maghom. wa'logh parmaqqay law' qangtlhIn qepmaj muv. jajvetlh nItebHa' «Sächsische Schweiz» HuD yoS wIleng. 'IH muD Dotlh. nughunmoH jul. malengmeH lupwI' mIr bIQ DujHom je DIlo' ghIq mayIt. Qatlhbe' He, HuD mach bIH. 'ach Do'Ha' Hutvagh tu'lu'. qechmaj lulInlaw' ghom'a' rab. meqvetlhmo' 'IHqu'be' yor ghoSmeH He.

 

baStay' QI

pIj mamev 'ej jorchan mIllogh wIqon. jIjatlhHa'. jorchan mIllogh vIqon jIH. qon'egh neH 'aSIl, HghHghHgh... qon'egh 'e' luparHa'qu'bej 'uqrayI'nanganpu' raSya'nganpu' je net Sov. vaj pIj lol ghaH 'ej mIlloghmeyDaj vIqon jIH 'e' muraD. wejpuH! 'a jIbepbe'. ghaH ngaSchugh jorchan, 'IHqu' je. 😉 toH... wa'logh jIbepqu' 'ej 'aSIl vIqonQo'. ngugh qoj toS neH ghaH 'ej vIqon 'e' poQ. Qobqu' 'ej tuchbej, vaj vIqonqangbe'qu'. meqvetlhmo' latlh tlhob 'ej qon nuvvetlh. 😑

'aSIl jIH je. tlhoS 100 'uj'a' 'ab nagh.

ngem raywalHomDaq mayev. leng Sojmaj wISoptaHvIS maja'chuq. qangtlhInmeymaj DIrIch 'ej pIj wa' DoS wIqIp. muvuQbej DI'onmeyDaj. juppu' QaQ maHmo' jIQuchqu'.

macheghrupDI' loQ mapaS 'ej maHvo' nargh lupwI' mIr. vaj bIQtIq HeHDaq maba'. 'aSIl SoS rI' 'ej loQ majaw. DIvI' Hol 'a'ghen ghaHpu'mo' DIvI' Hol jatlhchu', vaj raSya' Hol vIlo'nISbe'. qaSpu'DI' wa' rep tagha' lupwI' mIrna' wIyong 'ej vengmaj wIchegh. pa' 'aSIlvaD juHwIj vI'ang. not juHwIj Suchpu' ghaH 'ej not qav'ap juHDaj vISuch. merlaw' Du'Hommaj. belqu'law'. 'ej pa'meywIjDaq nIm qulcher taD wISop 'ej qorDu'maj vIghro' wIyach. ghIq juHDaj cheghnIS.

 

'IHqu' cha'vetlh! 😍

 

pItlh.

Qu'na' nIv!

Qu'na' chu' vIghaj! DaH DoyIchlan Hol ghojmoHwI' vIgheSqa' 'ach latlh malja' jItoy. bangwI' vengDaq HojnIypu'vaD HolwIj wa'DIch vIghojmoH net Sov. DaH jaSHa' vengwIjDaq jIvum, 'ach ghu'wIj chu' qaq law' ghu'wIj ret qaq puS.

layIpSIS vengDaq DuSaQ tu'lu'. DuSaQvamDaq meqmey law' ghojlaH nenwI'pu', vaj 'oHvaD «rewbe' DuSaQ» vIpong. 'op Hogh ret pa' toymoHwI'vaD jIjatlh: DoyIchlan Hol latlh Holmey je vIghojmoH vIneH. mulaj. DaH vengwIjDaq DoyIchlan Hol ghojmoHwI' jIH. ghaytan SIbI'Ha' latlh Hol vIghojmoHlaH je. chaq 'eSperanto Hol, mangtay Hol, tlhIngan Hol vIghojmoH... wej jISov.

toH... Hoch loghjaj buqjaj je DuSaQvetlhDaq DoyIchlan Hol (bay-wa' patlh) vIghojmoH, qaStaHvIS loS repmey. rep Hut tagh paQDI'norghwIj, rep wa'maH cha' bID vIvan. mubelqu'moH! naSHa' ghojwI'pu', vurqu' DuSaQ cham, jIj latlh ghojmoHwI'pu'. ghomvam vIghojmoH jIH neHHa'. rav DaSjaj 'aqroS ghItlhjaj ghojmoH latlh ghojmoHwI': 'ara'mat 'oH pongqoqDaj'e' 'ej 'uqrayI'nangan ghaH. DoyIchlan ghojmoHmeH mIw HaD ghaH. HolQeD vIHaDta' jIH net qaw. «Humanpu'» 'oH ghojmeH paqmaj per'e'.

 

ghojmeH pa’maj chu’

 

'ej tlhoS Sepngan pIm ghaH ngIq ghojwI''e'! balgharya', jungwoq, qenya', 'Iran, bolI'vIya', turIqya', polISqa', 'InDoneSya', Surya', 'eSpanya', qolombIya', maDyar, Hanghuq nganpu' chaH. wej jeS lIbya'ngan. Dajqu'bej qar'a' ghomvam? 😀 'ej QaQmo' DoyIchlan Hol laHchaj, ja'chuqmeH Holvetlh lu'lo'. qIm chaH! QumwI' Quj Qujbe' chaH. pe'vIl ja'chuqbe' chaH. Qongbe' chaH. Qu'Hommey tur chaH. meqmeyvetlhmo' mubelqu'moH paQDI'norghwIj.

Hogh ret qaSDI' ghojmeH mIw wa'DIch, SIbI' mughov wa' ghojwI' be': turIqya'ngan ghaH 'aHIlem'e'. wa' ben maqIHpu' qaStavIS Holmey ram. mu'meyvam vIghItlhtaHvIS Ha'le veng vIjaHmeH lupwI' mIrDaq jIba'taH. jar Soch Ha'le vengDaq jIghojmoH 'e' vIvan. yInwIj Dubbej ghu'vetlh.

logh chal je 'angweD, cheS yupma' je

jIyIn net Sov. jIHeghbe', 'ach qaStaHvIS Saghan DIS naDev pagh vIqon. vaj DaH DISvam cheS yupma' vIrIch. tagha' jIqonqa'!

toH... 'eQ qaSpu' «cheS yupma'». yupma'vam luSov'a' Hoch? ben law'qu' Heghpu' QIStoS ghIq yInqa', vaj wanI'vetlh quvmoH yupma'vam. 'ach QIStoS HarwI' jIHbe'mo' 'oHvaD «cheS yupma'» vIpong. loghjaj vorgh maghom bangwI' jIH je. mumer 'e' nab ghaH: vengDajDaq logh chal je 'angweD wISuch! logh HovQeD je vImuSHa' net Sovbej! 'ej 'e' Sov je bangwI'. 'ach tlhaQqu' wa' loScha': bangwI' vImer vIneH je jIH 'ej nabvam nIb vInabpu'! 'opleS logh chal je 'angweD qachvam wISuch vIneH, logh Sovbe'chu'mo' ghaH. rut mughel; jatlh: «Hov bIH'a' yuQ?», «marIS Hop law' latlh qIbmey Hop puS, qar'a'?», «ghorgh latlh Hov wISIchlaH?»... meqvetlhmo' ghaHvaD 'u' vIQIj vIneHqu'! toH... Dajqu' much 'ej 'IH. 'ey je QoQchaj.

Doj muchwI' jan!

 

mamejpa' meb paqchajDaq jIghItlhmeH tlhIngan Hol vIlo'. pelaD!

chaq 'op pIq ghItlhwIj laDlaH ghojwI'wI'. nIrtaq qavan!

ghIq bangwI' SoS wISuchmeH 'uSlar wIjaH. qaStaHvIS wej jajmey pa' maratlh. SaH je SoSnI'Daj, be'nI'Daj je. nItebHa' maSop, maja'chuq 'ej HaSta jIH wIbej. yuch wInobchuq. nuSuchDI' bangwI' be'nI' parmaqqay HurDaq mayIt. ghotI' 'oH meghmaj wa'DIch'e'. cheS 'oH meghmaj cha'DIch'e'. 'eybej! wIlpuq tu'lu' je. qaSDI' ram 'ej HurghchoHDI' chal, Sumbogh vengHom wIghoS. pa' qaS qul tInqu'. DoyIchlan 'op vengmeyDaq lurDech 'oH. qulvetlh wIchotlh, ghIq machegh.

