DIS chu' yItIv!

wa'maH wa' Hu' taghpu' DIS. maw'moH'a', DIS vorgh rur'a'? ghaytan numer. poH taQ wIDab net Sov.

motlh choHDI' DIS, qaS tulwI' Hol jatlhpu' qep 'ej jIjeS, 'ach qo'vID wa'maH Hut rop'a'mo' Do'Ha' 'InternetDaq neH qaSpu'. DoyIchlan juHwIjDaq maratlh jIH bangwI' je. HaSta jIH wIbej, nIm wIb ngogh wISop, HIq wItlhutlh 'ej 'echlet Quj wIQuj. qaSpa' ramjep vavwI' SoSwI' je wISuch 'ej nItebHa' HIvje'meymaj wIpaw'moH, ghIq ba'Suq HIq wItlhutlh. vengHommajDaq jorwI'qoq mach baHpu' latlh. 'IH. vaj Do' qabbe' DIS choH.

'ach ngajqu' poHwIj tlhab, DuSaQ'a' Qoyje' wejDIch vIHevmeH ghItlh'a' vIqonnIS. Holtej jIH 'ej mIyama Holmey bop ghItlh'a'wIj. Dorpa' jarvam 'a'ghenpu'vaD vIngeHnISqu'. vaj Hoch jaj vIqon. loQ lIm. jIHvaD poH QaQ 'oHbe'bej. juHDajDaq ghaHtaH bangwI', vIja'mo': pe'vIl vIqonmeH, nIteb vIqonnIS. 'a muyaj. chaq SochleS maghomqa'laH, qaSmo' qoSDaj. Hoch jaj tangqa' Doq vItlhutlhchugh, chaq jIQaplaH 'e' vItulqu'. Qapla'!

SuwISya'Daq Qu' chu' vIgheS vIneHpu' 'e' boqaw'a'? toH... qen QIn mungeH 'a'ghen, jatlh; Qu' chu' muSughbe'. Do'Ha' Qu'vamvaD latlh Hen law' jIH Hen puS. muQuchqa'moHmeH muchup bangwI', jatlh: «naDev HoltejvaD QIn yIqon 'ej 'eb yItlhob! chaq SoHvaD DuH ghaj.» vaj martIn HaSpelmatlhvaD jIghItlh 'ej SIbI' jang. cha'Hu' maghom 'ej maja'chuq. HolQeD yejHaD vumtaH martIn, 'a jInmol chu' ghajbe'. Qu' chu' munoblaHbe', 'ach jIHvaD qabDu' law' chuppu'. latlh Holtejpu' chaH. chaq chaHvaD vIrI'chugh, nItebHa' jInmol chu' wIcherlaH. pagh tejpu'vaD Huch lughaqbogh Qurmey'e' pongmey muja'pu', vaj 'opleS ngo'chang Hol vIQul ghIq pabDaj vIqon vIneHchugh, chaq Huch munoblaH...

vengHomwIjDaq jor chal