wa'leS po berlIn wIjaHmo' bangwI' jIH je, DaHjaj nom QonoS ghItlh vIqonnIS. qul DIr vISopnIS!
cha' Hogh ret qaS yupma'. Heghpu' QIStoS ghIq tlhabqa' qa'lI' 'e' luHar 'ej lulop QIStoS lalDan HarwI'pu'. HarwI'pu' maHbe'mo' malopmeH tuqnIghvaD, jupvaD, bangvaD je yuch DInob. DISvam nab wI'oghpu': qorDu'wIj Such 'e' Hech bangwI' SoS. 'uSlar veng Dab, 'ej pIjHa' bangwI' ghomlaH ('a wejHa' maqIHta'). Do'Ha' ropchoH SoSDaj: 'oy'qu'choH volchaHDaj, qay'law' pIpDaj. meqvetlhmo' maSuchlaHbe', vaj wISuchta' bangwI' jIH je. qaStaHvIS wej jaj juHDajDaq maratlh 'ej matay'taHvIS maSop 'ej majaw. tIn juH qachDaj 'ej pa' Dab je bangwI' SoSnI'. wej qaryoq mach ghaj. SuD tuy'tI; banan naH rur. SuD je SIqay; 'ach chal rur. 'ej SuDqu' qo'qo'; loQ menggho' naH rur. reH mo'DajDaq ratlh tuy'tI SIqay je. not mejqanglaw'. 'ach vutpa'Daq puv 'e' tIvbej qo'qo'. pIj raSDaq Saq 'ej nIQ wISoptaHvIS tIrmey wom. Do'Ha' jatlhlaHbe' bo'Deghmeyvetlh.
 |
| qo'qo'vaD nubqu' chab bo'Deghmey'e' vutta'bogh bangwI' 🐥 |
nItebHa' mavut, maSop, Quj wIQuj, HaSta muchmey wIbej. nubelmoHbej poHvetlh. 'uSlar veng mu'ang je. mach, 'a 'IH. law' qachmey tIQ. wa' Qe'Daq maba' 'ej nIm qulcher taD DISop. QIm HIq 'Iq ngaS qulcherwIj taD. 😄
 |
| 'IHbej vengvam mach! |
Ha'le wIcheghtaHvIS, lupwI' mIrDaq «Hov leng: lut mIr wa'DIch» lut HochDIch wIbej. «DopmoHbogh yotwI'» 'oH perDaj'e'. QaQbe'qu' lutvam 'ach tagha' lut HochDIch wIbejta'. 'eSpanya' Hol lo' lutvam, jIqeq vIneHmo'. 'ach bangwI'vaD DoyIchlan Hol mughbogh permey vIcha'. Hov leng ngotlhwI' ghaHbe'bej, 'ej ghaHvaD 'op muchmey neH vIbejmoHta'. loQ tIv, 'ach lut mIr wa'DIch tIvbe'qu', ngo'mo'. 'ej pe'vIl Da qIrq HoD DawI' net Sov. bo'Dagh'a' lo'ba'. 'op Hu' 'eSpanya' Hol «Hov leng: 'entepray'» vIbejchoHta'. QaQqu'be' je 'e' vIDam, 'ach Hoch vIbejqa' 'e' vIHechchu'.
layIpSIS vengDaq vIpawDI', SIbI' cheSqa' Qe'Daq maghom vavwI', be'nI'wI', puqbe'Daj (lorbe'wI') je. qechwIj 'oH 'ej lutIv Hoch. Hoch jar Qe'Daq maSopjaj 'e' chup vavoy. qorDu'na' wIrur neH. 'ej jIQochbe'bej.