Doj je qul'a'vam!

pItlh.

yInwIjDaq chu' nuq?

• 'op Hogh ret 'InternetDaq tlhIngan Hol vIlIHta'. jeSpu' 19 nuv.
• DaHjaj 'Internet qaSpu' tlhIngan Hol ghojmeH mIwwIj wa'DIch. SaH 5 jeSwI' (logh chal je 'angweDvetlhDaq vum wa'!). vaghlogh jIghojmoH.
• Hogh veb layIpSISDaq DoyIchlan Hol vIghojchoHmoH! Qu'na'wIj chu' 'oH! tugh De'vam chu' vIrIchnIS!
• jar cha', jaj wa'maHDIch qaSpu' qoSwIj. 38 ben jIboghpu'. mo'rItlh jem'IHDaq malop wa'maH juppu'wI' jIH je. vabDot jeS 'uqrayI'na 'aSIl, DuSaQwIj Deq nIraq je.
• qaStaHvIS Hoghmeyvam pIj 'uqrayI'na 'aSIl vIghom. pIj Holmey ram, Holmey qa'vIn Qe' je wISuch. cha'Hu' parmaqqay law' qangtlhIn qep wISuchpu'. maparHa'qu'chuqlaw'. 😊
• «Hov leng: pIqarD» DIS wejDIch muchlu'taH. mubelmoH. HaSta much lut mIr'e', DIS wejDIch QaQ law' DIS wa'DIch, DIS cha'DIch je QaQ puS. Hogh pIq mIr Qav muchlu'.
• wa'leS qaS raSya' QoQ ram. jIjeS 'ej mutlhej 'uqrayI'na 'aSIl! 😁
  

qo'vID rop vISIQqa'taH

jIropqa'. 'ach Do' jIbechbe'qu'. Hogh vorgh ghItlhjaj bangwI' juHvo' juHwIj vIcheghpu'DI' loQ jIchurlaw'. jItuS 'ej gheghchoH ghoghwIj. loQ jIpuj 'e' vIjem, vaj ramvetlh jImI'meH jItlheDbe'. pem veb jInuD'eghDI' jIrop 'e' vItob. tlhoS Dem yamtaw, 'ach tob. wa' ben qo'vID wa'maH Hut vISIQpu' net qaw, 'a DaH ropna' rurbe' ghu'wIj. jItujbe', jIQotnISbe', jIDoy'qu'be', ghIchwIjDaq 'IqnaH tu'lu'be', jImumlaHtaH. tera' ghIch rop chur law' ghu'wIj chur puS. Qel vISuchbe' je, vaj Do'Ha' mutoghbe'ba' DoyIchlan qo'vID mI' poj.

Dem yamtaw, 'ach ropwIj tobbej.

Do' Hoghvam jIvumnISbe'. Hogh veb taghqa' paQDI'norghwIj. DoyIchlan Hol ghojmoHmeH paq chu' wIlo'choH 'ej chaq ghojwI'pu'wI' vIchovlaH. latlh De' chu' vIchel vIneH: loSleS qaS qoSwIj wejmaH chorghDIch. qaSDI' jar cha', jaj wa'maHDIch HIbuS! 😁

QISmaS botIvjaj!

QISmaS yItIvqu' jay'!

tugh Dor tera' DIS 2022, 'ej Dorpu' QISmaS. DISvam maloptaHvIS mutlhejlaHbe' bangwI'. latlh veng Dab SoSDaj 'ej pa' tay'taH ghaH, SoSDaj, be'nI'Daj, SoSnI'Daj, be'nI'Daj jupna' je. vengwIjDaq lopwI' puS maH: jIH, vavwI', be'nI'wI', puqbe'Daj je. loS maH. ghobe', loSmaH maHbe'. loS ghot neH maH.

be'nI'wI' QISmaS Sor

qaSDI' QISmaS ram wa'DIch, vavwI' pa'meyDaq 'uQHom wISop. DoyIchlanDaq loQ jum lurDechvam: motlh ramvetlh 'uQ'a' wISopbe', 'ach patat 'oQqar ghIH Ha'DIbaH ghargh je tISop. maSoppa' nobmey tInob. jIHvaD ghIrep HIq, paSta', yuch je munob. vavwI'vaD SojHom 'ey vInob, be'nI'wI'vaD yuch naH qulcher je vInob 'ej SojHom wIb Hev lorbe' (parHa').

lurDech 'uQ

QISmaS jaj wa'DIch megh'a' wISop: Da'vI' ronglu'pu'bogh, patat 'oQqar taplu'pu'bogh moQmey, majaj Doq je tISop. 'eyqu'bej 'ej cha' ngop vIlo'. ngugh be'nI'wI' pa'meyDaq maSop. pa'meywIj vIcheghDI' jIpI'qu' 'e' vIjem, 'ej quSlabDaq jIQotchoH neH.

QISmaS megh'a' motlh

QISmaS jaj cha'DIch 'oH jajvam'e'. tennuSwI' quS 'oH je, vaj jungwoq Qe'Daq megh wISop. 'eyqa' Soj, 'a jungwoq Sojna' 'oHbe'. jungwoqqoq Soj 'oH, 'a vIyetnamnganpu' chaH jabwI''e'. qay'be'. vIparHa'.

DaHjaj SoSwI' wISuch vavwI' jIH je. ghIq bangwI' vISuch. tagha' maghomqa'! ghaHvaD nobmey vIje'ta' je net Sov. 'ej cha'leS 'eSperanto Hol qep'a' wISuch! DISvam 'oranyenburghDaq qaS «JES» (HojnIy 'eSperanto Hol Hogh). 'eSperanto Hol qepDaj wa'DIch 'oH! loQ jIbIt, HghHghHgh...

DIS veb macheghpu'DI' malaDchuqqa'!

Qu' chu' vIghaj!

tagha' Qu''a' chu' vIghaj! jISeyqu'! wa' ben SuwISya'vo' jIcheghta' net Sov 'ej DoyIchlan vIDabqa'taH. Qatlhqu'mo' 'ej 'ItmoHmo' Qoyje' vISuqmeH Qu', jIcheghpu'DI' Qu' chu' vInejQo'. jIleS qaStaHvIS poH nI'. jIHvaD qay'qu'be'. SuwISya'Daq Huch law' vIbajpu' 'ej naDev Do' puS juH qav'apwIj. qen Qu' vISamchoH. 'op paq nojwI' tum vItoy' 'e' vItlhob, 'ach vIlajlu'be'. ghIq DoyIchlan Hol ghojmoHwI'pu' nejtaH Ha'le nenwI' DuSaQ 'e' vItu'. bangwI' vengDaq DuSaQvam tu'lu'. vaj chaH vIrI' 'ej SIbI' muja' «maj! Hogh veb DuSaQmaj yIghoS ghIq mangach.» vaj mangachbej. chaHvaD jIjatlh HolQeD vIHaDta', 'ach DoyIchlan Hol vIghojqangmoH. tlhIngan Hol, 'eSperanto Hol, mangtay Hol, latlh meqmey vIghojmoH vIneH je. chaHvaD jIDajqu'law'. DIS veb pa' tlhIngan Hol, tengwar je vIrIch, 'ach SIbI'Ha' nabwIj vIchuH. toH...

DoyIchlan Hol ghojmoHwI' vIgheS!

