jungwoq Hol vIqeqqa'

jIpIvqa'. qo'vID wa'maH Hut vISIQpu', 'a jItaH! qaSpu' chorgh jaj, ghIq juHwIj vImejqa'laH. 'ach DaH latlh meq vIrIch vIneH...

Holmey law' vIghojtaH net Sov. vengwIj DuSaQ'a'Daq vIHaDtaHvIS, jungwoq QeD vIHaDta'. 2010 DIS jungwoq vIDabchoH 'ej pa' jIratlh qaStaHvIS wa' DIS. ghIq QaQbej jungwoq Hol laHwIj. HochHom vIjatlhlaH, vIyajlaH, vIlaDlaH, vIghItlhlaH. DoyIchlan vIcheghpu'DI' qaDwIj Qav vIqaD 'ej jIQap. tugh poSchoH jungwoq vIjatlhmeH 'ebmey 'ej mu'mey law'qu' vIlIj. loQ mIyamaDaq Holvetlh vIlo'laH neH. DaH vengwIj vIcheghpu' 'ej jungwoq Hol laHwIj vIchu'qa' vIneH. Do' QumwI'wIjvaD nIqHom vIjom, «Tandem» 'oH pongDaj'e' 'ej Holmey qeqmeH lo'lu'. nIqHomvam vIlo'taHvIS bangwI' veng Dabbogh jungwoqngan be' vItu'. naDev ghaHvaD nay ngay vIpong. chengDuDaq boghpu' 'ej DaH Ha'leDaq meHghem HaDtaH. baS Hew chenmoHwI' moj neH nay. Dajbej! 'op Hu' maqIH 'ej Ha'leDaq qa'vIn Qe' wIjaH. qaStaHvIS wej rep jungwoq Hol, DoyIchlan Hol je DIlo'. Hoch vIlIjpu'be'ba'! 'ej mu'mey vISovbe'bogh vIghItlhpu', vaj maghomqa'pa' mu'tay' tetlhHomvam vIghanqa'laH. Hogh veb maghomqa' 'e' vItul. Do'Ha' law' je Qu'meyDaj, Denmargh ravngI' ngevwI' qachDaq vummo'.

jungwoq Hol ghItlhwIj

 

mangtay Hol, 'eSpanya' Hol je vIqeq vIneH je, vaj 'opleS juppu' chu' vISamnIS. 'ej raSya' Hol vIqeqnIS je, 'ach DaH noHmo' raSya' juppu' chu' vISamqangqu'be'. 'ej DaH cha' Holmey chu' vIghojtaH... Haway'I Hol, maSIr Hol tIQ je bIH. vengwIjDaq jatlhwI'pu' vISamlaHbe'bej jay'! 😆