'ach DuSaQchajDaq jIghojmoHbe'. Do'Ha'. latlh DuSaQDaq jIghojmoH 'e' lutlhob. jIlaj. Ha'le veng 'ay' chu'Daq tu'lu'. DuSaQvamDaq tugh Qu'na'mey ghoj luneH HojnIypu', 'ach taghlaHpa' paQDI'norghmeychaj, 'op ghojmeH mIwmey le'be' ghojnISlaw'. vaj chaq «vumwI' qeqmeH DuSaQ» vIponglaH. pa' law' novpu' net jallaH, 'ej DoyIchlan Hol lujatlhlaHbe' qabDu' law'. novpu'vetlhvaD DoyIchlan Hol vIghojnISmoH! loS beqmey tu'lu', 'ej cha' ghommey vIghojmoH. latlhmey ghojmoH cha' ghojmoHwI' Qup. be'pu' chaH 'ej QonoSvamDaq 'anIrbaS le'baSIy je vIpong. Hoch Hogh DaSjaj, ghItlhjaj je ghojwI' beqwIj vIghojmoH. ngIq ghomvaD DoyIchlan Hol vIghojmoH qaStaHvIS cha' rep. vaj qaStaHvIS wa' Hogh, qaS chorgh rep jIghojmoHtaHvIS. 'ach jIghojrupmoHmeH 'ut latlh chorgh rep. Do'Ha' chorgh rep luDIllu'. ghojrupmoHmeH rupmey luDIllu'be'. motlh ghu'vam. jar wa'maH wa' tagh ghojmeH mIwmeywIj 'ej DIS veb jar cha' rIn. rInDI' chaq jIghojmoHtaH, chaq nabwIj vIchoH. wej jIna'.

pa'maj. Hutlh ghojwI'pu'.

ghojwI' beq «Soch» — ghomvamDaq wa'maH wa' ghojwI tu'lu'. 'uqrayI'na, Surya', 'avghanIStan je rewbe' chaH 'ej loDpu' neH chaH Hoch'e'. wa'maH jav, wa'maH Soch, wa'maH chorgh ben ghap boghpu'. puSqu' DoyIchlan Hol laH. qanlaH, tlho'laH, wotmey nap lo'laH. 'ej pImqu' laHmeychaj: loQ DoyIchlan Hol lujatlhlaH 'op, tlhoS pagh SovtaH latlh. vaj ngaDbe' ghojmoHmeH Qu'. Do' DaH ghojmeH paq DISuqpu' 'ej pa' reDDaq De'wI'HomwIj jIH vIHotlhlaH. jIghojmoHmeH DoyIchlan Hol neH vIlo'. 'a... teHchu'be'. rut loQ raSya' Hol vIlo', mu'mey vIQIjtaHvIS. Do'Ha' 'arab Hol, DarIy Hol, peSto Hol joq vIjatlhbe'. meqvetlhmo' pIj ghopDu' qamDu' je vIlo'. pIj jawtaH ghojwI'pu' 'ej pIj loQ buD, 'ach Do' mu'Irghbe'.

ghojwI' beq «chorgh» — wa'maH jav loDHompu' be'Hompu' yugh beqvam. nIb nenchaj. 'uqrayI'na, Surya', romanI'ya', bIraSIw, Soma'lIya' je rewbe' chaH. 'ej nIvba' DoyIchlan Hol laHchaj! mumerpu' ghu'vam beqvam vIqIHDI'. pIj Qagh, 'ach jatlhlaHbej. tlhaQ ghojmoHmeH Qu'vam maja'chuqlaHmo'. rav A1 'aqroS A2 'oHlaw' laH patlhchaj'e'. jaw 'e' lutIv je chaH net jallaH. 'ach jIja'taHvIS roD muqIm.

moHbej qar'a' DuSaQvam?

 

DuSaQvam'e'? moH qach 'ej moHqu' veng 'ay'vetlh. qaStaHvIS ram pa' jIyItqangbe'. 'ej juHwIjDaq Hopqu'. 730 rep taghmo' ghojmeH mIw wa'DIch, 520 rep juHwIj vItlheDnIS. tlhoy 'eq!!! Do' rut bangwI' juHDaq jIQong, vaj 630 rep pa' vItlheDlaH. Hurghqu' chal. ghaytan DIS veb DuSaQvamDaq jIvumbe' 'ej latlh DuSaQDaq jIvumchoH. chaq ngugh ghu'wIj vIDub. 'ach naSHa' latlh ghojmoHwI'pu', loQ maja'chuqpu'. muboQqang.

Do' qabqu'be' ghojmeH paqmeymaj.

wej tuchwIj vISov. Holtej jIH net Sov. qaStaHvIS chorgh DIS jIQulta'. Qatlhqu' poHvam 'ej mu'ItmoH. HolQaD vItIvqu'taH, 'ach jIQul vIneHbe'. Hoch DIS ghItlhmey vIqon vIneHbe'. DaH latlh Qu''a' vISamlI'. reH mubelmoH ghojmoHmeH Qu'. 'eSperanto Hol vIghojmoHpu'. tlhIngan Hol vIghojmoHpu'. HolQeD meqmey vIghojmoHpu'. DaH DoyIchlan Hol vIghojmoH. DIS veb tlhIngan Hol vIghojqa'moH. chaq ghojmoHwI' po' vImojlaH. chaq rut jImughlaH. Dajbej tuchwIj...  🏫

wej muchmey DISuchta'!

'op wanI' DISuchpu' bangwI' jIH je. 'ej DaHjaj latlh wanI' vISuch.

vengwIjDaq much qaSmoH Faisal Kawusi, DoyIchlan HaghmoHwI'. ret law' muchDaj chaw'mey DIje'ta'. DoyIchlanDaq boghpu' 'ach 'avghanIStan qaytu'pu' ghaj. vaj pIj novpu', DoyIchlanganpu', meHghem Qat bop qIDmeyDaj. qabqu'be' muchDaj, 'a QaQqu'be' je. tlhaQ qIDmey law', 'ach tlhaQbe' 'op. 'ej rInpa' SIbI' wup. tlhaQbe' bomDaj 'ej bomwI' QIvqu'bej ghaH. nubelbe'moH. much wIjaH 'e' wIpaybe', 'ach ghaytan wISuchqa'be'.

povjaj vorgh qaSpu' QoQ much. bomwI'vam maSqu' bangwI'. LEA 'oH pongDaj'e' 'ej pIj QoQDaj Qoy 'e' vISov. qaStaHvIS wa' DIS LEA rIchtaH. vengwIjDaq qaS QoQ muchDaj muja'pu' 'ej 'ISjaHDaq muchvam tu'lu'. 'a jIQIp! reH jIHIt: ghaytan bangwI' tlhej chajDaj. ghaytan nItebHa' muchvam luSuch chaH. pIj mumer bangwI' net Sov. 'e' tIvqu'. lengmaj vorgh boqaw'a'? mumerlu' 'e' vItIvqu' je. jIH'e', pIjHa' mermeH qech QaQ vIghaj. pImbej «parmaq Hol» DIlo'bogh. 'ach ret bangwI' vImer neH ghaH. 'e' vIyajHa'chu', vaj pagh 'elmeH chaw' vIje'ta'. DaSjaj ghaH vIghel, jIjatlh: «toH, wa'leS QoQ much DajaH'a'? Dutlhej 'Iv?» jang ghaH, jatlh: «teH'a'? choghelnIS'a'?» ghIq qaStaHvIS poH nI' maja'chuq. tagha' maHvaD cha' chaw'mey vIje'. chaw'mey vIje' 'e' qapbe'chu' 'ej muraDbe'. yajHa'ghachna' 'oHbej. bomwI'vam Qoy neH ghaH 'ej vItlhej neH. jItuHqu'... povjaj qaS QoQ much. wIghoS 'ej wI'el. loQ neH 'op bommey vISov. chaq wa'logh, cha'logh DIQoypu'. QoQ vImaSbogh 'oHbe'bej. reH vInglaw' bomwI'. loQ 'IQmoH bommeyDaj, 'a QuchmoHbogh QoQ vImaS. much yaHDaq maSum, 'ach law' bejwI'pu'. ghIq bom. 'ej qabbe' bommeyDaj. bommey law' vIghov 'ej motlhHa' 'ey bIH! much yaHDaq bommeyDaj QaQ law' Spotify bommeyDaj QaQ puS. muchDaj vIparHa'choH 'ej nItebHa' wISuchmo' jIQuchqu'. pe'vIl tIv je bangwI' net jallaH.

QaQbej LEA QoQ much

latlh QoQ much wInabpu' je: lepSISDaq bommeyDaj much The Kiffness! vIghro' HaSta tameyDajmo' 'InternetDaq noyqu'choHpu'. reH tlhaQ tamey, reH Daj bommey. Set'avrIqa'ngan ghaH 'ej DaH vengwIj machDaq muchDaj much! SIbI' 'elmeH chaw'mey DIje'ta' bangwI' jIH je. 'ach qaSpa' muchDaj, pay' ropchoH bangwI'. qo'vID wa'maH Hut SIQ. qaStaHvIS wa'maH jaj rop 'a Do' bechqu'be'. meqvammo' mutlhejlaHbe' QoQ much vISuchtaHvIS. Do' Sap DuSaQ jupwI', 'enyI'baS. 'ej nutlhej je 'eSperanto Hol jatlhbogh jup, tIr'ebor. toH... Dunqu'qu'qu'qu' QoQ muchDaj! wItIvqu' Hoch! much yaHDaq HaSta ta muchtaHvIS QoQ janmey cha'. pIj De' chel 'ej bom qun ja'.

vIghro' QoQ 'ey law' Hoch 'ey puS!

rInDI' much, yIvbeH DIje'laH 'ej vabDot noywI'vam retlhDaq mIllogh DIqonmoHlaH. loQ ghaHvaD jIjatlh 'ej bangwI'vaD HaSta taHom qon ghaH 'ej ghaHvaD jatlh. jIQuchchu'! vabDot yIvbeHwIj naD. 😃

maHoy qar'a' The Kiffness jIH je? 😉

jul naptop naQHa'

DaHjaj 'ewropDaq qaSpu' jul naptop. Do'Ha' naQHa' 'ej vengwIjDaq jul lutlhoDmoH 'engmey law'. jul po'oH neH vel maS 'ej jul chotlhbe'lu'chugh, ghaytan wanI' tu'laHbe'. 'ej wovqu'mo' jul, chotlhbe'nIS Human, 'a le'bogh mIn QanwI' nguv lo'nIS. cha' De' ngop vIlo' jIH. Qapbej mIwvam 'e' vISov. qaSpu'DI' latlh jul naptop, mIwvam vIlo'pu'. vabDot mIllogh vIqonta'!

 

DaHjaj qaS: jul velpu' maS. toH... naptop 'oH!

'ewrop botlh poH wa'maH cha' vatlh wa'maH wej rep qaS 'aqroSDaj. ngugh mIlloghvam vIqon. 🌞 🌝

tIq rop

roplaw'pu' tIqwIj. 💔 ghobe', bangwI' bopbe'. cha' Hogh ret taghpu' wanI'vam...

povjaj veng vIjaH. reH povjaj vengwIjDaq qaS «Holmey ram» (tachDaq Holmey qeqlaH jeSwI'pu'). jIjeSpa' 'uQ vISop 'ej jISoptaHvIS loQ jIchur 'e' vIjem. qaStaH nuq? ghan'ach vIbam'a'? ghobe', jaS jIjem. jIbItchoH 'e' vIjem, 'ach jIQepbe'chu'. jISeybe' je, vaj meq vIqawlaHbe'. 'a jIchurmo' «Holmey ram» vIjaHbe' 'e' vIwuq. juHwIj jIchegh. jaj veb joqqu'law' tIqwIj. 'ach joqqu' neHHa', pIj Suplaw'. pIjHa' Sup tIq motlh 'e' vISovbej. SIQpu' Hoch. 'ach jajvetlh pIj Suppu' tIqwIj. jIbItqu' 'ej mughIj wanI'vam. bangwI' vIja' 'ej SIbI' muSuch. reH Qep ghaH jIchurchugh. wa'Hu' Qel wISuch 'e' wIwuq.

jajmeyvetlh veb 'op Qel wISuch. chach Qel yaH wISuch 'ej yapbe' qay'taHghachlIj muja'. yebwIj 'uch neH Qel cha'DIch 'ej tIqwIj jaghIv nuD. loQ ngaDbe' 'a yIQepQo' jatlh. 'argh wanI'. tIqwIj jaghIv vInuDtaHvIS jIH, wa'logh Suplaw' tIqwIj 'e' vItu'. 'ach cha'logh joq 'e' vItu'be'. SetqIn wa'logh joqbe' 'e' vItu'. yev! mubItmoH. qaStaHvIS wa'maH tup chaq wa'logh yev tIqwIj. mughIj ghu'vam 'e' bojallaHbej. wa' Qel yaHDaq tIqwIj jaghIv juvmeH 'ul HotlhwI' lo' Qel, qaStaHvIS wa' tup. Do'Ha' pa' jIQottaHvIS Supbe' pagh yevbe' tIqwIj. nom joqbe' tIq 'ej vItlhbe' 'Iw Surmen.

meqvetlhmo' qaStaHvIS wa' pem wa' ram je 'ul HotlhwI' vIqengnIS. logh'obwIj lunguD wej noch. tetlhDaq ta'meywIj vIghernIS 'ej yevlaw'DI' tIqwIj reH rep vIngu'chu'. jaj veb gher'ID vIHev. QelwI' ghaHbe'mo' Qelvetlh, qorDu'wIj Qel vISuchnIS. meQHam gher'IDDaq qay'bogh pagh tu'lu'law'. chaq wa'maHlogh Supba' tIqwIj, 'ach motlhchu' ghu'vam. Supqu'taHvIS tIqwIj, gher'IDDaq pagh tu'lu'. jembe'ba' HotlhwI'. jumbe', qar'a'?

Hegh nu' (jIqID)

 

tagha' qorDu'wIj Qel vISuch. not vIparHa', 'ach qaSpu'DI' povam, not vISuch 'e' vIwuqchu'. latlh qorDu' Qel vISambej. toH... yaHDaj vI'el 'ej ghu'wIj vIDelchoH... cha' mu'tlheghmey vIjatlhDI' muqagh Qel. 

«nuqneH? motlhchu' wanI'vam. reH loQ Sup tIqDu'. 'ej yevchugh, qay'be' je. bIropbe'ba'! 😲» jatlh ghaH.

jIjang «jISov. rut qaS. 'ach jIH'e', qaStaHvIS wa' rep, wa'maHlogh Suplaw' tIqwIj. jIchur. mughIj wanI'vam. Badminton vIQujvIp. qay'law'mo' tIqwIj, nuDlu' 'e' vImaS. potlhbe''a' leSSov? 😟»

raS Dut 'ej jang Qel «ghobe' jay'! bIpIvba'! gher'IDlIjDaq pagh tu'lu'. yevchugh tIqlIj, vaj  taghqa'meH len neH 'oH. Badminton yIQuj! pIvmoH vIHtaHghach. qatlh yaHwIjDaq bIba'taH?! Hergh DapoQ'a'? 😠»

«ghobe'. jI— 😨»

«'ej tIq Qel DajaH DaneHchugh, SoHvaD ngeHmeH QIn vIghItlhQo'! yIQepQo' jay'! 😡» jatlh Qel.

jachbej Qelvam. mubItqu'moH 'ej tlhoS jIjanglaHbe'. qatlh QeHchoH ghaH? yaHDaj vImej 'ej not vIchegh. De' nIb muja'laHba' ghaH 'ej chaq mubItHa'moHlaH mu'meyDaj. 'ach jach 'ej raS weq 'ej tlhoS munuS. chaq rop vIjalqang neH DaH 'e' Qub ghaH. Qelvam vIyajbe'.

toH... juHwIj vIchegh 'ej qaStaHvIS 'op jaj jIleS. jImI'be', Qu' vInejbe', jISeybe' 'e' vInID, HIq tangqa' Doq ghap vItlhutlhbe'. QIt Dub'eghlaw'taH ghu'wIj. DaHjaj pIjHa' Sup tIqwIj 'e' vIjem. wej ngab 'a Do' tlhoS vIjembe'. ghaytan ropna' vISIQbe'. jarvam jaj wa'maH javDIch tIq Qel vISuch. ghaytan muja' bIpIv.

bIQ'a' HeHDaq maghIQ!

muneppu' bangwI'! mutoj! vItQo' ghaH! chay'? toH... 👀

loQ jIqID neH. mumerta' bangwI' 'ej Qapbej! 😁
'op Hu' vengDajDaq maHtaH. 'IHbej ghInjajmaj 'ej jaj wa' maleSchu'. HurDaq mayIttaHvIS mujatlh:

«wa'leS loQ mave'. Hoch vInabchu'pu' 'ej bIQepnISbe'. 'ach choghel 'e' vIchaw'be'. HIvoq neH!»

pIj mumer bangwI'. 'ej reH QaQ qechDaj. vaj nuqDaq wIleng? chaq latlh vengHomDaq magh yotlhDaq maba' 'ej Soj wInoS? chaq Sumbogh vengDaq qaS wanI' Daj? loQ jIbIt, 'a vIvoqlaHchu' 'e' vISov. DaSjaj po Sochlogh Qoylu'pu'DI' lupwI' wItIj 'ej mangghom wIjaH. pa' lupwI' mIr wItIj. Ha'levo' vI'tenbergh ghoS lupwI' mIrvam, ghIq pa' latlh lupwI' mIr wItIj 'ej nom maDuv... berlIn wIjuS, vaj ghaytan DoyIchlan 'ev chan wIghoS. 🚉 tagha' ghoch Qav wIpaw: SItralSun. vengvam pong vISov, 'a Daqna' vISovchu'be'. DenmarghDaq Sum'a'? po'lISqa'Daq Sum'a'? vISovqu'be' 'ej pu'jIn vInuDQo'. 'ach bIQ'a' HeHDaq tu'lu' 'e' vISovbej. «poH wIghaj. mamoDnISbe'.» jatlh bangwI'. vaj QIt mayIt 'ej veng wIbej. 'IH 'ej rabbe'. tugh vergh wIpaw. verghDaj mach law' Hamburgh vergh mach puS. ghIq qach'a' wIjuS: OZEANEUM 'oHlaw' pongDaj'e' 'ej SIbI' jIyaj. pa' muDorba' bangwI'! 'ach wI'elpa' latlh Doch wISuch:

«Gorch Fock I» (gho'rIch voq 'Iv?) 'oH DoyIchlan SolDeS Duj noy pong'e'. chorghmaH Hut ben mutlhlu'pu' 'ej DaH verghvetlhDaq rIjtaH 'ej vIHbe'. wItIj 'ej mIqta'Daj, janmeyDaj, pa'meyDaj je DIleghlaH. Daj. raSya' Hol mu'mey law' vIlaD, raSya' bIQ Duj 'oHlaw'pu'mo' je. ⛵

meSmey

megh paS wISoppu'DI', OZEANEUM wI'el. Hu rur, 'ach bIQDep neH bop. pa' 'atlantIQ bIQ'a', DoyIchlan 'ev bIQ'a', DoyIchlan chan bIQ'a' neH bIQDep lutu'lu', vaj qubbe' ghotI'. chumbe' je. SIrlIy rur HochHom. 🐟 SolbISmey bop je Huvam. Do' SolbISna' ghajbe', 'ach maH DungDaq SolbIS SuD nobmeD wIHo'laH. Dojqu'! latlh pa'Daq quSDaq wIba'laH 'ej SolbIS bopbogh De' Daj ja'lu'. 🐋 bIQ'a' 'umber lubop latlh pa'mey. 'ej qachvam bebDaq jentu' jorchan tu'lu'! 'IH bIH 'ej chalDaq beyHom bey bey'a' jachtaH! chaq tlhIngan jentu' bIH? 🐧

'IHqu' mIlloghvam, 'ach puq vIrur. 👦

mujatlh bangwI' «DaHjaj ram Ha'le wIchegh. Do vItlh lupwI' mIr wItIj, ghIq wa'vatlh rep wIpaw.» jIHvaD qay'be'. bIQDep Huvo' QIt veng wItol. maja'chuq 'ej 'IH lojmItmey 'e' tu' ghaH. 'oy'qu' qamDu'wIj, vaj wa' quSlabDaq maba'. maba'taHvIS wa' juH qachDaq lojmIt 'IHqu' tu' bangwI'. 🚪 SuD 'ej Hurgh; ram chal rur. Hu', qet, chol. mIllogh vIqon neH'a'? vay' tu'pu''a'? jISIv... SIbI' lojmIt retlhDaq SeHlaw lo' 'ej wa' lup pIq ngaQHa'moHwI' 'uch! 🔑 qaS nuq jay'?! ghIq jIyaj: mumerqa', mebpa' vunba'ta' ghaH 'ej DaH naDev maratlh, qaStaHvIS ram. HghHghHgh! 😄

'IHqu' mebpa'maj. SuD Dochmey law'. QongDaqDaq machurHa'qu'. Say' puchpa'. pa'vam wItIvqu'. mebpa'mey malja' 'oHbe' qachvam, 'a 'op pa'mey nojbogh ghot motlh ghaH pIn'e' (Airbnb). 'ej waghqu'be'law' mebpa'maj. Dun ngoDvam: choHmeH Sut qeng, HerghwIj, Ho' teywI', rol tajwIj je qeng bangwI'. Hochna' nabchu'! re'lIngDaj 'oHbej nabmeH Qu''e'! Du'HomDaq maHvaD nIQ vut mebpa' nojwI' 'ej 'ey je. tIr ngoghHommey vutta' ghaH 'ej tera' na'ran chang lInglaw'ta' je. pup Hoch. 👌

Du'HomvamDaq nIQ wISop. 😋

DaH juH qachvam mach wImej 'ej SItralSun veng wIbejqa' 'e' wInab. bIQ'a' HeH wIghoS 'ej mayIt. bIQ'a' muSHa' bangwI' 'ej ghangwI' bejDI' jotchoHchu', ghanHa'qu'mo' ghu'vam. rojvam wItIvlaH cha'. mayIt, maja'chuq, 'ej bIQ'a'Daq Sambogh naghmeyDaq maQot. loQ nurong jul. 🌞 ghIq maDuv 'ej Do'ol yotlh wIpaw. pa' QaltaH qabDu' law'. maQalbe', 'ach nIm qulcher taD wIroStaHvIS QalwI'pu' DIjIH. veng botlh wIcheghmeH cha' 'ul DujHom DIngIp. veng botlhDaq mayItqa', 'IH je. cha' QIn 'echletHommey DIje'. SoSDajvaD ghItlh bangwI' 'ej 'eta'ra'vaD 'echletHom vIghItlh jIH. SuwISya' DabtaH 'ej vIparHa'qu' 😊 'a Do'Ha' pIjHa' mughItlh ghaH. DIngeHpu'DI' mangghom wIjaH...

veng botlh

'ej ngugh nabmaj wIchoHqu'nIS. cha' lupwI' mIrmaj luqIllu'pu', meqvetlhmo' jajvetlh Ha'le wIpawlaHbe'. latlh Do vItlhHa' lupwI' mIrmey tu'lu', 'ach tlhoy ngajlaw' tIjqa'meH poH. vaj maba' 'ej Hoch nuH wIqel. wa' nuH neH tu'lu': SItralSunvo' lupwI' mIrDaq roStoq wIghoS. pa'vo' berlIn wIghoS. pa' lupwI' SuD wItIj; latlh lupwI' mIr qa'. 🚌 qaSpu'DI' ramjep tagha' Ha'le wIpaw. 🏠

leng Dun 'oHbej 'ej bangwI' vItlho'qu'! 😍

qep'a' cha'maH HutDIch

tera' poH jar chorgh, jaj cha'maH chorghDIch, jaj wejmaH wa'DIch je qubbID qaS «qep'a' cha'maH HutDIch». qoro'na javtImmo' 'InternetDaq qaSqa'. nuvpu' law'vaD Do'Ha' ghu'vam, 'a jIQuchqu' jIjeSlaHmo'. meqvetlhmo' 3500 qelI'qam vIlIDnISbe'. QongDaqwIjvo' De'wI'HomwIj vISIchmeH 2 'uj'a' neH vIlID. qep'a'vamDaq jeSpu' 75 qabDu'.

'ej Dajqu' DISvam Deryat! taghwI'pu'vaD tlhIngan Hol lughojmoH 'op, 'ach qaStaHvIS ghojmeH mIwmeyvetlh jIjeSlaHbe'. wejHa' ben law' tlhIngan Hol vIghojchoHta'! 'op muchmey vItIvqu', vaj naDev bIH vIrIch:

• «Politeness in Klingon» — DochHa'laH tlhIngan je 'ej law' mIwmey. Daj fergusq SoQ 'ej 'op De' chu' vISovchoH je jIH.
  
• «Translators Breakout Room» — DaH lutmey law' lumughlu'lI' 'ej law'choHlaw' mughwI'pu'. lut mughmeH ngaDbe' Qu' net Sov. wa' lut vImughlI' jIH 'ej DeSDu' cha' lutmey vI'oltaH. vaj jIHvaD lI'bej ja'chuqghachvam.
• «'u' – The Opera» — tera'Daq wa' tlhIngan ghe'naQ tu'lu' 'e' boSov'a'? «'u'» 'oH pongDaj'e'. qaSpa' qep'a'vam not vIbejpu'. 'amerI'qa' SepjIjQa'Daq 'u' muchlu'taHvIS qonlu', vaj DaH wIbejlaH. Do'Ha' pupbe' ta. pIj tam 'ej tlhoD wabDaj, vaj Hoch mu'mey DIyajlaHbe'.
• «meq Haw much: nIntenDo' qun» — nIntenDo' qun rIch DeSDu'. DaH QujmeH janmey lIngwI' noy 'oHbej, 'ach bI'reS 'echletHom vey lIng. jawtaHvIS DeSDu', (DaH) reH vIyajlaH. qay'be'. laDtaHvIS ghaH, tlhoy nom. vI'Ij 'e' vInIDqu', 'a pIj mu'tlheghmey vIyajchu'be'. chaq nom laD? chaq tlhoy nI' mu'tlheghmey? chaq Qatlh bIH? jISovbe'. 'ach SoQ laDbe' net jalchugh, ghaytan Hoch vIyajlaH.
• «Marc Okrand Q&A» — marq 'oqranD wIyu'laH 'ej (chaq) jang ghaH. meQHam DISvam tlhIngan Hol pab rIchQo'. SetqIn tlhIngan Hol qun, Hov leng lIngmeH wanI'mey je rIch. Daj. tlhaQ je 'op wov'on.
• «Rust-Removal Workshop» — DISmey vorgh mu'mey chu' rIch DeSDu' julyan'a' je. muchtaHvIS chaH, mu'mey law' vIghItlh, ghIq vIghojchoH. lI'bej. vItIvqu'!
• «nuq 'oH?» — tera' Quj noy rur Qujvam 'ej tlhIngan Hol neH wIlo'. wa' mu' buS SovwI' 'ej mu'vam luloynIS loywI'pu'. 'ach cha'maHlogh neH luyu' net chaw'. «HIja'», «ghobe'» ghap neH jang SovwI' net chaw'. DIvI' Hol Quj boQuj boneHchugh, vaj naDev «20 Questions» yISuch

latlh muchmey, SoQmey je lutu'lu', 'ach DajwI'mey neH vIrIch. 😉
'ej qaSbe'DI' vay' Daj, vaj majaw. rut DIvI' Hol wIlo', rut tlhIngan Hol wIlo'.

tlhIngan Hol DochHa'ghach SoQ

qaS je tlhIngan Hol laH qaD (KLCP)! wa' ben patlh cha'DIch vIchavta'. DaH jIqaDqa' 'ej Qapqa'! tlhIngan Hol laH qaD patlh wejDIch vIchavta'. ngeDbe'. jIQubqu'nIS. vaghlogh jIloynIS 'a Do' wejlogh jIbachHa'. Qapla'! vaj DaH tlhIngan Hol po'wI' muponglaH'a' vay'? 🎓

tagha' mu'mey chu' DISuqpu'! lI'bej 'op mu'. DaH tulwI' Hol vIjatlhnISbe', 'eSperanto Hol tu'lu'mo'. chap mu'vam. 'ej chap je «chap». tagha' to'qIpo'na Hol wIrIchlaH. chabalwIj bIH 'op mu'mey'e': nIbbe'chu' ghaQpey', HuQ'am net Sov(nIS). Sut tuQbe'chugh vay', vaj Qen ghaH.

DIS veb 'amerI'qa' SepjIjQa'Daq qaSqa' qep'a' wejmaHDIch. ngugh ghaytan jIjeSlaHbe'.

DoyIchlan DI'ruj qep wa'DIch

qaStaHvIS wej jaj tlhIngan Hol neH vIjatlhta'!

nuqjatlh? qaSpu' nuq? peqIm, jIQIjrup...

pIj 'InternetDaq DISqorDDaq tlhIngan Hol yejHaD turwI'Daq tlhIngan Hol lujatlh qabDu' law' net Sov qar'a'? DISvam tagha' DI'ruj qep wIcherta'. vaj maghommeH HamburghDaq mebpa'mey DIvunta'. rav jar Soch jaj cha'maH cha' 'aqroS jaj cha'maH loS qaS DI'ruj qepmaj. jeSpu' Hut nuv: jIH, cha'Qargh, payqagh, rIjmI', SItlha, Ester, Iikka, Kaneli, pne). ne'Derlan Dab cha'Qargh, SuwomIy luDab rIjmI', Iikka, Kaneli je, 'ej DoyIchlan luDab latlh. qaStaHvIS qepmaj tlhIngan Hol neH vIjatlh 'e' vIHech, 'ach jI'Ippu'be'. tlhoS jIQap!

buqjaj:

po juHwIj vItlheD 'ej lupwI' mIr vItIj. buy'qu' lupwI' mIrmey, Hut 'ewro' chaw'mey lo'mo' Hoch. tlhoS ba'meH quS vISuqbe'. Hamburgh manggha'a'Daq vIpawDI' muvan cha'Qargh SItlha je. vabDot pIqaD vep 'uchtaH SItlha. maghep 'ej maQuchqu', not maqIHpu'mo'. 'ej payqagh wIloStaHvIS nuvan Hov leng yIvbeH tuQtaHbogh HujwI'. pIqaD ghovba'pu', 'ach wa' tlhIngan Hol mu'tlhegh neH jatlhlaH: «nuqDaq 'oH puchpa''e'?» lI'qu'bej! 😂 numuvpu'DI' payqagh (mIvDaj chIS je), mebpa'mey DIghoS. wutlh lupwI' mIrDaq maba'taHvIS ja'chuqchoH cha'Qargh be' nov je. mangtayngan ghaH 'e' vIghojDI', ghaHvaD jIjatlhmeH mangtay Hol vIlo'. yabwIj mISqu'moH ghu'vam 'ej QaQqu'be'pu' laHwIj, 'a tlhaQbej ghu'vam!

muvanpu' payqagh, SItlha, cha'Qargh je!

mebpa'meyDaq tepmaj wIroQ, ghIq Soj ngevwI' wIghoS. macheghDI' pawta' SuwomIynganpu'. maghung, vaj mebpa'mey Qe'Daq pItSa' chab, tlhatlh, paSta' je DISop. 'eybej. Daqvam vIchuplaH. ghIq cha'Qargh mebpa'Daq 'echletHom Quj wIQuj: «Alias» 'oH pongDaj'e'. 'echletHommeyDaq mIllogh tu'lu' 'ej tlhIngan Hol mu' ghItlhpu' Kaneli. tlhIngan Hol wIlo'taHvIS latlhpu'vaD mu'vam DelnIS ngIq QujwI'. 'echletHomvam Suq loychu'wI'. nap Qujvam, 'ach matIvbej. rInDI' pa'wIj wIjaH 'ej pa' latlh 'echletHom Quj wIQujchoH: «Fluxx». wejHa' Qujvam vISov, 'ach Hov leng puq poH veb vey, Hov leng logh Hop Hut tengchaH vey je ghaj Kaneli 'ej DaH QISmaS chabal tetlhwIjDaq Qujvam tu'choHlu'! Qujvam chutmey'e'... wa' wa' wa'. napbe' 'ej reH chutmey luchoHlu'. Qappu'DI' payqagh, maQongmeH maghomHa'.

Fluxx QujwI'pu'

ghInjaj:

Hutlogh Qoylu'pu'DI' chobDaq maghom 'ej Hamburgh bIQ Duj vergh wIghoS. pa' Dujmey DIlegh 'ej 'elbe bIQtIq HeHDaq mayIt. tujbe' muD Dotlh, vabDot loQ bIr. 'elbe ghenraq'a' chaq noy vISuch 'a wI'elbe'. DungluQ Qe'Daq meghmaj wISop, pe'vIl maja'chuqtaHvIS. ghIq chIrgh Daj wISuch: nIqo'lawoS mIryoteS quv chIrgh pIgh. pa'logh chIrghna' 'oH 'ej 47 'uj'a' 'ab baS 'In chalqach. qaStaHvIS qo' noH'a' cha'DIch chIrghvam qach'a' Qaw' peng 'ej mutlhqa'be'lu'. DaH chIrghqoq 'ellu'DI' HurDaq Qamlu'. SuchwI' luDech tlhoy' Duy'. Dajbej. ghIq jupwI', pne, wISuchmeH latlh Qe'Daq maba': «Hans im Glück» 'oH Qe'vam pong'e', 'ej tlhoS DoyIchlan Hoch vengDaq tu'lu'. tugh paw ghaH. qaStaHvIS DIS law' maghombe'. Hamburghngan ghaH. tulwI' Hol jatlh 'ej tlhIngan Hol jatlh je, 'ach mu'mey 'Iq lIjmo' pIj DoyIchlan Hol wIlo'. Do'Ha' nutlhejlaHbe'. Qu'mey law' turnISlaw', vaj qaStaHvIS cha' repvetlh neH maghom.

Kaneli, SItlha, jIH, Iikka, pne, Ester, rIjmI', payqagh, cha'Qargh je

mejpu'DI' pne, ghochmaj veb maghoSmeH He wInab: «Miniatur Wunderland» (poymar Sep nu'). pa' jorchan velqa' nu' tu'lu'. toH, motlhbe' velqa'vam, 'ach rabqu'! law'qu' jorchan velqa' nu' yotlhmey rab. wejHa' 'elmeH chaw' je'ta' payqagh. 'ej tInqu'bej Hoch raSqoq. Hoch raSqoqDaq jorchan tu'lu': HuDmey, bIQtIqmey, Sormey, qachmey, lupwI' mIrmey, puH Dujmey, raghghanmey nu' je. 'ej wov Hoch pagh bar, law'mo' je wovmoHwI' nu'. vIH lupwI' mIrmey neHHa', 'a vIH je 'op puH Dujmey, tepqengwI', bIQ Dujmey, taH taH taH. 'IHqu' 'ej Dajqu' Hoch! raS tlhIn ghaj ngIq Sep: bIraSIw, DoyIchlan, 'amerI'qa' SepjIjQa', 'Italya', SuwISya', SIqenDInavya', vabDot mu'neqo tu'lu'. qaStaHvIS vagh rep poymar Sep nu'Daq maratlh 'ej HochHey wIbejchu'. wej ben HaSta ta qonpu' malja' 'ej mughmeH tlhIngan Hol lo' Quvar, yIbej:

ma'elHa'DI' mebpa'mey DIchegh 'ej mangghaDaq, lupwI' mIrDaq Holmey DIrIch. reH jIHvaD Dajqu' meqvam. venwI'na' maHba'!

roma' jorchan velqa' nu'

jaj wa':

Do'Ha' Qav jajvam. po mebpa'meymaj DIqeD 'ej meb paqchajDaq tlhIngan Hol ghItlh wIqon. naDev ghItlhmaj bolaDlaH:

meb paqvaD tlhIngan Hol wIlo'.

ghIq Sumbogh qa'vIn Qe'Hom wIjaH 'ej nItebHa' nay'maj Qav wISop. 'IHbej Qe'vam 'ej chab wIDIlnISbe'bogh nunob jabwI'. 'IH je ghaH 'e' vIchID. loQ maja'chuqtaH, ghIq tlheDnIS payqagh, cha'Qargh, Ester je. ratlhtaH SuwomIynganpu', SItlha, jIH je, vaj «veng, Sep, bIQtIq» wIQuj. DoyIchlan Quj 'oHlaw'. luSovbe' SuwomIyngan 'ej loQ mumer ngoDvam. 'ach qay'be'. napbej chutmey 'ej nav, ghItlhwI' neH DIpoQ. ngutlh Haw wIwIvmeH boQwI' wIlo'. buvmeyvetlh DIwIv: Ha'DIbaH, nuHna', porgh 'ay', Soj, Sep, Hap. Qap SItlha. cheghmeH leng taghta'DI' SuwomIynganpu', manggha wIjaH SItlha jIH je. megh wISop 'ej loQ maja'chuq je. ghIq lupwI' mIrwIj vItIj 'ej juHwIj vIchegh je. buy'qa' lupwI' mIr 'ej chuSqu', vaj Qatlhqu' laDmeH Qu'. cha'maH wa'vatlh loSmaH rep juHwIj vIpaw.

maQujpu' 'ej Qap SItlha.

Dunqu'qu'qu' DIruj qepmaj! tagha' 'InternetDaq neHHa' tlhIngan Hol vIjatlhlaH. Hoch nubelmoH wanI'vam 'ej ghaytan DIS veb qepvam wIcherqa'. chaq HamburghDaq maghomqa', chaq latlh veng wISuch. to'waQ wIyIvnISbej...

Har'eyngan boghoy 🌈

DaH 215 SImyon gheH DoyIchlan 'ej HurDaq jIyItvIpmo' pa'meywIjDaq jIratlh neH. tujbej jajmeyvetlh...

loQ tuj je ghInjaj vorgh. 'ej vengwIjDaq qaS «Har'eyngan boghoy», «le'yo' boghoy» ghap (Christopher Street Day). not jIjeSpu' 'ach DISvam qaSDI' majeS bangwI' jIH je. Har'eyngan ghaH, loDpu' be'pu' je ngelqangmo'... Qejmo'... muSHa'mo'...? 'op mu' Hutlhlaw'taH tlhIngan Hol. jIHvaD Har'eynganna' vIDambe', 'a Har'eyngan jIH 'e' Dam 'op. qatlh? toH... loD jIH 'ej be'pu' neH vIngelqang. 'ach parmaqwIj vIvuSrupbe', vaj cha' parmaqqaypu', wej parmaqqaypu' ghap vImuSHa'qang 'ej rapchu' bangwI'. latlh loD, latlh be' joq muSHa' 'e' vIchaw'bej 'ej jIHvaD ghu' rap chaw' je bangwI'. DaH tagha' naDev peghvam vI'otHa'qang. 😄 mamuSHa'chuqtaHvIS, latlh parmaq qepmey DItIv 'e' wIlajchu'. parmaqmaj Qaw'be' ghu'vam. vabDot cha' ben SuwISya'Daq maqIH, qaSDI' parmaqqay law' muSHa'qangbogh nuv qep. ngugh qepvetlh vIcher 'ej meb chu' ghaH. 'ach qunmaj vIchuH vIneHbe'. qaStaHvIS parmaq qep chu', reH ghotvetlhvaD qangtlhInmaj wI'otHa'. mapeghQo'. reH mayuDHa', parmaq wIchIwpa' net Sov. 'op ben cha' bangpu' vIghaj. raSya' Hovtej ghaH wa''e' 'ej vIyetnam HuchQeD HaDwI' ghaH latlh'e'. SuDbe' veqlargh mInDu'. DaH wa' parmaq neH vIghaj, 'ach qay'be'. jIH neH mughaj bangwI', 'a rut latlh loD be' ghap ghom...

Do' SoQvam tu'lu' 'ej DaH Dochmeyvetlh DIrIchlaH je maH, yIbej:

DaH le'yo' boghoy vIqelqa'. majeSpa' Sut chum DItuQmoH. Har'ey joqwI' chu' tuQmoH bangwI'. manggha wIpawDI' numuv tlhel'a' DIv'aD je. SuwISya' jupwI' ghaH tlhel'a''e' 'ej bangDaj ghaH DIv'aD'e'. latlh parmaqpu' laj je chaH, vaj marap. veng botlh wIjaH 'ej qev wImuv. chumbogh nuvpu' law'qu' tu'lu' 'ej joqwI', vep 'echletmey je qeng. 'IHqu'bej Hoch! motlhHa' 'IHchugh vay', vaj pIj ghotvam vIparHa'. loQ mayIt ghomHommaj, bangwI'vaD jIjatlh: «chaq bong naDev ghot vISovbogh vIghom.» 'ej mu'tlheghvam vIjatlhpu'DI' muvan wa' be' Sum. nIr'aq ghaH! DuSaQwIj jup ghaH 'ej ghaytan qaStaHvIS wa'maH ben maghomchuqbe'. 'ej pay' maghomqa'. QaQqu' neqjungvam. vaj numuv je ghaH juppu'Daj je. tInchoHtaH ghommaj. ghIq vIHchoH boghoy 'ej QIt veng botlh bav. law'qu'bej nuvpu'. lutoghlaHchu' pagh net Sov.

qalmuSvam vIQejbej! (mIlloghvam qonta' Tobias Möritz)

mabavtaHvIS latlh juppu' ghom bangwI' 'ej Daq wa'DIch wIpawqa'DI' maba'choH 'ej loQ leng Soj wISop 'ej HIq wItlhutlh. qevpobmajDaq parmaqqay law' muSHa'qangbogh nuv Deghmey DIDIj. 'ejyaH ngutlh ngaSbogh tIq 'oH Deghvam'e'. parmaq vuSlu'be' 'e' 'oS.

SIbI'Ha' DIreS'en luchegh tlhel'a' DIv'aD je. ghIq roSental (ro'Sa' ngech?) wIjaH bangwI' jIH je. pa' qaS latlh wanI': «Klassik Airleben». magh yotlh tInDaq qaS QoQ tIQ much 'ej DIlnISlu'be'. ghompu' tulwI' Hol jatlhwI'pu' 'ej DImuv. roD mubelmoH QoQ tIQ, 'ach ngugh loQ qetlh QoQchaj. rInpa' much mamej.

'IH QoQ muchvam jorchan.

le'yo' boghoywIj wa'DIch vItIvqu'qu'qu'! 😍 jar Hut, jar wa'maHDIch Ha'leDaq qaSqa' le'yo' boghoy. 'ej majeSqa'laH 'e' vItulqu'.

DIreS'en leng

jaj vagh vavwI' qoS wIloppu'. 'ej HochHey ghajmo' vavwI', ghaHvaD wanI' vInob. qechvam chuppu' bangwI': vav vuQ cham 'ej pa'logh Qum pat jonwI' ghaHpu'. DoyIchlan chan QIn tum toy', ghIq tay'choHDI' cha' DoyIchlanmey, Telekom toy'. toH... cham parHa'qu'mo' 'ej DaH qutlhqu'mo' DoyIchlan lengmey, ghaHvaD ruSvep le' vInobta': DIreS'en wIjaH 'ej pa' Qum pat 'angweD wISuch!

'ej wa'Hu' nabvam wIta'. wa'maH rep lupwI' mIr wItIj 'ej QIt DIreS'en wIjaH. chaq 50 qelI'qam DIlIDnIS, vaj qaStaHvIS HutmaH tup maba'nIS. qay'be'. vengHommajDaq lupwI' mIr wIloStaHvIS, muvan wa' be'. Hurgh jIbDaj 'ej loQ muleghvIplaw'. vISovlaw' 'a SIbI' vIghovlaHbe'. matIjpu'DI' pongDaj vIqaw: 'aytaq! naDev per yuD neH vIlo' net Sov. wa'maH ben layIpSIH DuSaQ'a'Daq HolQeD wIHaD. malengtaHvIS loQHa' maja'chuq. ne'Derlan nImveHeDaq HaDpu' ghaH 'ej wa' ben DoyIchlan cheghpu', pa' Huch Hutlhmo'. DaH qaytu'pu' juH DabtaH 'ej Qoyje'Daj wejDIch Suq 'e' nID. tugh rInlaw'. juppu'ma' DIrIch. Dajqu'. wa' jupDaj SuchmeH DIreS'en ghoSlI'. chaq 'opleS nIteb nIm qulcher taD wISop 'ej maja'chuqqa'.

DIreS'en wIpawDI' veng botlh wI'el jIH vavwI' je. maghungmo' megh wISopmeH 'elaDya' Qe' wI'el. 'eybej. ghIq lengmeH lupwI' chaw'mey DIngIp. cha' choQ ghaj lupwI'maj 'ej choQ cha'DIchDaq maba'. Hoch wIleghlaH 'ej Daqmey noy nuQIjchu' SeDwI'. Dajqu'bej 'ej loQ tlhaQ. qaSpu'DI' cha' rep, malItHa'. veng botlhDaq maryam joH chIrgh wISuch. 'IH 'ej Dojqu'. Dunqu' je qoDDaj 'ej mIllogh law' vIqon.

DIreS'en maryam joH chIrgh

 

qoDDaj Doj

ghIq loQ vengDaq mayItqa' 'ej wa'maH chorghlogh Qoylu'DI' Qum pat 'angweD wIpaw. vaS'a' vIpIH 'ach mach neH pa'Daj. law'qu'be' ghogh HablI'mey 'ach Hoch ghovlaH vavwI' 'ej muchuHbej. vaghmaH loS ben DIreS'en cham DuSaQ'a' HaDpu' vavwI' 'ej ghogh HablI'mey ngo' Sovchu'. vaj maHvaD Daj wanI'vam 'ej Quchmo' vavwI', jIQuch je jIH.

Qum cham lurIchtaH muchwI' (poS) vavwI' (nIH) je.

 

nI'mo' poHmaj, latlh 'angweD wISuch: leng 'angweD. puH Duj, muD Duj, bIQ Duj, lupwI' mIr, qam Do Duj je bop. ngo'bogh Dochmey law' lumuchlu' 'ej HochHom ghovqa'laH vavwI'. 'angweDvam vIchupbej, 'opleS DIreS'en Such neHchugh vay'! nom 'ItlhchoHba' lengmeH cham. Dojbej.

lupwI' mIr ngo' «Saxonia»

 

mamejDI' maDoy' 'ej 'oy' vavwI' qIv, vaj machegh 'e' wInab. lupwI' mIr (vur) wItIj. Do'Ha' chuSqu' wej HojnIy jIl be' 'ej macheghtaHvIS reH Dap luja'. ja'chuqtaHvIS DI'Ij 'e' wIjunlaHbe'. va... qaSDI' ramjep juH qachmaj wIpaw.

'IHqu'bej jajvetlh! 😊